Нәјә ҝөрә ‘Мәсиһи’ изләмәлијик?
«Ким ардымҹа ҝәлмәк истәјирсә, гој өзүнү инкар етсин вә... Мәни изләсин» (ЛУКА 9:23).
1, 2. ‘Мәсиһи’ изләмәли олдуғумузу нәзәрдән кечирмәк нәјә ҝөрә ваҹибдир?
ЈЕҺОВА сизи — мараглананлары вә ҝәнҹләри Она хидмәт едән издиһамын арасында ҝөрәндә неҹә дә фәрәһләнир! Әҝәр Мүгәддәс Китабы өјрәнир, мүнтәзәм олараг мәсиһчи ҝөрүшләриндә иштирак едир вә Аллаһын Кәламындакы хиласедиҹи һәгигәтдә тәрәгги едирсәнсә, онда сән Исанын бу дәвәтинин үзәриндә ҹидди дүшүнмәлисән: «Ким ардымҹа ҝәлмәк истәјирсә, гој өзүнү инкар етсин вә чармыхыны [«ишҝәнҹә дирәјини», ЈД] ҝөтүрүб Мәни изләсин» (Лука 9:23). Исанын сөзләри ҝөстәрир ки, өзүнү инкар етмәк вә онун давамчысы олмаг сәнин үчүн арзуолунан бир шеј олмалыдыр. Буна ҝөрә дә ‘Мәсиһи’ нәјә ҝөрә изләмәли олдуғумузу нәзәрдән кечирмәк ваҹибдир (Мат. 6:13-16).
2 Артыг Иса Мәсиһин изләри илә ҝедән бизләр һагда нә демәк олар? Биз ‘даһа чох тәрәгги етмәјә’ тәшвиг олунуруг (1 Салон. 4:1, 2). Һәгигәтдә јени вә ја узун илләр олмағымыздан асылы олмајараг, Мәсиһи изләмәјин сәбәбләри үзәриндә дүшүнмәк бизә көмәк едәҹәк ки, Павелин нәсиһәтини тәтбиг едәрәк ҝүндәлик һәјатымызда Исаны даһа јахшы изләјәк. Беләликлә, ҝәлин ҝөрәк, Мәсиһи изләмәји нәјә ҝөрә арзуламалыјыг вә бунун беш сәбәбини арашдыраг.
Јеһова илә мүнасибәтләрини мөһкәмләндир
3. Јеһованы һансы ики үсулла таныја биләрик?
3 Һәвари Павел «Ареопагын ортасында дуруб» афиналылара мүраҹиәт едәрәк демишди: «[Аллаһ] онларын габагҹадан мүәјјән едилмиш вахтларыны вә јашадыглары јерләрин сәрһәдләрини тәјин етди ки, Аллаһы ахтарсынлар вә бәлкә әл илә јохлаја-јохлаја тапсынлар. Амма бунунла бәрабәр, О һеч биримиздән узаг дејил» (Һәв. иш. 17:22, 26, 27). Биз Аллаһы ахтара вә Ону һәгигәтән дә таныја биләрик. Мәсәлән, Аллаһын јаратдыгларындан Онун кејфијјәтләри вә нәјә гадир олмасы һагда өјрәнирик. Онун әл ишләри үзәриндә миннәтдарлыгла дүшүнмәк Јарадан һаггында бизә чох шеј өјрәдә биләр (Ром. 1:20). Үстәлик, Јеһова Кәламында, Мүгәддәс Китабда Өзү һаггында бизә ҝениш мәлумат верир (2 Тим. 3:16, 17). Онун ‘ишләрини дәриндән дүшүнмәклә’ вә ‘әмәлләри барәдә хәјала далмагла’ биз Јеһованы даһа јахшы таныја биләрик (Мәз. 77:12).
4. Мәсиһи изләмәк Јеһова илә мүнасибәтләримизи даһа да мөһкәмләндирмәкдә бизә неҹә көмәк едә биләр?
4 Јеһованы даһа јахындан танымағын ән јахшы үсулу Мәсиһи изләмәкдир. «Дүнја јаранмаздан әввәл» Атасынын јанында оларкән Исанын һансы иззәтә малик олдуғунун үзәриндә бир дүшүн! (Јәһ. 17:5). О, «Аллаһын хилгәтинин башланғыҹы»дыр (Вәһј 3:14, КМ). О, «хилгәтин фөвгүндә дуран, илк доғулан Оғул» кими милјард илләр әрзиндә Атасы Јеһова илә бирҝә ҝөјдә јашамышдыр. Јер үзүнә ҝәлмәздән өнҹә Иса Атасынын јанында садәҹә вахт кечирмирди. О, Күлли-Ихтијар Аллаһла јахын әмәкдашлыг едәрәк Онунла бирҝә ишләмәкдән мәмнунлуг дујурду вә бунун сајәсиндә онларын арасында индијә кими һеч кимин малик олмадығы мөһкәм мәһәббәт телләри јаранды. Иса Атасынын һиссләринә вә кејфијјәтләринә диггәт јетирәрәк Онун етдикләрини садәҹә мүшаһидә етмирди, ејни заманда Атасы һаггында өјрәндикләринин һамысыны ҹанына һопдурур вә мәнимсәјирди. Нәтиҹәдә итаәткар Оғул Атасына о гәдәр охшады ки, Мүгәддәс Китабда «ҝөрүнмәјән Аллаһын сурәти» адландырылды (Колос. 1:15). Мәсиһи там шәкилдә изләмәклә Јеһова илә мүнасибәтләримизи даһа да мөһкәмләндирә биләрик.
Јеһованы даһа јахшы тәглид един
5. Јеһованы даһа јахшы тәглид етмәкдә бизә нә көмәк едә биләр вә нәјә ҝөрә?
5 Аллаһын ‘сурәтинә вә бәнзәринә ҝөрә јарадылдығымыз’ үчүн биз Онун кејфијјәтләрини тәзаһүр етдирмәк габилијјәтинә маликик (Јар. 1:26). Һәвари Павел мәсиһчиләрә ‘севимли өвладлар кими, Аллаһы тәглид етмәји’ нәсиһәт едирди (Ефес. 5:1). Мәсиһи изләмәк сәмави Атамызы тәглид етмәкдә бизә көмәк едир. Чүнки О, Јеһованын дүшүнҹәсини, һиссләрини вә шәхсијјәтини даһа јахшы әкс етдирирди вә Аллаһ һаггында онун гәдәр даһа ајдын өјрәдән икинҹи бир шәхс олмамышдыр. Иса јер үзүндә оланда Јеһованын адыны танытмагла кифајәтләнмирди. Әксинә, о, бу ады дашыјанын шәхсијјәтини ачыглады. (Матта 11:27 ајәсини оху.) Иса буну сөзләри вә әмәлләри илә, еләҹә дә тәлимләри вә өз нүмунәси илә етди.
6. Исанын тәлимләри Јеһова һаггында бизә нә өјрәдир?
6 Иса Аллаһын биздән нә тәләб етдијини вә Өз хидмәтчиләринә неҹә мүнасибәт бәсләдијини өјрәдирди (Мат. 22:36-40; Лука 12:6, 7; 15:4-7). Мәсәлән, Иса Он әмрдән бирини — «зина етмә» әмрини ситат ҝәтирдикдән сонра бу әмәлдән өнҹә инсанын үрәјиндә баш верәнләрә даир Аллаһын нөгтеји-нәзәрини изаһ етди. О деди: «Бир гадына шәһвәтлә бахан һәр адам, артыг үрәјиндә онунла зина етмиш олур» (Чых. 20:14; Мат. 5:27, 28). Ганунда јазылан, лакин фәрисејләр тәрәфиндән тәһриф олунан әмри — «өз гоншуну сев вә өз дүшмәнинә нифрәт ет» әмрини ситат ҝәтирдикдән сонра Иса бунунла әлагәдар Јеһованын нә дүшүндүјүнү ачыглајараг деди: «Дүшмәнләринизи севин, сизә ләнәт охујанлара хејир-дуа верин» (Мат. 5:43, 44; Чых. 23:4; Лев. 19:18). Аллаһын дүшүнҹә тәрзини, һиссләрини вә биздән нә тәләб етдијини баша дүшмәк Ону даһа јахшы тәглид етмәкдә бизә көмәк едәҹәк.
7, 8. Исанын нүмунәсиндән Јеһова һаггында нә өјрәнирик?
7 Иса һәмчинин Атасынын неҹә Шәхсијјәт олдуғуну өз нүмунәси илә дә ҝөстәрди. Исанын еһтијаҹы оланлара неҹә рәһми ҝәлдији, әзаб-әзијјәт чәкәнләрә шәфгәт ҝөстәрдији, ушаглары мәзәммәт едән шаҝирдләринә гәзәбләнмәси һагда Мүждәләрдә охујанда Атанын да ејни һиссләри кечирдијини ҝөрмүрүкмү? (Марк 1:40-42; 10:13, 14; Јәһ. 11:32-35). Исанын ҝөрдүјү ишләрин Аллаһын әсас хүсусијјәтләринә неҹә ајдынлыг ҝәтирмәси һагда дүшүнүн. Мәҝәр Мәсиһин ҝөстәрдији мөҹүзәләр она бөјүк гүввә верилдијини ҝөстәрмирми? Лакин о, бу гүввәдән һеч вахт шәхси мәнфәәти вә ја башгаларына зәрәр вурмаг мәгсәдилә истифадә етмирди (Лука 4:1-4). Аҹҝөз таҹирләри мәбәддән говмасы онун әдаләт һиссинә малик олдуғуну неҹә дә ајдын ҝөстәрир! (Марк 11:15-17; Јәһ. 2:13-16). Онун тәлимләри вә инсанларын үрәјинә јол тапмаг үчүн истифадә етдији ләтиф кәламлар ҝөстәрирди ки, о, мүдрикликдә ‘Сүлејмандан даһа бөјүкдүр’ (Мат. 12:42). Мүгәддәс Китаб: «Бир нәфәрин достлары уғрунда ҹаныны вермәсиндән даһа бөјүк мәһәббәт јохдур»,— дејәндә Исанын башгалары уғрунда ҹанындан кечәрәк ҝөстәрдији мәһәббәти неҹә дә ҝөзәл тәсвир едир! (Јәһ. 15:13).
8 Аллаһын Оғлу Јеһованы сөздә вә әмәлдә о гәдәр мүкәммәл сурәтдә тәҹәссүм етдирирди ки, нәтиҹәдә дејә билмишди: «Мәни ҝөрән, Атаны ҝөрмүш олур». (Јәһја 14:9-11 ајәләрини оху.) Мәсиһи изләмәк Јеһованы тәглид етмәк демәкдир.
Иса Јеһованын Мәсиһидир
9. Иса нә вахт вә неҹә Аллаһын Мәсиһи олду?
9 Ҝәлин ҝөрәк, 30 јашлы Иса ерамызын 29-ҹу илинин пајызында Вәфтизчи Јәһјанын јанына ҝәләндә нә баш верди. «Иса вәфтиз олунуб, о анда судан чыхды; вә будур, ҝөјләр ачылды вә Аллаһын Руһунун ҝөјәрчин кими ениб Өз үзәринә ҝәлдијини ҝөрдү». Һәмин ан о, Мәсиһ олду. О заман Јеһованын Өзү Исанын Онун Мәсиһи олдуғуну билдирәрәк деди: «Бу Мәним севимли Оғлумдур, Ондан чох мәмнунам» (Мат. 3:13-17). Бу, Мәсиһи изләмәк истәјимизин олмасы үчүн неҹә дә ҝөзәл әсасдыр!
10, 11. а) Иса илә әлагәдар «Мәсиһ» титулу неҹә истифадә олунур? б) Нәјә ҝөрә биз Мәсиһин ардынҹа ҝетмәлијик?
10 Мүгәддәс Китабда «Мәсиһ» титулу Иса илә әлагәдар мүхтәлиф ҹүр истифадә олунур: Иса Мәсиһ, Мәсиһ Иса вә Мәсиһ. Аддан сонра титулун ишләндији «Иса Мәсиһ» ифадәсини илк дәфә Исанын өзү истифадә етмишдир. О, Атасына дуа едәрәк демишди: «Әбәди һәјат о демәкдир ки, Сәни, ваһид һәгиги Аллаһы вә ҝөндәрдијин Иса Мәсиһи танысынлар» (Јәһ. 17:3). Бу ифадә диггәти ајдын шәкилдә Аллаһ тәрәфиндән ҝөндәрилән вә Онун мәсһ едилмиши олан кәсә јөнәлдир. Титул аддан әввәл ҝәләндә, јәни «Мәсиһ Иса» кими ишләнәндә вурғу шәхсин өзүнә јох, мөвгејинә вә ја вәзифәсинә дүшүр (2 Кор. 4:5). Амма «Мәсиһ» титулунун ајрыҹа ишләнмәси Исанын Мәсиһ олдуғуну вурғуламағын диҝәр үсулудур (Јәһ. 7:31).
11 «Мәсиһ» титулунун Иса илә әлагәдар неҹә истифадә олунмасындан асылы олмајараг, бу титул ваҹиб бир һәгигәти вурғулајыр: Аллаһын Оғлу јер үзүнә инсан кими ҝәлиб Атасынын ирадәсини бәјан етсә дә, о нә ади инсан, нә дә ки садәҹә пејғәмбәр иди; о, Јеһованын мәсһ олунмушу иди. Буна ҝөрә дә биз Мәсиһин ардынҹа ҝетдијимизә әмин олмалыјыг.
Иса јеҝанә хилас јолудур
12. Томаја дејилән һансы сөзләр бизим үчүн дә әһәмијјәт кәсб едир?
12 Даима Мәсиһин ардынҹа ҝетмәли олдуғумузун диҝәр ваҹиб сәбәбини өлүмүндән бир нечә саат әввәл Исанын садиг һәвариләринә дедији сөзләрдән ҝөрмәк олар. Исанын ҝедиб онлара јер һазырлајаҹағы һагда дедији сөзләрә даир Томанын суалына о, белә ҹаваб верди: «Јол, һәгигәт вә һәјат Мәнәм; Мәним васитәчилијим олмаса, Атанын јанына һеч ким ҝәлә билмәз» (Јәһ. 14:1-6). Һәмин вахт Иса 11 садиг һәвариси илә сөһбәт едирди. О, онлара ҝөјдә јер һазырлајаҹағыны вәд етди, лакин онун сөзләри јер үзүндә әбәди јашамаға үмид едәнләр үчүн дә әһәмијјәт кәсб едир (Вәһј 7:9, 10; 21:1-4). Нә үчүн?
13. Иса һансы мәнада «јол»дур?
13 Иса Мәсиһ «јол»дур. Бу о демәкдир ки, Аллаһа јалныз онун васитәсилә јахынлаша биләрик. Ејни шеји дуаја да аид етмәк олар, чүнки јалныз Иса Мәсиһин ады илә дуа етдијимиз тәгдирдә әмин ола биләрик ки, Атанын ирадәсинә ујғун нә истәсәк, бизә верәҹәкдир (Јәһ. 15:16). Лакин Иса башга мәнада да «јол»дур. Ҝүнаһ бәшәријјәти Аллаһдан узаглашдырыб (Јешаја 59:2). Анҹаг Иса ‘бир чохлары үчүн ҹаныны фидијә олараг верди’ (Мат. 20:28). Буна ҝөрә дә, Мүгәддәс Китабда дејилдији кими, «Иса Мәсиһин ганы бизи һәр ҝүнаһдан тәмизләјир» (1 Јәһ. 1:7). Беләликлә, Оғул Аллаһла барышмаг үчүн јол ачды (Ром. 5:8-10). Исаја иман ҝәтирмәклә вә она табе олмагла Аллаһла јахын мүнасибәт гура биләрик (Јәһ. 3:36).
14. Иса һансы мәнада «һәгигәт»дир?
14 Иса јалныз һәмишә һәгигәти данышыб она ујғун јашадығы үчүн дејил, һәм дә Мәсиһлә бағлы бүтүн пејғәмбәрликләрин онун үзәриндә јеринә јетдији үчүн «һәгигәт»дир. «Аллаһ нә гәдәр вәд етмишсә, һамысы Мәсиһдә “бәли”дир»,— дејә һәвари Павел јазмышдыр (2 Кор. 1:20). Мусанын Ганунун малик олдуғу ‘ҝәләҹәк немәтләрин көлҝәси’ Мәсиһ Исада ҝерчәкләшди (Ибр. 10:1; Колос. 2:17). Иса бүтүн пејғәмбәрликләрин әсас мөвзусудур вә онлар Аллаһын ирадәсинин јеринә јетмәсиндә онун ојнадығы ваҹиб ролу баша дүшмәјимизә көмәк едир (Вәһј 19:10). Аллаһын бизим үчүн олан нијјәтләринин јеринә јетмәсиндән фајда әлдә етмәк үчүн биз Мәсиһи изләмәлијик.
15. Һансы мәнада Иса «һәјат»дыр?
15 Иса бәшәријјәти өз ганы илә сатын алыб, буна ҝөрә дә о «һәјат»дыр; әбәди һәјат исә Аллаһын ‘Мәсиһ Иса’ васитәсилә вердији әнамдыр (Ром. 6:23). Иса һәмчинин өләнләр үчүн дә «һәјат»дыр (Јәһ. 5:28). Үстәлик, Миниллик Һөкмранлыг заманы Баш Каһин кими онун нәләр едәҹәји барәдә дүшүн. О, тәбәәләрини ҝүнаһын вә өлүмүн пәнҹәсиндән әбәдијјән хилас едәҹәк (Ибр. 9:11, 12, 28).
16. Исаны изләмәк үчүн һансы сәбәбләримиз вар?
16 Буна ҝөрә дә Исанын Томаја вердији ҹаваб бизим үчүн бөјүк мәна кәсб едир. Иса јол, һәгигәт вә һәјатдыр. О, Аллаһ тәрәфиндән дүнјаја ҝөндәрилмиш јеҝанә шәхсдир ки, дүнја онун васитәсилә хилас олуна биләр (Јәһ. 3:17). Атаја јахынлашмағымыз үчүн Иса јеҝанә васитәдир. Мүгәддәс Китабда ајдын дејилир: «Башга һеч кимдә хилас јохдур; чүнки сәма алтында инсанлара верилмиш башга бир ад јохдур ки, онунла хилас ола биләк» (Һәв. иш. 4:12). Буна ҝөрә дә әввәлләр нәјә етигад етмәјимиздән асылы олмајараг, Исаја иман ҝәтирмәк, ону изләмәк мүдрик һәрәкәтдир вә бу, әбәди һәјата апарыр (Јәһ. 20:31).
Биз Мәсиһә гулаг асмаг әмрини алмышыг
17. Аллаһын Оғлуна гулаг асмаг ҝөстәришинә әмәл етмәк нә үчүн ваҹибдир?
17 Петер, Јәһја вә Јагуб Исанын ҝөркәминин дәјишилмәсинин шаһиди олдулар. Һәмин вахт онлар ҝөјдән: «Бу Мәним севимли Оғлумдур, Она гулаг асын!» — дејән бир сәс ешитдиләр (Лука 9:28, 29, 35). Мәсиһә гулаг асмаг ҝөстәришинә әмәл етмәк бизим үчүн олдугҹа ваҹибдир. (Һәвариләрин ишләри 3:22, 23 ајәләрини оху.)
18. Иса Мәсиһә неҹә гулаг аса биләрик?
18 Исаја гулаг асмаг өзүнә она диггәтлә ‘бахмағы’ вә нүмунәси үзәриндә ҹидди ‘фикирләшмәји’ дахил едир (Ибр. 12:2, 3). Буна ујғун олараг, биз онун һаггында Мүгәддәс Китабдан, «садиг вә ағыллы гул»ун нәшрләриндән охудугларымыза, еләҹә дә мәсиһчи ҝөрүшләриндә онун һаггында ешитдикләримизә ‘даһа чох диггәт’ јетирмәлијик (Ибр. 2:1; Мат. 24:45). Ҝәлин Чобанымыз Исаја һәвәслә гулаг асаг вә ону изләјәк (Јәһ. 10:27).
19. Мәсиһи даима изләмәкдә бизә нә көмәк едәҹәк?
19 Чәтинликләрә бахмајараг, Мәсиһи даима изләмәк мүмкүндүрмү? Бәли, мүмкүндүр, бунун үчүн өјрәндикләримизи «иманла вә Мәсиһ Исада олан мәһәббәтлә» әмәлдә тәтбиг едәрәк «сәһиһ сөзләри... һифз ет»мәлијик (2 Тим. 1:13).
Сиз нә өјрәндиниз?
• Нәјә ҝөрә Мәсиһи изләмәк бизи Јеһоваја даһа да јахынлашдырыр?
• Нәјә ҝөрә Исаны тәглид етмәк Јеһованы тәглид етмәк демәкдир?
• Һансы мәнада Иса «јол, һәгигәт вә һәјат»дыр?
• Нәјә ҝөрә Јеһованын Мәсиһинә гулаг асмалыјыг?
[29-ҹу сәһифәдәки шәкил]
Исанын тәлимләри Јеһованын јүксәк дүшүнҹәсини әкс етдирирди
[30-ҹу сәһифәдәки шәкил]
Биз Јеһованын Мәсиһини сәдагәтлә изләмәлијик
[32-ҹи сәһифәдәки шәкил]
Јеһова бәјан едиб: «Бу Мәним севимли Оғлумдур, Она гулаг асын!»