Гејри-фәаллара көмәк
1 Исанын данышдығы мәсәлләрдән бириндә чобан 99 баш гојундан ибарәт сүрүнү гојуб, итмиш бир гојуну ахтармаға ҝедир. Исанын сөзләринә ҝөрә, чобан ону тапан заман нә баш верәҹәјини хатырлајырсанмы? “Вә әҝәр ону тапа билсә, сизә доғрусуну дејирәм: Јолуну азмајан дохсан доггузу үчүн севиндијиндән артыг онун үчүн севинәр” (Мат. 18:13). Гејри-фәал тәблиғчиләр Аллаһын сүрүсүнә гајыданда, јығынҹагларын чоху бу ҹүр севинҹ дујмушдур.
2 Сон бир нечә ил әрзиндә, гејри-фәаллара көмәк ҝөстәрмәјин ваҹиблијинә хүсуси диггәт јетирилмишдир. Нәзарәтчиләрин вәзифәләриндән бири — бүтүн сүрүјә диггәт јетирмәкдир (Һәв. иш. 20:28). Буна ҝөрә дә онлар тәшәббүс ҝөстәрәрәк, гејри-фәал оланларын һамысына баш чәкирдиләр. Бир чохлары ағсаггалларын ҝөстәрдикләри гајғыја һај вердиләр вә јенидән Падшаһлығын фәал тәблиғчиләри олдулар. Сизин јығынҹагда бу јахын илләр әрзиндә гејри-фәал оланлар вармы? Онлара көмәк ҝөстәрмәк үчүн нә етмәк олар?
3 Нә етмәк олар? Гејри-фәал тәблиғчиләрә көмәк үчүн сәрф едилән сә’јләр, әсас е’тибары илә хидмәти нәзарәтчи вә катиб тәрәфиндән тәшкил едилир. Гејри-фәал адама илк башчәкмәни ағсаггаллар етмәлидирләр. Бә’зән гејри-фәал тәблиғчи илә Мүгәддәс Китабы өјрәнмәк зәрурәти доғур. Белә һалда хидмәти нәзарәтчи јығынҹағын хидмәти комитәсинин диҝәр үзвләри илә мәсләһәтләшиб, һәмин адамла өјрәнмә кечирмәји кимә тапшыраҹағыны гәрарлашдыраҹаг. (“Бизим Падшаһлыг Хидмәтимиз”ин 1998-ҹи ил, нојабр сајына, “Суаллар гутусу”на бах, рус.) Чох еһтимал ки, гејри-фәал адамла илк дәфә Мүгәддәс Китаб өјрәнмәси кечирән вә ја онун јахшы таныдығы вә һөрмәт етдији кәс ән јахшы намизәд олаҹагдыр. Әҝәр бүтүн аиләјә көмәк етмәк лазым ҝәләрсә, өјрәнмә кечирмәји ағсаггалдан вә ја баҹарыглы хидмәти көмәкчидән хаһиш етмәк олар. Гејри-фәал баҹыја даһа тәҹрүбәли баҹы көмәк едә биләр. Ҝәнҹ адам, ҝәнҹ хидмәти көмәкчинин вә ја мәһарәтли пионерин сә’јләринә даһа тез һај верәр. Хидмәти нәзарәтчи кечиләҹәк мөвзу вә ја нәшрләри мәсләһәт ҝөрә биләр. Мәгсәд — лазыми көмәји ҝөстәрмәкдир. Хидмәти нәзарәтчи көмәк ҝөстәрмәк үчүн, бу ишин өһдәсиндән јахшы ҝәлә билән адамы сечәҹәкдир.
4 Бә’зи ағсаггаллар диггәт јетирмишләр ки, биринҹи башчәкмә заманы, “Ҝөзәтчи Гүлләси”нин 2000-ҹи ил, 15 декабр (рус.) сајында олан “Сән Аллаһа нәјә ҝөрә хидмәт едирсән?” вә ја 1992-ҹи ил, 1 август (рус.) сајында “Мәнә тәрәф дөнүн, Мән дә сизә тәрәф дөнәрәм” адлы мәгаләләри мүзакирә етмәк фајдалыдыр. Јеһованын мәрһәмәтинә нәзәр салмаг вә Она тәрәф дөнәнләр һаггында руһландырыҹы һадисәләр данышмаг олар. Сонра исә, Мүгәддәс Китабы мүнтәзәм өјрәнмәк һаггында данышмаг олар.
5 Бу ҹүр адамларла өјрәнмә кечирмәк е’тибар олунан тәблиғчиләр, онлара сәмими мараг ҝөстәрмәлидирләр. Онларла достлашын. Диггәтләрини јенидән руһани гүввә әлдә етмәләринин нә гәдәр ваҹиб олдуғуна јөнәлдин. Көмәк един ки, Јеһованын өз тәшкилаты васитәсилә јардым тәгдим едәрәк, онлара мәһәббәт вә гајғы ҝөстәрдијини анласынлар.
6 Гејри-фәаллара көмәк етмәк үчүн мүәјјән тәблиғчиләри ајырсалар да, бу о демәк дејил ки, башгалары һеч нә едә билмәз. Онлар Падшаһлыг Залына ҝәләндә һәр бир кәс онлары саламлаја вә онларла сөһбәт едәрәк руһән мөһкәмләдә биләрләр. Гој баша дүшсүнләр ки, биз онлары арамызда ҝөрмәјә чох шадыг вә үмид едирик ки, онлар наилијјәтләр едәҹәкләр. Онлар руһән бөјүдүкҹә, биз онлара гајғы вә диггәтлә јанашмаға давам етмәлијик. Һәр кәс әлиндән ҝәләни едәрсә, јахшы сәмәрәләр ҝөрәрик (Ефес. 4:16).
7 Гејри-фәал тәблиғчиләр Јеһоваја јенидән хидмәт етмәјә башлајанда биз чох шад олуруг. Онлара шәхсән көмәк ҝөстәрәнләр хүсуси севинҹ дујурлар. Дуа едирик ки, Јеһова, гејри-фәаллара, хүсусән дә “иманлылар аиләсинә јахшылыг” етмәк ҹәһдимизә бол-бол хејир-дуалар версин (Галат. 6:10).