Аилә башчылары, јахшы руһани графикә риајәт един

¹ Даниел онилликләр әрзиндә бүтпәрәст вә азғын Бабил халгы арасында јашамыш олса да, онун һаггында “дурмадан” Јеһоваја гуллуг едән шәхс кими данышылырды (Дан. 6:16, 20). Руһанилијини горујуб сахламаг она неҹә мүјәссәр олурду? Мүгәддәс Китабдан ҝөрүнүр ки, Аллаһа ибадәтиндә Даниел јахшы графикә риајәт едирди. Мисал үчүн, о, өз отағында ҝүндә үч дәфә дуа едирди (Дан. 6:10). Шүбһәсиз ки, Даниел руһани фәалијјәтин башга саһәләриндә дә, мәсәлән, Гануну охумагда да сабит иди. Буна ҝөрә дә онун башы үзәриндә тәһлүкә јаранан заман белә, Даниел сарсылмаз олараг Јеһоваја садиг галды вә нәтиҹәдә мө’ҹүзәли тәрздә азад олунду (Дан. 6:4-22).

² Бу ҝүн ‘ајыг олмаг’ үчүн биз дә сә’ј ҝөстәрмәлијик (Ефес. 6:18). Јашадығымыз дүнја “шәририн һакимијјәти алтындадыр” (1 Јәһ. 5:19). Иманымыз ҝөзләнилмәдән баш галдыран чәтинликләр вә ја гаршыдурмаларла сынаға чәкилә биләр. Бөјүк мәшәггәтдә Аллаһын хидмәтчиләри Магог дијарындан олан Гогун һәртәрәфли һүҹумуна мә’руз галаҹаглары заман, елә ҝәләҹәк ки, хилас олмаг үчүн һеч бир имкан јохдур. Онлардан бүтүнлүклә Јеһоваја бел бағламаг тәләб олунаҹагдыр (Һез. 38:14-16).

³ “Наилијјәт әлдә етмәјин ачарларындан бири — Мүгәддәс Китабын ҝүндәлик охунмасыны, онун өјрәнилмәсини вә мүзакирәсини аиләнизин вәрдиши етмәкдир”. Бу ҹүр сөзләр, 1998-ҹи илдә кечирилән “Аиләләр, Мүгәддәс Китабын ҝүндәлик охунмасыны һәјатынызда вәрдишә чевирин!” адлы вилајәт конгресиндә ҝөстәрилән драманы тәгдим едәркән сәсләнмишдир. Сонра дејилирди: “Аиләләр мүнтәзәм олараг мәшғул оланда вә Мүгәддәс Китабы “ҹанландырмаға” чалышанда, Мүгәддәс Китабын график үзрә өјрәнилмәси аиләјә бөјүк фајда ҝәтирә биләр. Бу, билијимизи артырыр. Иманымызы мөһкәмләдир. Һәгигәти мүдафиә етмәк үчүн бизи руһландыра биләҹәк адамларын — гәдимдә јашајан киши вә гадынларын нүмунәләрини ҝөзләримиз өнүндә сахламаға көмәк едир”. Јахшы руһани ишләрә даир графикин мүхтәлиф саһәләрини нәзәрдән кечирдикдән сонра, аилә башчылары өз аиләләринин руһани програмыны јахшылашдыраҹаг бир-ики саһәни өзләри үчүн гејд едә биләрләр.

⁴ Аллаһын Кәламыны ҝүндәлик олараг тәдгиг един. “Аллаһын Падшаһлығынын рәһбәрлијинә һеч бир кәсин мүгавимәт ҝөстәрмәјәҹәји вә Аллаһын ирадәсинин ҝөјдә олдуғу кими јердә дә јеринә јетәҹәји заман нә салеһ олмајанлар, нә дә ки, һејванлар “зәрәр вермәјәҹәкләр вә һәлак етмәјәҹәкләр” (Иш. 11:9; Мат. 6:9, 10, И-93)”. Бу сөзләр 2001-ҹи ил үчүн олан “Мүгәддәс Јазылары ҝүндәлик арашдырмаг” брошүрасында (рус.), сентјабрын 11-ә верилән Мүгәддәс Китаб ајәси үчүн шәрһдә јазылмышдыр. Бу зәманәт неҹә дә тәсәлливериҹи олмушдур! Аилә башчылары, аиләнизлә ҝүндәлик олараг Мүгәддәс Китаб ајәсини вә бу ајә үчүн верилән шәрһи тәдгиг едирсинизми? Бу, олдугҹа фајдалыдыр. Әҝәр ајәни аилә илә бирликдә сәһәр-сәһәр мүзакирә етмәк раһат дејилсә, еһтимал ки, буну ҝүнорта едә биләрсиниз. Бир ата демишдир: “Аиләмизлә Мүгәддәс Китаб ајәсини мүзакирә етмәк үчүн ән јахшы имкан шам јемәји вахты иди”.

⁵ Аиләнизин ҝүндәлик ајәни һәр ҝүн мүзакирә етмәк үчүн јахшы графики варса, бу тә’рифәлајигдир. Бәлкә бундан әлавә Мүгәддәс Китабын бир һиссәсини дә охујасыныз? Бә’зиләри нәзәрдән кечирилән ајә һансы фәсилдән ҝөтүрүлүбсә, һәмин фәсли дә охујурлар. Башгалары Мүгәддәс Китабы ардыҹыл олараг, фәсил-фәсил охујурлар. Мүгәддәс Китабын ҝүндәлик охунмасы аиләнизин үзвләринә Јеһованы разы салмамаг кими фајдалы горху һисси јетишдирмәјә көмәк едәҹәк вә Онун ирадәсини јеринә јетирмәк истәјини дә ҝүҹләндирәҹәк (Тәс. 17:18-20).

⁶ Охудуғунузун практики дәјәрини мүзакирә етмәк үчүн бир нечә дәгигә вахт ајырсаныз, Мүгәддәс Китабын ҝүндәлик охунмасы програмы вә ҝүндәлик ајәни тәдгиг етмәк аиләнизә даһа бөјүк фајда ҝәтирәр. “Хидмәт Мәктәби” китабынын (рус.) 60-ҹы сәһифәсиндә дејилир: “Мүгәддәс Китабын үзүмүзә ҝәлән һәфтәдә охумаг үчүн ајрылмыш һиссәсиндән бир нечә ајәни сечиб, мә’насыны мүзакирә етмәк вә сонра тәхминән белә суаллар вермәк олар: “Бу ајәләрдә өзүмүз үчүн һансы рәһбәрлији ҝөрә биләрик? Бу ајәләри хидмәтдә неҹә тәтбиг етмәк олар? Јеһова вә Онун һәрәкәт тәрзи һаггында нә өјрәнирик вә бу, Она олан мәһәббәтимизи неҹә артырыр?”. Бу ҹүр руһани мөвзуда апарылан мүзакирәләр аиләнизин бүтүн үзвләринә “Рәббин ирадәсини” гаврамаға көмәк едәҹәк (Ефес. 5:17).

⁷ Аиләви өјрәнмә. Һәр һәфтә ардыҹыл олараг аиләви өјрәнмә кечирмәк — руһани дәјәрләрин һәр шејдән ваҹиб олдуғуну ушагларына ҝөстәрмәк үчүн аилә башчыларынын гаршысында ачылан даһа бир имкандыр. Бир ҝәнҹ хатырлајыр: “Бә’зән атам ишдән евә чох јорғун ҝәлиб јатмаг истәсә дә, аиләви өјрәнмә кечирирди. Бу исә бизә, өјрәнмәнин нә гәдәр ваҹиб олдуғуну баша дүшмәкдә көмәк етди”. Өјрәнмәнин уғурлу кечмәсинә ушаглар да көмәк едә биләр. Доггуз ушагдан ибарәт бир аиләјә башга вахт мүвафиг олмадығы үчүн, аиләви өјрәнмә кечирмәкдән өтрү мүнтәзәм олараг јухудан сәһәр саат бешдә дурурлар.

⁸ Аиләви өјрәнмә арзу олундуғу нәтиҹәләри версин дејә, аилә башчылары даима неҹә өјрәтдикләринә фикир вермәлидирләр (1 Тим. 4:16). “Хидмәт Мәктәби” китабынын (рус.) 32-ҹи сәһифәсиндә дејилир: “Әминликлә демәк олар ки, аиләви өјрәнмә, аиләнин шәхси еһтијаҹларыны өјрәнмәкдән башланыр. Сәнин аиләнин үзвләри руһән бөјүјүрләрми? [...] Ушагларынла тәблиғә чыханда, Јеһованын Шаһидләри олдуглары үчүн онлар һәмјашыдлары гаршысында утанмырлар ки? Мүгәддәс Китабын аилә илә бирликдә охунуб өјрәнилмәси онларын хошуна ҝәлирми? Јеһованын јоллары онларын һәјатынын бир һиссәси олубму? Диггәтлә мүшаһидә етмәк, бир аилә башчысы кими аиләнин бүтүн үзвләриндә руһани кејфијјәтләри мөһкәмләтмәк вә инкишаф етдирмәк үчүн нә етмәк лазым олдуғуну ҝөрмәкдә сәнә көмәк едәҹәк”.

⁹ Јығынҹаг ҝөрүшләри. Јығынҹаг ҝөрүшләринә һазырлыг вә бу ҝөрүшләрдә иштирак етмәк һәфтәлик графикинизин ән ваҹиб һиссәси олмалыдыр (Ибр. 10:24, 25). Еһтимал ки, бә’зән ҝөрүшләрә аиләнизин бүтүн үзвләри илә бирликдә һазырлаша биләрсиниз. Сон анда һазырлашмаг әвәзинә, буну габагҹадан едә биләрсинизми? Јахшы график тутмаг һазырлашманызын кејфијјәтини артыраҹаг вә јығынҹаг ҝөрүшләриндән даһа чох фајда әлдә едәҹәксиниз (Сүл. мәс. 21:5).

¹⁰ Әҝәр ҝөрүшләрә мүнтәзәм олараг вә лазыми тәрздә һазырлашырсынызса, демәк олар ки, сизин һәгигәтән дә јахшы теократик графикиниз вар. Вәзијјәт бүтүн јығынҹаг ҝөрүшләринә һазырлашмағыныза чәтинлик төрәдирсә, онда неҹә? “Хидмәт Мәктәби” дәрслијинин (рус.) 31-ҹи сәһифәсиндә дејилир: “Садәҹә олараг гуш гојмаг үчүн бүтүн материалы тәләсик охумаг вә јахуд һәр шеји өјрәнмәк мүмкүн олмадығындан һеч нәји өјрәнмәмәк бөјүк сәһв оларды. Даһа јахшы оларды ки, нә гәдәр өјрәнә биләҹәјини өзүн үчүн мүәјјән едиб, сонра ону лазыми сәвијјәдә өјрәнәсән. Һәр һәфтә белә давран. Бир гәдәр вахтдан сонра јығынҹағын башга ҝөрүшләринә дә һазырлашмаға чалыш”.

¹¹ Әҝәр аилә ҝөрүшләрә вахтындан әввәл ҝәлирсә, бу, аиләнин бүтүн үзвләриндә Јеһованы иззәтләндирмәк әһвал-руһијјәси јарадыр вә Онун тәгдим етдији руһани тә’лимдән фајда әлдә етмәјә көмәк едир. Аиләнизин бу ҹүр вәрдиши вармы? Бунун үчүн јахшы план гурмаг вә аиләнин һәр бир үзвүндән сә’ј ҝөстәрмәк тәләб олунур. Әҝәр аиләнизин јығынҹаға ҝетмәк үчүн һазырлашаркән һәмишә тәләсдијини вә әсәб кечирдијини ҝөрүрсүнүзсә, графикиниздә нәји исә дәјишә билмәзсинизми? Һансыса ишләри габагҹадан ҝөрмәк мүмкүндүрмү? Әҝәр јығышан заман аилә үзвләриндән ким исә даһа чох иш ҝөрмәли олурса, нәјә ҝөрә башгалары она көмәк етмәсинләр? Нәјә ҝөрә һәр бир кәс, адәтән олдуғундан бир гәдәр тез јығышмасын? Бу ҹүр давранараг артыг нараһатчылыгдан гачынарсыныз. Јахшы график тутмаг һәм аиләдә, һәм дә јығынҹагда сүлһә сәбәб олур (1 Кор. 14:33, 40).

¹² Тәблиғ хидмәти. Тәблиғ хидмәти үчүн мүәјјән вахт ајырмаг, јахшы руһани график гурмағын даһа бир үсулудур. Ҹејсон адлы бир ҝәнҹ хатырлајыр: “Аиләмиздә шәнбә ҝүнүнүн сәһәрләрини һәмишә тәблиғә һәср едирдик. Бу, мәним үчүн чох фајдалы олду: хидмәтдә нә гәдәр чох иштирак едир вә бәһрәләрини ҝөрүрдүмсә, тәблиғ етмәк мәнә бир о гәдәр дә хош ҝәлирди”. Јеһованын Шаһидләри аиләсиндә бөјүјәнләрин әксәријјәти дә гејд едирләр ки, һәр һәфтәнин мүәјјән ҝүнләриндә бүтүн аилә илә бирликдә хидмәт етмәк онларын руһани инкишафына тә’сир ҝөстәрмишдир.

¹³ Һәмчинин јахшы график, аиләмизлә хидмәтдә оларкән севинҹимизи артырмаға вә о ҹүмләдән хидмәтимизи даһа да сәмәрәли етмәјә көмәк едәр. Буна неҹә наил олмаг олар? “Ҝөзәтчи Гүлләси”нин 1999-ҹу ил 1 ијул сајынын 21-ҹи сәһифәсиндә (рус.) нөвбәти фикирләр гејд едилирди: “Аиләви өјрәнмә заманы, һәмин һәфтә тәблиғ хидмәтиндә иштирак етмәк үчүн аилә үзвләринин һазырлашмасына көмәк етмәк мәгсәди илә бә’зән вахт ајырырсынызми? Бу чох фајдалы ола биләр (2 Тим. 2:15). Бу ҹүр һазырлыг, хидмәти мә’налы вә кејфијјәтли етмәјә көмәк едир. Бә’зән һазырлыға, аиләви өјрәнмәнизә ајырдығыныз вахты сәрф етмәк олар. Лакин әксәр һалларда тәблиғ хидмәтинин аспектләрини аиләви өјрәнмәнин сонунда кечирилән гыса мүзакирәләр заманы вә ја һәфтә әрзиндә башга вахт арашдырмаг олар”. Аиләниз бу мәсләһәти тәтбиг едибми?

¹⁴ Инкишаф етмәјә давам един. Бу мәгаләни охудугдан сонра, аилә үзвләринизин һансы саһәдә даһа мүвәффәг олдуғуну ҝөрүрсүнүзмү? Онлары тә’рифләјин вә бундан сонра да инкишаф етмәјә һәвәсләндирин. Әҝәр үзәриндә ишләмәниз лазым олан бир нечә саһә ҝөрүрсүнүзсә, әввәлҹә бир-икисиндән башлајын. Бу саһәдә јахшылашандан сонра нөвбәти бир-ики саһә үзәриндә чалышын. Оптимист вә тәдбирли олун (Филип. 4:4, 5). Бүтүн аилә илә бирликдә јахшы графикә риајәт етмәк үчүн чохлу сә’ј тәләб олунаҹаг, лакин әлдә едилән нәтиҹә буна дәјәр. Ахы Јеһова бизи әмин едир: “Јолуну доғрулдана Аллаһын хиласыны ҝөстәрәрәм” (Мәз. 50:23).