Мәсиһчи аиләләр, «һазыр олун»!

«Һазыр олун, чүнки инсан Оғлу ҝөзләмәдијиниз саатда ҝәләҹәк» (ЛУКА 12:40).

1, 2. Нәјә ҝөрә Исанын «һазыр олун» ҝөстәришинә ҹидди јанашмалыјыг?

ИНСАН ОҒЛУ ҝәлиб инсанлары саф-чүрүк едәндә сәнин вә бүтүн аиләнин агибәти неҹә олаҹаг? (Мат. 25:31, 32). Бу, бизим ҝөзләмәдијимиз саатда баш верәҹәји үчүн чох ваҹибдир ки, Исанын «һазыр олун» ҝөстәришинә ҹидди јанашаг! (Лука 12:40).

² Өтән мәгаләдә мәсиһчи аиләсинин һәр бир үзвүнүн үзәринә дүшән мәсулијјәти виҹданла јеринә јетирмәси бүтүн аиләјә руһән ојаг галмаға неҹә көмәк етдијини мүзакирә етдик. Бәс аиләмизин руһани фираванлығы үчүн даһа нә едә биләрик? Ҝәлин бу суалы арашдыраг.

Ҝөзүнүзү ‘тох’ сахлајын

3, 4. а) Мәсиһчи аиләләр өзләрини нәдән ҝөзләмәлидирләр? б) Ҝөзүмүзү ‘тох’ сахламаг нә демәкдир?

³ Мәсиһин ҝәлишинә һазыр олмаг үчүн аиләләр нәјинсә онлары һәгиги ибадәтдән јајындырмасына јол вермәмәлидирләр. Јајындырыҹы шејләрдән бири вар-дөвләт һәрислијидир вә артыг бир чох аиләләр бу тәләјә дүшүбләр. Буна ҝөрә дә Исанын ҝөзүмүзү ‘тох’ сахламаг барәдә дедикләринә диггәт јетирмәлијик. (Матта 6:22, 23 ајәләрини оху.) Чыраг јолу ишыгландыранда биз јыхылмадан о јолда јеријирик. Еләҹә дә ‘гәлбимизин ҝөзүнүн’ ҝөрдүјү бизи нурландыра, јәни маарифләндирә биләр ки, мүдрик гәрарлар верәк вә ҝүнаһа батмајаг (Ефес. 1:18).

⁴ Ајдын ҝөрмәк үчүн ҝөз ҝәрәк дүзҝүн фәалијјәт ҝөстәрсин вә бахдығы шејә нәзәрини ҹәмләмәји баҹарсын. Буну гәлбимизин ҝөзүнә дә шамил етмәк олар. Әҝәр ҝөзүмүз тохдурса, демәли, диггәтимиз јалныз бир мәгсәддәдир. Биз јол вермирик ки, һәјатымызда әсас јери мадди шејләр, пул вә аиләмизин јалныз физики тәләбатларыны өдәмәк гајғысы тутсун. Бизим ҝөзүмүз руһани мәгсәдләрә јөнәлиб (Мат. 6:33). Ҝөзүмүзү тох сахламаг оланымызла кифајәтләнмәк вә Аллаһа хидмәти һәјатымызда биринҹи јерә гојмаг демәкдир (Ибр. 13:5).

5. Бир јенијетмә гыз ‘ҝөзүнүн’ Аллаһа хидмәтдә олдуғуну неҹә ҝөстәрди?

⁵ Ушагларына ҝөзләрини тох сахламағы өјрәдән валидејнләр бунун ҝөзәл нәтиҹәләрини ҝөрүрләр. Ефиопијада јашајан бир јенијетмә гызын нүмунәсинә нәзәр салаг. О, елә јахшы охујурду ки, орта мәктәби битирдикдән сонра она јүксәк тәгаүд вә тәһсилини давам етдирмәји тәклиф етдиләр. Амма о, Јеһоваја хидмәт етмәк барәдә дүшүндүјү үчүн тәклифи гәбул етмәди. Бундан бир гәдәр сонра гыза ајлыг маашы 4200 АБШ доллары олан иш тәклиф етдиләр. Бу, һәмин өлкәдә олан орта ајлыг мәваҹибдән гат-гат чох иди. Амма гызын ‘ҝөзү’ пионер хидмәтиндә иди. О, валидејнләри илә мәсләһәтләшмәдән һәмин ишдән имтина етди. Онлар бу барәдә хәбәр тутанда гызлары илә бирҝә севиндиләр вә онунла фәхр етдикләрини сөјләдиләр!

6, 7. Иса һансы тәһлүкәјә гаршы хәбәрдарлыг сөјләди?

⁶ Матта 6:22, 23 ајәләриндә Иса, бирбаша олмаса да, тамаһкарлыға гаршы хәбәрдарлыг сөјләмишди. Јеһова аҹҝөзлүјә вә ја тамаһкарлыға неҹә јанашыр? Мүгәддәс Китабда ҹаваб верилир: «Ҹинси әхлагсызлығы, һәр ҹүр натәмизлији вә ја аҹҝөзлүјү дилинизә белә ҝәтирмәјин» (Ефес. 5:3).

⁷ Башгаларында аҹҝөзлүк дәрһал ҝөзә чарпса да, өзүмүздә буну чох вахт ҝөрмүрүк. Буна ҝөрә дә јахшы оларды ки, Исанын нөвбәти мәсләһәтинә әмәл едәк: «Ҝөзләринизи дөрд ачын вә өзүнүзү һәр ҹүр тамаһкарлыгдан горујун» (Лука 12:15). Тамаһкарлығын үрәјимиздә јува салыб-салмадығыны мүәјјән етмәк үчүн өзүмүзү јохламалыјыг. Мәсиһчи аиләләр әјләнҹәләрә, истираһәтә вә алыш-веришә нә гәдәр вахт вә вәсаит сәрф етдикләринә ҹидди фикир вермәлидирләр.

8. Нә исә алмаг истәјәндә Исанын «ҝөзләринизи дөрд ачын» мәсләһәтинә неҹә әмәл едә биләрик?

⁸ Нә исә алмаг истәјәндә анҹаг буна пулумузун чатыб-чатмајаҹағыны јох, нөвбәти амилләри дә нәзәрә алмалыјыг: «Бу әшјаны даима ишләтмәк вә ону гајдада сахламаг үчүн вахтым олаҹаг? Ону дүзҝүн ишләтмәји өјрәнәнә гәдәр нә гәдәр вахтым ҝедәҹәк?» Ҝәнҹләр, рекламлара алданыб валидејнләриниздән баһалы фирма ҝејимләри вә диҝәр әшјалары алмаларыны тәләб етмәјин. Өзүнүзә һаким олмағы өјрәнин. Һәмчинин фикирләшин ки, алмаг истәдијиниз әшја аиләнизә Инсан оғлунун ҝәлишинә һазырлашмаға көмәк едәҹәк, јохса мане олаҹаг. Јеһованын нөвбәти вәдинә етибар един: «Сәни һеч бир вәҹһлә атмарам вә һеч вахт тәрк етмәрәм» (Ибр. 13:5).

Руһани мәгсәдләрә ҹан атын

9. Руһани мәгсәдләрә ҹан атмағын бүтүн аиләјә һансы фајдасы вар?

⁹ Бүтүн аиләмизин иманыны мөһкәмләндирмәјин вә руһани рифаһынын гајғысына галмағын диҝәр үсулу исә руһани мәгсәдләр гојмаг вә онлара ҹан атмагдыр. Белә етмәклә биз аиләликҹә Јеһоваја хидмәтдә һансы наилијјәтләри әлдә етдијимизи ҝөрә вә һәјатда һансы мәшғулијјәтләрин даһа ваҹиб олдуғуну мүәјјән едә биләрик. (Филипилиләрә 1:10 ајәсини оху.)

10, 11. Бир аилә кими, сиз гаршыныза һансы руһани мәгсәдләр гојмусунуз вә һансы мәгсәдләр гојмаг нијјәтиндәсиниз?

¹⁰ Бүтүн аилә үчүн әлчатан олан кичик мәгсәдләр гојмаг да бөјүк хејир-дуалар ҝәтирир. Мәсәлән, бу мәгсәдләрдән бири ҝүндәлик ајәни һәр ҝүн аиләликлә мүзакирә етмәкдир. Аиләнин һәр бир үзвүнүн вердији шәрһләрдән аилә башчысы онларын руһанилијинин нә јердә олдуғуну ҝөрәҹәк. Мүгәддәс Китабы бирликдә охумаг мәгсәди исә ушаглара охумаг габилијјәтләрини јахшылашдырмаға вә Мүгәддәс Китабы даһа јахшы баша дүшмәјә көмәк едәҹәк (Мәз. 1:1, 2). Һәмчинин дуаларымызын кејфијјәтини јахшылашдырмаг барәдә дә дүшүнмәк олар. Гаршымыза гоја биләҹәјимиз диҝәр ҝөзәл мәгсәд исә руһун бәһрәсини тәшкил едән хүсусијјәтләри өзүмүздә даһа чох јетишдирмәкдир (Галат. 5:22, 23). Һәмчинин хидмәтдә гаршылашдығымыз инсанлара шәфгәт ҝөстәрмәјин үсулларыны да ахтара биләрик. Буна аиләликлә ҹан атсаныз, ушагларыныз да шәфгәтли олмағы өјрәнәҹәкләр вә чох јәгин ки, үрәкләриндә даими пионер вә ја миссионер олмаг истәји јаранаҹаг.

¹¹ Нәјә ҝөрә бир аилә кими гаршыныза һансы мәгсәдләр гоја биләҹәјиниз барәдә дүшүнмәјәсиниз? Мәсәлән, даһа чох тәблиғ етмәк мәгсәдини гојмаг олар. Әҝәр саһәдә, күчәдә вә ја ишҝүзар әразидә хидмәт етмәк горхунуз варса, нәјә ҝөрә онун өһдәсиндән ҝәлмәјә чалышмајасыныз? Јахуд да тәблиғчиләрә еһтијаҹ олан әразиләрдә хидмәт етмәк барәдә фикирләшмәк олар. Хош хәбәри әҹнәбиләрлә бөлүшмәк үчүн аиләнизин һеч олмаса бир үзвү хариҹи дил өјрәнә биләрми?

12. Аиләнин руһани ҹәһәтдән инкишаф етмәси үчүн аилә башчысы нә етмәлидир?

¹² Әҝәр сән аилә башчысысанса, аиләнин нәјин үзәриндә ишләмәли олдуғуну мүәјјән ет, сонра да конкрет мәгсәд гој. Бир аилә кими гаршыныза гојдуғунуз мәгсәдләр әлчатан, еләҹә дә шәраит вә баҹарығыныза ујғун олмалыдыр (Сүл. мәс. 13:12). Әлбәттә, јахшы бир мәгсәдә наил олмаг үчүн вахт лазымдыр. Буна ҝөрә дә телевизора аз бахын вә һәмин вахты руһани ишләрә сәрф един (Ефес. 5:15, 16). Аиләнизин гаршысына гојдуғунуз мәгсәдләрә чатмасы үчүн әлиниздән ҝәләни әсирҝәмәјин (Галат. 6:9). Әҝәр аилә руһани мәгсәдләрә ҹан атырса, онларын инкишафы һамыја бәлли олаҹаг (1 Тим. 4:15).

Аиләви ибадәтинизи мүнтәзәм кечирин

13. Һәфтәлик јығынҹаг ҝөрүшләринин ҹәдвәлиндә һансы дәјишиклик едилиб вә биз һансы суалларын үзәриндә дүшүнмәлијик?

¹³ Аиләләрә Инсан оғлунун ҝәлишинә ‘һазыр олмаға’ көмәк етмәк мәгсәдилә 2009-ҹу илин јанварын 1-дән етибарән јығынҹаг ҝөрүшләринин ҹәдвәлиндә мүһүм дәјишиклик едилиб. Артыг бизә һәфтәнин ајры бир ҝүнүндә әввәлләр китабөјрәнмә адланан ҝөрүш үчүн топлашмаг лазым дејил, чүнки бу ҝөрүш Теократик Хидмәт Мәктәби вә Хидмәти ҝөрүшлә бир ҝүндә кечирилир. Бу дәјишиклији етмәкдә мәгсәд одур ки, мәсиһчи аиләләр һәфтәнин бир ҝүнүнү аиләви ибадәтә һәср едәрәк руһаниликләрини мөһкәмләндирсинләр. Бу дәјишиклик гүввәјә минәндән бәри хејли вахт өтүб. Буна ҝөрә дә өзүмүздән сорушмалыјыг: «Аиләви ибадәт вә ја шәхси өјрәнмә үчүн ајрылан бу вахтдан сәмәрәли истифадә едирәмми? Јеһоваја вә доғмаларыма даһа јахын олмаға чалышыраммы?»

14. а) Аиләви ибадәти вә ја шәхси өјрәнмәни мүнтәзәм олараг кечирмәкдә әсас мәгсәд нәдир? б) Нәјә ҝөрә аиләви ибадәт кечирмәк ваҹибдир?

¹⁴ Мүнтәзәм олараг аиләви ибадәт вә ја шәхси өјрәнмә кечирмәкдә әсас мәгсәд Јеһоваја даһа јахын олмагдыр (Јаг. 4:8). Мүгәддәс Китабы арашдырмаг үчүн вахт ајыранда вә Јараданымыз һагда даһа чох өјрәнәндә Онунла мүнасибәтләримиз мөһкәмләнир. Јеһоваја нә гәдәр чох јахынлашсаг, бир о гәдәр дә Ону ‘бүтүн үрәјимизлә, бүтүн ҹанымызла, бүтүн ағлымызла вә вар ҝүҹүмүзлә’ севәҹәјик (Марк 12:30). Шүбһә јохдур ки, биз Аллаһын сөзүнә гулаг асмаг вә Ону тәглид етмәк истәјирик (Ефес. 5:1). Гаршыда бизи «бөјүк мүсибәт» ҝөзләјир вә аиләмизин о ҝүнә руһани ҹәһәтдән ‘һазыр олмасы’ үчүн мүнтәзәм аиләви ибадәт кечирмәлијик (Мат. 24:21). Бәли, бундан бизим хиласымыз асылыдыр!

15. Аиләви ибадәт аилә үзвләринин бир-бирләринә мүнасибәтинә неҹә тәсир ҝөстәрир?

¹⁵ Аиләви ибадәтин диҝәр мәгсәди исә аилә үзвләринә бир-бирләринә даһа јахын олмаға көмәк етмәкдир. Руһани мөвзулары мүзакирә етмәк үчүн аилә үзвләринин һәр һәфтә бирҝә јығышмасы онларын бир-биринә олан мүнасибәтинә бөјүк тәсир ҝөстәрир. Әрлә арвад бирликдә ҝөзәл руһани фикирләр тапанда вә севинҹлә бир-бири илә бөлүшәндә даһа да јахын олурлар. (Ваиз 4:12 ајәсини оху.) Валидејнләрлә ушаглар арасында исә ‘камил бирлик јаратмаға гадир’ олан мәһәббәт телләри лап мөһкәм олур (Колос. 3:14).

16. Үч руһани баҹы Мүгәддәс Китабы өјрәнмәк үчүн ајрылан вахтдан неҹә истифадә едир?

¹⁶ Бир шәһәрдә јашајан үч руһани баҹы Мүгәддәс Китабы өјрәнмәк үчүн ајрылан вахтдан сәмәрәли истифадә едир. Бу јашлы дул һәмиманлыларымыз гоһум дејилләр, амма нечә илләрдир ки, јахшы достдурлар. Онлар бир-бирилә даһа чох үнсијјәт етмәк истәјирдиләр. Лакин ордан-бурдан данышмаг әвәзинә, гәрара ҝәлдиләр ки, руһани мөвзулары мүзакирә етсинләр. Бунун үчүн дә һәфтәнин бир ҝүнүнү ајырыб «Аллаһын Падшаһлығы һаггында ‘әтрафлы шәһадәт верин’» китабынын көмәјилә Мүгәддәс Јазылары арашдырмаға башладылар. Онлардан бири дејир: «Бу, бизим о гәдәр хошумуза ҝәлир ки, адәтән, мүзакирәләримиз бир саатдан чох чәкир. Биз биринҹи әсрдә јашајан гардашларымызын үзләшдији вәзијјәтләри тәсәввүр етмәјә чалышырыг. Һәмчинин фикирләширик ки, онларын јериндә биз олсајдыг неҹә давранардыг. Өјрәндикләримизи баҹардығымыз гәдәр хидмәтдә тәтбиг едирик. Бунун сајәсиндә тәблиғ вә шаҝирд һазырламаг иши бизә даһа чох севинҹ ҝәтирир вә әввәлкиндән даһа сәмәрәлидир». Аиләви ибадәт бу баҹылары нәинки руһани ҹәһәтдән мөһкәмләндирди, һәм дә онлар бир дост кими даһа јахын олдулар. Онларын үчү дә бир ағыздан дејир: «Бизә верилән бу имканы чох гијмәтләндиририк».

17. Аиләви ибадәти сәмәрәли едән нәдир?

¹⁷ Бәс сизин барәниздә нә демәк олар? Аиләви ибадәт вә ја шәхси өјрәнмә үчүн ајырдығыныз вахт сизә һансы фајдалары ҝәтирир? Әҝәр ону һәрдәнбир вә ја нә вахт ҝәлди кечирсәниз, онда јухарыда гејд олунан ики мәгсәдә наил олмајаҹагсыныз. Аиләнин һәр бир үзвү тәјин олунан вахтда аиләви ибадәтә топлашмалыдыр. Ваҹиб олмајан ишләрин сизә мане олмасына јол вермәјин. Үстәлик, аиләви ибадәт заманы арашдырылан материал аиләнин тәләбатларына ујғун олмалыдыр. Онун сәмәрәли вә мараглы кечмәси үчүн даһа нә етмәк олар? Еффектив тәлим үсулларындан истифадә един вә чалышын ки, ибадәтиниз һөрмәтҹил тәрздә вә сакит шәраитдә кечсин (Јаг. 3:18)a.

Ојаг галын вә һазыр олун

18, 19. Инсан оғлунун ҝәлишинин јахын олдуғуну билмәк сизә вә аиләнизә неҹә тәсир едир?

¹⁸ Шејтанын пис дүнјасы 1914-ҹү илдән етибарән өз сон ҝүнләрини јашајыр. Дүнјада вәзијјәтин ҝетдикҹә писләшмәси буна бир сүбутдур. Биз Һар-Маҝедонун астанасындајыг вә тезликлә Инсан оғлу аллаһсызлар үзәриндә Јеһованын һөкмүнү иҹра едәҹәкдир (Мәз. 37:10; Сүл. мәс. 2:21, 22). Мәҝәр буну билмәк аиләнизә тәсир етмәли дејил?

¹⁹ Исанын мәсләһәтинә ујғун олараг, ҝөзүнүзү ‘тох’ сахлајырсынызмы? Бу дүнјадакы инсанларын вар-дөвләтә, шан-шөһрәтә вә һакимијјәтә ҹан атдығы бир вахтда сизин аиләниз руһани мәгсәдләрә наил олмаға чалышырмы? Аиләви ибадәт вә ја шәхси өјрәнмә үчүн ајрылан вахтдан сәмәрәли истифадә едирсинизми? Јеһоваја вә аилә үзвләринизә јахынлашырсынызмы? Әввәлки мәгаләдә мүзакирә етдијимиз кими, Мүгәддәс Китабын аиләдә үзәринизә гојдуғу вәзифәни иҹра едәрәк бүтүн аиләнизә руһән ‘ојаг галмаға’ көмәк едирсинизми? (1 Салон. 5:6). Әҝәр бүтүн бу суаллара мүсбәт ҹаваб вердинизсә, демәли, Инсан оғлу ҝәләндә сиз буна һазыр олаҹагсыныз.

[Һашијә]

Нә өјрәндиниз?

• Мәсиһчи аиләләрә

ҝөзләрини ‘тох’ сахламаг...

руһани мәгсәдләр гојуб онлара ҹан атмаг...

мүнтәзәм олараг аиләви ибадәт кечирмәк...

инсан оғлунун ҝәлишинә һазырлашмаға неҹә көмәк едир?

[13-ҹү сәһифәдәки шәкил]

Ҝөзүмүз ‘тох’ олса, нәјинсә бизи јајындырмасына јол вермәјәҹәјик