Пионер хидмәтинин ҝәтирдији хејир-дуалар
1, 2. Пионер хидмәти һансы хејир-дуалары ҝәтирир вә нәјә ҝөрә?
1 “Мәнә, инсанлара һәгигәти данышмаг имканындан даһа чох мәмнунлуг ҝәтирән һеч бир шеј јохдур” — бу сөзләр пионер бир гардашымыза мәхсусдур. Пионер баҹымыз исә бунлары дејир: “Мән раһат јатырам, һәр ҝүн дә үрәјим севинҹлә долудур”. Бу пионерләрин сөзләриндә, пионер хидмәтинин ҝәтирдији хејир-дуалары дадан бир чох баҹы-гардашларын рә’јләри әкс олунур (Сүл. мәс. 10:22).
2 Инсанлара, онларын һәјатыны хилас едән Мүгәддәс Китаб биликләрини чатдырмагла бөјүк мәмнунлуг һисси дујуруг (Һәв. иш. 20:35; 1 Салон. 2:19, 20). Узун мүддәт пионер хидмәтиндә чалышан бир гардашымыз јазырды: “Аллаһын Кәламы неҹә дә бөјүк гүввәјә маликдир! О, инсанлары Јеһоваја иззәт ҝәтирмәк үчүн һәјатларыны дәјишмәјә тәшвиг едир, бу исә бизим иманымызы мөһкәмләндирир”. Пионерләр башгаларына севинҹлә көмәк едир, Мүгәддәс Китаб өјрәнмәләри кечирирләр, буна ҝөрә дә онлары буна бәнзәр чох хејир-дуалар ҝөзләјир.
3, 4. Пионер хидмәти Јеһоваја ҝүвәнмәји неҹә өјрәдир вә бу, руһән бөјүмәјә неҹә көмәк едир?
3 Јеһоваја ҝүвәнмәк. Хидмәтләрини јеринә јетирмәк үчүн, пионерләр ҝүндәлик олараг Аллаһын мүгәддәс руһунун тә’сиринә ҝүвәнмәли олурлар. Бу онлара ‘руһун сәмәрәсини’ инкишаф етдирмәјә көмәк едир вә онлар үчүн мүдафиә кими хидмәт едир (Галат. 5:16, 22, 23). Аллаһын Кәламыны тез-тез истифадә етмәләри сајәсиндә, онларын әксәријјәти һәгигәти мүдафиә етмәкдә вә башгаларыны мөһкәмләндирмәкдә чох мәһарәтли олмағы өјрәнибләр (2 Тим. 2:15). Онилликләр әрзиндә пионер хидмәтиндә чалышан бир гардаш дејир: “Пионер хидмәти мәнә Мүгәддәс Китабы дәриндән баша дүшмәкдә көмәк етди. Бу биликләрин көмәји сајәсиндә исә Јеһова вә Онун нијјәтләри һаггында билмәкдә чох адамлара көмәк етмишәм”. Һәгигәтән дә ҝөзәл наилијјәтдир!
4 Пионерләр Јеһоваја башга саһәдә дә ҝүвәнмәлидирләр. Јеһованын онларын мадди еһтијаҹларыны тә’мин етдијини ҝөрәндә онларын иманы мөһкәмләнир. Артыг 55 илдир ки, пионер хидмәтиндә чалышан 72 јашлы гардашымыз дејир: “Јеһованын мәним гајғыма галмадығы вахт олмајыб”. Бундан әлавә, садә һәјат тәрзи сүрмәклә пионерләр өзләрини чох һәјат гајғыларындан мүһафизә едирләр. Мәҝәр бизләрдән һәр биримиз буну шәхси тәҹрүбәмиздә һисс етмәк истәмирикми? (Мат. 6:22; Ибр. 13:5, 6).
5. Пионер хидмәти Јеһоваја јахынлашмаға неҹә көмәк едир?
5 Аллаһа јахынлашмаг. Малик олдуғумуз ән дәјәрли хәзинә — Јеһова илә гаршылыглы мүнасибәтләримиздир (Мәз. 63:3). Јеһоваја олан мәһәббәтимиз бизи Она бүтүн үрәјимизлә хидмәт етмәјә тәшвиг едәндә, бу мүнасибәтләр даһа јахын олур (Јаг. 4:8). Пионер хидмәтиндә 18 иллик тәҹрүбәси олан бир гардашымыз дејир: “Пионер хидмәти Јараданла олан мүнасибәтләрими ҝүнү-ҝүндән мөһкәмләдир вә ‘Рәббин нә јахшы олдуғуну дадыб ҝөрмәјимә’ имкан верир” (Мәз. 34:8).
6. Пионерләр һансы кејфијјәтләрә малик олмалыдырлар вә онларын хидмәти өзләриндән башга даһа кимә фајда ҝәтирир?
6 Јалныз имканлары јол верән кәсләр пионер кими хидмәт етмирләр. Пионер олмаг үчүн ҝүҹлү имана, Аллаһа вә јахынларына сәмими мәһәббәтә, һәмчинин фәдакарлыға малик олмаг лазымдыр (Мат. 16:24; 17:20; 22:37-39). Бунунла белә, пионерләрин севинҹ сачан үзләри, пионер хидмәтинин бол хејир-дуалар ҝәтирдијинә ән јахшы сүбутдур (Мал. 3:10). Лакин бу хејир-дуалардан тәкҹә пионерләр фајдаланмырлар, әкс етдирдикләри ҝөзәл руһ онларын аилә үзвләринә вә јығынҹаглара да бөјүк фајда ҝәтирир (Филип. 4:23).