Тәблиғ етмәк вахты индидир!
1. Нәјә ҝөрә мәһз инди тәблиғ етмәјин вахтыдыр?
1 «Аллаһдан горхун! Она иззәт верин!» Мәләјин рәһбәрлији алтында бу хәбәр «јер үзүндә јашајанлара, һәр милләтә, һәр гәбиләјә, һәр дилә вә һәр халга» бәјан едилир. Нә үчүн? «Чүнки Онун [Аллаһын] һөкмүнүн вахты ҝәлди». Биз, бу дүнјанын мәһви илә јекунлашаҹаг ‘һөкмүн вахтында’ јашајырыг. Инсанлар үчүн ‘ҝөјү, јери, дәнизи вә су булагларыны Јарадана сәҹдә етмәк’ олдугҹа ваҹибдир. ‘Әбәди Мүждәнин’ бәјан едилмәси илә мүгајисәдә һеч бир иш даһа ваҹиб вә тә’ҹили ола билмәз. Бәли, тәблиғ етмәк вахты мәһз индидир! (Вәһј 14:6, 7).
2. Јеһованын хидмәтчиләри тәблиғ ишинин тә’ҹили олдуғуну баша дүшдүкләрини неҹә ҝөстәрирләр?
2 Сон он ил әрзиндә Јеһованын хидмәтчиләри Падшаһлыг һаггында тәблиғ етмәк вә шаҝирдләр һазырламаг үчүн 12 милјард саата јахын вахт сәрф едибләр. Руһани мәһсул топламаг ишиндә даһа фәал иштирак етмәк үчүн, бир чохлары һәјатларында дәјишикликләр едиб (Мат. 9:37, 38). Мисал үчүн, өтән ил орта һесабла һәр ај 850 000 тәблиғчи пионер кими хидмәт етмишди. Даими пионерләр ајда 70 саат тәблиғ едир, көмәкчи пионерләр исә 50 саат.
3. Пионер кими хидмәт етмәк үчүн чох вахт һансы дәјишикликләр тәләб олунур?
3 Пионер хидмәти. ‘Вахтын азалдығыны’ баша дүшән пионерләр садә һәјат тәрзи сүрүрләр (1 Кор. 7:29, 31). Пул газанмаға аз вахт сәрф олунсун дејә, онлар хәрҹләрини азалтмаға чалышырлар. Мисал үчүн, бә’зиләри даһа балаҹа евә көчмүшләр. Башгалары исә бир о гәдәр дә ҝәрәкли олмајан әшјалардан азад олмушлар (Мат. 6:19-21). Бундан әлавә, онлар чох вахт шәхси арзуларыны да мәһдудлашдырмалы олурлар. Бүтүн бунлары пионерләр хидмәтдә даһа чох иштирак етмәк үчүн едирләр (Ефес. 5:15, 16). Бир чох тәблиғчиләр мәтанәт, фәдакарлыг ҝөстәрәрәк вә Јеһованын көмәјинә ҝүвәнәрәк өз ишләрини елә тәшкил едибләр ки, пионер кими хидмәт етсинләр.
4. Пионер хидмәти мәгсәдинә наил олмаг үчүн һансы практики аддымлары атмаг олар?
4 Бәс сән пионер хидмәтиндә иштирак едә биләрсәнми? Нәјә ҝөрә тәҹрүбәли пионерләрдән нәјин сајәсиндә даһа чох тәблиғ едә билдикләри һагда сорушмајасан? Онларла тәблиғдә әмәкдашлыг ет вә онларын дујдуглары севинҹә шәрик ол. Бизим нәшрләрдә пионер хидмәтинә аид мәгаләләрин үзәриндә дүшүн. Гаршына елә мәгсәдләр гој ки, сәни пионер хидмәтинә јахынлашдырсын. Әҝәр пионер кими хидмәт етмәјинә нә исә мане олурса, дуада бу һагда Јеһоваја даныш вә Ондан көмәк дилә (Сүл. мәс. 16:3).
5. Пионер хидмәти бизим баҹарыглы тәблиғчи олмағымыза неҹә көмәк едир?
5 Хејир-дуалар вә севинҹ. Пионер хидмәти сајәсиндә Мүгәддәс Китабдан даһа баҹарыгла истифадә едә билирик, бу исә севинҹимизи артырыр. Бир ҝәнҹ пионер баҹымыз дејир: «Аллаһын һәгигәт Кәламыны дүзҝүн тәгдим етмәји баҹармаг әсл хејир-дуадыр. Пионер хидмәтиндә оларкән Мүгәддәс Китабдан чох истифадә едирсән. Инди евдән-евә тәблиғ едәндә мән Мүгәддәс Китабдан һәр бир инсан үчүн мүвафиг ајә сечә билирәм» (2 Тим. 2:15).
6. Пионер хидмәти нәјә өјрәдир?
6 Пионер хидмәти һәјатын бир чох саһәләриндә дә көмәк едир. Бу хидмәтин сајәсиндә ҝәнҹләр вахтдан вә мадди вәсаитләрдән мүдрикликлә истифадә етмәји, һәмчинин инсанларла үнсијјәт етмәји өјрәнә биләрләр. Бир чох пионерләр һәјата гаршы руһани нөгтеји-нәзәр инкишаф етдирибләр (Ефес. 4:13). Бундан әлавә, пионерләр «Рәббин әли»нин онларын үзәриндә олдуғуну тез-тез һисс едирләр (Һәв. иш. 11:21; Филип. 4:11-13).
7. Пионер хидмәти бизи Јеһоваја неҹә јахынлашдырыр?
7 Пионер хидмәтинин ҝәтирдији ән бөјүк хејир-дуалардан бири бизим Јеһоваја јахынлашмағымыздыр. Бу исә чәтинликләрин өһдәсиндән ҝәлмәкдә бизә көмәк едир. Чәтинликләрдән кечмиш бир баҹымыз сөјләјир: «Јеһова илә олан сых мүнасибәтләр мәнә чәтинликләрә таб ҝәтирмәкдә көмәк едиб. Бу ҹүр мүнасибәтләр пионер хидмәтинин сајәсиндә мүмкүн олуб. Чох шадам ки, јеткинлик јашында оларкән Јеһоваја таммүддәтли хидмәт етмишәм. Һеч ағлыма белә ҝәлмәзди ки, бу гәдәр хејирхаһлыг етмәјә гадирәм» (Һәв. иш. 20:35). Чох ваҹиб олан тәблиғ ишиндә үрәкдән иштирак етсәк, биз дә бол-бол хејир-дуалар әлдә едә биләрик (Сүл. мәс. 10:22).