Әһвал-руһијјәни галдыран мусиги
1 Маһны вә мусиги һәмишә Јеһоваја ибадәтин ајрылмаз һиссәси олмушдур. Гәдим Исраилдә јашамыш Асаф вә онун гардашлары охујурдулар: “Рәббә шүкр един... она маһны охујун, она тәрәннүм ејләјин; бүтүн харигәләрини сөјләјин” (1 Тарих. 16:8, 9). Бу ҝүн биз дә һәр һәфтә кечирилән ҝөрүшләримиздә Јеһоваја бирликдә маһны охујуруг (Ефес. 5:19). Бу, Аллаһын исминә һәмд етмәк үчүн олдугҹа ҝөзәл имкандыр! (Мәз. 69:30).
2 Оркестрлә мүшајиәт олунан “Падшаһлыг мелодијалары” әглимизи руһани фикирләрлә долдурур. Бир баҹы дејир: “Падшаһлыг маһныларынын мелодијалары чалындыгда, дәрһал маһнынын сөзләри јада дүшүр. Јеһова һаггында дүшүнмәк, ејни заманда да хош мусигини динләмәк чох ҝөзәлдир!” (Филип. 4:8).
3 “Падшаһлыг мелодијалары”ны нә заман динләмәк олар? “Падшаһлыг мелодијалары”нын евдә сәсләнмәси хош руһани атмосфер јарадыр вә аиләдәки сүлһә сәбәб олур. Бир аилә јазыр: “Биз һәмишә евдә дә, машында да бу мусигиләри динләјирик. Адам бу ҝөзәл бәстәләри динләмәкдән һеч јорулмур. Чох вахт “Падшаһлыг мелодијалары” мәсиһчи ҝөрүшләринә вә ја конгресләрә ҝедәркән дүзҝүн әһвал-руһијјә әлдә етмәјә көмәк едир”. Бир баҹы демишдир: “Ев ишләри илә мәшғул олан заман “Падшаһлыг мелодијалары” әһвал-руһијјәми галдырыр. Кимин ағлына ҝәләрди ки, палтар јудугдан сонра гурумуш палтарлары гатлајыб јығмагдан севинҹ әлдә етмәк олармыш? Мән белә гәрара ҝәлмишәм ки, руһдан дүшдүјүмү һисс етдијим һәр заман бу мусигиләри динләјим. Онлар мәним әһвал-руһијјәми галдырыр! [...] Һәр маһны мәним үчүн севинҹ мәнбәјидир”. Мәҝәр белә бир ҝөзәл мусигини динләмәк сәнин үчүн дә фајдалы олмаздымы?
4 Мүасир мусиги әсасән бу дүнјанын руһуну әкс етдирир. Валидејнләрин “Падшаһлыг мелодијалары”нын көмәји илә ушагларында сағлам мусигијә зөвг ашыламаг үчүн ҝөзәл имканлары вар. Шүбһәсиз ки, Мүгәддәс Китабы өјрәнән вә марагланан кәсләрин чоху Јеһованы иззәтләндирән вә инсанын әһвал-руһијјәсини галдыран бу ҝөзәл руһани маһныларла таныш олмаға шад олаҹаглар (Мәз. 47:1, 2, 6, 7).