Јеһованын мәһәббәтинә ҝөрә миннәтдарлыг тәзаһүр етдирин.
Мартын 24-дә Мәсиһин өлүм ҝүнү гејд едиләҹәк
1. Јеһова Өз мәһәббәтини бизә неҹә ҝөстәрмишдир?
1 Мәзмурчу нида етмишдир: «Рәббә шүкүр етсинләр мәһәббәтинә ҝөрә, бәшәр өвладларына ҝөстәрдији харигәләринә ҝөрә!» (Мәз. 107:8). Аллаһын инсанлара бәсләдији мәһәббәт зәриф бағлылыгдан даһа артыг шеји нәзәрдә тутур. Бу, мәзмурчунун Аллаһдан илһам алмыш һәмд маһнысындан ајдын олур: «Ја Рәбб, мәнә мәһәббәтинлә дајагсан» (Мәз. 94:18). Јеһованын бизим уғрумузда Өз Оғлуну гурбан вермәси, доғрудан да, бизә олан мәһәббәтинин ән бөјүк тәзаһүрүдүр! (1 Јәһ. 4:9, 10).
2. Јеһоваја миннәтдарлығымызы неҹә ҝөстәрә биләрик?
2 Мәсиһин өлүмүнүн Хатирә Ҝеҹәси мәрасими јахынлашдығы үчүн ‘мәһәббәтини ҝөстәрән’ Аллаһа миннәтдарлығымызы неҹә тәзаһүр етдирә биләрик? (Мәз. 59:17). Бизләрдән һәр биримизә Исанын јер үзүндәки һәјатынын сон ҝүнләриндә баш верән һадисәләр үзәриндә дүшүнмәк үчүн вахт ајырмаг лазымдыр (Мәз. 143:5). 2005-ҹи ил үчүн «Мүгәддәс Јазылары ҝүндәлик арашдырмаг» брошурасында (рус.) артыг гејд едилдији кими, Хатирә Ҝеҹәси илә әлагәдар Мүгәддәс Китабы охумаг үчүн нәзәрдә тутулан хүсуси графикә риајәт етмәк фајдалыдыр вә әҝәр мүмкүндүрсә, Мүгәддәс Китаба әсасланан нәшрләрлә бирҝә «Ән бөјүк инсан» китабынын (рус.) 112-116-ҹы фәсилләрини оху вә әлавә ахтарышлар ет. Охудуғун абзасларын үзәриндә дәриндән дүшүн (1 Тим. 4:15). Дуа васитәсилә Аллаһдан рәһбәрлик диләјиб Онун Кәламы үзәриндә дәриндән дүшүнмәклә биз һәм үрәкләримизи гидаландырыр, һәм дә Јеһоваја олан мәһәббәтимизи ҝөстәририк (Мат. 22:37).
3, 4. а) Либеријалы гардашларымызы неҹә тәглид едә биләрик? б) Хатирә Ҝеҹәсинә кимләри дә’вәт етмәји планлашдырырсан?
3 Башга адамлары Аллаһа миннәтдар олмаға тәшвиг ет. Өтән ил Хатирә Ҝеҹәсиндә бүтүн дүнјада 16 760 607 нәфәр иштирак етмишдир. Либеријанын бир кәндиндә гардашлар шәһәрин меринә мәктуб јазыб мә’лумат вердиләр ки, онлар һәмин шәһәрдә Рәббин Хатирә Ҝеҹәсини кечирмәк истәјирләр. Мер гардашлара јерли футбол мејданчасыны истифадә етмәјә иҹазә верди вә һәмин әразинин сакинләрини бу мәрасимә дә’вәт етмәк үчүн е’лан верди. Һәмин кәнддә ҹәми беш тәблиғчи олмасына бахмајараг, Хатирә Ҝеҹәсинә 636 нәфәр ҝәлмишдир.
4 Биз дә даһа чох инсанларын Хатирә Ҝеҹәси мәрасиминдә бизимлә бирликдә олмаларына көмәк етмәк истәјирик. Дә’вәт етмәк истәдијин инсанларын сијаһысыны тутмусанмы? Мәрасимә дә’вәт етмәк үчүн чап едилмиш дә’вәтнамәләрдән истифадә етмәк олар. Онларын үзәриндә Хатирә Ҝеҹәсинин нә вахт вә һарада кечириләҹәјини сәлигә илә јаз вә ја чап ет вә дә’вәт етмәк истәдијин һәр бир инсана вер. Мартын 24-ү јахынлашдығы әрәфәдә онлара зәнҝ ет вә ја јанларына ҝәлиб хатырлат вә һәр шеји дәгигләшдир.
5. Мүгәддәс Китабы өјрәнәнләри Хатирә Ҝеҹәсинә ҝәлмәјә неҹә тәшвиг едә биләрик?
5 Мүгәддәс Китабы өјрәнән, лакин һәлә јығынҹаг ҝөрүшләринә ҝәлмәјән инсанлара бу мәрасимә ҝәлмәјә вә онлардан там фајда әлдә етмәјә неҹә көмәк едә биләрик? Өјрәнәнләрин бу мәрасимин ваҹиб олдуғуну баша дүшмәләринә көмәк етмәк үчүн, һәр мәшғәлә заманы бир нечә дәгигә вахт ајыр. Бу һагда фајдалы мә’луматы «Ҝөзәтчи Гүлләси»нин 2004-ҹү илин 1 апрел сајынын 3-7-ҹи сәһифәләриндә вә «Билик» китабынын 127-ҹи сәһифәсиндә тапмаг олар.
6. Хатирә Ҝеҹәсинә ҝәләнләри саламламаг нәјә ҝөрә ваҹибдир?
6 Хатирә Ҝеҹәсинә ҝәләнләри саламла. Хатирә Ҝеҹәсинә ҝәләнләрә јахынлаш вә онлары саламла (Ром. 12:13). Дә’вәт етдијин инсанларла отур. Онларын Мүгәддәс Китаблары вә маһны китаблары јохдурса, бу барәдә сән өзүн гајғы ҝөстәр. Бу мәрасимә ҝәлән гејри-фәал баҹы вә гардашлары меһрибанлыгла саламламаг үчүн хүсуси тәшәббүс ҝөстәрәҹәјик. Онлара ҝөстәрдијимиз мәһәббәт јығынҹагла мүнтәзәм үнсијјәти бәрпа етмәләринә көмәк едә биләр (Лука 15:3-7). Ҝәлин әлимиздән ҝәләни едәк ки, бу мүгәддәс мәрасим заманы башгаларыны да Јеһоваја Онун ‘мәһәббәтинә’ ҝөрә миннәтдар олмагда бизә гошулмаға тәшвиг едәк (Мәз. 31:21).