Мүгәддәс Китабы өјрәнәнләрә Јеһованын мисилсиз кејфијјәтләрини дәрк етмәјә көмәк ет
1 Тәблиғ хидмәтиндә биз инсанлара садәҹә Мүгәддәс Китабын әсас принсипләрини өјрәтмирик. Биз онлара Јеһованы бир шәхсијјәт кими танымаға вә Онун мисилсиз кејфијјәтләрини лајигинҹә гијмәтләндирмәјә көмәк едирик. Сәмими инсан Аллаһ һаггында һәгигәти өјрәнәндә о лагејд галмыр, ‘Рәббә лајиг шәкилдә һәрәкәт етмәк’ үчүн һәјатында дәјишикликләр етмәјә башлајыр (Колос. 1:9, 10; 3:9, 10).
2 Өјрәтмә үчүн јени вәсаит. «Мүгәддәс Китаб өјрәдир» китабы артыг илк сәһифәләриндән Јеһованын кејфијјәтләринә диггәт јетирир. Биринҹи фәсил «Аллаһ сәнин гајғына галырмы? Аллаһ кимдир? Аллаһа јахынлашмаг мүмкүндүрмү?» кими суаллара ҹаваб верир. Бу фәсилдә, һәмчинин Јеһованын мүгәддәслији (абз. 10), әдаләти вә гајғыкешлији (абз. 11), мәһәббәти (абз. 13), ҝүҹү (абз. 16), рәһми, лүтфкарлығы, сәдагәти, сәбри вә бағышламаға һазыр олмасы (абз. 19) һагда данышылыр. 20-ҹи абзаса белә јекун вурулур: «Јеһова һаггында нә гәдәр чох өјрәнсәниз, О, сизин үчүн бир о гәдәр дә реал олаҹаг. Аллаһа олан мәһәббәтиниз артаҹаг вә сиз Она јахынлаша биләҹәксиниз».
3 Мүгәддәс Китабы өјрәнәнләрә Јеһоваја јахынлашмаға «Мүгәддәс Китаб өјрәдир» вәсаитинин васитәсилә неҹә көмәк едә биләрик? Өјрәнән адамла Аллаһын һәр һансы бир кејфијјәтиндән бәһс олунан абзасы мүзакирә етдикдән сонра, белә суал вермәк олар: «Јеһованын Шәхсијјәти һаггында нә өјрәндиниз?» вә ја «Бу, Аллаһын сизин шәхсән гајғынызы чәкдијини неҹә ҝөстәрир?» Өјрәнмә заманы бунлара бәнзәр суаллар вермәклә биз адамы өјрәндикләри үзәриндә дүшүнмәји өјрәдир вә Јеһованын мисилсиз кејфијјәтләри үчүн үрәкдән миннәтдар олмаға көмәк едирик.
4 Тәкрар үчүн чәрчивә. Һәр фәсли мүзакирә едиб гуртарандан сонра шаҝирддән «Мүгәддәс Китабын өјрәтдикләри» чәрчивәсинин бүтүн бәндләринә өз сөзләри илә ҹаваб вермәји хаһиш ет. Ҝәтирилән ајәләрә диггәт јетир. Шаҝирдин үрәјиндәкиләри өјрәнмәк үчүн арабир ондан сорушмаг олар: «Мүгәддәс Китабда бу һагда нә дедијинә сән неҹә бахырсан?» Бу ҹүр суаллар һәм әсас бәндләри гејд етмәјә имкан верир, һәм дә чох ваҹиб бир шеји — инсанын һәгиги әгидәсини ашкара чыхармаға көмәк едир. Бунун сајәсиндә Мүгәддәс Китабы өјрәнән инсан Јеһоваја јахынлашмаға башлајаҹаг.