Ләјагәтлә давранараг Мәсиһин ардынҹа ҝедин
1. Бу илин вилајәт конгресинин мөвзусу Аллаһы иззәтләндирмәклә неҹә бағлыдыр?
1 Мүгәддәс Китаб Каинатын Һөкмдары Јеһованы ‘еһтишамы ҝејинән’ кими тәсвир едир (Мәз. 104:1). Иса Мәсиһ һәмишә Атасына вә Онун ишләринә иззәт ҝәтирәҹәк тәрздә данышыр вә һәрәкәт едирди (Јәһ. 17:4). Бизләрдән һәр биримизин «Мәсиһин ардынҹа ҝедин!» адлы вилајәт конгресиндә Исадан нүмунә ҝөтүрмәјә вә Јеһоваја иззәт ҝәтирмәјә имканы олаҹаг.
2. Конгресин һәр һиссәсиндә иштирак етмәк үчүн һазырлашмағымыз нә үчүн Јеһованы иззәтләндирир?
2 Аллаһа лајиг ибадәт. Јеһованын һазырладығы руһани зијафәтә ҝәлмәк үчүн лазыми тәдбирләри ҝөрмәјимизлә Она еһтирам етдијимизи ҝөстәрмиш олаҹағыг. Ҹүмә ҝүнүнү дә дахил етмәклә, конгресин һәр үч ҝүнүндә иштирак етмәк үчүн сән артыг мүдиринлә данышмысанмы, јахуд да ишләрини гајдасына салмысанмы? Вахтында ҝәлмәк, өзүнә јер тутмаг, маһны вә дуаны бурахмамаг үчүн һәр шеји нәзәрә алмысанмы? Конгресин кечирилдији јердә баҹы-гардашларла бирликдә наһар етмәк үчүн өзүнлә гида ҝөтүрмәјин гејдинә галмысанмы? Сәдрлик едән гардаш програмын һәр һиссәсинин башланғыҹында, мусиги сәсләнмәздән габаг, бизләри өз јеримизи тутмаға нәзакәтлә дә’вәт едир; бу заман тез сөһбәти дајандырмалы вә програм башлајанда јеримиздә олмалыјыг.
3. Програма диггәтлә гулаг алмағымыз Јеһоваја неҹә иззәт ҝәтирир?
3 Програма диггәтлә гулаг асмаг да сәмави Атамыза иззәт ҝәтирир. Бир журналист вилајәт конгресиндә олдугдан сонра јазырды ки, кәнардан баханлара «иштирак едәнләрин нүмунәви давранышы» бөјүк тә’сир бағышлајарды: «һамы һөрмәтҹил тәрздә сакитлијә риајәт едәрәк вә руһани шејләрә ҹанлы мараг ҝөстәрәк диггәтлә гулаг асырды». Бундан башга о гејд едир: «Чохсајлы ушаглар... тәәҹҹүб доғураҹаг тәрздә өзләрини јахшы апарыр вә һәтта Мүгәддәс Јазылардан ајәләри ахтарырдылар». Програм вахты јерсиз сөһбәтләрдән, телефонла мәктублашмагдан, јемәк јемәкдән вә ора-бура ҝәзмәкдән гачынмалыјыг. Ушаглар вә јенијетмәләр өз валидејнләринин јанында отурмалыдырлар ки, програмдан фајдаланмагда валидејнләри онлара көмәк едә билсинләр (Ганун. т. 31:12; Сүл. мәс. 29:15). Белә сә’ј, башгаларына һөрмәт етдијимизи вә руһани гиданы јүксәк гијмәтләндирдијимизи ҝөстәрир.
4. Нә үчүн конгресдә хариҹи ҝөрүнүшүмүз ләјагәтли олмалыдыр?
4 Ләјагәтли хариҹи ҝөрүнүш. Бир чохлары, кечән ил вилајәт конгресиндә «Һәмишә Аллаһын иззәтини әкс етдир» адлы мә’рузәдәки хатырлатмалара ҝөрә миннәтдар олмушлар. Һәмин мә’рузәдә гејд едилирди ки, Аллаһын хидмәтчиләри өз ҝејимләри вә хариҹи ҝөрүнүшләри илә Аллаһын иззәтини әкс етдирмәјә сә’ј ҝөстәрмәлидирләр. Биз бу ил дә бу саһәјә ҹидди диггәт јетирмәлијик, чүнки хариҹи ҝөрүнүшүмүз Јеһова илә мүнасибәтимизи вә Онун Шаһидләри олмаг үстүнлүјүмүзү ҝөстәрир. Биз һәмишә, «Аллаһа һөрмәт етдикләрини иддиа едән» мәсиһчиләр кими ҝејинмәлијик (1 Тим. 2:9, 10).
5. Конгрес ҝүнләриндә асудә вахтымызда хариҹи ҝөрүнүшүмүзүн ләјагәтли олмасына неҹә диггәт јетирә биләрик?
5 Бәс өз хариҹи ҝөрүнүшүмүзә јалныз конгресдәми диггәт јетирмәлијик? Унутмајаг ки, бир чох инсанлар бизим плакетләрә нәзәр салыр вә олдуғумуз һәр јердә бизә фикир верирләр. Хариҹи ҝөрүнүшүмүзлә әтрафдакылардан фәргләнмәлијик. Буна ҝөрә дә, һәтта асудә вахтымызда да, мәсәлән, конгресдән сонра кафејә шам етмәјә ҝедәндә, ҝејимимиз Аллаһын хидмәтчиләри олдуғумузу вә мәсиһчи конгресинә ҝәлдијимизи ҝөстәрмәлидир; белә һалларда ҹинс, шорт вә ја идман көјнәји ҝејмәк мүнасиб дејил. Ләјагәтли ҝејимимиз јерли әһалијә неҹә дә ҝөзәл шәһадәт олаҹаг! Хариҹи ҝөрүнүшүмүз Јеһованын хидмәтчиләри олдуғумузу ҝөстәрәндә О севинир.
6. Ләјагәтли давранышымыз вә хариҹи ҝөрүнүшүмүз һансы сәмәрәләр ҝәтирир?
6 Јахшы сәмәрәләр. Әҝәр конгресдә хариҹи ҝөрүнүшүмүзлә Аллаһа иззәт веририксә, бу, гејри-рәсми хидмәтә вә әтрафдакы инсанлара хош тәәссүрат бағышламаға јол ачыр. Конгресдән сонра мүдиријјәтин бир нүмајәндәси демишдир: «Биз бу гәдәр әдәбли инсанлары һәлә ҝөрмәмишдик. Сиз мәһз Аллаһын биз инсанлары ҝөрмәк истәдији кимисиниз». Ләјагәтли давранышымыз вә хариҹи ҝөрүнүшүмүз ҝөстәрир ки, бир-биримизә һөрмәт едир вә Јеһованы иззәтләндиририк (1 Пет. 2:12). Һәмчинин белә давранмагда Аллаһ горхусуна малик олдуғумуз вә бизә ҝөстәрилән шәрәфә, јә’ни Атамыздан тә’лим алдығымыза ҝөрә миннәтдарлығымыз тәзаһүр олунур (Ибр. 12:28). «Мәсиһин ардынҹа ҝедин!» адлы вилајәт конгресини ҝөзләјәрәк, ҝәлин һәр бир ишдә Јеһованы иззәтләндирәк.
[5 сәһифәдәки чәрчивә]
Вилајәт конгреси илә бағлы хатырлатмалар
◼ Конгресин ҹәдвәли. Програм һәр ҝүн саат 9:20-дә башланаҹаг. Гапылар саат 8:00-дан ачыг олаҹаг. Падшаһлыг мелодијалары сәсләнмәјә башлајанда һәр биримиз јерләримизи тутмалыјыг ки, програм лајигли тәрздә башлансын. Програм ҹүмә вә шәнбә ҝүнү 17:05-дә, базар ҝүнү исә саат 16:10-да гуртараҹаг.
◼ Машын дајанаҹағы. Конгресин кечириләҹәји јерләрдә имкан олса гардашлар машынлар үчүн пулсуз дајанаҹаглар һазырлајаҹаглар. Дајанаҹагдан конгресин плакетли нүмајәндәләри истифадә едә биләр. Әлилләр үчүн дајанаҹаглардан јалныз әлил оланлар вә дөвләт тәрәфиндә мүвафиг нөмрә нишанлары вә ја ишарәләри оланлар истифадә едә биләр. Дајанаҹагларда јерләр мәһдуд олдуғундан јахшы олар ки, һәр машында даһа чох адам ҝәлсин.
◼ Јерләр. Әлавә јерләри анҹаг бир машында ҝәлдијиниз вә ја бир мәнзилдә галдығыныз адамлар үчүн тутмаг олар.
◼ Наһар. Фасилә заманы наһар етмәк үчүн башга јерә ҝетмәк әвәзинә, хаһиш олунур ки, өзүнүзлә јемәк ҝәтирәсиниз. Лазым ҝәлсә өз отураҹағынын алтына гоја биләҹәјин кичик сојудуҹу чанта ҝәтирмәк олар. Конгресә бөјүк аиләви чанталар, шүшә габлар вә спиртли ичкиләр ҝәтирмәк олмаз.
◼ Көнүллү ианәләр. Вилајәт конгресләринин тәшкилинә мүәјјән гәдәр вәсаит сәрф едилир. Буна ҝөрә миннәтдарлығымызы Падшаһлыг Залында вә ја конгресдә үмумдүнја ишинә көнүллү ианә етмәклә ҝөстәрә биләрик.
◼ Бәдбәхт вә фөвгәл’адә һадисәләр. Тә’ҹили јардым шө’бәси шикајәт едир ки, һәтта ән ҹүз’и һадисәләрә ҝөрә онлара телефон зәнҝләри ҝәлир. Әҝәр конгресин кечирилдији јердә тә’ҹили јардыма еһтијаҹ дујуларса, јахында олан хидмәтчи илә әлагә сахла. О, дәрһал илк јардым шө’бәсинә мә’лумат верәҹәк. Конгресин кечирилдији јердә олан ихтисаслы тибби һеј’әт јаранан вәзијјәтин нә дәрәҹәдә ҹидди олдуғуну мүәјјәнләшдирәҹәк вә јардым ҝөстәрәҹәк. Лазым ҝәлсә тә’ҹили јардым чағрылаҹаг.
◼ Програмын јазылмасы. Конгресин електрик вә ја сәс системинә програмы јазмаг үчүн һеч бир ҹиһаз гошулмамалыдыр. Бундан башга, белә ҹиһазлардан истифадә едәркән башгаларынын диггәтини јајындырмаг олмаз.
◼ Әтирләр. Конгресләрин әксәријјәти сүн’и вентилјасија системи илә тәҹһиз едилмиш өртүлү јерләрдә кечирилир. Буна ҝөрә, тәнәффүс јоллары вә бу кими хәстәликләрдән әзијјәт чәкән баҹы-гардашлары нәзәрә алараг кәскин гохусу олан әтир вә одеколонларын истифадәсини мәһдудлашдырмаг бизим тәрәфимиздән хејирхаһлыг оларды (1 Кор. 10:24).
◼ «Бу адама баш чәк». Конгрес заманы гејри-рәсми шаһидлик верәркән мараг ҝөстәрән һәр бир адам һаггында мә’лумат вермәк үчүн «Зәһмәт олмаса, бу адама баш чәк» (С-43) бланкындан истифадә ет. Тәблиғчиләр һәмин бланкдан бир-ики әдәд өзләри илә конгресә ҝәтирә биләрләр. Бланклары әдәбијјат шө’бәсиндән дә ҝөтүрмәк олар. Долдурулмуш бланклары ја бу шө’бәјә, ја да конгресдән гајыдандан сонра јығынҹағын катибинә вермәк олар. (2005-ҹи ил феврал сајынын «Бизим Падшаһлыг Хидмәтимиз»ин 6-ҹы сәһифәсинә бахын.)
◼ Јерләшдирилмә. Шәхси мәнзилдә галмағы сифариш етдикдә нөвбәти мәгамлары нәзәрә алмаг лазымдыр: 1) Хаһиш едирик, мәнзил сифариши үчүн бүтүн һалларда СО-5 бланкындан истифадә един. 2) Мәнзил шө’бәсинин јерләшдирилмә барәдә алынан СО-4 бланкы башга шәхсләрә верилмәмәлидир. 3) Јахшы олар ки, өзүнүзлә јатаг дәјишәји вә јемәк ҝөтүрәсиниз. 4) Ушагларыныза нәзарәт един вә онлары һеч вахт тәк бурахмајын. 5) Һәмиманлыларымызын хидмәтиндән истифадә едәркән миннәтдар олмалы вә Һәвариләрин ишләри 20:35 ајәсиндәки принсипи унутмамалыјыг. 6) Әҝәр мәнзил сифаришини ләғв етмәли олмусунузса, бу һагда мәнзил шө’бәсинә мә’лумат вермәји унутмајын.