Руһани зијафәт вә шадлыг
1 Јеһова хидмәтчиләринин руһани тәләбатларынын гајғысына мәһәббәтлә галыр. Бүтүн дүнја руһани ҹәһәтдән аҹлыг чәкдији һалда, биз чох јахшы гидаланырыг (Јешаја 65:13). Јеһованын бизи руһани гида илә тәмин етмәк үсулларындан бири һәр ил кечирилән вилајәт конгресләридир. «Аллаһын руһу бәләдчимиздир» адлы үзүмүзә ҝәлән вилајәт конгресинин бүтүн һиссәләриндә иштирак етмәк үчүн һазырлыг ҝөрүрсәнми? Бизим үчүн ләзиз вә бәсләјиҹи тәамлардан ибарәт руһани зијафәт һазырланыр.
2 Габагҹадан планлашдыр. «Чалышганын нијјәти хејир ҝәтирәр» (Сүл. мәс. 21:5). Буна ҝөрә, конгресин һәр үч ҝүнүндә олмағы планлашдыраркән, әҝәр ишдән галмалы олаҹагсанса, мүдириндән иҹазә алмағы тәхирә салма. Галмаг үчүн јер лазым ҝәләҹәксә, бу барәдә тәдбир ҝөрмүсәнми? Һәмчинин јахшы оларды ки, конгрес кечирилән јердә наһары һәмиманлыларынла бирликдә етмәк үчүн өзүнлә јемәк ҝәтирәсән. Өзүнә јер тапмаг, илк маһны вә дуада иштирак етмәк үчүн чалыш конгресин һәр ҝүнү кифајәт гәдәр тез ҝәләсән.
3 Әмин олмалыјыг ки, ҝејимимиз әдәбли вә сәлигәлидир (1 Тим. 2:9, 10). Вилајәт конгресләри заманы шаһидлик етмәк үчүн ҝөзәл имканларымыз јараныр. Конгрес кечирилән јердә оларкән әдәбли ҝејимимизлә вә плакет тахмагла әтрафдакылардан сечиләҹәк вә бизи мүшаһидә едәнләрә хош тәсир бағышлајаҹағыг.
4 Диггәтлә гулаг ас. Сөзсүз ки, биз бу руһани зијафәтдә верилән тәамларын бир парчасыны белә гачырмаг истәмирик! (Сүл. мәс. 22:17, 18). Охунан ајәләри өз Мүгәддәс Китабымыздан изләмәк вә гыса гејдләр апармаг диггәтимизин јајынмамасына вә програма ҹәмләнмәсинә көмәк едәҹәк. Ахшам исә гејдләримиздән истифадә едәрәк програмда сәсләнән мараглы фикирләри башгалары илә мүзакирә едә биләрик. Сон илләрдә мүшаһидә едилмишдир ки, бәзи ҝәнҹләр конгрес заманы бир јердә отуруб бир-бири илә сөһбәт едир вә ја мобил телефон васитәсилә мәктублашырлар. Јахшы оларды ки, јенијетмәләр дә дахил олмагла, ушагларымызла бир јердә отураг вә онларын биздән аралы башга ҝәнҹләрлә бир отурмаларына јол вермәјәк, әксинә, програма аиләликлә гулаг асаг.
5 Гардашлыг мүнасибәтләриндән һәзз алын. Ләзиз јемәкләри достларла бирликдә дадмаг инсана даһа чох һәзз ҝәтирир (Сүл. мәс. 15:17). Ејни тәрздә, баҹы-гардашларла үнсијјәт конгресдән алдығымыз севинҹи даһа да артырыр. Буна ҝөрә дә, фасиләләр заманы баҹы-гардашларла таныш олмаг вә үнсијјәт етмәк үчүн тәшәббүсү өз үзәримизә ҝөтүрмәк неҹә дә хошдур! (Мәз. 133:1). Програмын сәдри мусиги башламаздан әввәл бизи нәзакәтлә јерләримизә әјләшмәјә дәвәт едәндә, сөһбәти дајандырмалы вә програм башлајана кими јерләримизи тутмалыјыг.
6 Шаһидлик етмәк үчүн һәр имкандан истифадә ет. Адәтән конгресләр заманы шаһидлик етмәк үчүн ҝөзәл имканлар јараныр. Конгресдән чыхан баҹы-гардашлары ҝөрән адамлар онларын јахасындакы плакети охујуб конгресин мөвзусу һагда сорушмушлар. Бунун сајәсиндә, јахшы сөһбәт алынмыш вә онлар һәгигәтә ҝөзәл шаһидлик етмишләр. Сорушанларын бәзиләри дәвәти гәбул едиб конгресә ҝәлмишләр.
7 Програмын, јерин, конгрес шөбәләринин вә мәрузәләрин һазырланмасына минләрлә саат сәрф олунур. Бу руһани зијафәтин һазырланмасына мәһәббәтлә чәкилән әмәк Јеһованын Өз халгына олан гајғысыны әкс етдирир. Ҝәлин һамымыз орада иштирак едәк вә дојунҹа гидаланаг! Белә етсәк, биз дүнјадан фәргли олараг ‘шадланыб мәдһијјәләр сөјләјәҹәјик’ (Јешаја 65:14).
[Өјрәнилмә үчүн олан суаллар]
1. Јеһова хидмәтчиләринин руһани тәләбатларынын гајғысына неҹә галыр?
2. Конгресә һазырлыг өзүнә нәји дахил едир?
3. Ҝејимимиз неҹә олмалыдыр?
4. Бизә вә аиләмизә програмдан даһа чох фајда әлдә етмәјә нә көмәк едәҹәк?
5. Конгресдән даһа чох һәзз алмаг үчүн нә едә биләрик?
6. Өз тәҹрүбәнә әсасланараг конгрес кечирилән јердә шаһидлик етмәјин неҹә мүмкүн олдуғу һагда даныш.
7. Үзүмүзә ҝәлән вилајәт конгресиндә нә үчүн иштирак етмәлијик?