Мүгәддәс Китаб өјрәнмәси башламаға тәрәддүд етмә!
1 Аллаһын Падшаһлығы һагда хош хәбәри фәал тәблиғ етмәклә биз ‘әлимиздән ҝәлән јахшылығы’ саһәмиздә јашајан инсанлардан әсирҝәмирик (Сүл. мәс. 3:27). Тезликлә Аллаһын Падшаһлығы инсанлары ишыглы ҝәләҹәјә чыхараҹаг, бәшәријјәтә чатдыра биләҹәјимиз бундан ҝөзәл хәбәр јохдур. Ола билсин, сән гејри-рәсми тәблиғ етмәклә, јахуд әдәбијјат сахламагла Падшаһлыға олан үмидимизи инсанлара фәал сурәтдә чатдырырсан. Әҝәр һәлә буну етмәмисәнсә, нәјә ҝөрә Мүгәддәс Китаб өјрәнмәси кечирмәји гаршына мәгсәд гојмајасан?
2 Бә’зән Мүгәддәс Китаб өјрәнмәсинә башламаға ән бөјүк манеәләрдән бири бу мәсәләјә неҹә мүнасибәт ҝөстәрмәјимиздир. Бә’зи тәблиғчиләр өзләринә әмин олмадыглары, диҝәрләри исә чох мәшғул олдуглары үчүн Мүгәддәс Китаб өјрәнмәсинә башламаға ҹәсарәт етмирләр. Ашағыдакы мәсләһәтләр сизин үчүн фајдалы ола биләр (Мат. 28:19; Һәв. иш. 20:20).
3 Әминсизлик. Ола билсин, натамам тәһсилли олдуғун үчүн, јахуд башга сәбәбләрдән дүшүнүрсән ки, Мүгәддәс Китаб өјрәнмәсини апара билмәјәҹәксән. Биринҹи әсрдә һәгигәти инсанлара өјрәдән мәсиһчиләр ‘охумамыш, авам адамлар’ иди. Бәс нәјин сајәсиндә онлар мәһарәтли тәблиғчи олдулар? Онлар «Иса илә бәрабәр олмушдулар» (Һәв. иш. 4:13). Бу мәсиһчиләр, тә’лимләри вә өјрәтмә үсуллары бизим үчүн Мүгәддәс Јазыларда горунуб сахланан Даһи Мүәллим Исадан нүмунә ҝөтүрмүшләр. Савадын ашағы олса да, унутма ки, алдығын руһани тәһсиллә һеч нә мүгајисә олуна билмәз (Јешаја 50:4; 2 Кор. 3:5).
4 Јеһова рәһбәрләри вә јүксәк вәзифә саһибләрини мәзәммәт етмәк үчүн бә’зән пејғәмбәрләрдән истифадә едирди. Анҹаг онларын бир чоху Амос кими садә адамлар иди. О е’тираф едирди: «Мән нә пејғәмбәрәм, нә дә пејғәмбәрин шаҝирди. Мән јалныз бир чобанам, фир’он әнҹири ағаҹларыны јетишдирирәм» (Амос 7:14). Буна бахмајараг, Амос Јеһованын һөкмүнү данаја ибадәт едән каһин Амасјаја чатдырмагдан чәкинмәди (Амос 7:16, 17). Биз һеч вахт унутмамалыјыг ки, иҹра етдијимиз иш Аллаһындыр вә О бунун үчүн бизә лазым олан баҹарығы верәҹәк (2 Тим. 3:17).
5 Чох мәшғул олсан да. Бош вахтын олмаса да, јәгин сән мүнтәзәм хидмәт етмәк үчүн конкрет вахт ајырмысан. Мүгәддәс Китаб өјрәнмәси апармаг хидмәтинин ән севиндириҹи јөнләриндән бири ола биләр. Бу, Јеһованын Кәламынын инсанын һәјатына тә’сир етдијини ҝөрмәк үчүн надир имкандыр (Ибр. 4:12). Киминсә ‘һәгигәти дәрк етмәси’ үчүн шәхсән ҝөстәрдијимиз фәдакарлыға Јеһова севинир (1 Тим. 2:4). Һәтта мәләкләр белә, киминсә кечмиш һәјат тәрзиндән төвбә едиб, руһән инкишаф етмәсинә севинирләр (Лука 15:10).
6 Аллаһ «истәјир ки, бүтүн инсанлар хилас олуб, һәгигәти дәрк етсинләр» (1 Тим. 2:4). Тәрәддүд етмәдән Мүгәддәс Китаб өјрәнмәси апарараг Аллаһын ирадәсини јеринә јетирмәк неҹә дә шәрәфли ишдир!
[Өјрәнилмә үчүн олан суаллар]
1. Биз һансы мә’нада әлимиздән ҝәлән јахшылығы әсирҝәмирик?
2. Нәјә ҝөрә бә’зи тәблиғчиләр киминләсә Мүгәддәс Китаб өјрәнмәсинә башламаға тәрәддүд едирләр?
3. Биз нәјин сајәсиндә Мүгәддәс Китаб һәгигәтләрини инсанлара өјрәдә билирик?
4. Амосун нүмунәсиндән нә өјрәнирик?
5. Чох мәшғул олсаг да, нәјә ҝөрә Мүгәддәс Китаб өјрәнмәси башламаға сә’ј ҝөстәрмәлијик?
6. Аллаһын ирадәсилә әлагәдар бизим һансы шәрәфли ишимиз вар?