Сән мүәллим ола биләрсән!
1. Падшаһлыг тәблиғчиләринин гаршысында һансы надир имкан вардыр?
1 Хидмәтин ән хошаҝәлән саһәләриндән бири кимәсә һәгигәти өјрәтмәкдир. Онун Падшаһлыг хәбәринә һај вердијини ҝөрмәк вә Каинатын Һөкмдарына јахынлашмаға көмәк етмәк инсаны чох севиндирир (Јаг. 4:8). Һәгигәтә сусајан адама һәгигәти өјрәтмәк вә онун хасијјәтиндә, бахышларында вә давранышында әһәмијјәтли дәјишиклик етмәсини ҝөрмәк һәр бир Падшаһлыг тәблиғчисинин мәгсәди олмалыдыр (Мат. 28:19, 20).
2. Нә үчүн бәзиләри Мүгәддәс Китаб өјрәнмәси кечирмәјә тәрәддүд едир вә бу проблемин өһдәсиндән ҝәлмәјә нә көмәк едә биләр?
2 Јеһоваја ҝүвән. Кечмишдә иманлы инсанлар Јеһованын онлара вердији тапшырығы јеринә јетирә биләҹәкләринә һәрдән әмин олмајыблар. Муса, Јеремја, Амос вә башга садә инсанлар Јеһоваја етибар етмәјин сајәсиндә өз шүбһә, јахуд инамсызлыгларына үстүн ҝәлмиш вә мүһүм ишләр ҝөрмүшләр (Чых. 4:10-12; Јер. 1:6, 7; Амос 7:14, 15). Һәвари Павел дә ‘ҹәсарәт алмышды’. Һарадан? О ачыглајыр ки, буну «Аллаһымыздан» алмышды (1 Салон. 2:2). Бәли, сәмәрәли Мүгәддәс Китаб өјрәнмәси кечирмәк үчүн Јеһованын һәр биримизә еһтијаҹымыз олан көмәји, мүдриклик вә ҝүҹү верәҹәјинә архајын ола биләрик (Јешаја 41:10; 1 Кор. 1:26, 27; 1 Пет. 4:11).
3, 4. Аллаһын Кәламыны өјрәтмәјә бизә нә көмәк едәр?
3 Верилән тәлими гәбул ет. Даһи Нәсиһәтчимиз Јеһова Аллаһ мүнтәзәм руһани програм васитәсилә бизә тәлим верир, буна ҝөрә дә там мәнада баҹарыглы мүәллим ола биләрик (Јешаја 54:13; 2 Тим. 3:16, 17). Мүгәддәс Јазылары даһа јахшы баша дүшмәк вә Мүгәддәс Китаб һәгигәтләрини өјрәтмәк габилијјәтини јахшылашдырмаг үчүн бүтүн имканлардан истифадә етмәклә бу тәлими гәбул ет. Әсас етибарилә, Теократик Хидмәт Мәктәби вә Хидмәти ҝөрүш бу мәгсәдә хидмәт етсә дә, бүтүн јығынҹаг ҝөрүшләриндә Аллаһын Кәламыны өјрәтмәји өјрәнирик.
4 Чалыш, һәтта дәрин руһани һәгигәтләри дә садә тәрздә чатдырмағы өјрәнәсән. «Хидмәт Мәктәби» китабынын 227-ҹи сәһифәсиндә изаһ едилир: «Әҝәр мөвзуну башгаларына баша салаҹагсанса, өзүн ону ајдын баша дүшмәлисән». Ҝөрүшләрдә шәрһ вермәк ҝәләҹәкдә истифадә етмәк үчүн әсас мәгамлары јадда сахламаға көмәк едир. Буна ҝөрә дә јахшы һазырлаш вә өјрәтмәји баҹардығына әминлијин артаҹаг.
5. Мүәллим кими инкишаф етмәјимиз үчүн јығынҹагда башга һансы васитә вар?
5 Лап әввәлдән мәсиһчиләр шаҝирд һазырламаг ишиндә бирҝә чалышаркән сөзсүз ки, бир-бириндән өјрәнмишләр (Лука 10:1). Әҝәр мүмкүнсә, Мүгәддәс Китаб өјрәнмәси кечирәркән пионерләр, ағсаггаллар вә сәјјар нәзарәтчиләр дә дахил олмагла, тәҹрүбәли тәблиғчиләрлә әмәкдашлыг ет. Онларын Мүгәддәс Јазылардакы һәгигәтләри изаһ етмәк үчүн садә нүмунәләрдән вә тәлим нәшрләримиздә олан башга өјрәтмә вәсаитләриндән неҹә истифадә етмәләринә фикир вер. Јахшы мүәллим олмаг үчүн нә едә биләҹәјинә даир онлардан мәсләһәт истә (Сүл. мәс. 1:5; 27:17). Баҹы-гардашлардан өјрәндијин һәр шеји гијмәтләндир, чүнки әслиндә бу тәлими Аллаһ верир (2 Кор. 3:5).
6. Аллаһын Кәламынын мүәллими олмаг үчүн нә хүсусилә ваҹибдир?
6 Јеһоваја етибар ет вә вердији тәлимдән фајдалан. Инкишаф етмәјин үчүн дуа ет (Мәз. 25:4, 5). Сән дә кимәсә өзүн кими Аллаһын Кәламынын мүәллими олмаға көмәк етмәјин севинҹини дуја биләрсән!