Хидмәт етмәк шәрәфини гијмәтләндир
1. Дүнјада бир чохлары тәблиғ хидмәтимизә неҹә јанашыр?
1 Бу ҝүн Шејтан дүнјасында чохлары бизим тәблиғ хидмәтимизә «ҹәфәнҝијат» кими бахыр (1 Кор. 1:18—21). Әҝәр диггәтли олмасаг, бу ҹүр јанлыш дүшүнҹә тәрзи бизи руһдан сала вә сәјимизи зәифләдә биләр (Сүл. мәс. 24:10; Јешаја 5:20). Бәс бизим Јеһованын Шаһиди олмаг шәрәфини гијмәтләндирмәк үчүн һансы сәбәбләримиз вар? (Јешаја 43:10).
2. Нәјә ҝөрә хидмәти мүгәддәс иш адландырмаг олар?
2 Мүгәддәс иш. Һәвари Павел хидмәтә мүгәддәс бир иш кими јанашырды (Ром. 15:15, 16). Нәјә ҝөрә демәк олар ки, хидмәт мүгәддәсдир? Бу ишдә иштирак етмәклә биз Мүгәддәс Јеһова Аллаһла әмәкдашлыг едир, еләҹә дә Онун адынын тәгдис олунмасында өз төһфәмизи вермиш олуруг (1 Кор. 3:9; 1 Пет. 1:15). Јеһова тәблиғ ишимизи «мәдһ гурбаны» кими гәбул едир, бу сәбәбдән хидмәт ибадәтимизин ајрылмаз һиссәсидир (Ибр. 13:15).
3. Нәјә ҝөрә хош хәбәри тәблиғ етмәк бу гәдәр шәрәфли ишдир?
3 Јеһова хош хәбәри тәблиғ етмәк кими бөјүк шәрәфли ишә һамыны лајиг ҝөрмүр. Бу иш мәләкләрә тапшырылсајды, онлар буну мәмнунијјәтлә гәбул едәр, үстәлик, даһа јахшы јеринә јетирәрдиләр (1 Пет. 1:12). Анҹаг Јеһова бу бөјүк шәрәфи сахсы габлара, бизим кими гејри-камил инсанлара һәвалә едиб (2 Кор. 4:7).
4. Хидмәтимизи гијмәтләндирдијимизи неҹә ҝөстәрә биләрик?
4 Ән ваҹиб иш. Бизә һәвалә олунан шәрәфли иши гијмәтләндирдијимиз үчүн хидмәт һәјатымызда ән ваҹиб јери тутур (Филип. 1:10). Буна ҝөрә һәр һәфтә хидмәтә нә гәдәр вахт сәрф етдијимизи јазырыг. Дүнја шөһрәтли оркестрдә чыхыш етмәк шәрәфини гијмәтләндирән мусигичи һәр дәфә чыхыш етмәздән габаг һазырлашаҹаг вә даим өз габилијјәтини инкишаф етдирмәјә чалышаҹаг. Буна бәнзәр тәрздә, биз дә һәгигәт сөзүнү дүзҝүн өјрәдә билмәк үчүн хидмәтә ҝетмәздән габаг һазырлашмалы вә тәлим вермәк габилијјәтимизи јахшылашдырмалыјыг (2 Тим. 2:15; 4:2).
5. Хидмәтимиз кимин үчүн гијмәтлидир?
5 Чатдырдығымыз хәбәрә бир чохларынын биҝанә јанашмасынын сәни руһдан салмасына јол вермә. Унутма ки, әразимиздә бизим ҝәлишимизә севинән һәлә чох адам вар. Анҹаг бизим мәгсәдимиз инсанлары разы салмаг дејил. Бизим үчүн ән ваҹиби Јеһованын фикридир; вә О, бизим сәјләримизи јүксәк гијмәтләндирир (Јешаја 52:7).