Падшаһлыг һаггында тәблиғ етмәк гијмәтли үстүнлүкдүр
1 Јер күрәсинин милјардларла сакинләри һәјатын давам етмәси үчүн Јеһованын сәхавәтлә тәгдим етдији шејләрдән истифадә едир (Мат. 5:45). Лакин Јараданларына миннәтдарлыг тәзаһүр етдирмәк үчүн јалныз азсајлы адамлар Аллаһын Падшаһлығы һаггындакы хош хәбәри тәблиғ едир (Мат. 24:14). Бу дәјәрли үстүнлүјү сән нә дәрәҹәдә гијмәтләндирирсән?
2 Падшаһлыг һаггында тәблиғ Аллаһа шәрәф ҝәтирир вә буҝүнкү нараһат ҝүнләрдән әзијјәт чәкән инсанлара үмид вә әмин-аманлыг бәхш едир (Ибр. 13:15). Бу хәбәрә һај верәнләр әбәди јашамаг үмидини әлдә едирләр (Јәһ. 17:3). Мәҝәр карјера вә ја һансыса башга иш бу ҹүр ҝәләҹәклә мүгајисә олуна биләрми? Һәвари Павел хидмәтини иҹра етмәк тәрзи илә ону гијмәтләндирдијини ҝөстәрирди. О өз хидмәтинә бир хәзинә кими јанашырды (Һәв. иш. 20:20, 21, 24; 2 Кор. 4:1, 7).
3 Гијмәтли үстүнлүјә ҝөрә миннәтдарлыг тәзаһүр етдирәк. Хидмәти гијмәтләндирдијимизи ҝөстәрмәјин үсулларындан бири — онун кејфијјәтинә диггәт јетирмәјимиздир. Тәблиғ етдијимиз адамларын үрәјинә јол ачан тәгдимәләр һазырламаг үчүн вахт ајырырыгмы? Мүгәддәс Јазылардан даһа мәһарәтлә истифадә етмәк вә инсанларла даһа јахшы мүлаһизә јүрүтмәк габилијјәтимизи инкишаф етдирә биләрикми? Саһәмиздә әсаслы сурәтдә тәблиғ едирикми? Мүгәддәс Китаб өјрәнмәләринә башламағын вә апармағын үсулларыны билирикми? Кечмишин вә мүасир дөврүн садиг мәсиһчиләри кими, биз дә хидмәтимизи гијмәтләндирмәјә вә она дүзҝүн јанашмаға тәшвиг олунуруг (Мат. 25:14-23).
4 Гоҹалығын ҝәтирдији чәтинликләр, зәиф сағламлыг вә ја башга шәраитләр уҹбатындан әзијјәт чәкдијимиз заман, тәблиғ хидмәтиндә сә’јлә иштирак етмәк үчүн сәрф етдијимиз гүввәнин доғрудан да јүксәк гијмәтләндирилдијини билмәк тәсәлливериҹидир. Јеһова Аллаһ Өз Кәламында бизи әмин едир ки, бу ҹүр сә’јләримиз башгаларынын ҝөзүндә кичик ҝөрүнсә дә, Онун үчүн чох дәјәрлидир (Лука 21:1-4).
5 Падшаһлыг һаггында тәблиғ етмәк дәрин мәмнунлуг һисси ҝәтирир. 92 јашлы бир баҹымыз дејир: «Јеһоваја хидмәтдә кечирдијим 80 илә тәәссүф һисси кечирмәдән дөнүб бахмаг неҹә дә бөјүк шәрәфдир! Әҝәр һәјатымы бир даһа јашамалы олсајдым, онун башга ҹүр олмасыны истәмәздим. Һәгигәтән дә Аллаһын ‘мәһәббәти бу һәјатдан ҝөзәлдир’» (Мәз. 63:3). Ҝәлин биз дә Аллаһын вердији бу үстүнлүјү — Падшаһлыг һаггында тәблиғ етмәк ишини гијмәтләндирәк!