Тәблиғ ҝөрүшләри нәјә ҝөрә ваҹибдир?

1. Тәблиғ ҝөрүшләринин мәгсәди нәдир?

¹ Бир дәфә Иса Мәсиһ 70 шаҝирдини тәблиғә ҝөндәрмәздән өнҹә бир јерә топламышды (Лука 10:1—11). Иса шаҝирдләрини үрәкләндирәрәк демишди ки, онлар тәк олмајаҹаглар, бичинин Саһиби Јеһова онларла олаҹаг. О һәмчинин онлара бу ишин өһдәсиндән ҝәлә билмәк үчүн лазыми ҝөстәришләр вермишди вә онлары ики-ики бөлүшдүрмүшдү. Бу ҝүн дә хидмәтә ҝетмәздән әввәл кечирилән ҝөрүшләр ејни мәгсәдә хидмәт едир: үрәкләндирмәк, тәлим вермәк вә бөлүшдүрмәк.

2. Тәблиғ ҝөрүшү нә гәдәр сүрмәлидир?

² Һазырда тәблиғ ҝөрүшләри 10—15 дәгигә чәкир. Тәблиғчиләрин бөлүшдүрүлмәси, саһәләрин тәјин олунмасы вә дуа да бу вахта дахилдир. Инди исә буна дәјишиклик едилир. Апрел ајындан етибарән тәблиғ ҝөрүшләринин кечирилмә мүддәти 5—7 дәгигә чәкәҹәк. Лакин әҝәр бу ҝөрүш јығынҹаг ҝөрүшүндән сонра кечирилсә, даһа гыса олмалыдыр. Белә ки, баҹы-гардашлар јығынҹаг ҝөрүшүндән кифајәт гәдәр информасија алырлар. Тәблиғ ҝөрүшүнү гыса кечирмәјин сајәсиндә тәблиғчиләрин хидмәтә даһа чох вахты олаҹаг. Бундан әлавә, әҝәр өнҹүлләр вә ја тәблиғчиләр тәблиғ ҝөрүшүндән габаг хидмәтә башлајыбларса, онлар хидмәтләринә чох гыса ара верәҹәкләр.

3. Тәблиғчиләр үчүн фајдалы олсун дејә, тәблиғ ҝөрүшләри неҹә тәшкил едилә биләр?

³ Тәблиғ ҝөрүшләри елә тәшкил едилмәлидир ки, тәблиғчиләр ондан фајда әлдә етсин. Бир чох јығынҹагларда тәблиғ ҝөрүшләри үмуми јох, групларда кечирилир. Бу, тәблиғчиләрин тәблиғ ҝөрүшләриндә иштирак етмәләрини вә саһәјә ҝетмәләрини асанлашдырыр. Һәмчинин груп нәзарәтчисинә тәблиғчиләри тез бөлүшдүрмәјә вә групунун үзвләринә даһа чох көмәк етмәјә имкан верир. Ағсаггаллар шурасы јерли шәраити нәзәрә алыб тәблиғ ҝөрүшләринин неҹә тәшкил едиләҹәјини мүәјјән едә биләр. Тәблиғ ҝөрүшүнүн сонунда гыса дуа едилмәздән өнҹә бүтүн тәблиғчиләр һара вә киминлә ҝедәҹәкләрини билмәлидирләр.

4. Нәјә ҝөрә тәблиғ ҝөрүшләри јығынҹағын диҝәр ҝөрүшләри гәдәр ваҹибдир?

⁴ Диҝәр ҝөрүшләр кими ваҹибдир. Тәблиғ ҝөрүшләриндә тәблиғә чыханлар үчүн мәсләһәтләр верилдијиндән, бәзән тәблиғә ҝетмәји планлашдырмајанлар бу ҝөрүшләрдә иштирак етмир. Лакин тәблиғ ҝөрүшләринә сојуг јанашмамалыјыг, чүнки бу ҝөрүшләр дә јығынҹағын диҝәр ҝөрүшләри гәдәр ваҹибдир. Бу ҝөрүшләр дә Јеһованын бизим үчүн һазырладығы тәдбирдир вә бизә бир-биримизи мәһәббәтә вә јахшы ишләрә тәшвиг етмәјә көмәк едир (Ибр. 10:24, 25). Буна ҝөрә дә ҝөрүшү апаран елә һазырлашмалыдыр ки, бу, Јеһова Аллаһа шәрәф ҝәтирсин, динләјиҹиләрә дә фајда. Хидмәтә ҝедән тәблиғчиләрдән дә ҝөзләнилир ки, имкан дахилиндә бу ҝөрүшдә иштирак етсинләр.

5. а) Тәблиғ ҝөрүшләринин тәшкил олунмасында хидмәт нәзарәтчисинин ролу нәдән ибарәтдир? б) Баҹы тәблиғ ҝөрүшүнү неҹә кечирмәлидир?

⁵ Ҝөрүшү апаран неҹә һазырлашмалыдыр? Гардаш јығынҹаг ҝөрүшүндәки тапшырығына јахшы һазырлашсын дејә тапшырығыны әввәлҹәдән билмәлидир. Буну тәблиғ ҝөрүшүнә дә шамил етмәк олар. Сөзсүз, тәблиғ груплары ајры-ајры јығышанда ҝөрүшү груп нәзарәтчиләри вә ја көмәкчиләри апарыр. Лакин јығынҹагда үмуми тәблиғ ҝөрүшү кечириләндә ҝөрүшү апаран гардашы хидмәт нәзарәтчиси тәјин едәҹәк. Бәзи хидмәт нәзарәтчиләри ҹәдвәли һәм ҝөрүшү кечирән бүтүн гардашлара верир, һәм дә еланлар лөвһәсиндән асыр. Хидмәт нәзарәтчиси ҝөрүшү кечирмәк үчүн гардашлары сечәркән јахшы ҝөтүр-гој етмәли, јадда сахламалыдыр ки, бу ҝөрүшләрин кејфијјәти ҝөрүшү апаран гардашын тәлим вермә вә тәшкилатчылыг габилијјәтиндән дә асылыдыр. Әҝәр бәзи ҝүнләр ҝөрүшү кечирмәк үчүн ағсаггал, јығынҹаг хидмәтчиси вә ја башга мүнасиб гардаш јохдурса, хидмәт нәзарәтчиси ҝөрүшү апармағы баҹарыглы баҹыја тапшыра биләр. («Ҝөрүшү баҹы кечирәндә» адлы мәгаләјә бах.)

6. Нә үчүн ҝөрүшү апаран јахшы һазырлашмалыдыр?

⁶ Биз адәтән Теократик Хидмәт Мәктәбиндә вә Хидмәти ҝөрүшдә тапшырыг аланда буна ҹидди јанашыр вә јахшы һазырлашырыг. Тәбии ки, һеч биримиз јығынҹагда нә һагда данышаҹағымызы отуруб-отуруб јығынҹаға ҝедәндә фикирләшмирик. Тәблиғ ҝөрүшләринә дә ејни ҹиддијјәтлә јанашылмалыдыр. Инди тәблиғ ҝөрүшләри әввәлкиндән гыса олаҹаг, буна ҝөрә дә ҝөрүшүн мараглы олмасы вә вахтында гуртармасы үчүн јахшы һазырлашмаг хүсусилә ваҹибдир. Јахшы һазырлашмаг һәмчинин тәблиғчиләрин һарада хидмәт едәҹәкләрини габагҹадан мүәјјән етмәји дә өзүнә дахил едир.

7. Тәблиғ ҝөрүшүнү апаран нәләри мүзакирә едә биләр?

⁷ Нәји мүзакирә етмәк олар? Әразидән-әразијә шәраит дәјишдијиндән садиг нөкәр һәр тәблиғ ҝөрүшү үчүн һазыр материал вермир. «Тәблиғ ҝөрүшүндә нәји мүзакирә етмәли?» адлы чәрчивәдә бәзи тәклифләр вар. Индән белә дә бу ҝөрүш мүзакирә шәклиндә кечириләҹәк. Бәзән бу ҝөрүшләрә јахшы һазырланмыш сәһнәҹик вә ја jw.org сајтындан мүвафиг видео дахил етмәк олар. Ҝөрүшү апаран тәблиғ ҝөрүшүнә һазырлашаркән һәмин ҝүн тәблиғә ҝедәнләри неҹә үрәкләндирәҹәји вә тәлиматландыраҹағы үзәриндә дүшүнмәлидир.

8. Шәнбә вә базар ҝүнләри тәблиғ ҝөрүшләриндә нәји мүзакирә етмәк олар?

⁸ Мәсәлән, шәнбә ҝүнләри әксәр тәблиғчиләр «Ҝөзәтчи гүлләси» вә «Ојанын!» журналларыны тәклиф едирләр. Шәнбә ҝүнләри хидмәтә чыханларын чоху һәфтәарасы хидмәтә чыхмадыгларындан аиләви ибадәтдә мәшг етдикләри тәгдимәни унуда биләрләр. Буна ҝөрә дә јахшы олар ки, ҝөрүшү кечирән «Мүгәддәс ибадәтимиз» вәрәгәсинин ахырынҹы сәһифәсиндәки тәгдимәләрдән бирини нәзәрдән кечирсин. Јахуд да журнал үчүн олан тәгдимәни јерли әразидә чыхан хәбәрләрә, баш верән һадисәјә вә ја кечирилән бајрама неҹә ујғунлашдырмағы вә ја ев сакини журналы ҝөтүрдүјү тәгдирдә нөвбәти ҝәлишимизә неҹә зәмин јаратмағы мүзакирә едә биләр. Әҝәр тәблиғ ҝөрүшүндәкиләрин бәзиләри артыг ај әрзиндә пајланан журналдан пајлајыбларса, онлардан гысаҹа олараг өз тәклифләрини демәләрини вә ја руһландырыҹы һадисәләр данышмаларыны хаһиш етмәк олар. Базар ҝүнләри кечирилән тәблиғ ҝөрүшләриндә исә јухарыдакы мәсләһәтләри ај әрзиндә пајланан нәшрләр үчүн дә тәтбиг етмәк олар. «Илаһи мүждә», «Аллаһын сөзүнә гулаг ас» вә диҝәр дәрс вәсаитини истәнилән ҝүн тәклиф етмәк олар. Буна ҝөрә дә ҝөрүшү апаран бу нәшрләрдән бирини тәклиф етмәјин үсулуну гысаҹа нәзәрдән кечирә биләр.

9. Јығынҹаг хүсуси кампанијада иштирак едәндә һәфтәсону нәји мүзакирә етмәк олар?

⁹ Әҝәр јығынҹаг һәфтәсону хүсуси кампанијада иштирак едирсә, ҝөрүшдә ҹари журналлары дәвәтнамә, јахуд буклетлә бирҝә тәклиф етмәјин үсулуну нәзәрдән кечирмәк вә ја ев сакини мараг ҝөстәрдији тәгдирдә нә етмәк лазым олдуғуну мүзакирә етмәк олар. Јахуд да бу ҹүр кампанијаларын фајдасыны ҝөстәрән һадисәләри данышмаг олар.

10, 11. Нә үчүн тәблиғчиләрин тәблиғ ҝөрүшүнә һазырлашмасы ваҹибдир?

¹⁰ Тәблиғчиләр неҹә һазырлашмалыдыр? Тәблиғ ҝөрүшүнүн јахшы кечмәси үчүн тәблиғчиләр дә өз өһдәләринә дүшәни етмәлидирләр. Хидмәтә габагҹадан, мәсәлән, аиләви ибадәтдә һазырлашсалар, башга тәблиғчиләрлә мараглы фикирләр бөлүшә биләрләр. Тәблиғчи һәмчинин тәблиғ ҝөрүшүнә ҝәлмәздән әввәл өзү илә журнал вә башга нәшрләр ҝөтүрмәлидир. Белә етсә, һамы вахт итирмәдән саһәјә јоллана биләр.

¹¹ Һәмчинин тәблиғ ҝөрүшүнә ҝөрүш башламаздан бир нечә дәгигә әввәл ҝәлмәк лазымдыр. Сөзсүз ки, биз јығынҹағын бүтүн ҝөрүшләринә вахтында ҝәлмәјә чалышырыг. Анҹаг тәблиғ ҝөрүшүнә ҝеҹикмәк хүсусилә нараһатчылыг төрәдир. Белә ки, гардаш тәблиғчиләри бөлүшдүрмәздән әввәл бәзи мәгамлары нәзәрә алыр. Әҝәр ҝөрүшдә иштирак едәнләрин сајы аздырса, ҝөрүшү апаран гардаш тәблиғчиләри јарымчыг галмыш саһәјә вә ја әразијә ҝөндәрмәји планлашдырыр. Әҝәр кимсә тәблиғ ҝөрүшүнә пијада ҝәлибсә вә саһә узагдырса, ону автомобили оланла тәјин едир. Әҝәр саһә горхулу әразидәдирсә, ҝөрүшү кечирән гардаш гардашлары баҹыларла, јахуд онлара јахын јердә хидмәт етмәјә тәјин едир. Сағламлығында проблеми олан тәблиғчиләри енишли-јохушлу олмајан күчәләрдә, аз мәртәбәли биналарда тәблиғ етмәјә ҝөндәрир. Јени тәблиғчиләри тәҹрүбәлиләрлә тәјин едир. Амма тәблиғчиләр ҝөрүшә ҝеҹикәрсә, онлары киминләсә тәјин етмәк үчүн бүтүн бунлары јенидән ҝөрмәк лазым ҝәләҹәк. Сөзсүз ки, һәрдән үзүрлү сәбәбләрә ҝөрә ҝеҹикирик. Лакин әҝәр ҝеҹикмәк биздә адәт һалыны алыбса, онда фикирләшмәлијик ки, ҝөрәсән, буна сәбәб нәдир: биз тәблиғ ҝөрүшләрини кифајәт гәдәр әһәмијјәтли һесаб етмирик, јохса ишләримизи габагҹадан дүзүб-гоша билмирик.

12. Әҝәр адәтән тәблиғә габагҹадан јазылырсанса, нәји нәзәрә алмағын јахшы олар?

¹² Тәблиғ ҝөрүшүнә ҝәләнләр ја өзләри ҝөрүш башламаздан әввәл хидмәтә даныша биләр, ја да гардаш ҝөрүшдә онлара әмәкдаш тәјин едә биләр. Әҝәр сән адәтән тәблиғә өзүн данышырсанса, олар ки, үрәјини ҝениш ачасан, һәмишә јахын достларынла јох, мүхтәлиф тәблиғчиләрлә әмәкдашлыг едәсән? (2 Кор. 6:11—13). Вахташыры јени тәблиғчиләрлә хидмәтә данышыб онлара пүхтәләшмәјә көмәк едә биләрсән? (1 Кор. 10:24; 1 Тим. 4:13, 15). Тәблиғә һарадан башламагла бағлы верилән ҝөстәриш дә дахил олмагла, бүтүн мәсләһәтләрә диггәтлә гулаг ас. Ҝөрүшдән сонра әмәкдашыны дәјишмә вә дәрһал саһәјә јоллан.

13. Әҝәр һәр кәс виҹданла өз өһдәсинә дүшәни етсә, тәблиғ ҝөрүшләринин һансы фајдасы олар?

¹³ Иса Мәсиһин ики-ики бөлүшдүрүб хидмәтә ҝөндәрдији 70 шаҝирд хидмәтдән «севинҹ ичиндә» гајытмышды (Лука 10:17). Сөзсүз ки, хидмәтдән габаг Исанын онларла ҝөрүшмәси онлара сәмәрәли хидмәт етмәјә көмәк етмишди. Бу ҝүн дә тәблиғ ҝөрүшләринин бизә бу ҹүр көмәји дәјир. Әҝәр һәр кәс виҹданла өз өһдәсинә дүшәни етсә, тәблиғ ҝөрүшләринин сајәсиндә «халгларын һамысына шәһадәт» вермәк үчүн үрәкләнәр, тәлиматланар вә јахшы әмәкдашлыг едәрик (Мәт. 24:14).