Суаллар Гутусу

◼ Тәблиғчи башга өлкәдә јашајан јад адамлара шаһидлик етмәк вә ја онларла Мүгәддәс Китаб дәрси кечмәк үчүн Интернетдән һәддән артыг истифадә едә биләрми?

Бәзи тәблиғчиләр тәблиғ ишинә мәһдудијјәт гојулан вә ја аз тәблиғчи олан өлкәләрдәки адамларла дәрс кечмәјә башламаг үчүн Интернетдән истифадә едирләр. Бәзи һалларда бу, јахшы нәтиҹәләр верир. Амма тәблиғчиләрин јад адамлара өз електрон үнванларыны вермәси, јахуд да Интернетдә сөһбәт отагларында онларла мүзакирәләр апармасы тәһлүкәлидир. («Мүгәддәс ибадәтимиз» вәрәгәсинин 2007-ҹи ил ијул сајынын 3-ҹү сәһифәсинә бах.) Мәгсәд мүждәни Аллаһы ахтаран инсанлара чатдырмаг олса да, белә сөһбәтләрин нәтиҹәсиндә баҹы вә ја гардаш пис инсанларын, еләҹә дә дөнүкләрин әһатәсинә дүшә биләр (1 Кор. 1:19—25; Кол. 2:8). Бундан башга, тәблиғ ишинә мәһдудијјәт, јахуд гадаға гојулан өлкәләрдә дөвләт јазышмалары нәзарәт алтында сахлаја биләр, она ҝөрә дә белә әлагә јерли баҹы-гардашлар үчүн тәһлүкә јарада биләр. Бу сәбәбдән, тәблиғчиләр башга өлкәдә јашајан адамлара тәблиғ етмәк үчүн Интернетә үз тутмамалыдырлар.

Биз башга өлкәдән ҝәлән јад адама гејри-рәсми тәблиғ етмишиксә, филиалдан башга ҹүр ҝөстәриш ҝәлмәдији һалда, чалышмамалыјыг ки, һәмин адам өз өлкәсинә гајыдандан сонра онунла һәгигәт барәдә сөһбәтимизи давам етдирәк. Әксинә она jw.org сајты васитәсилә әлавә мәлуматы неҹә әлдә етмәји, јахуд да јерли филиалла неҹә әлагә сахламағы ҝөстәрә биләрик. Һәмчинин она јашадығы јердәки ибадәт евинә ҝетмәји дејә биләрик. Дүздүр, бәзи өлкәләрдә ибадәт евләри јохдур. Әҝәр о, јашадығы јердә Шаһидләрин она баш чәкмәсини истәсә, «Зәһмәт олмаса, бу адама баш чәк» (S-43) бланкыны долдур вә јығынҹағын катибинә вер. Катиб ону jw.org сајты васитәсилә филиала ҝөндәрәҹәк. Марагланан инсанын јашадығы өлкәјә бахан филиал орадакы вәзијјәтлә танышдыр вә инсана руһани көмәји о даһа јахшы ҝөстәрә биләр. («Мүгәддәс ибадәтимиз» вәрәгәсинин 2014-ҹү ил ијун сајынын 7-ҹи сәһифәсинә вә 2011-ҹи ил нојабр сајынын 2-ҹи сәһифәсинә бах.)

Әҝәр һазырда баш чәкдијин адам башга өлкәјә көчәрсә, јахуд јалныз Интернет васитәсилә таныдығын бир адамла һазырда Мүгәддәс Китабы өјрәнирсәнсә, јухарыдакы ҝөстәришә риајәт ет. Лакин јашадығы јердә тәблиғчиләр һәмин адамла әлагә јарадана гәдәр онунла әлагә сахлаја биләрсән. Бунунла белә инсан тәблиғ ишинә мәһдудијјәт вә ја гадаға гојулан јердә јашајырса, мәктубла, телефонла вә ја електрон ҹиһазлары васитәсилә Мүгәддәс Китаб мөвзуларыны мүзакирә едәркән сон дәрәҹә еһтијатлы олмаг лазымдыр (Мәт. 10:16).