Пејғәмбәрләрдән нүмунә ҝөтүрүн — Һәбгуг
1. Биз Һәбгуг пејғәмбәр кими һансы вәзијјәтлә үзләширик?
1 Дүнјада баш алыб ҝедән писликләрлә үзләшәндә биз дә өзүмүзү Һәбгуг пејғәмбәр кими һисс едирик. О, Јеһовадан сорушмушду: «Нијә бу зүлм-ситәми ҝөтүрүрсән, нијә гојурсан ҝөзләрим јаманлыг ҝөрсүн?» (Һәб. 1:3; 2 Тим. 3:1, 13). Һәбгуг пејғәмбәрин чатдырдығы хәбәр вә онун сәдагәти барәдә дүшүнмәк Јеһованын һөкм ҝүнүнү ҝөзләдијимиз мүддәтдә бизә мөһкәм галмаға көмәк едәҹәк (2 Бут. 3:7).
2. Иманла јашадығымызы неҹә ҝөстәрә биләрик?
2 Иманла јашајын. Һәбгуг пејғәмбәр пис вәзијјәтләрлә үзләшәндә руһдан дүшмәди, әксинә, руһани сајыглығыны вә фәаллығыны горуду (Һәб. 2:1). Јеһова пејғәмбәри әмин етди ки, Онун сөзү дүз вахтында јеринә јетәҹәк вә «салеһ... сәдагәти [«иманы», һашијә] сајәсиндә јашајаҹаг» (Һәб. 2:2—4). Бу сөзләр ахырзаманын сонунда јашајан бизләр үчүн һансы мәнаны кәсб едир? Сонун мүтләг ҝәләҹәјинә әмин олмаг онун нә вахт ҝәләҹәјини билмәкдән ваҹибдир. Иман бизи ајыг галмаға вә хидмәти биринҹи јерә гојмаға тәшвиг едир (Ибр. 10:38, 39).
3. Нәјә ҝөрә хидмәтдә севинҹимизи горумалыјыг?
3 Севинҹиниз Јеһова олсун. Мәҹуҹ өлкәсиндән олан Јәҹуҹ Јеһованын халгына һүҹум едәндә иманымыз сынанаҹаг (Һизг. 38:2, 10—12). Тоггушмалар заманы һамы, һәтта ахырда галиб ҝәлән тәрәф дә чәтинликләрлә үзләшир. Ола билсин, гытлыг олаҹаг, мал-мүлкүмүз әлимиздән чыхаҹаг вә һәјат сәвијјәси ашағы дүшәҹәк. Бу чәтинликләр заманы биз неҹә давранаҹағыг? Һәбгуг пејғәмбәр ону гаршыда чәтинликләрин ҝөзләдијини билирди, бунунла белә, о, Јеһоваја хидмәтдә севинҹини горумаға гәтијјәтли иди (Һәб. 3:16—19). «Јеһованын бәхш етдији севинҹ» бизә дә ҝәләҹәкдә үзләшәҹәјимиз чәтинликләрә дөзмәјә көмәк едәҹәк (Нәһ. 8:10; Ибр. 12:2).
4. Инди вә ҝәләҹәкдә нәдән севинҹ дуја биләрик?
4 Јеһованын һөкм ҝүнүндә хилас етдији инсанлар сонра да Онун јоллары барәдә билик алаҹаглар (Һәб. 2:14). Дириләнләр дә Јеһова һагда өјрәнәҹәкләр. Ҝәлин индидән һәр имкандан истифадә едиб Јеһова вә Онун һејрәт доғуран ишләри барәдә данышаг (Зәб. 34:1; 71:17).