Пејғәмбәрләр Аллаһы бизә танытмышлар
Гәдимдә Аллаһ пејғәмбәрләрә мүһүм хәбәрләр назил етмишди. Бу хәбәрләр васитәсилә биз Аллаһдан немәт алмағын үсулларыны өјрәнә биләрик. Ҝәлин ҝөрәк үч пејғәмбәрдән нә өјрәнирик.
ИБРАҺИМ ПЕЈҒӘМБӘР
Аллаһ ајры-сечкилик етмир, бүтүн бәшәријјәтә немәт вермәк истәјир.
Аллаһ Ибраһим пејғәмбәрә вәд едиб демишди: «Јер үзүнүн бүтүн халглары сәнин васитәнлә мүбарәк олаҹаг» (Јарадылыш 12:3).
Нә өјрәнирик? Аллаһ инсанлары чох севир вә Она итаәт едән һәр кәси — кишиләри, гадынлары, ушаглары мүбарәк гылмаг истәјир.
МУСА ПЕЈҒӘМБӘР
Аллаһ рәһмлидир вә Ону танымаг истәјәнләрә јар олур.
Гадир Аллаһ Муса пејғәмбәрә бөјүк мөҹүзәләр ҝөстәрмәк гүдрәти вермишди. Бунунла белә, пејғәмбәр Аллаһа дуа едиб демишди: «Хаһиш едирәм, јолларыны мәнә ач, гој Сәни јахшы таныјым вә бундан сонра да Сәни разы салым» (Чыхыш 33:13). Аллаһ Муса пејғәмбәрин бу хаһишиндән разы галмыш вә она Өз јолларыны, хүсусијјәтләрини әјан етмишди. Мәсәлән, пејғәмбәр Аллаһын «рәһмли вә мәрһәмәтли» олдуғуну өјрәнмишди (Чыхыш 34:6, 7).
Нә өјрәнирик? Аллаһ Ону танымаг истәјән кәсләрә — киши, гадын вә ја ушаг олмасындан асылы олмајараг, һәр кәсә Өзүнү таныдыр. Кәламында дүзҝүн ибадәтин јолуну ҝөстәрир вә инсанлара лүтф ҝөстәрмәјә һазыр олдуғуну билдирир.
ИСА МӘСИҺ
Иса Мәсиһ шәфгәтлә һәр ҹүр хәстәлијә шәфа верирди
Иса Мәсиһ һагда, ҝөрдүјү ишләр вә тәлимләри барәдә өјрәнмәк Аллаһын әбәди немәтләринә гапы ачыр.
Аллаһын Кәламында Иса Мәсиһин һәјаты вә тәлимләри һаггында ҝениш мәлумат јер алыр. Мәсиһ Аллаһын ҝүҹү илә бөјүк мөҹүзәләр ҝөстәрирди. Мәсәлән, корларын ҝөзүнү, карларын гулағыны ачыр, шикәстләрә шәфа верирди. Һәтта өлүләри дә дирилдирди. Бүтүн бунлар Аллаһын ҝәләҹәкдә бәшәријјәтә верәҹәји немәтләрин көлҝәси иди. Иса Мәсиһ бу немәтләри алмағын јолуну ҝөстәрәрәк демишди: «Әбәди һәјат одур ки, Сәни, тәк ҝерчәк Аллаһы вә ҝөндәрдијин Иса Мәсиһи танысынлар» (Јәһја 17:3).
Иса Мәсиһ шәфгәтли, меһрибан вә хејирхаһ иди. О, инсанлары сәсләјиб дејирди: «Мәндән өјрәнин, чүнки мән һәлим вә гәлбән тәвазөкарам. Онда ҹаныныз тәравәтләнәр» (Мәтта 11:29) Кишили-гадынлы, гоҹалы-ҹаванлы һәр кәс онун бу дәвәтинә һај вериб јанына ахышырды. Бахмајараг ки, о дөврдә гадынларла адәтән пис рәфтар едирдиләр, Иса Мәсиһ гадынлара гаршы һөрмәтҹил вә хејирхаһ иди.
Нә өјрәнирик? Иса Мәсиһ инсанлара дәрин мәһәббәт бәсләјирди. О, инсанларла рәфтарда бизә ҝөзәл нүмунә гојмушду.
ИСА МӘСИҺ АЛЛАҺ ДЕЈИЛ
Мүгәддәс Китабда дејилир ки, «тәк бир Аллаһ вар». Иса Мәсиһ исә Аллаһын елчисидир (1 Коринфлиләрә 8:6). Мәсиһ өзү дә бирмәналы шәкилдә билдирмишди ки, Аллаһ ондан үстүндүр вә ону јер үзүнә ҝөндәрән Аллаһдыр (Јәһја 11:41, 42; 14:28)a.