Аллаһын немәтләрини әбәдијјән дадын

Аллаһ Ибраһим пејғәмбәрә вәд етмишди ки, «јер үзүнүн бүтүн халглары» онун нәслиндән ҝәлән бир шәхсин васитәсилә мүбарәк олаҹаг (Јарадылыш 22:18). Сөһбәт кимдән ҝедир?

Тәхминән 2000 ил бундан өнҹә Аллаһ Ибраһим пејғәмбәрин нәслиндән ҝәлән Иса Мәсиһә бөјүк мөҹүзәләр ҝөстәрмәк ҝүҹү вермишди. Бу мөҹүзәләр Ибраһим пејғәмбәрә верилән вәдин Иса Мәсиһ васитәсилә јеринә јетәҹәјинә дәлаләт едирди (Галатијалылара 3:14).

Иса Мәсиһин мөҹүзәләрини ҝөрән инсанлар шәксиз инанырдылар ки, Аллаһ онун васитәсилә бәшәријјәти мүбарәк гылаҹаг. Онун етдији мөҹүзәләр һәмчинин ҝөстәрирди ки, Аллаһ бәшәријјәтә һансы әбәди немәтләри бәхш едәҹәк. Иса Мәсиһин ҝөстәрдији мөҹүзәләрдән онун неҹә бир шәхсијјәт олдуғуну ҝөрә биләрик.

Гајғыкеш иди. Иса Мәсиһ хәстәләрә шәфа верирди.

Бир дәфә ҹүзама тутулмуш бир нәфәр Иса Мәсиһә јахынлашыб ону сағалтмасыны хаһиш етди. Иса она тохунуб деди: «Истәјирәм. Тәмизлән. О андаҹа ҹүзам кечди, һәмин адам тәмизләнди» (Марк 1:40—42).

Әлиачыг иди. Иса Мәсиһ аҹлары дојурурду.

Иса инсанларын аҹлыг чәкмәсини истәмирди. Бир нечә дәфә о, аз сајда чөрәји вә балығы мөҹүзәви сурәтдә чохалдараг минләрлә инсаны једиздирмишди (Мәтта 14:17—21; 15:32—38). Һамы дојмушду, һәлә үстәлик артыг да галмышды.

Шәфгәтли иди. Иса Мәсиһ өлүләри дирилдирди.

Бир дул гадынын ҝөзүнүн ағы-гарасы оғлу өләндә Иса Мәсиһин гадына јазығы ҝәлиб оғлуну дирилтмишди (Лука 7:12—15).