МӘСИҺИ ҺӘЈАТЫ
Чохдилли әразидә әмәкдашлыг
Чох вахт инсанлар Падшаһлыг хәбәрини доғма дилдә ешидәндә даһа һәвәслә гулаг асырлар. Јәгин бу сәбәбә ҝөрә ерамызын 33-ҹү илинин Әллинҹи ҝүн бајрамында Јеһова тәдбир ҝөрдү ки, «дүнјанын һәр өлкәсиндән ҝәлмиш мөмин јәһудиләр» мүждәни өз ана дилиндә ешитсин, бахмајараг ки, онларын һамысы, ола билсин, ја ибрани, ја да јунан дилини билирди (Һв 2:5, 8). Бу ҝүн дә, елә ола биләр ки, чохдилли әразиләрдә олан мүхтәлифдилли јығынҹаглар ејни әразидә тәблиғ етсин. Бу јығынҹагларын тәблиғчиләри бир-бири илә әмәкдашлыг етмәлидир ки, һәм әразидәки һәр кәсә шаһидлик версинләр, ејни заманда тез-тез ҝәлиб ҝетмәклә орада јашајан инсанлары нараһат етмәсинләр. Буна неҹә наил олмаг олар?
Мәсләһәтләшин (Мс 15:22). Мүждәнин тәблиғини мүтәшәккил шәкилдә һәјата кечирмәк үчүн хидмәт нәзарәтчиләри бир-бири илә мәсләһәтләшиб мүәјјән систем јаратмалыдырлар. Әҝәр әразиләри кичикдирсә, башга дилдә тәблиғ едән јығынҹаглар, ола билсин, хаһиш едәҹәк ки, сизин јығынҹаг онларын саһәсинә аид олан евләрдә тәблиғ етмәсин. Лакин онларын саһәси бөјүк әразини әһатә етдији үчүн мүнтәзәм олараг саһәни ишләјә билмирләрсә, сизин јығынҹагдан хаһиш едә биләрләр ки, онларын саһәсинә аид олан евләрә дә тәблиғ едәсиниз, анҹаг кимсә мараг ҝөстәрсә, онлара мәлумат верәсиниз (od с. 93, абз. 37). Јахуд хаһиш едә биләрләр ки, јығынҹағыныз онларын дилиндә данышан адамлары тапыб үнванларыны онларын јығынҹағына өтүрсүн (km 7/12 с. 5, чәр.). Нәзәрә алын ки, бәзән ејни евдә мүхтәлиф дилләрдә данышан инсанлар јашајыр. Гејд едәк ки, саһәни ишләмәк үчүн ҝөрүлән тәдбирләр мәлумат мәхфилијинин горунмасы илә бағлы дөвләт ганунларына ујғун олмалыдыр.
Әмәкдашлыг един (Еф 4:16). Хидмәт нәзарәтчисиндән алдығыныз һәр ҝөстәришә дәгигликлә әмәл един. Әҝәр Мүгәддәс Китабы өјрәтдијиниз адам сизин јығынҹағын дилиндә јох, башга дилдә данышырса, ону јахын әразидә һәмин дилдә кечирилән јығынҹаға, јахуд група өтүрсәниз, о даһа тез инкишаф едәр.
Һазырлашын (Мс 15:28; 16:1). Әҝәр ев сакини башга дилдә данышырса, мүждәни чатдырмаг үчүн әлиниздән ҝәләни един. Әввәлҹәдән тәхмин един ки, саһәдә гаршыныза һансы дилләрдә данышан адамлар чыха биләр. Електрон ҹиһазыныза һәмин дилләрдә Мүгәддәс Китаб вә видеолар јүкләјин. Һәмчинин JW Language тәтбигетмәсиндән истифадә едәрәк мүхтәлиф дилләрдә саламлашмағы өјрәнин.