«Инди хидмәти чох севирәм!»

СЕВИНҸИМИ ИТИРИРӘМ

Јенијетмәлик дөврүнә ҝирәндә Јеһова илә мөһкәм мүнасибәтләрим зәифләмәјә башлады. Мәнә елә ҝәлирди ки, синиф јолдашларым там азаддыр, мән исә нәдәнсә мәһрумам. Санки валидејнләримин гојдуғу гајда-ганунлар, мәсиһи нормалары әл-голуму бағлајырды. Руһани ишләр мәнә ағыр јүк кими ҝәлирди. Дүздүр, Јеһованын варлығына шүбһә етмирдим, амма Она јахын да дејилдим.

Чох аз хидмәт едирдим, әсас о иди ки, гејри-фәал олмајым. Хидмәтә һазырлашмамыш ҝедирдим, буна ҝөрә дә сөһбәтә башламаг вә давам етдирмәк мәним үчүн чәтин иди. Ҝет-ҝедә хидмәтим даһа да бәһрәсиз олду, артыг севинҹ дујмурдум, тәблиғә олан-галан һәвәсим дә өлдү. Өз-өзүмә фикирләширдим: «Неҹә ола биләр ки, инсан һәр һәфтә, һәр ај тәблиғә ҝетсин?»

17 јашым оланда сәрбәст јашамаг арзусу илә әшјаларымы јығыб евдән чыхдым. Австралијаја көчдүм. Мәним евдән ајрылмағым валидејнләрим үчүн чох ағыр иди, онлар мәнә ҝөрә нараһат иди. Амма ејни заманда үмид едирдиләр ки, мән орада да хидмәтими давам етдирәҹәјәм.

Австралијада руһани ҹәһәтдән даһа да зәифләдим. Јығынҹаглара ајда-илдә бир дәфә ҝедирдим. Бу ҝүн јығынҹаға ҝәлән, сабаһ да ҝеҹә клубларында ички ичән, рәгс едән ҝәнҹләрә гошулмаға башладым. Ҝеријә бојланыб баханда баша дүшүрәм ки, бир ајағым һәгигәт јолунда иди, бир ајағым да дүнјада. Һеч бириндә дә өзүмү раһат һисс етмирдим.

ҜӨЗЛӘМӘДИЈИМ ҺАЛДА ВАҸИБ ҺӘГИГӘТИ БАША ДҮШҮРӘМ

Тәхминән ики ил сонра бир баҹы илә таныш олдум. Танышлығымыз гыса чәксә дә, о өзү дә билмәдән мәни һәјатым барәдә дүшүндүрдү. Бу баҹы рајон нәзарәтчимизин јолдашы Тамара иди. Онлар бир һәфтәлик биздә гонаг галмышдылар. О вахт мән беш субај баҹы илә бир евдә галырдым. Гардаш јығынҹаг ишләри илә мәшғул оланда Тамара бизим јанымызда олурду. Бирҝә дејиб-ҝүлүрдүк, әла иди. О, чох ағыллы, дүшүнҹәли инсан иди, онунла данышмаг раһат иди. Мәәттәл галмышдым ки, руһани ҹәһәтдән јеткин бир инсан неҹә белә шән ола биләр.

Тамара чох шөвглү инсан иди. Онун һәгигәтә вә хидмәтә севҝиси башгаларына да сирајәт едирди. О, Јеһоваја вар ҝүҹү илә хидмәт етдији үчүн хошбәхт иди, мән исә әксинә, аз хидмәт етдијим үчүн хошбәхт дејилдим. Онун мүсбәт әһвали-руһијјәси, дујдуғу әсл хошбәхтлик һәјатыма ҝүҹлү тәсир бағышлады. Онун нүмунәси мәнә Мүгәддәс Китабдакы ваҹиб бир һәгигәти баша дүшмәјә көмәк етди: Јеһова истәјир ки, һамымыз Она севинҹлә, шадјаналыгла хидмәт едәк (Зәб. 100:2).

ЈЕНИДӘН ХИДМӘТӘ СЕВҜИМ ЈАРАНЫР

Мән дә истәјирдим Тамара кими хошбәхт олум. Амма бунун үчүн һәјатымда бөјүк дәјишикликләр етмәли идим. Бу, бирдән-бирә алынмады, амма кичик дәјишикликләрдән башлајараг буна наил олдум. Хидмәтә габагҹадан һазырлашырдым, вахташыры көмәкчи өнҹүл кими хидмәт едирдим. Бунун сајәсиндә ҝет-ҝедә һәјәҹаным азалды вә әминлијим артды. Мүгәддәс Китабдан даһа чох истифадә етдикҹә хидмәт мәнә зөвг верирди. Бир мүддәт сонра һәр ај көмәкчи өнҹүл кими хидмәт етмәјә башладым.

Јеһоваја хидмәтдә ҹан гојан, бундан севинҹ дујан һәр јашда олан баҹы-гардашларла достлашдым. Онларын нүмунәси мәнә көмәк етди ки, һәјатда даһа ваҹиб шејләри ајырд едим, мүталиәјә мүнтәзәм вахт ајырым. Хидмәтә севҝим артды вә беләҹә, өнҹүл хидмәтинә башладым. Узун илләрдән сонра илк дәфә иди ки, јығынҹагда өзүмү хошбәхт, евимдәки кими һисс едирдим.

ДАИМИ ӨНҸҮЛ ӘМӘКДАШЫ ТАПЫРАМ

Бир ил сонра Алекслә таныш олдум. О, сәмими, меһрибан инсан иди, Јеһованы вә хидмәти севирди. Һәмин вахт Алекс јығынҹаг хидмәтчиси иди вә алты ил иди ки, өнҹүл кими хидмәт едирди. Һәмчинин о, бир мүддәт тәблиғчиләрә тәләбат олан әразидә, Малавидә хидмәт етмишди. Орада о, хүсуси тәјинатлы мүждәчиләрлә әмәкдашлыг едирди. Онлар Алексә ҝөзәл нүмунә олмушдулар. Вә ону тәшвиг етмишдиләр ки, бундан сонра да Падшаһлыг ишини һәјатында һәр шејдән үстүн тутсун.

2003-ҹү илдә Алекслә аилә гурдум. О вахтдан тамвахтлы хидмәти дајандырмамышыг. Бу ҝүнә кими чохлу ҝөзәл шејләр өјрәнмишик. Јеһова башымыздан һәр ҹүр немәтләр төкүб.

БАШГА НЕМӘТЛӘРӘ АЧЫЛАН ГАПЫ

2009-ҹу илдә Индонезија архипелагында јерләшән кичик өлкәјә, Шәрги Тимора хүсуси тәјинатлы мүждәчи кими тәјин олундуг. Һәм тәәҹҹүбләндик, һәм севиндик, һәм дә һәјәҹанландыг. Беш ајдан сонра пајтахт шәһәр Дилијә ҝәлдик.

Бурада һәјат тамам башга ҹүр иди. Биз јени мәдәнијјәтә, јени дилә, јени мәтбәхә, јени һәјат шәраитинә ујғунлашмалы идик. Хидмәтдә тез-тез јохсул, савадсыз, зүлмә мәруз галмыш инсанларла растлашырдыг. Һәмчинин мүһарибәнин вә зоракылығын нәтиҹәсиндә физики вә емосионал јара алан инсанлара раст ҝәлирдик a.

Хидмәтимиз әла ҝедирди. Мәсәлән, бир дәфә Маријаb адлы 13 јашлы кәдәрли бир гызла таныш олдум. Онун анасы бир нечә ил әввәл вәфат етмишди. Атасыны исә тәк-түк һалларда ҝөрүрдү. О јашда олан бүтүн ушаглар кими, Марија да билмирди һәјатдан нә истәјир. Јадымдадыр, бир дәфә о, ағлајараг дәрдини данышырды. Амма онун дилиндә сәлис даныша билмәдијим үчүн һеч нә баша дүшмәдим. Дуа едиб Јеһовадан хаһиш етдим ки, ону руһландырмаға мәнә көмәк етсин. Сонра она тәсәлливериҹи ајәләр охудум. Нөвбәти илләр әрзиндә һәгигәтин онун әһвали-руһијјәсини, хариҹи ҝөрүнүшүнү вә һәјатыны неҹә јахшылыға доғру дәјишдијини ҝөрдүм. О вәфтиз олунду. Вә һал-һазырда өзү башгаларына Мүгәддәс Китаб дәрси кечир. Инди онун бөјүк руһани аиләси вар вә севилдијини һисс едир.

Јеһова Шәрги Тиморда тәблиғ ишини аванд едир. Бахмајараг ки, тәблиғчиләрин әксәријјәти сон он илдә вәфтиз олунуб, онларын чоху өнҹүл, јығынҹаг хидмәтчиси вә ја ағсаггал кими хидмәт едир. Диҝәрләри тәрҹүмә офисиндә ишләјир вә руһани гиданын јерли дилләрә тәрҹүмә олунмасына көмәклик ҝөстәрир. Онларын јығынҹагда нәғмә охудуғуну, ҝүләр үзләрини вә руһани инкишафыны ҝөрәндә чох севинирдим.

«БУНДАН ҜӨЗӘЛ ҺӘЈАТ ТӘСӘВВҮР ЕДӘ БИЛМӘЗДИМ»

Австралија илә мүгајисәдә Шәрги Тиморда һәјат чох фәргли иди, амма бундан ҝөзәл һәјат тәсәввүр едә билмәздим. Елә олурду ки, миндијимиз автобуслар ағзынаҹан адамларла долу олурду, әлләриндә исә базардан алдыглары гахаҹ едилмиш балыг вә тәрәвәзләрлә долу зәнбилләр. Бәзән Мүгәддәс Китаб дәрсләри кечдијимиз евләр исти вә рүтубәтли иди, дөшәмәси чиркли олурду, евдә тојуг-ҹүҹә ҝәзирди. Чәтинликләрин олмасына бахмајараг, мән тез-тез фикирләширдим: «Бу, мөһтәшәмдир!»

Валидејнләримә миннәтдарам. Чүнки ҝеријә бојланыб баханда ҝөрүрәм ки, онлар мәнә Јеһованын јолларыны өјрәтмәк үчүн әлләриндән ҝәләни едибләр, мәнә дәстәк олублар, һәтта чәтин кечән јенијетмәлик илләримдә дә. Мәсәлләр 22:6 ајәсиндә јазыланлар мәним вәзијјәтимә ујғундур. Анам да, атам да Алекслә вә мәнимлә фәхр едирләр. Онлар хошбәхтдирләр ки, биз Јеһоваја хидмәт едирик. 2016-ҹы илдән бәри биз Австралазија филиалынын әразисиндә сәјјар хидмәтдәјик.

Инана билмирәм ки, нә вахтса тәблиғ иши мәнә дарыхдырыҹы ҝәлиб. Инди хидмәти чох севирәм! Инди баша дүшүрәм ки, инсанын һәјатда пис ҝүнү дә, хош ҝүнү дә ола биләр, амма әсл севинҹи јалныз Јеһоваја сәмими-гәлбдән ибадәт едәндә дујур. Доғрудан да, Алекслә бирҝә Јеһоваја хидмәт етдијим сон 18 ил һәјатымын ән хошбәхт илләридир. Давудун Јеһоваја дедији сөзләрин нә гәдәр доғру олдуғуну инди даһа јахшы баша дүшүрәм: «Сәнә пәнаһ ҝәтирәнләр исә севинәр, һеј севинҹ сәдалары уҹалдар... Адыны әзиз тутанларын һәдсиз севинҹи Сән оларсан» (Зәб. 5:11).