НИФРӘТ ЗӘНҸИРИНИ НЕҸӘ ГЫРМАГ ОЛАР?

4 | Аллаһын көмәји илә нифрәтә галиб ҝәлин

Тәлим:

«Руһун бәһрәси исә будур: мәһәббәт, севинҹ, сүлһ, сәбир, хејирхаһлыг, јахшылыг, иман, мүлајимлик, өзүнә һаким олмаг» (ГАЛАТИЈАЛЫЛАРА 5:22, 23).

Мәнасы:

Нифрәт зәнҹирини Аллаһын көмәји илә гырмаг мүмкүндүр. Аллаһын мүгәддәс руһунун сајәсиндә биздә ҝөзәл кејфијјәтләр јарана биләр. Өз ҝүҹүмүзә бу кејфијјәтләрә јијәләнмәк, демәк олар ки, мүмкүн дејил. Буна ҝөрә дә нифрәтә өз ҝүҹүнүзлә галиб ҝәлмәјә чалышмајын. Аллаһдан көмәк истәјин. Белә етсәниз, сиз дә бир мөмин инсанын сөзләринә шәрик олаҹагсыныз. О демишди: «Мәнә гүввәт верәнин сајәсиндә һәр шејә ҝүҹүм чатыр» (Филиппилиләрә 4:13). Беләҹә, сиз дә әминликлә дејәҹәксиниз: «Мәним көмәјим... Јеһовадан ҝәлир» (Зәбур 121:2).

Сиз нә едә биләрсиниз?

«Јеһова Аллаһ мәним кими гәддар бирисини сүлһпәрвәр бир инсана чевирди» (ВАЛДО).

Јеһоваја дуа едиб, Ондан мүгәддәс руһ истәјин (Лука 11:13). Хаһиш един ки, сизә ҝөзәл кејфијјәтләр јетишдирмәјә көмәк етсин. Мүгәддәс Китабы арашдырын, ҝөрүн нифрәтә галиб ҝәлмәјә көмәк едән кејфијјәтләр, мәсәлән, мәһәббәт, сүлһ, сәбир вә тәмкин барәдә орада нә јазылыб. Бу кејфијјәтләри өз һәјатынызда тәзаһүр етдирмәјә чалышын. Һәмчинин өзүндә бу кејфијјәтләри јетишдирмәјә чалышан инсанларла отуруб-дурун. Бу ҹүр инсанлар сизи мәһәббәтә вә јахшы ишләрә тәшвиг едәҹәкләр (Ибраниләрә 10:24).

Реал һәјатдан нүмунә. ВАЛДО

Гәддарлыгдан әл чәкиб

Чәкдији әзаб-әзијјәтләр Валдонун үрәјини нифрәтлә долдурмушду. О, наркотик алверчиләри илә тез-тез далашырды. Валдо дејир: «Бир дәфә рәгиб гулдур дәстәси мәни өлдүрмәк үчүн пис ад газанмыш муздлу бир гатил тутмушду. Јалныз бычаг зәрбәси алараг ҹанымы өлүмүн пәнҹәсиндән ҝүҹ-бәла илә гуртардым».

Валдонун һәјат јолдашы Јеһованын Шаһидләри илә Мүгәддәс Китабы өјрәнмәјә башлајанда бу онун хошуна ҝәлмәди. О дејир: «Шаһидләри ҝөрән ҝөзүм јох иди вә дәфәләрлә онлары тәһгир етмишәм. Буна бахмајараг, онлар һәр дәфә ҝөзләмәдијим һалда мәнимлә мүлајим давранырдылар».

Сонралар Валдо да Мүгәддәс Китабы өјрәнмәјә башлады. О дејир: «Өјрәндикләрими тәтбиг етмәк чох чәтин иди. Дүшүнүрдүм ки, гәзәбимин өһдәсиндән һеч вахт ҝәлә билмәјәҹәјәм». Анҹаг Мүгәддәс Китабдан өјрәндији бир фикир она ҝүҹлү тәсир етди.

Валдо дејир: «Ҝүнләрин бир ҝүнү мәнә Мүгәддәс Китабы өјрәдән Алехандро гардаш Галатијалылара 5:22, 23 ајәләрини охумағымы хаһиш етди... Алехандро изаһ етди ки, мәним бу хүсусијјәтләри инкишаф етдирмәјим өз ҝүҹүм сајәсиндә јох, Јеһованын мүгәддәс руһунун сајәсиндә мүмкүндүр. Бу һәгигәт мәним дүшүнҹәмдә көклү дәјишикликләр етди».

Валдо Аллаһын ҝүҹүнә архаланараг нифрәт зәнҹирини гырды. О дејир: «Дәјишилдијими ҝөрән гоһумларым вә көһнә достларым ҝөзләринә инана билмирләр». Һәмчинин әлавә едир: «Јеһова Аллаһ мәним кими гәддар бирисини сүлһпәрвәр бир инсана чевирди».