Рәһбәрлик Шурасынын мәктубу
Әзиз һәмиманлыларымыз!
Каинатын Һөкмдары олан Јеһованын адыны дашымаг бизим үчүн неҹә дә бөјүк шәрәфдир! Бу, әбәди, сарсылмаз вә өзлүјүндә јеҝанә аддыр. Мәһз Јеһова бизә бу ады дашымаға изин вериб. Хүсусилә дә, 1931-ҹи илдән етибарән биз бу бәнзәрсиз адла танынырыг (Јешаја 43:10). Биз Јеһованын Шаһидләри адыны дашымағымызла фәхр едирик.
Иблис усанмадан Јеһованын адыны јох етмәјә чалышыр. Онун һакимијјәти алтында олан халглар Јеһованын адыны инкар едирләр. Јалан динин дүнја империјасы олан Бөјүк Бабил Аллаһын адына нифрәт едир вә Мүгәддәс Китабын бир чох тәрҹүмәләриндән бу ады силиб. Бунун әксинә олараг, Иса Атасынын адыны уҹа тутур вә шаҝирдләринә өјрәтдији нүмунәви дуада илк олараг бу ады гејд етмишди. О сөјләмишди: «Белә дуа един: “Еј ҝөјләрдә олан Атамыз, адын мүгәддәс тутулсун”» (Мат. 6:9). Сонралар, о, Атасына сәмими дуасында белә демишди: «Дүнјадан Мәнә вердијин адамлара Сәнин адыны ачдым» (Јәһ. 17:6). Исанын ҝөзәл нүмунәсини изләјәрәк биз Јеһованын адыны бүтүн дүнјада уҹалтмаға һәмишәкиндән даһа чох гәти гәрарлыјыг.
‘Мүждәјә әсаслы сурәтдә шәһадәт ет’ сөзләри, 2009-ҹу илин иллик ајәси кими, бизи хидмәтимизи там шәкилдә иҹра етмәјә тәшвиг етмишди (Һәв. иш. 20:24, ЈД). Шүбһәсиз ки, өтән хидмәт илиндә Јеһова бизим ҹәһдләримизи бол-бол хејир-дуаландырыб. Бүтүн дүнјада Јеһованын адына иззәт вә шәрәф ҝәтирән бөјүк шаһидлик верилмишди. Јени ән јүксәк сајда тәблиғчи, 7 313 173 нәфәр бир ағыздан һамыја тәблиғ едир вә ҝүндәлик гаршылашдыглары чохсајлы проблемләрин һәллини ахтаран сәмими инсанлары өјрәдирләр. Мәсиһин өлүмүнүн Хатирә Ҝеҹәсинә 18 168 323 нәфәрин ҝәлмәси ҝөстәрир ки, бу пис системин сону ҝәлмәздән өнҹә һәлә милјонларла инсанын Јеһованын адыны чағыраҹағына үмид едә биләрик.
Һәлә ки, Јеһова изин, верир биз саһәмиздәки инсанлара баш чәкмәк үчүн һәр фүрсәтдән истифадә едәрәк Падшаһлыг һаггында хош хәбәри сәјлә тәблиғ етмәјә давам едәҹәјик (Мат. 24:14; Марк 13:10). Евдән-евә, күчәдә, мәктуб вә телефон васитәсилә вә ја гејри-рәсми шаһидлик вермәјимиздән асылы олмајараг, Јеһованын адыны вә нијјәтини баҹардығымыз гәдәр даһа чох адама чатдырмаға чалышырыг.
Јеһованын чох тез бир заманда Өз адыны иззәтләндирәҹәјинә инанмаға там әсасымыз вар (Јез. 36:23). Аллаһын адына ләкә ҝәтирән адамларын сусаҹағы вахт сүрәтлә јахынлашыр. Јеһованын адыны иззәтләндирән вә Онун һөкмранлығыны дәстәкләјән бүтүн садиг хидмәтчиләри үчүн бу неҹә дә ҝөзәл ҝүн олаҹаг!
Јеһованын Өз халгына мәһәббәт долу гајғысы 2009-ҹу илдә бүтүн дүнјада кечирилән «Ојаг дурун!» адлы вилајәт вә бејнәлхалг конгресләриндән ајдын ҝөрүнмүшдү. Бу конгресләр теократијанын тарихиндә дөнүш нөгтәси олмуш вә бизи Јеһованын ҝүнүнү ҝөзләјәрәк даһа ојаг олмаға тәшвиг етмишдир (Марк 13:37; 1 Салон. 5:1, 2, 4).
Һәгигәтән дә, Јеһова бизә гаршы чох хејирхаһдыр. Онун сајәсиндә үрәјимиз севинҹлә долуб дашыр. О, бизи јашыл чәмәнләрдә динҹәлдир вә сакит ахан сулар кәнарында ҝәздирир (Мәз. 23:1, 2; 100:2, 5).
Әмин олун ки, нөвбәти ајларда Падшаһлыг ишиндә фәал иштирак едәркән Јеһова һәмишә олдуғу кими хејир-дуасыны сиздән әсирҝәмәјәҹәк!
Үмумдүнја гардашлығымыза аловлу мәсиһчи мәһәббәти илә, Сизин гардашларыныз, Јеһованын Шаһидләринин Рәһбәрлик шурасы