«Јеһованын мәрһәмәтли вә бағышлајан олдуғуну өјрәндим»

КЕЧМИШИМ.

Мән Монреал шәһәринин касыб бир әразисиндә бөјүмүшәм. Ҹәми алты ајлыг икән атам вәфат етди. Бүтүн јүк анамын үстүндә галды. Аиләнин сонунҹу, сәккизинҹи ушағы идим.

Бөјүдүкҹә наркотик чәкир, гумар ојнајыр, зоракылыг едир вә ҹинајәткарларла отуруб-дурурдум. Он јашымда фаһишәләрә вә сәләмчиләрә хәбәр апарыб-ҝәтирирдим. Тез-тез јалан данышыр вә һәр фүрсәтдә инсанлара кәләк ҝәлирдим. Мән бундан ләззәт алырдым, бу, мәнимчүн нәшә кими иди.

14 јашымда артыг маһир фырылдагчы идим. Мәсәлән, гызыл өртүклү саатлары, биләрзикләри вә үзүкләри алыб, үзәринә 14 каратлыг олдуғуну билдирән әјар дамғасы вурурдум, сонра исә күчәләрдә, тиҹарәт мәркәзләринин дајанаҹагларында гызыл ады илә сатырдым. Асан јолла пул газанмаг хошума ҝәлирди. Бир дәфә бир ҝүнә 10 000 доллар газанмышдым!

15 јашым оланда мәни интернатдан говдулар, галмаға јерим јох иди. Күчәләрдә, паркларда, ја да танышларымын евиндә галырдым.

Фырылдагчылыг етдијим үчүн полисләр тәрәфиндән тез-тез сорғу-суал олунурдум. Анҹаг оғурлуг мал сатмадығым үчүн һеч вахт һәбсә дүшмүрдүм. Бунунла белә, фырылдагчылыг, сахтакарлыг вә ганунсуз сатыш етдијим үчүн дәфәләрлә бөјүк ҹәримәләр өдәмишәм. Һеч кәсдән горхмадығымдан, һәтта сәләмчиләр үчүн пул јығырдым. Бу тәһлүкәли иди, она ҝөрә дә һәрдән јанымда силаһ ҝәздирирдим. Бәзи мәсәләләрдә ҹинајәткар дәстә илә әлбир олурдум.

МҮГӘДДӘС КИТАБ ҺӘЈАТЫМЫ ДӘЈИШДИ.

Мүгәддәс Китабла илк дәфә 17 јашымда таныш олдум. Мән севҝилимлә бирликдә јашајырдым. О, Јеһованын Шаһидләри илә бирликдә Мүгәддәс Китаб дәрсинә башлады. Мүгәддәс Китабдакы әхлаг гајдалары илә разылашмадығым үчүн севҝилимдән ајрылдым. Ҝөрүшдүјүм башга гызла јашамаға башладым.

Ҝөрүшдүјүм икинҹи гыз да Јеһованын Шаһидләри илә Мүгәддәс Китаб дәрсинә башлајанда бу мәним үчүн дөнүш нөгтәси олду! О, һәјатында дәјишикликләр етмәјә башлады, ҝетдикҹә даһа мүлајим вә сәбирли олду. Бу мәни тәәҹҹүбләндирди. Буна ҝөрә дә Јеһованын Шаһидләринин ибадәт ҝөрүшүнә ҝетмәјә разылашдым. Бурадакы инсанлар һөрмәтҹил вә мүлајим иди. Мәним билдијим дүнјанын там әкси! Мән аилә севҝиси ҝөрмәмишдим; ушаглығымдан бәри шәфгәт вә севҝидән мәһрум галмышдым. Јеһованын Шаһидләри арасында ҝөрдүјүм сәмими мүнасибәтин һәр заман һәсрәтиндә идим. Шаһидләр мәнә Мүгәддәс Китаб дәрси тәклиф едәндә мән мәмнунијјәтлә гәбул етдим.

Мүгәддәс Китабы өјрәнмәјин сајәсиндә, демәк олар ки, һәјатым хилас олду. Ики тәрәф мүгабилимлә бирҝә бөјүк оғурлуг планлашдырмышдыг. Бунун сајәсиндә 50 000 доллардан чох гумар борҹуму өдәјә биләҹәкдим. Амма јахшы ки, бу фикримдән дашындым! Тәрәф мүгабилләрим исә оғурлуға ҝетдиләр. Онлардан бири һәбс олунду, диҝәри исә өлдүрүлдү.

Мүгәддәс Китабы өјрәндијим мүддәтдә һәјатымда чохлу дәјишикликләр етмәли олдуғуму анладым. Мәсәлән, 1 Коринфлиләрә 6:10 ајәсиндән өјрәндим ки, «нә оғрулар, нә тамаһкарлар, нә ички дүшкүнләри, нә тәһгирамиз данышанлар, нә дә сојғунчулар Аллаһын Падшаһлығына ҝирмәјәҹәкләр». Бу ајәни охујанда вәзијјәтимин нә гәдәр аҹынаҹаглы олдуғуну анлајыб һөнкүртү илә ағладым. Баша дүшдүм ки, һәјатымы көкүндән дәјишмәлијәм (Ромалылара 12:2). Мән зоракы вә гәзәбли инсан идим, һәјатым јалан үзәриндә гурулмушду.

Һәмчинин Мүгәддәс Китабдан Јеһованын мәрһәмәтли вә бағышлајан олдуғуну өјрәндим (Әшија 1:18). Јеһоваја үрәкдән дуа етдим, јалварыб хаһиш етдим ки, әввәлки һәјат тәрзиндән тамамилә гуртулмағыма көмәк етсин. Онун көмәји илә јаваш-јаваш дәјишмәјә башладым. Ән бөјүк аддымы исә бирҝә јашадығым севҝилимлә рәсми никаһа ҝирмәклә атдым.

24 јашымда евли вә үч ушаг атасы идим. Артыг өзүмә гануни бир иш тапмалы идим. Ди ҝәл, нә тәһсилим вар иди, нә дә кимсә мәни ишә дүзәлдирди. Јеһоваја јенидән јалварыб дуа етдим. Сонра иш ахтармаға башладым. Ишчи ахтаранлара һәјатымы дәјишмәк вә дүрүст ишчи олмаг истәдијими дејирдим. Һәтта бәзән онлара Мүгәддәс Китабы өјрәндијими вә даһа јахшы вәтәндаш олмаг истәдијими дејирдим. Чоху мәнә иш вермәк истәмәди. Нәһајәт, бир иш мүсаһибәси заманы кечмиш һәјатымы ачыг шәкилдә бөлүшәндә мүсаһибәчи мәнә деди: «Ачығы билмирәм нијә, амма мәнә елә ҝәлир ки, сәни ишә ҝөтүрмәлијәм». Әминәм ки, бу, дуаларымын ҹавабы иди. Бир мүддәтдән сонра һәјат јолдашымла бирҝә вәфтиз олунуб, Јеһованын Шаһиди олдуг.

МӘНӘ ФАЈДАСЫ.

Мүгәддәс Китаб принсипләринә әмәл етмәјин вә мәсиһи јолуна гәдәм гојмағын сајәсиндә инди һәјатдајам. Ҝөзәл аиләм вар. Јеһованын мәни бағышладығына әминәм, виҹданым тәмиздир.

Артыг 14 илдир ки, тамвахтлы хидмәт едирәм, инсанлара Мүгәддәс Китабы өјрәнмәјә көмәк едирәм. Бу јахынларда һәјат јолдашым да тамвахтлы хидмәтдә мәнә гошулуб. Сон 30 ил әрзиндә 22 иш јолдашыма Јеһоваја ибадәт етмәјә көмәк етмишәм. Тиҹарәт мәркәзләринә һәлә дә ҝедирәм, амма әввәлләр олдуғу кими инсанлара кәләк ҝәлмәк үчүн јох, әгидәми башгалары илә бөлүшмәк үчүн. Инди мән онларла бир шеји бөлүшмәк истәјирәм: фырылдагчыларын олмајаҹағы јени бир дүнјада ҝөзәл һәјат үмидини (Зәбур 37:10, 11).