Охуҹуларын суаллары

Павел 2 Коринфлиләрә 6:14 ајәсиндә кимләри “имансызлар” адландырыр?

Биз 2 Коринфлиләрә 6:14 ајәсиндә охујуруг: “Имансызларла ејни бојундуруға ҝирмәјин”. Контекстә баханда ајдын олур ки, Павел бурада ачыг шәкилдә мәсиһчи јығынҹағынын үзвү олмајан кәсләрдән данышыр. Буну, Павелин һәмчинин “имансыз” вә ја “имансызлар” кими сөзләр ишләтдији башга Мүгәддәс Китаб ајәләри дә тәсдигләјир.

Мисал үчүн, Павел мәсиһчиләри “имансызлар гаршысында” мәһкәмәјә ҝетдикләри үчүн мәзәммәт едирди (1 Коринфлиләрә 6:6). Бурада имансызлар — Коринфин мәһкәмә системинин һакимләридир. Павел икинҹи мәктубунда дејир ки, Шејтан “имансызларын зеһинләрини кор етмишдир”. Санки онларын ҝөзүндә хош хәбәри онлардан ҝизләдән “өртүк” вардыр. Неҹә ки, Павел изаһ едир, онлар Јеһоваја дөнсәјдиләр, бу “өртүк” онларын ҝөзүндән галхарды, лакин имансызлар Аллаһа дөнмәк истәмирдиләр (2 Коринфлиләрә 3:16; 4:4).

Бә’зи имансызлар ганунсузлугда вә бүтпәрәстликдә иштирак едирләр (2 Коринфлиләрә 6:15, 16). Анҹаг онларын һамысы Јеһованын хидмәтчиләринә әкс-тә’сир ҝөстәрмирләр. Бә’зиләри һәгигәтлә марагланыр. Бир чохларынын һәјат јолдашлары мәсиһчидир вә онлар өз никаһларындан мәмнундурлар (1 Коринфлиләрә 7:12-14; 10:27; 14:22-25; 1 Петер 3:1, 2). Лакин, јухарыда гејд олундуғу кими, Павел ардыҹыл сурәтдә “имансызлар” сөзүнү ‘Рәббә иман едәнләрдән’ ибарәт олан мәсиһчи јығынҹағынын үзвү олмајанлара тәтбиг едир (Һәвариләрин ишләри 2:41; 5:14; 8:12, 13).

2 Коринфлиләрә 6:14 ајәсиндәки принсип мәсиһчиләр үчүн һәјатын һәр бир саһәсиндә рәһбәрлик олараг хидмәт едир вә өзләринә һәјат јолдашы тапмаг истәјән мәсиһчиләрә мүдрик нәсиһәт хүсусунда чох вахт бу принсипә истинад едилир (Матта 19:4-6). Һәср вә вәфтиз олунмуш мәсиһчиләр, әлбәттә ки, һәјат јолдашыны имансызларын арасында ахтармырлар, чүнки мәсиһчиләрлә имансызлар һәјатларында тамамилә фәргли дәјәрләрә, е’тигадлара вә мәгсәдләрә маликдирләр.

Бәс Мүгәддәс Китабы өјрәнәнләр вә мәсиһчи јығынҹағына ҝәләнләр барәдә нә демәк олар? Бәс вәфтиз олунмамыш тәблиғчиләр барәсиндә? Онлар да имансыздырлармы? Хејр. Хош хәбәрә даир һәгигәти гәбул едән вә вәфтизә доғру аддымлар атан инсанлары имансыз адландырмаг олмаз (Ромалылара 10:10; 2 Коринфлиләрә 4:13). Корнелиус һәлә вәфтиз олунмамышдан габаг “диндар вә... Аллаһдан горхан бир адам” адландырылмышды (Һәвариләрин ишләри 10:2).

Бәс онда вәфтиз олунмуш мәсиһчиләр тәрәфиндән вәфтиз олунмамыш тәблиғчиләрә гаршы романтик һиссләр бәсләмәк вә онларла никаһа дахил олмаға ҹан атмаг мүдрик давраныш олардымы? Ахы, ҹидди десәк, Павелин 2 Коринфлиләрә 6:14 ајәсиндәки мәсләһәти белә јердә тәтбиг олунан дејил? Јох, бу ҹүр һәрәкәт мүдрик олмазды. Нә үчүн? Чүнки дул мәсиһчи гадын һаггында Павел бирбаша нөвбәти сөзләри демишдир: “Истәдији кимсә илә евләнмәкдә сәрбәстдир; анҹаг Рәбдә олсун” (1 Коринфлиләрә 7:39, КМ). Павелин бу сөзләринә әсасән, вәфтиз олунмуш мәсиһчиләр һәјат јолдашыны јалныз “Рәбдә” ахтармалыдырлар.

“Рәбдә” ифадәси вә буна јахын олан “Мәсиһдә” ифадәси нә демәкдир? Павел, “Рәбдә” (И–93) вә ја “Мәсиһдә” (И–93) оланлар һаггында Ромалылара 16:8-10 вә Колослулара 4:7 ајәләриндә данышыр. Бу ајәләрдән ҝөрүндүјү кими, Павел бу кими инсанлары һәмчинин әмәкдаш, сәдагәти сүбут едилмиш, севимли гардаш вә садиг хидмәткар адландырыр.

Инсан нә заман “Рәбдә... әмәкдаш [“гул”, ЈД]” олур? Гулдан ҝөзләнилән ишләри көнүллү сурәтдә ҝөрмәјә башладығы вә өзүнү инкар етдији заман. Иса изаһ едир: “Ким ардымҹа ҝетмәк истәјирсә, өзүнү инкар етсин вә чармыхыны ҝөтүрүб Мәни изләсин” (Матта 16:24). Инсан өзүнү Аллаһа һәср едәндә, Мәсиһин ардынҹа ҝетмәјә вә өзүнү тамамилә Аллаһын ирадәсинә табе етдирмәјә башлајыр. Бундан сонра о, вәфтиз олунур вә Јеһова Аллаһын ҝөзүндә лүтф тапмыш хидмәткар тә’јин олунурa. Буна ҝөрә дә “Рәбдә” евләнмәк вә әрә ҝетмәк — иманыны ајдын шәкилдә изһар едән вә “Аллаһын вә Рәбб Иса Мәсиһин” вәфтиз олунмуш “гулу” олан кәсләрлә никаһа дахил олмаг демәкдир (Јагуб 1:1).

Јеһованын Шаһидләри илә Мүгәддәс Китабы өјрәнән вә јахшы руһани наилијјәтләр едән адамлар тә’рифә лајигдирләр. Лакин онлар һәлә өзләрини Јеһоваја һәср етмәјиб вә фәдакарлыг тәләб олунан хидмәт јолуна гәдәм гојмајыблар. Никаһа дахил олмаг кими ваҹиб бир аддым атмағы планлашдырмаздан әввәл, онлар һәјатларында ән ваҹиб олан дәјишиклији етмәли — һәср вә вәфтиз олунмуш мәсиһчи олмалыдырлар.

Мәсиһчинин Мүгәддәс Китаб өјрәнмәсиндә јахшы наилијјәтләр едән адамла никаһа дахил олмаг мәгсәдилә онун вәфтиз олунмасыны ҝөзләјәрәк, она гаршы романтик һиссләр бәсләмәси, мүдрик давраныш олмазды. Мүгәддәс Китабы өјрәнән адам вәфтиз олунмуш мәсиһчинин онунла никаһа дахил олмаг истәјини вә онун вәфтиз олунмасыны ҝөзләдијини биләрсә, һәмин адамда сәһв нијјәтләр јарана биләр.

Әксәр һалларда, инсан вәфтиз олунмамышдан әввәл, гыса мүддәт әрзиндә вәфтиз олунмамыш тәблиғчи олараг галыр. Буна ҝөрә јалныз Рәбдә никаһа дахил олмаг мәсләһәтинә риајәт етмәк һәддиндән артыг сә’ј тәләб етмир. Бәс әҝәр ким исә никаһа дахил олмаг јашына чатмыш, мәсиһчи аиләсиндә бөјүмүш, артыг бир нечә илдир ки, јығынҹағын фәалијјәтиндә фәал иштирак едир вә вәфтиз олунмамыш тәблиғчи кими хидмәт едирсә, онда неҹә? Белә олан һалда онун өз һәјатыны Јеһоваја һәср етмәсинә мане олан нәдир? О, бу аддымы атмаг үчүн нијә тәрәддүд едир? Онун шүбһәләри вармы? Белә адамы имансыз адландырмаг олмаз, амма “Рәбдә” олдуғуну да демәк мүмкүн дејил.

Павелин никаһа даир мәсләһәти бизим хејримиз үчүн верилмишдир (Ишаја 48:17). Әҝәр никаһа дахил олмаға һазырлашан ики нәфәр өзләрини Јеһоваја һәср етмишләрсә, онларын бирлијинин мөһкәм руһани бүнөврәси олаҹагдыр. Онлары һәјатда ејни дәјәрләр вә мәгсәдләр бирләшдирәҹәкдир. Никаһдакы хошбәхтлик исә әсасән бундан асылыдыр. Бундан әлавә, Рәбдә никаһа дахил оланлар Јеһоваја сәдагәтли олдугларыны ҝөстәрирләр, бу исә әбәди хејир-дуалара доғру апарыр, чүнки Јеһова ‘сәдагәтлиләрлә сәдагәтлидир’ (Мәзмур 18:25, МКШ).

[Һашијә]

[31-ҹи сәһифәдәки шәкил]

Јеһова сәдагәтлиләрлә сәдагәтлидир.