«Руһани тәләбатларыны дәрк едәнләр хошбәхтдирләр»
ГУШЛАР сәһәр тездән ојандыгдан сонра бир аз ҹиккилдәшир вә јем далынҹа учурлар. Ахшам јуваларына гајыданда јенә дә бир аз ҹиккилдәшир вә јухуја ҝедирләр. Илин мүәјјән вахтында онлар өз тајларыны тапыр, јумуртлајыр вә бала чыхарырлар. Демәк олар ки, башга һејванлар да бу ҹүр өмүр сүрүрләр.
Анҹаг биз инсанларда һәр шеј тамам башга ҹүрдүр. Бәли, биз јејир-ичир, јатыр вә дүнјаја ушаг ҝәтиририк, лакин әксәријјәтимиз бунунла кифајәтләнмирик. Биз нә үчүн мөвҹуд олдуғумузу билмәк истәјирик. Һәјатымызын мә’насынын нәдән ибарәт олдуғуну дәрк етмәјә чалышырыг. Һәмчинин ҝәләҹәјә үмидимизин олмасыны истәјирик. Бу јүксәк арзулар биз инсанларда руһани шејләрә тәләбатын олдуғуна ишарә едир.
Аллаһын сурәтиндә јарадылмышыг
Мүгәддәс Китаб инсанларда руһани тәләбатларын нә үчүн олдуғуну белә изаһ едир: «Аллаһ инсаны Өз сурәтиндә јаратды, Аллаһын сурәтиндә јаратды, онлары киши вә гадын олараг јаратды» (Јарадылыш 1:27). «Аллаһын сурәтиндә» јарадылмағымыз о демәкдир ки, ҝүнаһлы вә гејри-камил олмағымыза бахмајараг, биз Аллаһын хүсусијјәтләрини әкс етдирмәји баҹарырыг (Ромалылара 5:12). Мәсәлән, биз јарадыҹылыг габилијјәтинә маликик. Һәмчинин мүдриклик, әдаләтлилик вә бир-биримизә гаршы фәдакар мәһәббәт тәзаһүр етдирә билирик. Бундан әлавә, кечмишин үзәриндә дүшүнмәји вә ҝәләҹәјә даир планлар гурмағы да баҹарырыг (Сүлејманын мәсәлләри 4:7; Ваиз 3:1, 11; Микеја 6:8; Јәһја 13:34; 1 Јәһја 4:8).
Анадан оландан Аллаһа ибадәт етмәк арзусуна малик олмағымыз ајдын сурәтдә ҝөстәрир ки, биз руһани тәләбатларымызы өдәјә биләрик. Әҝәр биз Јарадан һаггында өјрәнмәсәк вә Онунла јахшы мүнасибәтләр инкишаф етдирмәсәк, һәгиги вә давамлы хошбәхтлијә наил ола билмәрик. Иса демишдир: «Руһани тәләбатларыны дәрк едәнләр хошбәхтдирләр» (Матта 5:3, ЈД). Јадда сахламаг ваҹибдир ки, руһани тәләбатларымызы јалныз руһани һәгигәт — Аллаһ һаггындакы, Онун нормалары вә бәшәријјәтә даир нијјәтләри һаггындакы билик тә’мин едә биләр. Бу һәгигәти һарадан тапмаг олар? Мүгәддәс Китабдан.
«Сәнин сөзүн һәгигәтдир»
Һәвари Павел јазмышдыр: «Һәр Мүгәддәс Јазы Аллаһдан илһам алмыш вә тә’лим, тәкзиб, ислаһ, салеһлик тәрбијәси үчүн фајдалыдыр» (2 Тимотејә 3:16). Павелин сөзләри Исанын Аллаһа етдији дуасындакы сөзләрлә һәмаһәнҝдир: «Сәнин сөзүн һәгигәтдир». Бу ҝүн бу Сөз бизә Мүгәддәс Китаб кими танышдыр. Әгидә вә принсипләримизи Мүгәддәс Китабын әсасында јохламаг мүдрик давраныш оларды (Јәһја 17:17).
Әгидәмизи Аллаһын Кәламы илә мүгајисә етмәклә гәдим Верија шәһәринин сакинләрини тәглид етмиш олуруг: онлар Павелин тә’лимләринин дүзҝүн олуб-олмадығыны Мүгәддәс Китабла мүгајисә едирдиләр. Онларын бу һәрәкәти Павелин вә онун јолдашларынын наразылығына сәбәб олмады, әксинә, тә’рифә лајиг ҝөрүлдү. Мүгәддәс Китаб јазычысы Лука онлар һаггында јазмышдыр: «“Бу тә’лимләр доғрудурму?” — дејәрәк һәр ҝүн Мүгәддәс Јазылары арашдырараг Аллаһ кәламыны бөјүк шөвглә гәбул етдиләр» (Һәвариләрин ишләри 17:11). Бу ҝүн динә вә әхлага даир бир-биринә зидд ҝедән сајсыз-һесабсыз нөгтеји-нәзәрләр мөвҹуд олдуғу үчүн, дүшүнҹәли веријалыларын нүмунәсини тәглид етмәјимиз ваҹибдир.
Дини тә’лимин һәгигәт олуб-олмадығыны јохламағын диҝәр үсулу — онун инсанларын һәјатына неҹә тә’сир ҝөстәрдијини мүшаһидә етмәкдир (Матта 7:17). Мәсәлән, Мүгәддәс Китаб һәгигәтинин инсанын даһа јахшы ата, әр, арвад вә ја ана олмасына, һәмчинин бундан мәмнунлуг әлдә етмәсинә вә аиләнин хошбәхт олмасына көмәк етдији ајдын ҝөрүнмәлидир. Иса демишдир: «Аллаһын сөзүнү динләјиб она әмәл едәнләр бәхтијардыр» (Лука 11:28).
Исанын сөзләри бизә Аллаһын гәдим исраиллиләрә дедикләрини хатырладыр: «Аллаһын Рәбб Мәнәм, Мән сәнин хејринә сәни өјрәдирәм, ҝетдијин лазым олан јолла сәни апарырам. Аһ, каш ки сән Мәним әмрләримә диггәт јетирәјдин! Онда әмин-аманлығын һеч вахт гурумајан чај кими ахарды, салеһлијин дәниз далғалары кими оларды» (Јешаја 48:17, 18). Гој бу сәмими сөзләр јахшылығы вә салеһлији севән һәр бир инсанын үрәјинә јол ачсын!
Бә’зиләри «гулагларына хош ҝәлән» сөзләри динләмәји үстүн тутурлар
Аллаһын бу сәмими сөзләрлә исраиллиләрә мүраҹиәт етмәсинин сәбәби онларын дини јаланларын тә’сири алтына дүшмәләри иди (Мәзмур 106:35-40). Өзүмүзү јаландан биз дә ҝөзләмәлијик. Өзләрини Мәсиһин давамчылары адландыран адамлар һагда Павел јазмышдыр: «Вахт олаҹагдыр ки, сәһиһ тә’лимә тәһәммүл етмәјәҹәкләр; лакин сәсләри гулагларына хош ҝәлән вә арзуларына ујғун олан мүәллимләри әтрафларына топлајаҹаглар. Вә өз гулагларыны һәгигәтдән» узаглашдыраҹаглар (2 Тимотејә 4:3, 4).
Дин рәһбәрләри ҝүнаһлы бәдәнин никаһдан кәнар ҹинси әлагә, һомосексуализм вә ички дүшкүнлүјү кими еһтирасларына ҝөз јумараг инсанларын гулагларына хош ҝәлән сөзләр сөјләјирләр. Мүгәддәс Китаб исә ајдын ҝөстәрир ки, бу ҹүр әмәлләри бәјәнән вә онларла мәшғул олан адамлар «Аллаһын Сәлтәнәтини [Падшаһлығыны] мирас алмајаҹаглар» (1 Коринфлиләрә 6:9, 10; Ромалылара 1:24-32).
Дүзҝүн һәјат тәрзинин истеһзалара сәбәб олдуғуну нәзәрә алсаг, Мүгәддәс Китаб нормаларына ујғун јашамаг, әлбәттә, ҹәсарәт тәләб едир. Лакин бу мүмкүндүр. Јеһованын Шаһидләри арасында елә инсанлар вар ки, әввәлләр оғру, гулдур, јаланчы, ички дүшкүнү олмуш, наркотик гәбул етмиш вә әхлагсыз һәјат тәрзи сүрмүшләр. Лакин онлар Аллаһын Кәламыны үрәкдән гәбул етмиш вә ‘Рәббә лајиг шәкилдә һәрәкәт етмәк’ үчүн мүгәддәс руһун көмәји сајәсиндә һәјатларыны дәјишмишләр (Колослулара 1:9, 10; 1 Коринфлиләрә 6:11). Аллаһла сүлһ мүнасибәти гурараг онлар дахили сүлһә наил олмуш вә ҝәләҹәјә даир мөһкәм үмид әлдә етмишләр. Биз инди бу үмид һаггында данышаҹағыг.
Падшаһлыға олан үмид
Мүгәддәс Китабын итаәткар инсанлара вердији мөһкәм сүлһ үмиди Аллаһын Падшаһлығы васитәсилә һәјата кечәҹәк. Иса нүмунәви дуасында: «Сәлтәнәтин [Падшаһлығын] ҝәлсин. Ҝөјдә олдуғу кими, Јердә дә Сәнин ирадән олсун» дејә өјрәдирди (Матта 6:10). Јалныз Аллаһын Падшаһлығы елә едә биләр ки, јер үзүндә Аллаһын ирадәси јеринә јетсин. Нәјә ҝөрә? Она ҝөрә ки, Иса Мәсиһин рәһбәрлији алтындакы бу Падшаһлыг Аллаһын јер үзүндә Өз гануни һөкмранлығыны һәјата кечирмәк үчүн олан васитәдир (Мәзмур 2:7-12; Даниел 7:13, 14).
Иса Мәсиһ, бу сәмави Падшаһлығын Падшаһы кими фәалијјәт ҝөстәрәрәк, итаәткар инсанлары Адәмин ҝүнаһындан вә ондан мирас алынмыш хәстәлик вә өлүм зәнҹирини гыраҹаг. Вәһј 21:3, 4 ајәләриндә дејилир: «Будур, Аллаһын мәскәни инсанларла бәрабәрдир... [Јеһова] Аллаһ онларын ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр, чүнки әввәлки шејләр кечиб ҝетди».
Бүтүн јер үзүндә давамлы сүлһ бәргәрар олаҹаг. Нәјә ҝөрә биз буна әмин ола биләрик? Ҹавабы Јешаја 11:9 ајәсиндә тапырыг: «Мүгәддәс дағымын һеч бир јериндә һеч кимә зәрәр дәјмәјәҹәк, [Падшаһлығын вәтәндашларындан] һеч бир кәс о бирисини мәһв етмәјәҹәк, һәгигәтән, сулар дәнизи неҹә долдурурса, дүнја да Рәббин билији илә елә долаҹаг». Демәли, јер үзүндә јашајан һәр бир инсан Аллаһ һаггында дәгиг билијә малик олаҹаг вә Она итаәт едәҹәкдир. Белә бир ҝәләҹәк хошунуза ҝәлирми? Әҝәр ҝәлирсә, онда артыг индидән Јеһова һаггында билик әлдә етмәк лазымдыр.
Падшаһлыг һаггындакы хәбәрә гулаг асаҹагсынызмы?
Аллаһ Өз Падшаһлығынын васитәсилә Шејтанын бәшәријјәтә чәкдирдији бүтүн изтираблара сон гојаҹаг вә инсанлара салеһ јолларыны өјрәдәҹәк. Буна ҝөрә дә тәәҹҹүблү дејил ки, Иса башлыҹа олараг мәһз Падшаһлыг һаггында өјрәдирди. О демишдир: «Аллаһ Сәлтәнәтинин [Падшаһлығынын] мүждәсини диҝәр шәһәрләрә дә јајмалыјам; чүнки Мән бунун үчүн ҝөндәрилмишәм» (Лука 4:43). Мәсиһ өз шаҝирдләринә тапшырмышды ки, һәмин хәбәри башга инсанлара чатдырсынлар (Матта 28:19, 20). О, габагҹадан хәбәр вермишди ки, «сәмави Сәлтәнәт [Падшаһлыг] һаггында олан бу Мүждә халгларын һамысына шәһадәт олараг бүтүн дүнјада тәблиғ олунаҹагдыр, вә сон о заман ҝәләҹәкдир» (Матта 24:14). Сон сүр’әтлә јахынлашыр. Буна ҝөрә дә, сәмими инсанларын бу хош хәбәрә һај вермәләри неҹә дә ваҹибдир!
Әввәлки мәгаләдә һаггында данышылан Алберт Падшаһлыг һаггындакы хош хәбәри, һәјат јолдашы вә оғлу Јеһованын Шаһидләри илә Мүгәддәс Китабы өјрәнмәјә башладыглары заман ешитмишдир. Алберт әввәлҹә онларын мәшғулијјәтинә шүбһә илә јанашырды. О, һәтта јерли кешишдән хаһиш етмишди ки, Шаһидләри ифша етмәк үчүн һәјат јолдашына вә оғлуна баш чәксин. Амма кешиш бу ишә гарышмаг истәмәмишди. Буна ҝөрә дә Алберт Шаһидләрин тә’лимләриндә сәһвләр тапмаг үчүн онларын Мүгәддәс Китаб мүзакирәләриндә иштирак етмәк гәрарына ҝәлди. Јалныз бир мәшғәләдән сонра Алберт даһа чох билик әлдә етмәк арзусу илә өјрәнмәјә гошулду. Даһа сонра мүнасибәтинин нә үчүн дәјишдијини белә изаһ етди: «Мән елә һәмишә буну ахтармышам».
Ахыр ки, Албертин руһани тәләбатлары тә’мин едилмәјә башланмышды вә о, буна һеч вахт тәәссүфләнмирди. Белә ки, Мүгәддәс Китабы өјрәнмәси сајәсиндә өмрү боју ону нараһат едән суаллара ҹаваб тапды: әдаләтсизлијә вә мүасир ҹәмијјәтдә һөкм сүрән әхлагсызлыға неҹә сон гојулаҹағыны өјрәнди вә ҝәләҹәјә үмид әлдә етди. Мүгәддәс Китаб һәгигәти она үрәк раһатлығы ҝәтирди. Бәс сизин руһани тәләбатларыныз өдәнилирми? Буну јохламаг үчүн 6-ҹы сәһифәдәки чәрчивәдә ҝәтирилән суаллары нәзәрдән кечирин. Әҝәр әлавә мә’лумат әлдә етмәк истәјирсинизсә, Јеһованын Шаһидләринә мүраҹиәт един. Онлар сизә көмәк етмәјә шад олаҹаглар.
[6-ҹы сәһифәдәки чәрчивә/шәкилләр]
Руһани тәләбатларыныз тә’мин олунурму?
Гәбул етдијиниз руһани гида руһани тәләбатларынызы тә’мин едирми? Биз сизә нөвбәти суаллары охумағы вә дүзҝүн ҹаваб верә билдијиниз суалларын гаршысында ишарә гојмағы тәклиф едирик.
□ Аллаһ кимдир вә Онун ады нәдир?
□ Иса Мәсиһ кимдир? О, нә үчүн өлмәли иди? Онун өлүмү бизә һансы фајданы ҝәтирир?
□ Иблис мөвҹуддурму? Әҝәр мөвҹуддурса, о һарадан пејда олмушдур?
□ Инсан өләндә нә баш верир?
□ Аллаһын јер вә инсанлар үчүн нијјәти нәдән ибарәтдир?
□ Аллаһын Падшаһлығы нәдир?
□ Аллаһын әхлаг нормалары нәдән ибарәтдир?
□ Аллаһ әр вә арвада аиләдә һансы ролу вермишдир? Мүгәддәс Китабын һансы принсипләри аиләјә хошбәхтлик ҝәтирир?
Әҝәр бу суаллардан һансынаса дүзҝүн ҹаваб вердијинизә әмин дејилсинизсә, «Аллаһ биздән нә тәләб едир?» брошүрасыны сифариш едә биләрсиниз. Јеһованын Шаһидләри тәрәфиндән тәгрибән 300 дилдә дәрҹ олунан бу брошүрада Мүгәддәс Китабын 16 әсас тә’лими мүзакирә едилир вә јухарыда ҝәтирилән суалларын һамысына Мүгәддәс Китабдан ҹаваб верилир.
[4-ҹү сәһифәдәки шәкилләр]
Һејванлардан фәргли олараг инсанларын руһани тәләбатлары вар.
[5-ҹи сәһифәдәки шәкил]
«Сәсләри гулагларына хош ҝәлән мүәллимләри әтрафларына топлајаҹаглар» (2 Тимотејә 4:3).
[7-ҹи сәһифәдәки шәкил]
Мөһкәм сүлһү Аллаһын Хиласкар Падшаһлығы бәргәрар едәҹәк.