Охуҹуларын суаллары

Еден бағында хејир вә шәр билмә ағаҹына даир верилмиш гануну позмаг идејасыны илан Һәвванын бејнинә неҹә јеритди?

Јарадылыш 3:1 ајәсиндә (МКШ) дејилир: “Рәбб Аллаһын јаратдығы бүтүн чөл һејванларынын ән һијләҝәри илан иди. Илан гадына деди: “Доғруданмы, Аллаһ сизә “бағда олан һеч бир ағаҹын бәһрәләриндән јемәјин” дејиб?” Иланын Һәвва илә үнсијјәтдә олмасына даир мүхтәлиф рә’јләр мөвҹуддур. Нәзәријјәләрдән биринә әсасән о, буну бәдән һәрәкәтләри вә ја ишарәләрлә етмишдир. Мисал үчүн, бунунла әлагәдар инҝилис диндары Ҹозеф Бенсон дејир: “Јәгин ки, бу үнсијјәт һансыса ишарәләрин васитәсилә јаранмышды. Лакин бә’зиләри елә һесаб едирләр ки, о заман иланлар дүшүнмәк вә данышмаг баҹарығына малик идиләр... бунун исә һеч бир тәсдиги јохдур”.

Амма јалныз бәдән һәрәкәтләри илә илан Һәвванын бејнинә неҹә јеридә биләрди ки, гадаған едилмиш мејвәдән јејәрсә, Аллаһ кими олаҹаг, нәјин хејир, нәјин исә шәр олдуғуна даир өзү гәрар чыхара биләҹәк? Бундан әлавә, иланын суалларына ҹаваб вермәклә Һәвва өзү дә сөһбәтдә иштирак едирди (Јарадылыш 3:2-5, МКШ). Мүгәддәс Китабда Һәвванын данышдығы гејд олунур. Иланын исә Һәвва илә ишарә вә бәдән һәрәкәтләри илә үнсијјәтдә олмасы фикриндән елә нәтиҹәјә ҝәлмәк олар ки, ҝуја Һәвва она жестләрдән истифадә едәрәк ҹаваб верирди.

Бу һадисәјә истинад едәрәк һәвари Павел һәмиманлыларыны хәбәрдар едирди: “Илан Һәвваны өз һијләҝәрлији илә неҹә алдатдыса, горхурам ки, сизин дүшүнҹәләриниз... позулсун”. Павелин сөјләдији тәһлүкә, “һијләҝәрликлә фәалијјәт ҝөстәрән адамлар” тәрәфиндән төрәдилирди. Һәмин “фөвгәлһәвариләр”ин јалныз бәдән һәрәкәтләри, ишарә вә жестләри бу ҹүр тәһлүкә јарада билмәзди. Бурада бөјүк рол ојнајан онларын сөһбәтләри - инсанлары алдадан һијләҝәр сөзләри иди (2 Коринфлиләрә 11:3-5, 13).

Еден бағында Һәвва сөһбәт вә ја сөзләрлә алдадылса да, бу о демәк дејил ки, иланын сәс телләри варды. Сәс телләринә еһтијаҹ јох иди. Аллаһын мәләји, ешшәјин васитәсилә Балаамла данышаркән, һејван инсан организминин үзвләриндән бири олан гыртлаға еһтијаҹ дујмурду (Сајлар 22:26-31). Ајдындыр ки, “дилсиз ешшәк, инсан сәси илә” руһани аләмдән киминсә тә’сири алтында данышмаға башламышды (2 Петер 2:16).

Мүгәддәс Китаб иланын әвәзинә данышан руһани варлығын ким олдуғуну ашкар едир. О, “Иблис вә шејтан адланан бөјүк әждаһа, бүтүн дүнјаны алдадан гәдим илан”дыр (Вәһј 12:9). Һәвванын ешитдији вә ҹаваб вердији сөзләр Шејтандан, “нур мәләји ҹилдинә ҝирә”н Иблисдәндир (2 Коринфлиләрә 11:14).

[31-ҹи сәһифәдәки шәкил]

“Хејирлә шәри биләрәк Аллаһ кими олаҹагсыныз”.