Өлүләрдән горхурсунузму?

БУ СУАЛА әксәријјәт садәҹә олараг: «Хејр. Нәјә ҝөрә горхмалыјам?» — дејә ҹаваб верирләр. Онларын фикринҹә, өлү елә өлүдүр. Анҹаг милјонларла инсан өлүләрин руһ кими јашамаға давам етдијини дүшүнүр.

Гәрби Африка өлкәси олан Бениндә чохлары инаныр ки, өлүләр өз аилә үзвләрини өлдүрмәк үчүн ҝери гајыда биләрләр. Буна ҝөрә дә, бу инсанлар өз мүлкләрини сатыр, јахуд борҹа ҝирирләр ки, гурбанлыг һејван алсынлар вә өләнин руһуну сакитләшдирмәк үчүн ајинләр кечирсинләр. Бәзиләри спиритизмлә мәшғул олур. Спиритизмә ҝөрә, инсан өләндә руһу бәдәниндән ајрылыр вә дириләрлә даныша билир. Башгаларынын исә башына горхулу һадисәләр ҝәлир вә онлар буну өләнләрин руһунун ајағына јазырлар.

Белә һадисә илә үзләшәнләрдән бири Бенинлә Ниҝерија сәрһәдинә јахын јашајан Агбула адлы бир киши олмушду. О дејир: «Бизим әразидә спиритизм ҝүндәлик һәјатын ајрылмаз һиссәсидир. Өлүнү руһани аләмә һазырламаг үчүн ону јумаг адәтдир. Мән чох вахт бу мәрасимдән сонра галан сабуну ҝөтүрүб мүәјјән јарпагларла гарышдырырдым. Сонра һазырланмыш гатышығы ов түфәнҝинә сүртүрдүм вә овламаг истәдијим һејванын адыны уҹадан дејирдим. Бу кими адәтләр ҝениш јајылмышды вә санки көмәји дә дәјирди. Анҹаг спиритизмин бәзи нөвләри горхулу иди.

Ики оғлум намәлум сәбәбдән өләндә киминсә мәнә ҹаду етдијиндән шүбһәләнмәјә башладым. Ҹаду едәни тапмаг үчүн ҝүҹлү фалчы кими танынан гоҹа кишинин јанына ҝетдим. О, мәним шүбһәләрими тәсдигләди. Ән писи исә о иди ки, онун сөзләринә ҝөрә, оғулларым руһани аләмдә өз гатилләринин өлүмүнү ҝөзләјирдиләр ки, она хидмәт етсинләр. Гоҹа үчүнҹү оғлуму да ејни агибәтин гөзләдијини әлавә етди. Бир нечә ҝүн сонра һәмин оғлуму да итирдим».

Даһа сонра Агбула гоншу Ниҝеријадан олан Ҹон адлы Јеһованын Шаһиди илә растлашды. Ҹон Мүгәддәс Китаба әсасланараг өлүләрин вәзијјәтини изаһ етди. Онун сөзләри Агбуланын һәјатыны дәјишди. Бу сизин дә һәјатынызы дәјишә биләр.

Өлүләр јашајырмы?

Бу суала ән дүзҝүн ҹавабы ким верә биләр? Нә гәдәр ҝүҹлү фалчы олурса-олсун, һеч бир инсан. Лакин «ҝөјләрдә вә јердә олан, ҝөрүнән вә ҝөрүнмәјән» бүтүн ҹанлылары Јарадан Јеһова бу суала ҹаваб верир (Колослулара 1:16). О, мәләкләри руһани аләмдә, инсанлары вә һејванлары исә јердә јашамаг үчүн јарадыб (Мәзмур 104:4, 23, 24). Бүтүн ҹанлыларын һәјаты Ондан асылыдыр (Вәһј 4:11). Белә исә ҝәлин Аллаһын Кәламы олан Мүгәддәс Китабын өлүм һаггында нә дедијинә нәзәр салаг.

Өлүм һаггында илк дәфә данышан Јеһова олмушдур. О, Адәмлә Һәвваја хәбәрдарлыг етмишди ки, итаәтсизлик етдикләри тәгдирдә онлары өлүм ҝөзләјир (Јарадылыш 2:17). Бу нә демәк иди? Јеһова изаһ етмишди: «Јерин торпағысан, торпаға да гајыдаҹагсан» (Јарадылыш 3:19). Инсан өләндә бәдәни чүрүмәјә башлајыр. О, торпаға гајыдыр. Һәјат дајаныр.

Адәмлә Һәвва биләрәкдән Аллаһын итаәтиндән чыхдылар вә буна ҝөрә дә өлүмә мәһкум олдулар. Анҹаг өлүмү илк дадан онлар јох, оғуллары Һабил олду. Бөјүк гардашы Габил ону гәтлә јетирди (Јарадылыш 4:8). Габил өлмүш гардашынын ондан гисас алаҹағындан горхмурду. Әксинә, Габил еһтијат едирди ки, дири адамлар она нә исә едә биләрләр (Јарадылыш 4:10-16).

Чох әсрләр сонра мүнәҹҹимләр Һирод падшаһа ‘јәһуди һөкмдарынын’ онун әразисиндә доғулдуғуну хәбәр верәндә о тәшвишә дүшдү. Ҝәләҹәк һөкмдары өлдүрмәји гәрара алан Һирод Бет-Лехемдә ики јашына гәдәр олан бүтүн оғлан ушагларыны гылынҹдан кечирмәји әмр етди. Анҹаг мәләк Јусифә хәбәрдарлыг етди ки, Исаны вә Мәрјәми ҝөтүрүб ‘Мисирә гачсын’ (Матта 2:1-16).

Һирод өләндә мәләк Јусифә Исраилә гајытмағы тапшырды, ‘чүнки Көрпәнин ҹаныны ахтаранлар өлмүшдүләр’ (Матта 2:19, 20). Өзү руһ олан мәләк билирди ки, артыг Һирод Исаја хәләл јетирә билмәз. Јусиф вәфат етмиш Һироддан горхмурду. Әксинә, онун ганичән оғлу Археладан горхурду. Буна ҝөрә дә, Јусиф өз аиләси илә Галилејаја, Археланын һакимијјәти алтында олмајан әразијә көчдү (Матта 2:22).

Бу һадисәләр бизә өлүләрин ҝүҹсүз олдуғуну ҝөрмәјә көмәк едир. Бәс Агбула вә башга адамларын башына ҝәләнләри неҹә изаһ етмәк олар?

‘Ҹинләр’ вә ја мурдар руһлар

Иса бөјүјәндә пис руһани варлыгларла гаршылашырды. Онлар Исаны таныјырдылар вә она «Аллаһын Оғлу» дејә мүраҹиәт едирдиләр. Иса да онлары јахшы таныјырды. Онлар өлмүш инсанларын руһлары дејилдиләр. Иса онлары ‘ҹинләр’ вә ја мурдар руһлар адландырырды (Матта 8:29-31; 10:8; Марк 5:8).

Мүгәддәс Китабда һәм Аллаһа садиг галан, һәм дә Она гаршы үсјан галдыран руһлардан сөһбәт ачылыр. «Јарадылыш» китабында гејд едилир ки, Јеһова Адәмлә Һәвваны итаәтсизликләринә ҝөрә Еден бағындан гованда баға һеч кимин ҝирмәмәси үчүн онун шәргинә керувлар, јәни мәләкләр гојду (Јарадылыш 3:24). Ҝөрүнүр, бу, биринҹи дәфә иди ки, руһани варлыглар инсанларын ҝөзүнә ҝөрүнмүшдү.

Сонралар, бәзи мәләкләр јерә енәрәк өзләринә инсан бәдәни ҝөтүрдүләр. Јеһова онлара јердә һеч бир тапшырыг вермәмишди. Әксинә, руһани аләмдәки «мәскәнләрини» өзләри ‘тәрк етмишдиләр’ (Јәһуда 6). Онлар буну худбин нијјәтдән ирәли ҝәләрәк етмишдиләр. Һәмин мәләкләр өзләринә арвад алдылар вә бу гадынлардан «Нефилим» (КМ) адланан гејри-ади ушаглары олду. Нефилимләр вә онларын үсјанкар аталары јер үзүнү зоракылыг вә башга писликләрлә долдурдулар (Јарадылыш 6:1-5). Јеһова Нуһун ҝүнләриндә Дашгын ҝөндәрмәклә вәзијјәти дүзәлтди. Дашгынын сулары пис инсанлары, еләҹә дә нефилимләри мәһв етди. Бәс мәләкләрин ахыры нә олду?

Дашгын онлары руһани аләмә гајытмаға мәҹбур етди. Анҹаг Јеһова онларын өз әввәлки ‘ләјагәтләринә’ саһиб олмаларына јол вермәди (Јәһуда 6). Мүгәддәс Китабда дејилир: «Аллаһ ҝүнаһа батмыш мәләкләрә рәһм етмәјиб, онлары ҹәһәннәмә [«Тáртара», ЈД] атды вә гаранлыгда зәнҹирлә бағлады ки, мәһкәмәјә кими һәбсдә сахлансынлар» (2 Петер 2:4).

Тартар ҹоғрафи мәкан јох, һәбсханаја бәнзәјән, говулмушларын фәалијјәтинин мәһдудлашдырылдығы алчалдылмыш вәзијјәтдир. Артыг ҹинләр ҹисмани бәдән ала билмирләр, анҹаг онлар һәлә дә инсанларын зеһнинә вә һәјатына ҝүҹлү тәсир едирләр. Онлар инсанлары вә һејванлары идарә едә билирләр (Матта 12:43-45; Лука 8:27-33). Һәмчинин өзләрини өләнләрин руһу кими тәгдим едәрәк инсанлары алдадырлар. Нәјә ҝөрә? Онларын мәгсәди инсанлары Јеһоваја мәгбул ибадәтдән узаглашдырмаг вә өлүләрин әсл вәзијјәти һагда чашгынлыг јаратмагдыр.

Горхуну неҹә дәф етмәк олар?

Агбула өлүләрин вәзијјәти вә руһларын кимлији һагда Мүгәддәс Китабын вердији изаһатын ағлабатан олдуғуну ҝөрдү. О баша дүшдү ки, даһа чох өјрәнмәлидир. Буна ҝөрә дә, башлады Ҹон илә Мүгәддәс Китабы вә она әсасланан нәшрләри арашдырмаға. Агбула оғулларынын өлүм јухусунда олдугларыны вә гатилләринә хидмәт етмәк үчүн руһани аләмдә ҝөзләмәдикләрини биләндә үрәји сакитләшди (Јәһја 11:11-13).

Агбула һәмчинин баша дүшдү ки, спиритизмлә бағлы ишләрә тамамилә сон гојмалыдыр. О, ҹадуҝәрликлә бағлы олан һәр шејини јандырды (Һәвариләрин ишләри 19:19). Бәзиләри хәбәрдарлыг едирди ки, о, ҹинләрин гәзәбинә туш олаҹаг. Анҹаг бу, Агбуланы горхутмады. О, Ефеслиләрә 6:11, 12 ајәләриндә јазылан: «Аллаһын бүтүн зиреһләрини ҝејинин, чүнки мүбаризәмиз... пис руһи гүввәләрә гаршыдыр» мәсләһәтини рәһбәр тутду. Бу руһани зиреһ һәгигәти, салеһлији, сүлһ мүждәсини, иман вә руһун гылынҹыны, јәни Аллаһын Кәламыны өзүнә дахил едир. Аллаһын тәгдим етдији бу зиреһ чох ҝүҹлүдүр!

Агбула спиритизмлә бағлы адәтләрдән имтина едәндә бәзи достлары вә гоһумлары ондан үз дөндәрдиләр. Анҹаг Јеһованын Шаһидләринин Падшаһлыг Залында о өзүнә Мүгәддәс Китаб тәлимләринә инанан јени достлар тапды.

Агбула инди билир ки, Јеһова тезликлә јери писликдән тәмизләјәҹәк вә ҹинләрин фәалијјәтинә сон гојаҹаг. Сонда исә, ҹинләри мәһв едәҹәк (Вәһј 20:1, 2, 10). Аллаһ ‘гәбирләрдә оланларын һамысыны’ јер үзүндә јашамаг үчүн дирилдәҹәк (Јәһја 5:28, 29). Бура Һабил, Һирод падшаһын өлдүрдүјү ҝүнаһсыз көрпәләр вә милјонларла башга инсанлар дахилдир. Агбула инаныр ки, онун үч оғлу да дириләнләрин арасында олаҹаг. Итирдијиниз доғма инсанлар да онларын арасында ола биләр. Бүтүн дириләнләр тәсдиг едәҹәкләр ки, өлү олдуглары мүддәтдә онлар тамамилә шүурсуз вәзијјәтдә олмуш, онлар үчүн едилән ајинләрдән хәбәрләри олмамышдыр.

Өлүләрдән горхмаға һеч бир әсас јохдур. Әксинә, өлән әзизләримизә јенидән говушаҹағымызы үмидлә ҝөзләјә биләрик. Бәс бу арада нәјә ҝөрә иманынызы мөһкәмләндирмәк үчүн Мүгәддәс Китабы өјрәнмәјәсиниз? Мүгәддәс Китаб тәлимләринә инанан инсанларла сых үнсијјәтдә олун. Спиритизмлә ҹүзи дә олса әлагәниз варса, буна дәрһал сон гојун. «Аллаһын бүтүн зиреһләрини» ҝејинәрәк өзүнүзү ҹинләрдән горујун (Ефеслиләрә 6:11). Јеһованын Шаһидләри сизә көмәк етмәјә шад олаҹаглар. Онлар «Мүгәддәс Китаб әслиндә нә өјрәдир?»a китабы васитәсилә евдә пулсуз Мүгәддәс Китаб өјрәнмәси тәклиф едирләр.

Агбула артыг өлүләрдән горхмур вә ҹинләрә неҹә мүгавимәт ҝөстәрмәји өјрәниб. О дејир: «Үч оғлумун өлүмүнә кимин сәбәб олдуғуну билмирәм. Анҹаг Јеһоваја хидмәт едәндән једди өвладым дүнјаја ҝәлиб. Һәлә индијәдәк руһани аләмдән олан һеч кәс онлара зәрәр јетирмәјиб».

[Һашијә]

[29-ҹу сәһифәдәки шәкил]

Агбула артыг өлүләрдән горхмур вә ҹинләрә неҹә мүгавимәт ҝөстәрмәји өјрәниб

[30-ҹу сәһифәдәки шәкил]

Габил өлмүш гардашынын ондан гисас алаҹағындан горхмурду