«Руһун бәһрәси» Аллаһы иззәтләндирир

«Сиз чохлу бар верәндә... Атам шөһрәтләнир» (ЈӘҺ. 15:8).

1, 2. а) Башгаларыны руһландырмаг үчүн бизим һансы имканларымыз вар? б) Јеһовадан алдығымыз һансы әнам Она даһа мәһарәтлә хидмәт етмәјә көмәк едир?

БЕЛӘ бир вәзијјәти тәсәввүр едәк: бир баҹы ҝәнҹ һәмиманлысынын јаман фикирли олдуғуну ҝөрүр. Баҹы она јахынлашыб хидмәтә јазылыр. Бир гапыдан о бири гапыја кечәркән ҹаван баҹы үрәјиндәки нараһатчылыглары онунла бөлүшүр. Һәмин ҝүн ҝәнҹ баҹы дуа едәркән јеткин баҹынын ҝөстәрдији сәмими диггәтә ҝөрә Јеһоваја миннәтдарлығыны билдирир; онун мәһз буна еһтијаҹы варды. Кечәк диҝәр нүмунәјә: бир ҹүтлүк башга өлкәдә тәблиғ хидмәтиндән тәзәҹә гајыдыб. Достлуг ҝөрүшүндә онлар хидмәтдә баш верән һадисәләрдән ағыздолусу данышырлар, ҝәнҹ гардаш исә нәфәс дәрмәдән онлара диггәтлә гулаг асыр. Бундан бир нечә ил сонра, миссионер кими хариҹи өлкәјә ҝетмәјә һазырлашаркән ҝәнҹ гардашын јадына һәмин әр-арвад вә үрәјиндә миссионер олмаг һәвәсини ојадан о сөһбәт дүшүр.

² Ола билсин, бу һадисәләри охујаркән јадына сәнә бөјүк тәсир ҝөстәрән, јахуд да һәјатыны дәјишән бир инсан дүшдү. Әлбәттә, чәтин ки, бир сөһбәт киминсә һәјатыны көклү шәкилдә дәјишсин. Анҹаг башгаларыны руһландырмаг вә мөһкәмләндирмәк үчүн бизим һәр ҝүн чохлу имканларымыз јараныр. Баҹарығыны вә хүсусијјәтләрини јахшылашдырмаға көмәк едәҹәк бир шејин олмасыны истәјәрдинми? Бунун сајәсиндә сән баҹы-гардашларын вә Аллаһ үчүн даһа јарарлы ола биләрдин. Әслиндә, Јеһова бизә белә бир шеј бәхш едиб. Сөһбәт мүгәддәс руһдан ҝедир (Лука 11:13). Мүгәддәс руһ һәјатымызда фәалијјәт ҝөстәрәндә дахилимиздә ҝөзәл хүсусијјәтләр јетишдирир, бу да хидмәтимизин һәр бир саһәсинин јахшылашмасына сәбәб олур. Һәгигәтән дә, бу әнамын тајы-бәрабәри јохдур! (Галатијалылара 5:22, 23 ајәләрини оху.)

3. а) Мүгәддәс руһун бәһрәсини инкишаф етдирмәјимиз Аллаһы неҹә иззәтләндирир? б) Биз һансы суаллары нәзәрдән кечирәҹәјик?

³ Мүгәддәс руһун биздә јетишдирдији хүсусијјәтләр онун Мәнбәји олан Јеһова Аллаһын шәхсијјәтини әкс етдирир (Колос. 3:9, 10). Мәсиһчиләрин нәјә ҝөрә Аллаһы тәглид етмәли олдугларынын әсас сәбәбини Исанын һәвариләринә дедији сөзләрдән ҝөрмәк олар: «Сиз чохлу бар верәндә... Атам шөһрәтләнир»a (Јәһ. 15:8). Биз «руһун бәһрәси»ни инкишаф етдирәндә бу, бизим һәрәкәтләримиздә вә данышыг тәрзимиздә өзүнү ајдын бүрузә верир. Бу да, өз нөвбәсиндә, Аллаһа иззәт ҝәтирир (Мат. 5:16). Руһун бәһрәси илә Шејтанын дүнјасына хас олан хүсусијјәтләр арасында һансы фәрг вар? Биз руһун бәһрәсини неҹә инкишаф етдирә биләрик? Нәјә ҝөрә буну етмәк бәзән чәтин олур? Руһун бәһрәсинә дахил олан илк үч хүсусијјәти — мәһәббәт, севинҹ вә сүлһү арашдыраркән бу суаллара ҹаваб тапаҹағыг.

Јүксәк принсипләрә әсасланан мәһәббәт

4. Иса өз давамчыларына һансы мәһәббәти тәзаһүр етдирмәји өјрәдирди?

⁴ Мүгәддәс руһун јетишдирдији мәһәббәт дүнјадакы мәһәббәтдән әһәмијјәтли дәрәҹәдә фәргләнир. Бу фәрг нәдәдир? Онун бүнөврәсини јүксәк принсипләр тәшкил едир. Иса бу фәрги Дағүстү тәблиғиндә ајдын ҝөстәрмишди. (Матта 5:43—48 ајәләрини оху.) О гејд етмишди ки, һәтта ҝүнаһкарлар белә башгаларынын онларла даврандығы кими давранырлар. Бу ҹүр «мәһәббәтин» әсил фәдакарлыгла һеч бир әлагәси јохдур; о садәҹә әвәз-әвәз принсипинә әсасланыр. Әҝәр ‘ҝөјдәки Атамызын оғуллары олмаг’ истәјириксә, онда диҝәр инсанлардан фәргләнмәлијик. Башгалары илә онларын бизимлә рәфтар етдији кими давранмаг әвәзинә, биз онлара Јеһованын ҝөзү илә бахмалы вә онларла Онун кими давранмалыјыг. Исанын нәсиһәтинә әсасән, дүшмәнләримизи неҹә севә биләрик?

5. Бизи тәгиб едәнләрә өз мәһәббәтимизи неҹә ҝөстәрә биләрик?

⁵ Бир Мүгәддәс Китаб нүмунәсинә нәзәр салаг. Павел вә Сила Филипи шәһәриндә тәблиғ едәркән һәбс едилдиләр. Сонра онлары амансызҹасына дөјүб, һәбсхананын дахили бөлмәсинә атдылар вә ајагларына күндә вурдулар. Чох еһтимал ки, зинданбан онларла пис рәфтар едирди. Павел вә Сила зәлзәлә нәтиҹәсиндә ҝөзләнилмәдән азад едиләндә һәмин адамдан гисас алмаг фүрсәтиндән истифадә етдиләрми? Гәтијјән. Фәдакар мәһәббәт онлары зинданбанын рифаһыны дүшүнмәјә вә вахт итирмәдән она, еләҹә дә бүтүн аиләсинә имана ҝәлмәјә көмәк етмәјә тәшвиг етди (Һәв. иш. 16:19—34). Бир чох мүасир баҹы-гардашларымыз да онлары ‘тәгиб едәнләр үчүн јахшылыг диләјирләр’ (Ром. 12:14).

6. Гардашларымызы фәдакарҹасына севдијимизи неҹә ҝөстәрә биләрик? (21-ҹи сәһифәдәки чәрчивәјә бах.)

⁶ Һәмиманлыларымыза бәсләдијимиз мәһәббәт исә даһа бөјүкдүр. Биз «гардашларымыз уғрунда ҹанымызы фәда етмәјә борҹлујуг». (1 Јәһја 3:16—18 ајәләрини оху.) Амма әксәр һалларда мәһәббәтимизи хырда шејләрдә ҝөстәрмәк лазым ҝәлир. Мәсәлән, сөз вә ја һәрәкәтимизлә гардашымызын хәтринә дәјмишиксә, онунла барышмаг үчүн илк аддымы атмагла мәһәббәтимизи ҝөстәрәҹәјик (Мат. 5:23, 24). Бәс әҝәр бизим хәтримизә дәјибләрсә, онда неҹә? Бу заман биз онлары ‘бағышлајыр’, јохса бәзән үрәјимиздә кин сахлајырыг? (Мәз. 86:5). Мүгәддәс руһун үрәјимиздә јетишдирдији дәрин мәһәббәт бизә хырда сәһвләрә әһәмијјәт вермәмәјә вә Јеһованын бизи «үрәкдән бағышладығы кими», башгаларыны сәмими-гәлбдән бағышламаға көмәк едәҹәк (Колос. 3:13, 14; 1 Пет. 4:8).

7, 8. а) Аллаһа олан мәһәббәт инсанлара олан мәһәббәтимизә неҹә тәсир едир? б) Јеһоваја олан мәһәббәтимизи неҹә мөһкәмләндирә биләрик? (Ашағыдакы шәклә бах.)

⁷ Һәмиманлыларымыза гаршы фәдакар мәһәббәти неҹә инкишаф етдирә биләрик? Јеһоваја олан мәһәббәтимизи артырмагла (Ефес. 5:1, 2; 1 Јәһ. 4:9—11, 20, 21). Мүгәддәс Китабы охумаг, үзәриндә дүшүнмәк вә дуа етмәк үчүн ајырдығымыз вахт үрәјимиздә сәмави Атамыз Јеһоваја гаршы дујдуғумуз мәһәббәти мөһкәмләндирәҹәк. Аллаһа јахынлашмаг үчүн биз бу вахты сатын алмалыјыг.

⁸ Туталым, бизә јалныз ҝүнүн мүәјјән саатында Аллаһын Кәламыны охумаг, үзәриндә дүшүнмәк вә дуа етмәк имканы верилиб. Јеһова илә шәхси мүнасибәтләр үчүн нәзәрдә тутулан бу вахты киминсә вә ја нәјинсә алмасына јол верәрдин? Јохса ону мүдафиә етмәк үчүн әлиндән ҝәләни едәрдин? Әлбәттә, Јеһоваја дуа етмәк имканыны һеч кәс әлимиздән ала билмәз вә әксәр баҹы-гардашларын Мүгәддәс Китабы истәдикләри вахт охумаг имканы вар. Бунунла белә, диггәтли олмалыјыг ки, ҝүндәлик ишләр башымызы гатмасын, әкс тәгдирдә, Аллаһла мүнасибәтләримизи мөһкәмләндирмәјә вахт галмајаҹаг. Бәс сән Јеһоваја јахынлашмаг үчүн һәр ҝүн вахты сатын алырсанмы?

‘Мүгәддәс руһун һасил етдији севинҹ’

9. Мүгәддәс руһун һасил етдији севинҹин сәҹијјәви хүсусијјәтләриндән бири һансыдыр?

⁹ Руһун бәһрәсинин сәҹијјәви хүсусијјәтләриндән бири онун сабит олмасыдыр. Буна бир нүмунә кими севинҹи ҝәтирмәк олар. Севинҹ әлверишсиз шәраитдә белә бөјүјүб чичәк ачан шахтајадавамлы биткијә бәнзәјир. Дүнјанын һәр јериндә Аллаһын әксәр хидмәтчиләри ‘бир чох әзијјәтә гатлашараг Аллаһын сөзүнү мүгәддәс руһун һасил етдији севинҹлә гәбул едибләр’ (1 Салон. 1:6). Диҝәрләри исә һәјатларында мүхтәлиф чәтинликләрлә үзләширләр. Анҹаг Јеһова «ахыра гәдәр дөзмәк вә севинҹлә сәбир етмәк» үчүн онлара мүгәддәс руһу илә ҝүҹ верир (Колос. 1:11). Бәс бу севинҹин мәнбәји нәдир?

10. Севинҹимизин мәнбәји нәдир?

¹⁰ Шејтан дүнјасынын ‘ҝәлди-ҝедәр вар-дөвләтиндән’ фәргли олараг, Јеһовадан алдығымыз руһани хәзинә һеч вахт дәјәрини итирмир (1 Тим. 6:17; Мат. 6:19, 20). Аллаһ бизә әбәди ҝәләҹәјә даир севиндириҹи бир үмид верир. Һәмчинин бизә үмумдүнја мәсиһчи гардашлығынын үзвү олмаг севинҹи дә нәсиб олуб. Севинҹимизин әсас мәнбәји исә Аллаһла олан мүнасибәтимиздир. Биз бир мүддәт сәрҝәрдан кими јашамаг мәҹбуријјәтиндә олан Давудун Јеһованы нәғмәдә тәрәннүм едәрәк дедији сөзләринә шәрикик: «Мәним дилим Сәни тәрәннүм едир, мәһәббәтин бу һәјатдан ҝөзәлдир. Бүтүн өмрүм боју Сәнә алгыш едәҹәјәм» (Мәз. 63:3, 4). Үзләшдијимиз чәтинликләрдән асылы олмајараг, Аллаһы севинҹлә тәрәннүм етмәк истәји үрәјимиздән һеч вахт јох олмур.

11. Нәјә ҝөрә Јеһоваја севинҹлә хидмәт етмәјимиз ваҹибдир?

¹¹ Һәвари Павел мәсиһчиләри тәшвиг едирди: «Рәббин јолунда һәмишә севинин. Бәли, севинин!» (Филип. 4:4). Нәјә ҝөрә мәсиһчиләрин Јеһоваја севинҹлә хидмәт етмәләри ваҹибдир? Чүнки ортада Шејтанын Јеһованын али һөкмранлығы илә әлагәдар галдырдығы мүбаһисәли мәсәлә вар. Шејтан иддиа едир ки, һеч бир инсан Аллаһа үрәкдән хидмәт етмир (Әјј. 1:9—11). Әҝәр биз севинҹлә јох, јалныз борҹ һиссиндән ирәли ҝәләрәк Она хидмәт етсәјдик, һәмд гурбанымыз гүсурлу оларды. Буна ҝөрә дә мәзмурчунун дедији сөзләрә диггәт јетирмәлијик: «Севинҹлә Рәббә гуллуг един, мәдһ охујараг Онун һүзуруна ҝәлин!» (Мәз. 100:2). Јеһоваја үрәкдән вә севинҹлә хидмәт етмәјимиз Она иззәт ҝәтирир.

12, 13. Мәнфи фикирләрин өһдәсиндән ҝәлмәкдә бизә нә көмәк едә биләр?

¹² Амма етираф етмәк лазымдыр ки, Јеһованын һәтта садиг хидмәтчиләри белә бәзән руһдан дүшүрләр вә мүсбәт әһвал-руһијјәни горумаг үчүн ҝәрҝин мүбаризә апарырлар (Филип. 2:25—30). Белә вахтларда онлара нә көмәк едә биләр? Ефеслиләрә 5:18, 19 ајәләриндә дејилир: «Мүгәддәс руһла долун, бир-биринизә мәзмур, Аллаһа исә мәдһијјә сөјләјин, руһани маһнылар ифа един, мусиги мүшајиәти илә үрәјиниздә Јеһоваја нәғмә охујун». Бу мәсләһәти неҹә тәтбиг етмәк олар?

¹³ Мәнфи фикирләр бизә раһатлыг вермәјәндә Јеһоваја сәјлә дуа етмәли вә фикримизи јахшы шејләрә ҹәмләмәјә чалышмалыјыг. (Филипилиләрә 4:6—9 ајәләрини оху.) Бәзиләри фикир вермишләр ки, Падшаһлыг нәғмәләринин сәдалары алтында бу маһныларын сөзләрини зүмзүмә етмәк овгаты јахшылашдырыр вә фикирләри мүсбәт шејләрә јөнәлтмәјә көмәк едир. Ағыр сынагла үзләшән бир гардаш чох вахт руһ дүшкүнлүјүнә гапылырды. О хатырлајыр: «Мүтәмади олараг Јеһоваја дуа етмәклә јанашы, бир нечә Падшаһлыг нәғмәсини әзбәрләмишдим. Јеһованы тәрәннүм едән бу ҝөзәл нәғмәләри үрәјимдә вә ја уҹадан охујанда дахилимдә гәлб раһатлығы һисс едирдим. Тәхминән һәмин әрәфәдә “Јеһоваја јахынлаш” китабы ишыг үзү ҝөрмүшдү. Бир ил әрзиндә ону ики дәфә охудум. Бу, мәним үрәјим үчүн сакитләшдириҹи бир мәлһәм иди. Јеһова сәјләримә хејир-дуа верди».

«Сүлһүн бирләшдириҹи телләри»

14. Мүгәддәс руһун јаратдығы сүлһүн сәҹијјәви ҹәһәти һансыдыр?

¹⁴ Бејнәлхалг конгресләрдә бир араја ҝәлән мүхтәлиф баҹы-гардашлар сүлһ ичиндә бир-бирилә үнсијјәт етмәкдән зөвг алырлар. Бу кими мәнзәрәләр Аллаһын халгы арасында һөкм сүрән үмумдүнја бирликдән хәбәр верир. Бизи кәнардан мүшаһидә едәнләр бир-биринә дүшмән кәсилән халглардан олан инсанларын ‘сүлһүн бирләшдириҹи телләри ичиндә руһун бирлијини горумаға үрәкдән чалышдыгларыны’ ҝөрәндә чох вахт мәәттәл галырлар (Ефес. 4:3). Чохларынын һансы манеәләри ашмалы олдугларыны нәзәрә алсаг, бу ҹүр бирлик, һәгигәтән дә, һејрәтамиздир.

15, 16. а) Петерә ушаглыгдан нә ашыланмышды вә бу, сонрадан һансы чәтинликләрә сәбәб олду? б) Јеһова Петерә инсанлара олан мүнасибәтини дәјишмәјә неҹә көмәк етди?

¹⁵ Мүхтәлиф мәншәли инсанлары бирләшдирмәк елә дә асан дејил. Белә бирлијә наил олмаг үчүн һансы манеәләри ашмаг лазымдыр? Буну баша дүшмәк үчүн биринҹи әсрдә јашамыш һәвари Петерин нүмунәсинә нәзәр салмалыјыг. Онун гејри-јәһудиләрә мүнасибәтини нөвбәти сөзләриндән ҝөрүрүк: «Сиз јахшы билирсиниз ки, јәһудинин башга милләтдән олан адамла үнсијјәт гурмасына вә ја онун јанына ҝетмәсинә Ганун јол вермир. Лакин Аллаһ мәнә ҝөстәрди ки, мән һеч кәси мурдар вә ја натәмиз сајмамалыјам» (Һәв. иш. 10:24—29; 11:1—3). О дөврдә ҝениш јајылмыш фикрә ҝөрә, ҝөрүнүр, Петерә ушаглыгдан ашыламышдылар ки, Гануна әсасән јәһудиләр јалныз өз сојдашларыны севмәлидирләр. Буна ҝөрә дә гејри-јәһудиләрә дүшмән ҝөзү илә бахмаг вә онлара нифрәт етмәк онун үчүн нормал идиb.

¹⁶ Петер Корнилинин евинә ајаг басанда кечирдији гарышыг һиссләри тәсәввүр ет! Вахтилә гејри-јәһудиләр барәдә гәрәзли фикирдә олан бир адам «сүлһүн бирләшдириҹи телләри ичиндә» онларла «һәмаһәнҝ сурәтдә» нә вахтса бирләшә биләрдими? (Ефес. 4:3, 16). Бәли! Елә бундан бир нечә ҝүн әввәл Аллаһын руһу Петерин үрәјини ачараг мүнасибәтини дәјишмәјә вә гәрәзли фикрин өһдәсиндән ҝәлмәјә она көмәк етмишди. Петерә вердији ҝөрүнтүдә Јеһова ајдын шәкилдә ҝөстәрмишди ки, Онун инсанлара олан мүнасибәти һансы иргә вә милләтә мәнсуб олдугларындан асылы дејил (Һәв. иш. 10:10—15). Буна ҝөрә дә Петер Корнилијә деди: «Доғрудан да, ҝөрүрәм ки, Аллаһымыз ајры-сечкилик етмәјән Аллаһдыр, һәр халгын ичиндә Ондан горхан вә салеһ һәјат сүрән адамы хошлајыр» (Һәв. иш. 10:34, 35). Петер инсанлара олан мүнасибәтини дәјишиб ‘бүтүн гардашлыгла’ һәмаһәнҝ шәкилдә бирләшди (1 Пет. 2:17).

17. Аллаһын халгы арасында һөкм сүрән бирлик нәјә ҝөрә бу гәдәр һејрәтамиздир?

¹⁷ Петерин нүмунәси Аллаһын халгы арасында баш верән мөһтәшәм дәјишикликләри гијмәтләндирмәјә көмәк едир. (Јешаја 2:3, 4 ајәләрини оху.) «Һәр милләтдән, һәр гәбиләдән, һәр халгдан» олан милјонларла инсанлар «Аллаһын... фајдалы, хош вә камил» ирадәсинә мүвафиг олмаг үчүн дүшүнҹә тәрзләриндә дәјишикликләр едибләр (Вәһј 7:9; Ром. 12:2). Шејтан дүнјасына хас олан нифрәт, дүшмәнчилик вә нифаг бир вахт чохларынын ҝөзләрини кор етмишди. Анҹаг Аллаһын Кәламыны өјрәнмәләри сајәсиндә вә мүгәддәс руһун көмәјилә белә инсанлар ‘сүлһә апаран шејләрә ҹан атмағы’ өјрәндиләр (Ром. 14:19). Бунун сәмәрәси олан бирлик Аллаһа иззәт ҝәтирир.

18, 19. а) Јығынҹағымызда һөкм сүрән сүлһ вә бирлијә шәхсән биз өз төһфәмизи неҹә верә биләрик? б) Нөвбәти мәгаләдә сөһбәт нәдән ҝедәҹәк?

¹⁸ Аллаһын халгы арасында олан бирлијә вә сүлһә шәхсән биз өз төһфәмизи неҹә верә биләрик? Бир чох јығынҹагларда әҹнәби баҹы-гардашлар вар. Ола билсин, онларын адәт-әнәнәләри бизим адәт-әнәнәләримиздән фәргләнир, јахуд да онлар бизим дилдә ҝүҹ-бәла илә данышырлар. Бәс биз онларла јахындан таныш олмаға ҹан атырыгмы? Аллаһын Кәламы бизә мәһз буну төвсијә едир. Һәм јәһудиләрдән, һәм дә диҝәр милләтләрин нүмајәндәләриндән ибарәт олан Рома јығынҹағына үнванладығы мәктубунда Павел демишди: «Мәсиһ бизи гәбул етдији кими, сиз дә бир-биринизә меһрибанлыг ҝөстәрин ки, нәтиҹәдә Аллаһ шөһрәтләнсин» (Ром. 15:7). Бәс сәнин јығынҹағында һәлә јахшы танымадығын инсан вармы?

¹⁹ Мүгәддәс руһ һәјатымызда фәалијјәт ҝөстәрсин дејә даһа нә етмәлијик? Бу суал нөвбәти мәгаләдә арашдырылаҹаг. Орада биз һәмчинин руһун бәһрәсинә дахил олан диҝәр хүсусијјәтләри дә мүзакирә едәҹәјик.

[Һашијәләр]

Неҹә ҹаваб верәрдиниз?

• Гардашларымыза олан фәдакар мәһәббәти әмәлдә неҹә ҝөстәрә биләрик?

• Аллаһа севинҹлә хидмәт етмәк нәјә ҝөрә ваҹибдир?

• Јығынҹағымызда һөкм сүрән сүлһ вә бирлијә өз төһфәмизи неҹә верә биләрик?

[21-ҹи сәһифәдәки чәрчивә]

«Онлар әсил мәсиһчидирләр»

Јеһованын Шаһидләринин фашист Алманијасында гаршылашдыглары тәгибләрдән бәһс едән бир китабда ҝәнҹ јәһуди мәһбусун сөзләри ҝәтирилир. Нојенгамме һәбс дүшәрҝәсинә дүшән бу ҝәнҹ Јеһованын Шаһидләри илә илк ҝөрүшү барәдә өз тәәссүратларыны бөлүшүр («Between Resistance and Martyrdom— Jehovah’s Witnesses in the Third Reich»).

О дејир: «Дахаудан ҝәлән биз јәһудиләр бу дүшәрҝәјә дахил оланда орадакы башга јәһудиләр һәр шејләрини тез ҝизләтмәјә башладылар ки, бизимлә бөлүшмәсинләр... Азадлыгда оланда биз бир-биримизә әл тутурдуг. Амма бурада, јашамаг үчүн мүбаризәнин ҝетдији бир шәраитдә һәр кәс башгаларыны унудуб јалныз өзүнүн сағ галмасыны фикирләширди. Мүгәддәс Китаб Тәдгигатчылары исә бу заман тамамилә башга ҹүр даврандылар. Һәмин вахт онлар су кәмәрини тәмир едирдиләр. Бу, олдугҹа ағыр иш иди. Үстәлик, һава чох сојуг иди вә онлар бүтүн ҝүнү буз кими сујун ичиндә ишләмәли олурдулар. Онларын буна неҹә таб ҝәтирдијини һеч кәс анлаја билмирди. Тәдгигатчылар дејирдиләр ки, Јеһова онлара ҝүҹ верир. Бизим кими, онлар да аҹ вә чөрәјә мөһтаҹ идиләр. Буна бахмајараг, онлар Дахаудан һәмиманлыларынын ҝәлдијини биләндә кимдә нә чөрәк вар идисә бир јерә јығыб јарысыны өзләринә ҝөтүрдүләр, галан һиссәсини исә онлара вердиләр. Онлар һәмиманлыларыны гаршыладылар вә бағырларына басыб өпдүләр. Јемәк јемәздән әввәл бирликдә дуа етдиләр. Бундан сонра һамысы мәмнун вә хошбәхт ҝөрүнүрдү. Онлар дедиләр ки, артыг аҹ дејилләр. Елә һәмин ан мән: “Онлар әсил мәсиһчидирләр”, — дејә үрәјимдә фикирләшдим».

[19-ҹу сәһифәдәки шәкилләр]

Ҝүн әрзиндә ишимиз чох олса да, Јеһоваја јахынлашмаг үчүн вахты сатын алмаға чалышырыгмы?