Бүтүн үрәјинлә салеһлији сев

‘[Сән] салеһлији севирсән’ (МӘЗ. 45:7).

1. Бизә «салеһлик јоллары» илә ҝетмәјә нә көмәк едәҹәк?

ЈЕҺОВА Кәламы вә мүгәддәс руһу васитәсилә халгыны «салеһлик јоллары илә апарыр» (Мәз. 23:3). Лакин биз гејри-камил олдуғумуздан асанлыгла бу јолдан кәнара чыха биләрик. Јенидән бу јола гајытмаг, јәни дүзҝүн оланы етмәк үчүн гәтијјәтли аддымлар атмаг тәләб олунур. Буна неҹә наил ола биләрик? Иса кими, биз дә салеһлик јолларыны севмәлијик. (Мәзмур 45:7 ајәсини оху.)

2. «Салеһлик јоллары» нәдир?

² «Салеһлик јоллары» дејилдикдә нә баша дүшүлүр? Бу «јоллар» Јеһованын салеһлик нормалары илә мүәјјән едилир. Ибрани вә јунан дилләриндә «салеһлик» сөзү алтында «доғру олан» нәзәрдә тутулур; бу исә әхлаги вә мәнәви принсипләрә дәгиг риајәт етмәк демәкдир. Мүгәддәс Китабда Јеһова ‘доғрулуг [вә ја салеһлик] јурду’ адланыр, буна ҝөрә дә Она ибадәт едәнләр мәнәви бахымдан дүзҝүн олан вә ҝетмәли олдуглары јолу мүәјјән етмәк үчүн севинҹлә Она үз тутурлар (Јер. 50:7, «Китабы Мукаддес»).

3. Аллаһын салеһлији һагда даһа чох неҹә өјрәнмәк олар?

³ Јалныз Аллаһын салеһлик нормаларына бүтүн үрәкдән риајәт етмәјә чалышдығымыз тәгдирдә биз Ону там разы салаҹағыг (Ганун. т. 32:4). Бунун үчүн, илк нөвбәдә, Мүгәддәс Китабда Јеһова Аллаһ барәдә јазыланлары өјрәнмәк үчүн баҹардығымыз гәдәр сәј ҝөстәрмәлијик. Јеһова һаггында Онун Кәламындан нә гәдәр чох өјрәнсәк, Она јахынлашаҹаг вә салеһлијини даһа чох севәҹәјик (Јаг. 4:8). Үстәлик, һәјатда ваҹиб гәрарлар гәбул едәндә Онун мүгәддәс руһунун тәсири алтында јазылан Кәламындакы рәһбәрлијә риајәт етмәлијик.

Аллаһын салеһлијини һәјатында биринҹи јерә гој

4. Аллаһын салеһлијини һәјатымызда биринҹи јерә гојмаг өзүнә нәји дахил едир?

⁴ Матта 6:33 ајәсини оху. Аллаһын салеһлијини һәјатымызда биринҹи јерә гојмаг садәҹә олараг Падшаһлыг һагда хош хәбәри тәблиғ етмәк үчүн вахт ајырмаг демәк дејил. Мүгәддәс хидмәтимиз Јеһоваја мәгбул олсун дејә ҝүндәлик давраныш тәрзимиз Онун јүксәк нормаларына мүвафиг олмалыдыр. Јеһованын салеһлијини һәјатларында биринҹи јерә гојан инсанлардан нә тәләб олунур? Онлар ‘Аллаһын ирадәси илә һәгиги салеһлик вә сәдагәт ичиндә јарадылмыш јени шәхсијјәтә бүрүнмәлидирләр’ (Ефес. 4:24).

5. Руһ дүшкүнлүјүнүн өһдәсиндән ҝәлмәјә бизә нә көмәк едәҹәк?

⁵ Аллаһын салеһлик нормаларына ујғун јашамаға чалышан бизләрдә бәзән нөгсанларымыз уҹбатындан руһ дүшкүнлүјү јарана биләр. Бу үзүҹү вәзијјәтин өһдәсиндән ҝәлмәјә, еләҹә дә салеһлији севиб бу јолла ҝетмәјә бизә нә көмәк едәҹәк? (Сүл. мәс. 24:10). Биз «сидги-үрәкдән вә имандан доған там гәтијјәтлә» мүнтәзәм олараг Јеһоваја дуа етмәлијик (Ибр. 10:19—22). Сәмави вә ја јерүзү үмидимизин олмасындан асылы олмајараг, биз Иса Мәсиһин фидјә гурбанлығына вә онун Баш Каһинимиз кими иҹра етдији хидмәтләрә иман ҝәтиририк (Ром. 5:8; Ибр. 4:14—16). Исанын төкүлмүш ганынын бөјүк ҝүҹә малик олдуғу бу журналын илк бурахылышында әјани нүмунә әсасында ҝөстәрилмишди (1 Јәһ. 1:6, 7). Орада дејилирди: «Данылмаз фактдыр ки, ал вә түнд-гырмызы әшјалара гырмызы шүшә васитәсилә ишыгда баханда онлар ағ ҝөрүнүр; буна ҝөрә дә ҝүнаһларымыз ал вә ја түнд-гырмызы рәнҝдә олса да, Аллаһын бизим ҝүнаһларымыза Мәсиһин ганы васитәсилә бахдығы јерә ҝәләндә онлар ағ ҝөрүнүр» (1879-ҹу ил ијул, сәһ. 6, инҝ.). Биз неҹә дә хошбәхтик ки, Јеһова севимли Оғлунун фидјә гурбанлығы васитәсилә бизи сатын алыб! (Јешаја 1:18).

Руһани јарагларыны јохла

6. Руһани јарагларынын вәзијјәтинин нә јердә олдуғуну јохламаг нәјә ҝөрә зәруридир?

⁶ Биз һеч вахт «салеһлик зиреһини» дөшүмүздән чыхармамалыјыг. Чүнки бу, Аллаһын бизә тәгдим етдији руһани јарагларын ваҹиб бир һиссәсидир (Ефес. 6:11, 14). Истәр өзүмүзү Јеһоваја бу јахынларда һәср едәк, истәрсә дә Она узун илләр хидмәт едәк, биз руһани јарагларымызын вәзијјәтинин нә јердә олдуғуну һәр ҝүн јохламалыјыг. Нәјә ҝөрә? Чүнки Иблис вә онун ҹин мәләкләри Јер күрәсинә атылыблар (Вәһј 12:7—12). Вахтынын мәһдуд олдуғуну билән Шејтан чох аҹыглыдыр. Буна ҝөрә дә о, Аллаһын халгына даһа шиддәтли һүҹумлар едир. Биз ‘салеһлик зиреһини дөшүмүзә тахмағын’ ваҹиблијини дәрк едирикми?

7. Әҝәр биз ‘салеһлик зиреһинин’ ваҹиблијини дәрк едириксә, неҹә давранаҹағыг?

⁷ Әсҝәрин дөшүнә тахдығы зиреһ онун үрәјини горујурду. Гејри-камил олдуғумуз үчүн мәҹази үрәјимиз һијләҝәрдир (Јер. 17:9). Үрәјимиз пислијә мејиллидир, буна ҝөрә дә она тәрбијә вә дүзәлиш вермәк чох ваҹибдир (Јар. 8:21). Әҝәр ‘салеһлик зиреһинә’ еһтијаҹ дујдуғумузу дәрк едириксә, Аллаһын нифрәт етдији әјләнҹәләри сечмәклә бу зиреһи дөшүмүздән мүвәггәти дә олса, чыхартмајаҹағыг, јахуд да пис ишләрлә мәшғул олмаг барәдә хәјаллара далмајаҹағыг. Һәмчинин ҝүнүмүзүн чох һиссәсини телевизор гаршысында кечирәрәк гызыла бәрабәр вахтымызы бош јерә сәрф етмәјәҹәјик. Әксинә, Јеһованын бәјәндији ишләри етмәк наминә вар ҝүҹүмүзлә мүбаризә апармаға давам едәҹәјик. Һәтта пис ҹисмани дүшүнҹәләрин ардынҹа дүшәрәк бир анлыға бүдрәсәк белә, Јеһованын көмәји илә јенидән ајаға галхаҹағыг. (Сүлејманын мәсәлләри 24:16 ајәсини оху.)

8. Бөјүк ‘иман галханына’ нәјә ҝөрә еһтијаҹымыз вар?

⁸ Бизим руһани јарагларымызын арасында бөјүк ‘иман галханы’ да вар. Онун көмәјилә биз ‘Шәририн бүтүн аловлу охларыны сөндүрәҹәјик’ (Ефес. 6:16). Јеһоваја олан иманымыз вә үрәкдән ҝәлән мәһәббәтимиз бизә дүзҝүн давранмаға вә әбәди һәјата апаран јолда галмаға көмәк едәҹәк. Биз Јеһованы нә гәдәр чох севсәк, бир о гәдәр дә Онун салеһлијини гијмәтләндирәҹәјик. Бәс виҹдан барәдә нә демәк олар? О, бизә салеһлији севмәкдә јардымчы ола биләрми?

Тәмиз виҹданыны гору

9. Нәјә ҝөрә виҹданымызы тәмиз сахламаг ваҹибдир?

⁹ Вәфтиз заманы биз Јеһовадан ‘тәмиз виҹдан’ диләмишик (1 Пет. 3:21). Биз фидјә гурбанлығына иман етдијимиз үчүн Исанын ганы ҝүнаһларымызын үстүнү өртүр вә бунун сајәсиндә биз Аллаһ гаршысында тәмиз ада маликик. Лакин бу ады итирмәмәк үчүн виҹданымызы тәмиз сахламалыјыг. Виҹданымыз вахташыры бизи иттиһам едирсә вә ја хәбәрдаредиҹи сигналлар ҝөндәрирсә, онун дүзҝүн ишләдијинә ҝөрә севинмәлијик. Чүнки виҹданымыз Јеһованын садиг јолларына гаршы өз һәссаслығыны итирмәјиб (1 Тим. 4:2). Лакин салеһлији севмәк истәјәнләр үчүн виҹдан даһа бөјүк рол ојнаја биләр.

10, 11. а) Мүгәддәс Китаб әсасында тәрбијә олунмуш виҹданымызын сәсинә гулаг асмағын ваҹиблијини ҝөстәрән бир һадисә даныш. б) Нәјә ҝөрә салеһлији севмәк бизә бөјүк мәмнунлуг ҝәтирир?

¹⁰ Сәһв бир иш тутанда виҹданымыз бизи мүһакимә едә вә ја бизә әзаб верә биләр. Бир ҝәнҹ ‘салеһлик јолундан’ азмышды. О, порнографијаја алудә олду вә марихуана чәкмәјә башлады. Јығынҹаг ҝөрүшләриндә иштирак едәндә виҹданы ону нараһат едирди, хидмәтдә исә өзүнү икиүзлү кими һисс едирди. Буна ҝөрә дә о, һәгигәтдән ҝетди. Гардаш дејир: «Мән там баша дүшмүрдүм ки, виҹданым һәрәкәтләримә ҝөрә мәни мәсулијјәтә ҹәлб едәҹәк. Дөрд ил мән бу ахмаг јолдан әл чәкмәдим». Сонра о, һәгигәтә дөнмәк барәдә фикирләшмәјә башлады. Гардаш дүшүнүрдү ки, Јеһова онун дуаларына гулаг асмајаҹаг, буна бахмајараг, о дуа едиб Ондан үзр истәди. Он дәгигә кечмәди ки, анасы она баш чәкиб јығынҹаға ҝәлмәјә тәшвиг етди. О, Падшаһлыг Залына ҝәлиб бир ағсаггалдан онунла Мүгәддәс Китабы өјрәнмәји хаһиш етди вә бир мүддәтдән сонра вәфтиз олду. Һәјатыны хилас етдијинә ҝөрә гардаш Јеһоваја үрәкдән миннәтдардыр.

¹¹ Мәҝәр дүзҝүн оланы етмәк инсана бөјүк мәмнунлуг ҝәтирмир? Салеһлији севмәји вә бу ҹүр давранмағы өјрәндикҹә сәмави Атамыза мәгбул олан ишләр бизә даһа бөјүк севинҹ ҝәтирәҹәк. Бир тәсәввүрүнә ҝәтир, ҝүн ҝәләҹәк ки, виҹдан бүтүн инсанлара јалныз севинҹ ҝәтирәҹәк; о заман биз Аллаһын кејфијјәтләрини мүкәммәл сурәтдә әкс етдирәҹәјик. Буна ҝөрә дә ҝәлин салеһлијә олан мәһәббәтимизи үрәјимизин дәринликләринә һәкк едәк вә Јеһованы севиндирәк (Сүл. мәс. 23:15, 16).

12, 13. Виҹданымызы неҹә тәрбијә едә биләрик?

¹² Виҹданымызы неҹә тәрбијә едә биләрик? Мүгәддәс Китабы вә она әсасланан нәшрләри арашдыранда јадда сахламалыјыг ки, «салеһ инсан ҹаваб вермәздән әввәл гәлбиндә дүшүнәр» (Сүл. мәс. 15:28). Ҝәлин ҝөрәк ишлә бағлы мәсәләләри ҝөтүр-гој едәркән бу принсип бизә неҹә көмәк едә биләр. Әҝәр һәр һансы бир иш Мүгәддәс Китабдакы тәләбләрә бирбаша зидд ҝедирсә, әксәријјәтимиз садиг вә ағыллы нөкәр синфи васитәсилә верилән рәһбәрлијә дәрһал ҹаваб веририк. Ишлә бағлы суала конкрет ҹаваб олмајанда исә биз мүвафиг Мүгәддәс Китаб принсипләри тапмалы вә дуа едәрәк онларын үзәриндә дүшүнмәлијикa. Гәрарымыз башгаларынын виҹданына тохуна биләҹәји үчүн бунунла бағлы олан принсипләри арашдырмаг лазымдыр (1 Кор. 10:31—33). Јеһова илә мүнасибәтләримизә аид олан принсипләрә хүсуси диггәт јетирмәлијик. Әҝәр Јеһова бизим үчүн реал Шәхсијјәтдирсә, биз, илк нөвбәдә, өзүмүзә бу суалы верәҹәјик: «Мәним бу иши ҝөрмәјим Јеһованын “хәтринә” дәјмәјәҹәк ки?» (Мәз. 78:40, 41).

¹³ «Ҝөзәтчи Гүлләси»нә вә ја Јығынҹағын Мүгәддәс Китаб өјрәнмәсинә һазырлашаркән охудугларымызын үзәриндә дүшүнмәјин ваҹиблијини унутмамалыјыг. Өзүндән соруш: «Мәгаләјә һазырлашаркән ҹавабын алтындан тез-тәләсик хәтт чәкиб нөвбәти абзаса кечмәк вәрдишим вармы?» Әҝәр варса, чәтин ки, бизим салеһлијә олан мәһәббәтимиз артсын вә ја виҹданымыз һәссас олсун. Үрәјимиздә салеһлијә гаршы мәһәббәтин көк салмасыны истәјириксә, Аллаһын Кәламыны чалышганлыгла өјрәнмәли вә үзәриндә дүшүнмәлијик. Салеһлији севмәји өјрәнмәјин асан јолу јохдур!

«Салеһлик үчүн сусајыб она ҹан атанлар»

14. Јеһова Аллаһ вә Иса Мәсиһ мүгәддәс хидмәтин бизә неҹә тәсир ҝөстәрмәсини истәјирләр?

¹⁴ Јеһова Аллаһ вә Иса Мәсиһ истәјирләр ки, мүгәддәс хидмәт бизә севинҹ ҝәтирсин. Лакин севинҹимизә севинҹ гатмаг үчүн биз салеһлији дә севмәлијик. Дағүстү тәблиғиндә Иса демишди: «Салеһлик үчүн сусајыб она ҹан атанлар нә хошбәхтдирләр, чүнки онлар дојаҹаглар» (Мат. 5:6). Салеһлији севмәк истәјәнләр үчүн бу сөзләр нә дәрәҹәдә ваҹибдир?

15, 16. Руһани аҹлыг вә сусузлуг неҹә јатырылаҹаг?

¹⁵ Бизим јашадығымыз дүнјаны Шәрир идарә едир (1 Јәһ. 5:19). Дүнјанын истәнилән өлкәсиндә әлимизә гәзет аланда мисли ҝөрүлмәмиш дәрәҹәдә азғынлығын вә зоракылығын баш алыб ҝетдији барәдә мәлумат тапа биләрик. Инсанларын бир-бириләринә гаршы гәддарлығыны ҝөрәндә салеһ адамларын үрәји ган ағлајыр (Ваиз 8:9). Јеһованы севән бизләр билирик ки, салеһлик јолларыны өјрәнмәк истәјәнләрин руһани аҹлығыны вә сусузлуғуну јалныз О јатыра биләр. Аллаһсыз инсанлар тезликлә јер үзүндән силинәҹәк; салеһлији севәнләр даһа һеч вахт ганунсуз инсанлар вә онларын пис әмәлләри уҹбатындан әзијјәт чәкмәјәҹәкләр (2 Пет. 2:7, 8). О заман раһат нәфәс алмаг олаҹаг!

¹⁶ Јеһованын хидмәтчиләри вә Иса Мәсиһин давамчылары олан бизләр јахшы билирик ки, салеһлик үчүн сусајыб она ҹан атанларын һамысы «дојаҹаглар». ‘Салеһлијин һөкм сүрдүјү’ јени ҝөј вә јени јер һагда дејиләнләр һәјата кечәндә исә бу сөз там јеринә јетәҹәк (2 Пет. 3:13). Буна ҝөрә дә ҝәлин зүлм вә зоракылығын Шејтан дүнјасындан салеһлији сыхышдырыб чыхардығына тәәҹҹүбләнмәјәк вә буна ҝөрә һәддән артыг нараһат олмајаг (Ваиз 5:8). Уҹаларда олан Јеһова Аллаһ јер үзүндә нәләрин баш вердијини ҝөзәл билир вә тезликлә салеһлији севәнләри гуртараҹаг.

Салеһлији севмәјин ҝәтирдији хејир-дуалар

17. Салеһлији севмәјин ҝәтирдији бәзи хејир-дуалар һансылардыр?

¹⁷ Мәзмур 146:8 ајәсиндә салеһлик јолу илә ҝетмәјин ҝәтирдији мисилсиз хејир-дуадан бәһс олунур. Мәзмурчу охујурду: «[Јеһова] салеһләри севир». Тәсәввүр едирсән, салеһлији севдијимиз үчүн Каинатын Али Һөкмдары бизи севир! Буна ҝөрә дә биз әминик ки, Падшаһлыг ишини биринҹи јерә гојдуғумуз тәгдирдә О, бизи лазым олан һәр шејлә тәмин едәҹәк. (Мәзмур 37:25; Сүлејманын мәсәлләри 10:3 ајәләрини оху.) Вахт ҝәләҹәк, бүтүн Јер күрәси салеһлији севәнләрә мәхсус олаҹаг (Сүл. мәс. 13:22). Салеһлик јолу илә ҝетдикләри үчүн Јеһова әксәр хидмәтчиләрини ҝөзәл јерүзү Ҹәннәтдә әбәди һәјат вә түкәнмәз севинҹ һиссилә хејир-дуаландыраҹагдыр. Аллаһын салеһлијини севәнләр бу ҝүн дә мүкафатсыз галмырлар: үрәкләриндәки гәлб раһатлығы сајәсиндә доғмалары вә һәмиманлылары илә сүлһдә јашајырлар (Филип. 4:6, 7).

18. Јеһованын ҝүнүнү ҝөзләдијимиз мүддәтдә биз һансы хејирли ишләрлә мәшғул олмалыјыг?

¹⁸ Јеһованын бөјүк ҝүнүнү ҝөзләдијимиз мүддәтдә биз Онун салеһлијини ахтармаға давам етмәлијик (Сеф. 2:2, 3). Буна ҝөрә дә ҝәлин Јеһова Аллаһын салеһ јолларыны сәмими-гәлбдән севдијимизи ајдын ҝөстәрәк. Буна бизим мәҹази үрәјимизи горујан ‘салеһлик зиреһини дөшүмүзә тахыб’ ону һеч вахт чыхармамаг дахилдир. Үстәлик, биз виҹданымызы тәмиз сахламалыјыг. Бу, бизә мәмнунлуг, Аллаһа исә севинҹ ҝәтирәҹәк (Сүл. мәс. 27:11).

19. Биз нә етмәк әзминдәјик вә нөвбәти мәгаләдә нә мүзакирә олунаҹаг?

¹⁹ Јеһованын «ҝөзләри јер үзүнү сејр едир ки, үрәји бүтүнлүклә Онунла оланлары гүввәтләндирсин» (2 Салн. 16:9). Бу тәлатүмлү дүнјада гејри-сабитлијин, зоракылығын вә пислијин артдығы бир вахт дүзҝүн оланы едән бизләрә бу сөзләр әсил тәсәлли верир! Бизим салеһ јолларымыз Аллаһдан узаглашмыш инсанлара гәрибә ҝәлсә дә, биз баша дүшүрүк ки, Јеһованын салеһлијинә сарылмаг бизим өз хејримизәдир (Јешаја 48:17; 1 Пет. 4:4). Буна ҝөрә дә ҝәлин бундан сонра да Аллаһын салеһлијини бүтүн үрәјимизлә севәк вә бу јолла ҝетмәкдән севинҹ дујаг. Лакин «бүтөв үрәк» ифадәси алтында ганунсузлуға нифрәт етмәк дә нәзәрдә тутулур. Нөвбәти мәгаләдә бунун нә демәк олдуғу әтрафлы мүзакирә олунаҹаг.

[Һашијә]

Неҹә ҹаваб верәрдиниз?

• Салеһлији севмәк үчүн нәјә ҝөрә фидјәни гијмәтләндирмәлијик?

• ‘Салеһлик зиреһини дөшүмүзә тахмаг’ нәјә ҝөрә ваҹибдир?

• Виҹданымызы неҹә тәрбијә едә биләрик?

[26-ҹы сәһифәдәки шәкил]

Мүгәддәс Китаб әсасында тәрбијә олунмуш виҹдан ишлә бағлы мәсәләләри һәлл етмәкдә бизә көмәк едир