Алдығын хејир-дуалары гијмәтләндир

ЈЕҺОВА исраиллиләри мөҹүзәли шәкилдә Мисир көләлијиндән азад едәндә онлар Она чох миннәтдар идиләр. Чүнки артыг Јеһоваја сәрбәст ибадәт едә биләҹәкдиләр (Чых. 14:29—15:1, 20, 21). Лакин бу һадисәнин үстүндән чох кечмәмиш онларын дүшүнҹә тәрзи, фикирләри дәјишди. Халг өз ҝүзәранындан шикајәтләнмәјә башлады. Нәјә ҝөрә? Чүнки исраиллиләр Јеһованын онлар үчүн етдикләрини унудуб фикирләрини сәһрада гаршылашдыглары чәтинликләрә ҹәмләмишдиләр. Исраил оғуллары Мусаја дедиләр: «Нә үчүн сиз бизи Мисирдән чыхардыныз? Сәһрада өлмәк үчүнмү? Ахы бурада нә чөрәк, нә дә су вар. Бу дадсыз јемәкдән [маннадан] дә ијрәнирик» (Сај. 21:5).

Бир нечә әср сонра гәдим Исраилин падшаһы Давуд охујурду: «Сәнин мәһәббәтинә [севҝи долу хејирхаһлығына] ҝүвәнирәм, гуртулушунла гәлбим шадланаҹаг. Рәббә илаһи нәғмәми охујаҹағам, чүнки мәнә ҹомәрдлик етди» (Мәз. 13:5, 6). Давуд Јеһованын она ҝөстәрдији севҝи долу хејирхаһлығыны унутмамышды. Әксинә, о, даима Аллаһын ишләри барәдә дүшүнүрдү (Мәз. 103:2). Јеһова бизә дә ҹомәрдлик едиб вә биз буна ади јанашмамалыјыг. Ҝәлин Јеһованын вердији бәзи хејир-дуалар үзәриндә дүшүнәк.

«Јеһова илә сых мүнасибәт»

Мәзмурчу охујурду: «Јеһова илә сых мүнасибәт Ондан горханларындыр» (Мәз. 25:14, ЈД). Јеһова илә достлуг мүнасибәтиндә олмаг гејри-камил инсан олан бизләр үчүн бөјүк шәрәфдир! Туталым, башымыз ҝүндәлик ишләрә о гәдәр гарышыб ки, Јеһоваја јетәринҹә дуа етмирик. Белә олан һалда Јеһова илә сых мүнасибәтләримизин агибәти неҹә олаҹаг? Бу һагда дүшүнмәјә дәјәр. Бир Дост кими, Јеһова Аллаһ истәјир ки, биз Она етибар едәк вә горхуларымызы, нараһатчылыгларымызы вә арзуларымызы сөјләјәрәк дуада үрәјимизи бошалдаг (Сүл. мәс. 3:5, 6; Филип. 4:6, 7). Мәҝәр бу, бизи дуаларымызын кејфијјәтинә фикир вермәјә тәшвиг етмәли дејил?

Полa адында ҝәнҹ Шаһид дуаларына нәзәр саланда баша дүшдү ки, онлары јахшылашдырмалыдыр. Гардаш дејир: «Мән Јеһоваја дуа едәркән ејни ифадәләри ишләтмәји вәрдиш етмишдим». Пол «Ҝөзәтчи Гүлләси нәшрләринин индекси»нин көмәјилә арашдырма апараркән өјрәнди ки, сән демә, Мүгәддәс Китабда 180-ә јахын дуа гәләмә алыныб! Бу дуаларда Јеһованын кечмишдә јашајан хидмәтчиләринин ән дәрин һисс вә дујғулары әкс олунуб. Пол давам едир: «Мүгәддәс Китабда јазылан дуаларын үзәриндә дүшүнмәк мәнә өз дуаларымда конкрет олмағы өјрәтди. Бунун сајәсиндә үрәјими Јеһоваја ачмаг даһа асан олду. Инди Она дуа етмәк мәнә чох хошдур».

«Вахтлы-вахтында јемәк»

Мүгәддәс Китабдан өјрәндијимиз чохсајлы һәгигәтләр Јеһованын даһа бир хејир-дуасыдыр. Јеһова бизим гаршымызда руһани тәамларла зәнҝин олан сүфрә ачыб. Буна ҝөрә дә бизим ‘шадланыб мәдһијјәләр сөјләмәјә’ әсасымыз вар (Јешаја 65:13, 14). Амма биз јол вермәмәлијик ки, пис тәсирләр бизим һәгигәтә олан севҝимизи сојутсун. Мисал үчүн, дөнүкләрин тәблиғатына баш гошсаг, дүшүнҹәмиз зәһәрләнәҹәк вә биз Јеһованын «садиг вә ағыллы нөкәр» васитәсилә «вахтлы-вахтында» вердији руһани гидаја хор бахмаға башлајаҹағыг (Мат. 24:45—47).

Узун илләр Јеһоваја хидмәт едән, сонрадан исә дөнүкләрин тәсири алтына дүшәрәк һәгигәтдән ҝедән Андре өз аҹы тәҹрүбәси илә бөлүшүр. Вахтилә о дүшүнүрдү ки, дөнүкләрин Интернет сәһифәләринә ҝөзуҹу бахмағын һеч бир зәрәри јохдур. Кечмиш ҝүнләрини хатырлајараг о дејир: «Әввәл-әввәл дөнүкләрин данышдығы “һәгигәт” мәни ҹәлб едирди. Онларын јаздыглары мәлуматларын дәринликләринә ҝетдикҹә Јеһованын тәшкилатыны тәрк етмәклә дүзҝүн һәрәкәт етдијимә ҝүнү-ҝүндән даһа чох әмин олурдум. Лакин бир гәдәр сонра, дөнүкләрин Јеһованын Шаһидләринә гаршы ҝәтирдикләри аргументләри арашдыранда јаланчы мүәллимләрин нә гәдәр мәкрли олдугларыны анладым. Контекстдән чыхардылмыш мәлумат онларын бизә гаршы истифадә етдији ән “ҝүҹлү силаһ” иди. Мән јенидән нәшрләримизи охумаг вә јығынҹаг ҝөрүшләриндә иштирак етмәк гәрарына ҝәлдим. Тезликлә нәләрдән мәһрум олдуғуму баша дүшдүм». Хошбәхтликдән, Андре јығынҹаға гајытды.

Бизим үмумдүнја гардашлығымыз

Севҝи вә бирлијин һөкм сүрдүјү гардашлығымыз Јеһованын диҝәр хејир-дуасыдыр (Мәз. 133:1). Буна ҝөрә дә һәвари Петер јазмышды: «Бүтүн гардашлығы севин» (1 Пет. 2:17). Үмумдүнја мәсиһчи гардашлығынын үзвү олдуғумуз үчүн иманымыза шәрик олан чохсајлы руһани аталарын, аналарын, гардаш вә баҹыларын сәмими мәһәббәт вә дәстәјинә маликик (Марк 10:29, 30).

Амма јенә дә мүхтәлиф сәбәбләрә ҝөрә бәзән һәмиманлыларымызла мүнасибәтимиздә ҝәрҝинлик јарана биләр. Мисал үчүн, бир нәфәрин гејри-камил ҹәһәтләри бизи асанлыгла гыҹыгландыра биләр вә буна ҝөрә дә биз һәмин инсана гаршы тәнгиди мөвге тута биләрик. Әҝәр бу дејиләнләр бизә дә аиддирсә, онда јадда сахламалыјыг ки, гејри-камил олмаларына бахмајараг, Јеһова бүтүн хидмәтчиләрини севир. Үстәлик, әҝәр биз: «“Биздә ҝүнаһ јохдур”, — дејириксә, онда биз өзүмүзү алдадырыг вә гәлбимиздә һәгигәт јохдур» (1 Јәһ. 1:8). Мәҝәр биз ‘бир-биримизә гаршы һәмишә сәбирли олмалы’ дејилик? (Колос. 3:13).

Анна адлы ҝәнҹ мәсиһчи гардашлығымызын нә гәдәр дәјәрли олдуғуну анламаг үчүн аҹы тәҹрүбәдән кечмәли олду. Исанын мәсәлиндәки итмиш оғул кими, о, мәсиһчи јығынҹағындан узаглашмышды. Лакин сонра сәһв етдијини дәрк едиб һәгигәтә гајытды (Лука 15:11—24). Анна бундан өзүнә һансы дәрси ҝөтүрдү? О дејир: «Јеһованын јығынҹағына гајыдандан сонра мән бүтүн баҹы вә гардашлары, гејри-камилликләринә бахмајараг, гијмәтләндирмәјә башладым. Әввәлләр мән онлара чох тәнгиди јанашырдым. Амма инди јол вермәрәм ки, нә исә һәмиманлыларым арасында малик олдуғум хејир-дуалардан мәни мәһрум етсин. Бу дүнјада һеч бир шеј бизим руһани ҹәннәтимизә чата билмәз».

Хејир-дуаларынын гијмәтини бил

Биз билирик ки, бүтүн дүнјанын проблемләринә бирдәфәлик јалныз Аллаһын Падшаһлығы сон гојаҹаг. Бизим малик олдуғумуз бу үмид әсил хәзинәдир. Биз бу үмид барәдә илк дәфә өјрәнәндә үрәјимиз севинҹдән неҹә дә ҹуша ҝәлмишди! Биз «чох гијмәтли бир мирвари»ни алмаг үчүн «ҝедиб дәрһал һәр шејини» сатан таҹирә бәнзәјирик (Мат. 13:45, 46). Иса демәди ки, бу мирвари сонрадан таҹирин ҝөзүндән дүшдү. Гој бу ҝөзәл үмид дә һеч вахт бизим ҝөзүмүздән дүшмәсин! (1 Салон. 5:8; Ибр. 6:19).

60 илдән чох Јеһоваја хидмәт едән Ҹејн адлы баҹы дејир: «Аллаһын Падшаһлығы һагда башгалары илә данышмаг диггәтими бу үмиддә сахламаға көмәк едир. Кимсә Падшаһлыг һаггында һәгигәти баша дүшдүјүнә ҝөрә ҝөзләри ишылдајанда севинҹимин һәдди-һүдуду олмур. Падшаһлыг һаггында һәгигәтин инсанларын һәјатыны дәјишдирдијини ҝөрәндә һәмишә фикирләширәм ки, ҝөр бу һәгигәтләр неҹә ҝөзәлдир!»

Һал-һазырда малик олдуғумуз чохсајлы руһани хејир-дуалара ҝөрә миннәтдар олмаг үчүн бизим тутарлы сәбәбләримиз вар. Тәгибләр, хәстәликләр, гоҹалыг, депрессија, әзизләримизин өлүмү вә мадди чәтинликләр кими проблемләрлә үзләшдијимизә бахмајараг, онларын мүвәггәти олдуғуну билирик. Аллаһын Падшаһлығы јер үзүнү идарә едәндә индики руһани хејир-дуаларымыза физики хејир-дуалар әлавә олунаҹаг. Һал-һазырда гаршылашдығымыз әзаб-әзијјәтләр јени дүнјада һеч јадымыза дүшмәјәҹәк (Вәһј 21:4).

Јени дүнјаны ҝөзләдијимиз мүддәтдә ҝәлин руһани хејир-дуаларымыза ҝөрә Аллаһа миннәтдар олаг вә нөвбәти сөзләри дејән мәзмурчу кими, онлары гијмәтләндирдијимизи ҝөстәрәк: «Ја Рәбб Аллаһым, Сәнә бәнзәјән јохдур! Бизә аид харигәләрин, дүшүнҹәләрин чохдур. Онлардан данышмаг истәсәм, белә дејәрдим: “Сајы-һесабы јохдур”» (Мәз. 40:5).

[Һашијә]

[18-ҹи сәһифәдәки шәкил]

Сынаглар заманы бизә ҝөстәрилән руһани көмәк әсил хејир-дуадыр