Сәмәрәли вә хош өјрәнмә
“Әҝәр... ону ахтарсан... Аллаһ билијини тапаҹагсан” (СҮЛЕЈМАНЫН МӘСӘЛЛӘРИ 2:4, 5).
1. Бош вахтларда охумагдан неҹә ләззәт ала биләрик?
ИНСАНЛАРЫН әксәријјәти, садәҹә олараг һәзз алмаг үчүн охујурлар. Әҝәр материал фајдалыдырса, охумаг сағлам истираһәт ола биләр. Бә’зи мәсиһчиләр Мүгәддәс Китабы шәхси ҹәдвәл үзрә охумагла бәрабәр, һәм дә Мәзмурлары, Сүлејманын мәсәлләрини, еләҹә дә Инҹилдән вә Мүгәддәс Китабын башга һиссәләриндән сечилмиш парчалары охујурлар. Дилин валеһедиҹи тәрздә ҝөзәл олмасы вә фикирләрин дәринлији онлара ләззәт верир. Диҝәрләри бош вахтларында “Јегованын Шаһидләринин салнамәси”ни, “Ојанын!” журналыны вә әлиниздәки журналда нәшр олунан тәрҹүмеји-һаллары, јахуд да тарих, ҹоғрафија вә тәбиәт һаггында олан мәгаләләри охујурлар.
2, 3. а) Дәрин руһани мә’лумат, һансы мә’нада гүввәтли јемәјә бәнзәјир? б) Өјрәнмә өзүнә нәји дахил едир?
2 Ләззәт алмаг наминә охумаг истираһәт ола биләр, өјрәнмәк исә әгли гүввә ҝәрҝинлији тәләб едир. Инҝилис философу Бекон Френсис јазырды: “Бә’зи китабларын дадына бахмаг кифајәтдир, бә’зиләрини исә удмаг олар, лакин еләләри дә вар ки, онлары чејнәмәк вә һәзм етмәк лазымдыр”. Мүгәддәс Китаб, һеч бир шүбһә олмадан, ахырынҹы група аиддир. Һәвари Павел јазырды: “Бу барәдә [падшаһ вә каһин Мәлкиседек кими тәгдим олунан Мәсиһ барәдә] дејиләси сөзүмүз чохдур, амма бунлары изаһ етмәк чәтиндир. Чүнки сиз ағыр ешидирсиниз. Гүввәтли јемәк... камилләр үчүндүр. Чүнки онларын һиссләри алышдырылараг, хејирлә шәри ајырд етмәк үчүн тәрбијә едилмишдир” (Ибраниләрә 5:11, 14). Гүввәтли јемәји удуб, һәзм етмәздән әввәл, чејнәмәк лазымдыр. Дәрин руһани мә’лумат, јаддашымызда һәкк олунуб мөһкәмләнмәздән әввәл исә, онун үзәриндә дәриндән дүшүнмәк ҝәрәкдир.
3 Лүғәтә әсасән “өјрәнмәк” - “билик әлдә етмәк, бир шеји тәҹрүбә илә мәнимсәмәк” демәкдир. Ҝөрүндүјү кими, “өјрәнмәк”, сәтһи олараг охумагдан даһа артыг шеји - охујаркән сөзләрин алтындан хәтт чәкмәји нәзәрдә тутур. Өјрәнмәк - зәһмәт чәкмәк, дәрк етмә габилијјәти илә јанашы әгли гүввәни ҝәрҝинләшдирмәк демәкдир. Өјрәнмә гүввә тәләб етсә дә, мәмнунлуг верә биләр.
Мәмнунедиҹи өјрәнмә
4. Аллаһын Кәламыны өјрәнмәк, мәзмурчунун сөзләринә ҝөрә, неҹә мөһкәмләндириҹи вә фајдалы ола биләр?
4 Аллаһын Кәламыны охумаг вә өјрәнмәк, инсаны мөһкәмләндириб, гүввә верә биләр. Мәзмурчу дејирди: “РӘББИН шәриәти камилдир; ҹаны тәзәләјир; РӘББИН шәһадәти [“хатырлатмасы”, ЈД] садигдир; тәҹрүбәсиз адама һикмәт верир. РӘББИН бујуруғу доғрудур; үрәји севиндирир; РӘББИН әмри пакдыр; ҝөзләри ајдынладыр” (Мәзмур 19:7, 8). Јегованын ганунлары вә хатырлатмалары ҹанымызы дирчәлдир, руһани рифаһымыза көмәк едир, бизә дахили севинҹ ҝәтирир вә ҝөзләримизи “ајдынладараг”, Онун һејранедиҹи нијјәтләрини ачыг-ашкар ҝөрмәјә имкан јарадыр. Бүтүн бунлар неҹә дә валеһедиҹидир!
5. Өјрәнмәкдән һәгиги мәмнунлуғу неҹә алмаг олар?
5 Ҝөрдүјүмүз бир иш јахшы нәтиҹәләр верәндә, биз мәмнунлуг һисси дујуруг. Буна ҝөрә дә, өјрәндијимизин бизә севинҹ бәхш етмәси үчүн, әлдә етдијимиз јени билији дәрһал тәтбиг етмәлијик. Јагуб јазырды: “Ким камил гануна, азадлыг ганунуна диггәтлә бахыб она бағлы галарса вә унутган динләјиҹи дејил, иҹраедиҹидирсә, өз әмәлиндә хошбәхт олаҹагдыр” (Јагуб 1:25). Әлдә едилән биликләр ҝеҹикдирилмәдән тәтбиг едиләрсә, дәрин мәмнунлуг ҝәтирәр. Евдән-евә тәблиғ едәркән вә ја Мүгәддәс Китабы бир кимсәјлә өјрәнәркән бизә верилән суалын ҹавабыны ахтармаг да бизә бөјүк севинҹ ҝәтирәҹәк.
Аллаһын Кәламына мәһәббәт инкишаф етдирмәк
6. Јүз ондоггузунҹу Мәзмуру бәстәләјән шәхс Јегованын Кәламына олан мәһәббәтини неҹә ҝөстәрди?
6 Јүз ондоггузунҹу Мәзмуру бәстәләјән шәхс - еһтимала ҝөрә, падшаһлыг тахтынын ҝәнҹ вариси олан Һезекија - Јегованын кәламына мәһәббәт ҝөстәрмишдир. О, шаиранә тәрздә јазырды: “Ганунларындан зөвг алырам; сөзүнү унутмарам. Шәһадәтләрин дә мәним зөвгүмдүр, мәним өјүдчүләримдир. Вә севдијим әмрләриндә зөвг тапырам. Мәрһәмәтләрин мәнә ҝәлсин дә јашајым; чүнки шәриәтин мәним зөвгүмдүр. Хиласыны ҝөзләдим, ја РӘБ; вә шәриәтин зөвгүмдүр” (Мәзмур 119:16, 24, 47, 77, 174).
7, 8. а) Бир лүғәтә ҝөрә, Аллаһын Кәламындан “зөвг алмаг” нә демәкдир? б) Биз, Аллаһын Кәламына мәһәббәтимизи неҹә ҝөстәрә биләрик? в) Езра, Јегованын Ганунуну охумаға неҹә һазырлашырды?
7 Ибраниҹә Мүгәддәс Јазылар үзрә бир лүғәт, 119-ҹу Мәзмурдакы “зөвг алмаг” сөзүнү белә изаһ едир: “16-ҹы ајәдә истифадә олунан фе’л, “севинмәк”... вә “дүшүнмәк” [фе’лләри] илә паралелдир... Фәалијјәт ашағыдакы гајда үзрә апарылыр: севинмәк, дүшүнмәк, зөвг алмаг... Бу әлагәләндирмә, Јәһванын кәламларындан зөвг ала билмәси үчүн, инсанын бу кәламлар үзәриндә дәриндән дүшүнмәсинин ваҹиб олмасыны ҝөстәрә биләр. [...] Бурада, дујғулара мүраҹиәт нәзәрдә тутулур”a.
8 Бәли, Јегованын Кәламына мәһәббәтимиз, һиссләримизин мәркәзи олан үрәјимиздән ҝәлмәлидир. Јениҹә охудуғумуз һиссәләрин үзәриндә дајанмагдан мәмнунлуг һисси алмалыјыг. Биз руһани ҹәһәтдән дәрин фикирләрә диггәт јетирмәли, онлары ҹанымыза чәкмәли вә онларын үзәриндә дүшүнмәлијик. Бунун үчүн сакитҹә фикирләшмәк вә дуа етмәк ваҹибдир. Езра кими, биз дә үрәјимизи Аллаһын Кәламыны охумаға вә тәдгиг етмәјә һазырламалыјыг. Езра һаггында јазылыб: “РӘББИН шәриәтини арајыб иҹра етмәк үчүн вә Исраилдә гануну вә һөкмләри өјрәтмәк үчүн Езра өз үрәјини һазырламышды” (Езра 7:10). Езранын өз үрәјини һансы үч мәгсәд үчүн һазырладығына диггәт јетирин: өјрәнмәк, өјрәниләни һәјатда тәтбиг етмәк вә башгаларына тә’лим вермәк. Биз онун нүмунәсинә риајәт етмәлијик.
Ибадәтин тәркиб һиссәси олан өјрәнмә
9, 10. а) Мәзмурчу, Јегованын Кәламына олан дәрин марағыны неҹә ҝөстәрирди? б) “Дәрин мараг ҝөстәрмәк” кими тәрҹүмә олунан гәдим ибрани сөзү һансы мә’наны дашыјыр? в) Нә үчүн Мүгәддәс Китабы өјрәнмәји “ибадәт нөвү” кими һесаб етмәк ваҹибдир?
9 Мәзмурчу, Јегованын ганунлары, әмрләри вә хатырлатмалары һагда дүшүндүјүнү вә ја онлара дәриндән мараг ҝөстәрдијини сөјләјирди. О, охујурду: “Бујуруғуну дүшүнүрәм [“сәнин әмрләринлә дәриндән марагланаҹағам”, ЈД] вә сәнин јолларына бахырам. Севдијим әмрләринә доғру әлләрими галдырарам; вә сәнин ганунларыны дүшүнүрәм. Шәриәтини нә гәдәр севирәм! Бүтүн ҝүн дүшүнҹәм одур. Бүтүн мүәллимләримдән даһа анлајышлы олдум; чүнки шәһадәтләрин [“хатырлатмаларын”, ЈД] мәним дүшүнҹәмдир” (Мәзмур 119:15, 48, 97, 99). Јегованын Кәламлары илә “дәриндән марагланмаг” нә демәкдир?
10 Бу ҹүр тәрҹүмә олунан гәдим ибрани сөзү, һәм дә “дүшүнмәк, ҝөтүр-гој етмәк”, “нәји исә әтрафлы фикирләшмәк” мә’насыны верир. “Бунунла, Аллаһын ишләри... вә Аллаһын сөзләри үзәриндә сакит дүшүнмәк тәсвир олунур” (“Theological Wordbook of the Old Testament”). “Дәрин мараг” мә’насыны дашыјан исим, “мәзмурчунун дүшүнҹәсини” вә өзлүјүндә “ибадәт нөвүнү” әкс етдирән Аллаһын ганунуну “һәјәҹанла өјрәндијини” ҝөстәрир. Әҝәр өјрәнмәни ибадәтимизин бир нөвү һесаб етсәк, онда өјрәнмәјә даһа ҹидди јанашаҹағыг. Биз, виҹданла мәшғул олмалы вә дуанын көмәјиндән истифадә етмәлијик. Өјрәнмә, ибадәтимизин тәркиб һиссәсидир вә ибадәтимизи јахшылашдырмаг мәгсәдилә едилир.
Аллаһын Кәламынын дәринлијини анламаг
11. Јегова дәрин руһани дүшүнҹәләри өз халгына неҹә ашкар едир?
11 Мәзмурчу һәјәҹан вә еһтирамла нида етди: “Ишләрин нә бөјүкдүр, ја РӘБ! Дүшүнҹәләрин чох дәриндир” (Мәзмур 92:5). Јегованын, “Өз Руһу” васитәсилә “садиг вә ағыллы гул” синфинә тә’сир едәрәк, халгына ашкар етдији “дәрин дүшүнҹәләри” барәдә һәвари Павел дә данышырды (1 Коринфлиләрә 2:10; Матта 24:45). Гул синфи, сә’ј ҝөстәрәрәк һамыны руһани гида илә тә’мин едир: јени ҝәләнләрә “сүд”, “јеткинләрә” (ЈД) исә “гүввәтли јемәк” верир (Ибраниләрә 5:11—14).
12. “Садиг вә ағыллы гул” тәрәфиндән изаһ едилән “Аллаһын дәрин дүшүнҹәләри” барәдә мисал чәкин.
12 “Аллаһын дәрин дүшүнҹәләрини” анламаг үчүн, Онун Кәламыны дуа едәрәк өјрәнмәк вә өјрәндикләримизин үзәриндә дәриндән дүшүнмәк лазымдыр. Мисал үчүн, бир дәфә, Јегованын ејни заманда һәм әдаләтли, һәм дә мәрһәмәтли ола билдијини изаһ едән бир мәгалә дәрҹ олунмушдур. Јегова мәрһәмәт ҝөстәрәрәк әдаләтли олмагдан әл чәкмир, әксинә, Аллаһын мәрһәмәти һәм Онун әдаләтини, һәм дә мәһәббәтини ҝөстәрир. Јегова ҝүнаһкары мүһакимә едәндә, әввәлҹә өз Оғлунун фидијә гурбанлығына әсасән һәмән ҝүнаһкара мәрһәмәт ҝөстәрмәјин мүмкүн олуб олмадығыны мүәјјән едир. Әҝәр ҝүнаһкар олан шәхс төвбә етмирсә вә ја Аллаһа гаршы үсјан едирсә, мәрһәмәти әсассыз олараг ҝөстәрмәдән, Аллаһ мәсәләни әдаләт әсасында һәлл едир. Јегова һәр ики вәзијјәтдә өз јүксәк принсипләринә садиг галырb (Ромалылара 3:21—26). “Еј Аллаһын... һикмәт... дәринлији!” (Ромалылара 11:33).
13. Биз, индијәдәк ачыгланан руһани һәгигәтләрин “бөјүк сајына” ҝөрә өз миннәтдарлығымызы неҹә ҝөстәрә биләрик?
13 Јегованын бир чох фикирләрини бизимлә бөлүшмәси, мәзмурчу кими, бизә дә хош һәјәҹан һисси верир. Давуд јазырды: “Дүшүнҹәләрин дә мәним үчүн нә дәјәрлидир, еј Аллаһ! Онларын топу [“сајы”, ЈД] нә бөјүкдүр! Онлары сајсам, гумдан чохдурлар” (Мәзмур 139:17, 18). Бу ҝүн билдикләримиз, Јегованын әбәдијјәт әрзиндә бизә ашкар едәҹәји сајсыз-һесабсыз дүшүнҹәләрин јалныз бир зәррәсидир. Лакин буна бахмајараг, индијәдәк ачыгланан дәјәрли руһани һәгигәтләрин “бөјүк сајыны” чох гијмәтләндиририк вә Аллаһын Кәламынын “маһијјәтини” (ЈД) дәриндән анламаға чалышырыг (Мәзмур 119:160).
Гүввә сәрф етмәк вә јахшы вәсаитләрдән истифадә етмәк лазымдыр
14. Аллаһын Кәламыны өјрәнән заман, гүввә сәрф етмәјин ваҹиблији Сүлејманын мәсәлләри 2:1—6 ајәләриндә неҹә гејд олунур?
14 Мүгәддәс Китабы дәриндән өјрәнмәк гүввә тәләб едир. Сүлејманын мәсәлләри 2:1—6 ајәләрини диггәтлә охусаг, бу факт ајдын олур. Бурадакы фәал һәрәкәтләри ҝөстәрән фе’лләрә диггәт јетирин; мүдрик падшаһ Сүлејман, Аллаһдан ҝәлән билији, мүдриклији вә сечмәк мәһарәтини мәнимсәмәк үчүн, тәләб олунан гүввәни бу фе’лләрдән истифадә едәрәк гејд етмишдир. О јазырды: “Оғлум, гулағыны һикмәтә чевирәрәк вә анлајыша үрәјини мејлләндирәрәк, сөзләрими гәбул етсән; вә әмрләрими јанында сахласан; ҝерчәк, әҝәр идракы чағырсан вә анлајыша сәсини јүксәлтсән; әҝәр ҝүмүш ахтарар кими ону ахтарсан вә хәзинәләр арашдырар кими ону арашдырсан; РӘБ горхусуну о заман анлајаҹагсан вә Аллаһ билијини тапаҹагсан. Чүнки РӘБ һикмәт верир; ағзындан билик вә анлајыш чыхар”. Бәли, өјрәнмә сәмәрәләр ҝәтирсин дејә, ҝизләдилмиш хәзинәләр ахтарыр кими, сә’јлә тәдгигат апармаг лазымдыр.
15. Мүгәддәс Китабдакы һансы әјани мисал, өјрәнмә үчүн јахшы үсулларын лазым ҝәлдијини ҝөстәрир?
15 Бундан әлавә, руһән зәнҝинләшдирән өјрәнмә јахшы үсуллар тәләб едир. Сүлејман јазырды: “Әҝәр балта күтдүрсә вә ағзы итиләнмәзсә, даһа чох гүввәт сәрф етмәли” (Ваиз 10:10). Әҝәр бир адам күт балта илә ишләјирсә вә ја баҹарыгсыздырса, бош јерә гүввә итирәҹәк вә иши кејфијјәтсиз олаҹаг. Буна бәнзәр тәрздә, өјрәнмәнин дә нә дәрәҹәдә фајда ҝәтирмәси, ону кечирдијимиз үсуллардан асылыдыр. Өјрәнмәни даһа јахшы кечирмәк һагда практики мәсләһәтләри, “Теократик хидмәт Мәктәби үчүн рәһбәрлик” китабында, 7-ҹи дәрсдән тапмаг оларc.
16. Дәрин өјрәнмә үчүн, бизә һансы практики мәсләһәтләр көмәк едәр?
16 Сәнәткар ишә башламаздан әввәл, лазым олаҹаг аләтләри јанына гојур. Бунун кими, биз дә өјрәнмәјә башламаздан габаг, лазым олаҹаг “аләтләри” өз шәхси китабханамыздан сечмәлијик. Өјрәнмәнин зеһни гүввә тәләб едән иш олдуғуну нәзәрә алараг, өјрәнәркән лазыми вәзијјәти гәбул етмәк дүзҝүн оларды. Әҝәр ағлымызын ајдын ишләмәсини истәјириксә, чарпајыја узанмаг вә ја креслоја јајылмаг әвәзинә, стол архасында әјләшәрәк мәшғул олмаг даһа јахшыдыр. Бир гәдәр мәшғул олдугдан сонра, бир аз идман етмәк вә ја тәмиз һаваја чыхмаг олар.
17, 18. Бизим үчүн әлверишли олан фајдалы вәсаитләри неҹә истифадә етмәк олар?
17 Өјрәнәркән фајда әлдә етмәјимиз үчүн, әвәзедилмәз вәсаитләримиз чохдур. Бунлардан ән әсасы, һазырда там вә ја гисмән 37 дилдә мөвҹуд олан Мүгәддәс Китабын “Јени Дүнја Тәрҹүмәси”дир. “Јени Дүнја Тәрҹүмәси”нин стандарт нәшриндә паралел ҝөстәриҹиләрин, китаблары јазан инсанларын адларыны вә онун јазылдығы јери, әһатә олундуғу дөврү ҝөстәрән “Мүгәддәс Китаб сијаһысы” вар. Бу нәшрдә һәмчинин Мүгәддәс Китаб сөзләринин индекси, көмәкчи әлавәләр вә хәритәләр дә вар. Бә’зи дилләрдә бу Мүгәддәс Китаб даһа бөјүк өлчүдә нәшр олунуб вә “Мүгәддәс Јазыларын гејдләрлә Јени Дүнја Тәрҹүмәси” кими таныныр. Бу нәшрә һәм јухарыда садалананлар, һәм дә даһа ҝениш сурәтдә гејдләр вә онларын ҝөстәриҹиләри дахилдир. Сиз, Аллаһын Кәламыны дәриндән анламаг үчүн, өз ана дилиниздә нәшр олунан бүтүн вәсаитләрдән истифадә едирсинизми?
18 Өјрәнмәклә мәшғул олмагда диҝәр дәјәрли көмәкчи вәсаит, “Мүгәддәс Јазыларын дәрк едилмәси” адлы ики ҹилдли Мүгәддәс Китаб енсиклопедијасыдыр. Әҝәр бу әсәр сизин баша дүшдүјүнүз дилдә варса, өјрәндијиниз заман, һәмишә әлинизин алтында олмалыдыр. Бу енсиклопедија, Мүгәддәс Китабын әксәр мөвзулары барәдә сизә әлавә мә’лумат верәҹәк. Бундан әлавә, “Һәр Мүгәддәс Јазы Аллаһдан илһам алыб вә фајдалыдыр” адлы китаб да вар. Мүгәддәс Китабын јени бир һиссәсини охумаға башлајанда, ҹоғрафи вә тарихи мә’луматлары әлдә етмәк үчүн “Һәр Мүгәддәс Јазы” китабынын мүвафиг дәрсинә мүраҹиәт етмәк, охудуғунуз китабын иҹмалы илә таныш олмаг вә онун дәјәрини өјрәнмәк јахшы оларды. Өјрәнмә үчүн һазырланмыш чохсајлы вәсаитләрә, бу јахынларда “Ҝөзәтчи Гүлләсинин Китабханасы” адлы, артыг 9 дилдә мөвҹуд олан, компүтер вәсаити дә әлавә олунуб.
19. а) Мүгәддәс Китабы өјрәнмәмиз үчүн Јегова нәјә ҝөрә бизи фајдалы вәсаитләрлә тә’мин едир? б) Мүгәддәс Китабы лазыми гајдада охумаг вә өјрәнмәк үчүн нә тәләб олунур?
19 Јегова бүтүн бу вәсаитләри “садиг вә ағыллы гул”ун васитәсилә она ҝөрә вериб ки, јер үзүндә олан хидмәтчиләри “ахтарсынлар вә... Аллаһ билијини” тапсынлар (Сүлејманын мәсәлләри 2:4, 5). Јахшы өјрәнмә сајәсиндә биз Јегованы даһа да јахындан таныјаҹаг вә Она јахынлашаҹағыг (Мәзмур 63:1—8). Бәли, өјрәнмә зәһмәт тәләб едир, амма зөвг вә мүкафат ҝәтирир. Өјрәнмә вахт тәләб етдијиндән сиз јәгин ки, фикирләширсиниз: “Мүгәддәс Китабы охумаға вә шәхси өјрәнмәјә лазым олан вахты неҹә тапмаг олар?” Бу суал сонунҹу мөвзуда мүзакирә олунаҹагдыр.
[Һашијәләр]
a “Әһди-әтигин илаһијјаты вә изаһы үзрә јени бејнәлхалг лүғәт” (“New International Dictionary of Old Testament Theology & Exegesis”), ҹилд 4, сәһифә 205—207.
b “Ҝөзәтчи Гүлләси”нин 1998-ҹи ил 1 август нөмрәсинә, сәһифә 13, абзас 7-јә бахын (русҹа). Мүгәддәс Китабы шәхсән өјрәнән заман, һәмин журналын ики өјрәниләҹәк мөвзусуну, һәм дә Ҝөзәтчи Гүлләси Ҹәмијјәтинин нәшр етдији “Мүгәддәс Јазыларын дәрк едилмәси” адлы Мүгәддәс Китаб енсиклопедијасынын “Justice” (“Әдаләт”), “Mercy” (“Мәрһәмәт”) вә “Righteousness” (“Салеһлик”) мөвзуларыны нәзәрдән кечирмәк олар.
c Ҝөзәтчи Гүлләси Ҹәмијјәти тәрәфиндән нәшр олунуб. Әҝәр бу китаб сизин ана дилиниздә јохдурса, өјрәнмә үсуллары барәдә мәсләһәтләри “Ҝөзәтчи Гүлләси”нин бу нөмрәләриндән тапмаг олар: 15 август 1993-ҹү ил, сәһифә 13—17; 15 октјабр 1986-ҹы ил, сәһифә 19, 20, (русҹа).
Тәкрар үчүн суаллар
• Шәхси өјрәнмәнин бизи мөһкәмләндирмәси вә сәмәрәләр ҝәтирмәси үчүн нә едә биләрик?
• Мәзмурчу кими, Јегованын Кәламына мәһәббәт вә дәрин марағы биз неҹә ҝөстәрә биләрик?
• Сүлејманын мәсәлләри 2:1—6 ајәләри, Аллаһын Кәламыны өјрәнмәк үчүн гүввә тәләб олундуғуну неҹә ҝөстәрир?
• Јегова бизә өјрәнмә үчүн һансы фајдалы вәсаитләри тәгдим едир?
[22-ҹи сәһифәдәки шәкил]
Сакитҹә фикирләшмәк вә дуа етмәк, Аллаһын Кәламына мәһәббәт инкишаф етдирмәкдә бизә көмәк едәр
[24-ҹү сәһифәдәки шәкилләр]
Сиз, Аллаһын Кәламыны дәриндән анламаг үчүн, өз ана дилиниздә нәшр олунан өјрәнмә вәсаитләрдән истифадә едирсинизми?