Гој Аллаһын сөзү јолларыны ишыгландырсын
«Сөзүн... јолларыма ишыгдыр» (МӘЗМУР 119:105).
1, 2. Јеһованын сөзү һансы һалларда јолларымыза ишыг сачаҹаг?
ӘҜӘР изн верәриксә, Јеһованын сөзү јолларымыза ишыг сачар. Руһани ишығын бизә фајда ҝәтирмәси үчүн, Аллаһын Кәламыны сә’јлә тәдгиг етмәли вә принсипләрини һәјатымызда тәтбиг етмәлијик. Јалныз белә олан һалда мәзмурчунун һиссләринә шәрик ола биләрик: «Сөзүн һәр аддымым үчүн чырагдыр, јолларыма ишыгдыр» (Мәзмур 119:105).
2 Ҝәлин Мәзмур 119:89-176 ајәләрини тәдгиг едәк. Бу 11 бәнддә нә гәдәр бөјүк мүдриклик вардыр! Бу биликләр, әбәди һәјат јолунда мөһкәм дурмағымыза көмәк едә биләр (Матта 7:13, 14).
Аллаһын сөзүнү нәјә ҝөрә севмәлијик?
3. Мәзмур 119:89, 90 ајәләри Аллаһын сөзүнә е’тибар едә биләҹәјимизи неҹә ҝөстәрир?
3 Јеһованын сөзүнә олан мәһәббәт бизә руһани сабитлик верир (Мәзмур 119:89-96). Мәзмурчу охујурду: «Ја Рәбб, сөзүн әбәдидир, ҝөјләрдәдир, дәјишмәздир... Јер үзүнү Сән гурмусан, мөһкәм галыр» (Мәзмур 119:89, 90). Аллаһын сөзү илә, јә’ни Онун гојдуғу «ҝөјләрин ганунлары» илә Ҝүнәш, Ај вә улдузлар кими ҝөј ҹисимләри өз орбитләриндә дәгиг һәрәкәт едир, јер үзү исә әбәди дурур (Әјјуб 38:31-33; Мәзмур 104:5). Биз Јеһованын ағзындан чыхан һәр бир кәлмәјә е’тибар едә биләрик; Онун сөјләдикләри, ирадәсинин јеринә јетмәси үчүн мүтләг һәјата кечәҹәк (Јешаја 55:8-11).
4. Аллаһын сөзүндән зөвг алмаг, Онун әзаблара таб ҝәтирән хидмәтчиләринә неҹә көмәк едир?
4 Мәзмурчу Аллаһын ‘ганунундан зөвг алмасајды, әзаб чәкмәкдән һәлак оларды’ (Мәзмур 119:92). Мәзмурчуја әзаб верән јаделлиләр дејил, она нифрәт едән гануну позан исраиллиләр иди (Левилиләр 19:17). Лакин бу онун ирадәсини гырмады, чүнки мәзмурчу, Аллаһын она дајаг олан ганунуну севирди. Коринфдә һәвари Павел, она гаршы мүхтәлиф иттиһамлар ирәли сүрән «фөвгәлһәвариләр» дә дахил олмагла, «јаланчы гардашлар арасында» тәһлүкәдә иди (2 Коринфлиләрә 11:5, 12-14, 26). Лакин буна бахмајараг, Аллаһын сөзүндән зөвг алдығы үчүн о, руһән мөһкәм галды. Аллаһын Кәламы олан Мүгәддәс Китабдан зөвг алдығымыз вә принсипләрини һәјатда тәтбиг етдијимиз үчүн, биз гардашларымызы севирик (1 Јәһја 3:15). Һәтта дүнјанын нифрәти белә, Аллаһын әмрләрини унутмаға вадар едә билмәз. Гардашларымызла бирликдә Аллаһа әбәдијјәт боју хидмәт етмәји арзулајараг, Онун ирадәсини даима јеринә јетиририк (Мәзмур 119:93).
5. Падшаһ Аса Јеһованы неҹә ахтарды?
5 Јеһоваја олан сәдагәтимизи ҝөстәрмәк үчүн белә дуа едә биләрик: «Гуртар мәни, мән Сәнинәм, гајда-ганунларыны ахтармышам» (Мәзмур 119:94). Падшаһ Аса Аллаһы ахтармыш вә Јәһудада дөнүклүјүн көкүнү кәсмишдир. Онун падшаһлығынын 15-ҹи илиндә (б. е. ә. 963-ҹү илдә) кечирилән бөјүк топлантыда Јәһуда сакинләри «Рәбби... ахтармаг үчүн әһд етдиләр». Аллаһ ‘онлара Өзүнү ҝөстәрди’ вә ‘онлара һәр тәрәфдән динҹлик верди’ (2 Салнамәләр 15:10-15). Бу нүмунә мәсиһчи јығынҹағындан узаглашанларын һамысыны јенидән Аллаһы ахтармаға тәшвиг етмәлидир. О, јығынҹаға гајыдан һәр бир кәсә хејир-дуа вә мүдафиә верәҹәк.
6. Руһани зәрәрдән бизи нә горујаҹаг?
6 Јеһованын сөзү бизи руһани зәрәрдән горуја биләҹәк мүдриклик верир (Мәзмур 119:97-104). Аллаһын әмрләри бизи дүшмәнләримиздән даһа мүдрик едир. Онун хатырлатмалары бизә узагҝөрәнлик верир вә Аллаһын ‘гајда-ганунларына әмәл етдијимиз’ үчүн, јашлы инсанлардан «артыг дәрракәли» едир (Мәзмур 119:98-100). Әҝәр Јеһованын сөзләри ‘дилимиздә балдан шириндирсә, һәр јанлыш јола нифрәт едәҹәк’ вә ондан гачынаҹағыг (Мәзмур 119:103, 104). Беләликлә, ахыр ҝүнләрдә тәкәббүрлү, азғын, Аллаһдан горхмајан инсанларла гаршылашдығымыз заман, бу бизи руһани зәрәрдән горујаҹаг (2 Тимотејә 3:1-5).
Аддымларымыз үчүн чырагдыр
7, 8. Мәзмур 119:105 ајәсинә әсасән нә етмәлијик?
7 Аллаһын сөзү түкәнмәз руһани ишығын мәнбәјидир (Мәзмур 119:105-112). Мәсһ едилмиш мәсиһчиләр вә ја «башга гојунлар» олмағымыздан асылы олмајараг, биз бәјан едирик: «Сөзүн һәр аддымым үчүн чырагдыр, јолларыма ишыгдыр» (Јәһја 10:16; Мәзмур 119:105). Аллаһын сөзү бизим аддымларымыза ишыг сачан чыраг кими олдуғу үчүн, биз руһән бүдрәмәјәҹәјик вә јыхылмајаҹағыг. Анҹаг шәхсән јол вермәлијик ки, Јеһованын сөзү аддымларымыз үчүн «чыраг» олсун.
8 Биз јүз он доггузунҹу мәзмурун јазычысы кими әзмли олмалыјыг. О, Аллаһын гајда-ганунларындан јајынмамаға гәти гәрарлы иди. Мәзмурчу демишдир: «Әдаләтли һөкмләринә бағлы галмаг үчүн анд ичмишәм, јеринә јетирәҹәјәм» (Мәзмур 119:106). Ҝәлин Мүгәддәс Китабы мүнтәзәм олараг өјрәнмәјин вә мәсиһчи ҝөрүшләриндә иштирак етмәјин дәјәрини азалтмајаг.
9, 10. Јеһоваја һәср олунмуш бә’зи адамларын Онун гајда-ганунларыны поза биләҹәкләрини һарадан билирик вә бундан неҹә гачынмаг олар?
9 Мәзмурчу Аллаһын ‘гајда-ганунларыны позмады’, лакин бу, Јеһоваја һәср олунмуш һәр бир кәсин башына ҝәлә биләр (Мәзмур 119:110). Сүлејман падшаһ Јеһоваја һәср олунмуш халгын үзвү олмасына вә әзәлдән Аллаһын вердији һикмәтә мүвафиг давранмасына бахмајараг, Онун гајда-ганунларыны позду. «Јаделли гадынлар» бүтпәрәстлијә тәһрик едәрәк, «ону белә ҝүнаһа салдылар» (Неһемја 13:26; 1 Падшаһлар 11:1-6).
10 Иблис бир ‘овчу’ кими чохлу тәләләр гурур (Мәзмур 91:3). Мәсәлән, вахты илә бизимлә бирликдә ибадәт едәнләрдән ким исә, бизи руһани ишыг јолундан дөнүклүјүн гаранлығына јөнәлтмәјә чалыша биләр. Тиатирадакы мәсиһчиләрин арасында «Ијзевел адлы гадын» вар иди, еһтимал ки, бу ифадә алтында башгаларына бүтпәрәстлик вә әхлагсызлыг етмәји өјрәдән бир груп гадын нәзәрдә тутулур. Иса бу ҹүр пислијә ҝөз јуммады, буну биз дә етмәмәлијик (Вәһј 2:18-22; Јәһуда 3, 4). Буна ҝөрә дә ҝәлин Јеһованын гајда-ганунларындан дөнмәмәк вә Онун Кәламынын руһани ишығында галмаг үчүн бизә көмәк етмәси барәдә дуа едәк (Мәзмур 119:111, 112).
Аллаһын сөзүнүн вердији дајаг
11. Мәзмур 119:119 ајәсинә әсасән Аллаһ писләри нә һесаб едир?
11 Әҝәр Јеһованын гајдаларындан һеч вахт дөнмәсәк, О бизә дајаг олаҹаг (Мәзмур 119:113-120). Исанын бу ҝүн өзләрини мәсиһчи адландыран, амма ‘нә исти, нә дә сојуг’ оланлары бәјәнмәдији кими, биз дә ‘икиүзлү инсанлары’ бәјәнмирик (Вәһј 3:16; Мәзмур 119:113). Јеһоваја бүтүн үрәкдән хидмәт едирик дејә, О бизим ‘пәнаһҝаһымыз’ вә дајағымыз олаҹаг. Јеһова фәндләрдән вә јаланлардан истифадә едәрәк Онун ‘гајдаларыны атанлары Өзүндән кәнар едәҹәк’ (Мәзмур 119:114, 117, 118; Сүлејманын мәсәлләри 3:32). О, бу ҹүр инсанлары тулланты, јә’ни әридилән заман гызыл вә ҝүмүш кими дәјәрли металларын үзәриндә әмәлә ҝәлән гатышыг һесаб едир (Мәзмур 119:119; Сүлејманын мәсәлләри 17:3). Ҝәлин Аллаһын хатырлатмаларыны һәмишә севәк, чүнки биз, санки лазымсыз бир шеј кими онларла бирҝә мәһв олмаг истәмирик!
12. Нәјә ҝөрә Јеһованын горхусуна малик олмаг бу гәдәр ваҹибдир?
12 Мәзмурчу охујурду: «Зәһминдән бәдәним ләрзәјә ҝәлир» (Мәзмур 119:120). Әҝәр Јеһованын бизә Өз хидмәтчиләри кими дајаг олмасыны истәјириксә, онда биз мүтләг Јеһованын нифрәт етдији һәр шејдән узаглашмаға тәшвиг едән Аллаһ горхусуна малик олмалыјыг. Бу ҹүр еһтирамлы горху Әјјубу салеһ өмүр сүрмәјә тәшвиг едирди (Әјјуб 1:1; 23:15). Таб ҝәтирдијимиз сынаглардан асылы олмајараг, Аллаһ горхусу Онун бәјәндији јолда галмаг үчүн бизә ҝүҹ верәҹәкдир. Дөзүмлүлүк исә иманла долу сәмими дуаларын олмасыны тәләб едир (Јагуб 5:15).
Иманла дуа един
13-15. а) Дуаларымызын ешидиләҹәјинә нә үчүн әмин ола биләрик? б) Дуада нә дејәҹәјимизи билмириксә, нә баш верә биләр? в) Мәзмур 119:121-128 ајәләринин ‘ифадә олунмаз аһларымызла’ неҹә һәмаһәнҝ ола биләҹәјини ҝөстәрин.
13 Аллаһын бизи мүдафиә етмәси үчүн иманла дуа едә биләрик (Мәзмур 119:121-128). Мәзмурчу кими биз дә дуаларымызын ешидиләҹәјинә әминик. Нәјә ҝөрә? Чүнки биз Аллаһын әмрләрини «гызылдан, саф гызылдан чох» севирик. Үстәлик, Аллаһын бүтүн гајда-ганунларыны доғру һесаб едирик (Мәзмур 119:127, 128).
14 Јеһова бизим јалварышларымызы ешидир, чүнки иманла дуа едир вә вар гүввәмизлә Онун гајда-ганунларына әмәл етмәјә чалышырыг (Мәзмур 65:2). Бәс әҝәр проблемләр бизи чыхылмаз вәзијјәтә салырса вә дуа етмәк үчүн сөз тапа билмириксә, онда неҹә? Онда «Руһ Өзү... ифадә олунмаз аһларла бизим үчүн вәсатәт едир» (Ромалылара 8:26, 27). Белә һалларда Аллаһ бизим Мүгәддәс Китабдан охудуғумуз сөзләри, һиссләримизи әкс етдирән дуа кими гәбул едир.
15 Мүгәддәс Јазылар, ‘ифадә олунмаз аһларымызла’ бағлы чохлу дуа вә фикирләрлә долудур. Мисал үчүн Мәзмур 119:121-128 ајәләрини нәзәрдән кечирәк. Бу мәзмурун сөзләри бә’зән кечирдијимиз һиссләри бүтүнлүклә әкс етдирир. Мәсәлән, әҝәр бизимлә әдаләтсиз давранылмасыны истәмириксә, мәзмурчунун етдији кими, Аллаһдан көмәк диләјә биләрик (121-123-ҹү ајәләр). Тутаг ки, ҹидди бир гәрар гәбул етмәлијик. Онда Јеһовадан хаһиш етмәк олар ки, Онун руһу һәр һансы ваҹиб принсипләри хатырламаға вә тәтбиг етмәјә көмәк етсин (124, 125-ҹи ајәләр). ‘Бүтүн сәһв јоллара нифрәт етсәк’ дә, Аллаһын ганунларыны позмамаг үчүн, Ондан көмәк диләјә биләрик (126-128-ҹи ајәләр). Мүгәддәс Китабы һәр ҝүн охујуругса, Јеһоваја јалвараркән лазым олан сөзләри сечмәјә көмәк едән парчалар јадымыза дүшә биләр.
Јеһованын хатырлатмалары бизим үчүн көмәкдир
16, 17. а) Аллаһын хатырлатмаларына нә үчүн еһтијаҹ дујуруг вә онлара неҹә јанашмалыјыг? б) Башгалары бизим һаггымызда һансы фикирдә ола биләр, лакин ваҹиб олан нәдир?
16 Дуаларымызы ешитмәси вә бизә лүтф ҝөстәрмәси үчүн, Аллаһын хатырлатмаларына диггәт јетирмәлијик (Мәзмур 119:129-136). Чох шејләри унутмаға мејлли олдуғумуз үчүн, Јеһованын һејрәтамиз хатырлатмалары, Онун тә’лимләрини вә әмрләрини јадымыза салмаға көмәк едир. Әлбәттә ки, биз Аллаһын сөзләринин ачыгланмасы илә сачан руһани нура ҝөрә миннәтдарыг (Мәзмур 119:129, 130). Башгаларынын Јеһованын ганунларыны поздуглары үчүн ‘ҝөзләримиздән селләр кими јаш ахса да’, Онун бизи бәјәндијинә вә үзүнүн бизә ‘нур сачдығына’ ҝөрә чох миннәтдарыг (Мәзмур 119:135, 136; Сајлар 6:25).
17 Әҝәр биз Аллаһын әдаләтли хатырлатмаларына диггәт јетирсәк, Онун бизә бундан сонра да илтифат ҝөстәрәҹәјинә әминик (Мәзмур 119:137-144). Јеһованын хидмәтчиләри кими, Аллаһын бизә Өз әдаләтли әмрләрини хатырлатмаға вә биздән итаәткарлыг ҝөзләмәјә һаггы олдуғуну гәбул едирик (Мәзмур 119:138). Мәзмурчу Аллаһын әмрләринә риајәт етсә дә, нәјә ҝөрә «кичик сајылсам да, мәнә хор бахсалар да» дејир? (Мәзмур 119:141). Ҝөрүнүр о, дүшмәнләринин онун һаггындакы фикирләринә әсасланыр. Әҝәр Аллаһын әдаләт нормаларында ҝүзәштә ҝетмириксә, башгалары бизә дә белә јанаша биләр. Лакин ән ваҹиби Јеһованын бизә илтифат ҝөстәрмәсидир, чүнки Онун әдаләтли хатырлатмаларына мүвафиг јашајырыг.
Сүлһ вә руһани тәһлүкәсизлик
18, 19. Аллаһын хатырлатмалары бизә һансы фајданы ҝәтирир?
18 Аллаһын хатырлатмаларына риајәт едәрәк Она даһа јахын олуруг (Мәзмур 119:145-152). Јеһованын хатырлатмаларына диггәт јетирдијимиз үчүн Она бүтүн үрәкдән мүраҹиәт едәндә, бизи ешидәҹәјини ҝөзләјә биләрик. «Дан јери сөкүлмәздән әввәл» ојанараг Она имдад едә биләрик. Дуа етмәк үчүн неҹә дә ҝөзәл вахтдыр! (Мәзмур 119:145-147). Һәм дә Аллаһ бизә, әхлагсыз давранышдан узаг олдуғумуз вә Исанын етдији кими, Онун сөзүнү һәгигәт сајдығымыз үчүн јахындыр (Мәзмур 119:150, 151; Јәһја 17:17). Аллаһла мүнасибәтләримиз һәјәҹан вә нараһатчылыгла долу олан бу дүнјада бизим үчүн мүдафиәдир; онлар бизә Аллаһын дәһшәтли мүһарибәси олан Һар-Меҝидондан сағ чыхмаға көмәк едәҹәк (Вәһј 7:9, 14; 16:13-16).
19 Аллаһын сөзүнә дәрин еһтирам бәсләдијимиз үчүн, һәгиги тәһлүкәсизликдә јашајырыг (Мәзмур 119:153-160). Писләрдән фәргли олараг биз Аллаһын хатырлатмаларындан дөнмәдик. Биз Јеһованын гајда-ганунларыны севир вә буна ҝөрә дә Онун мәһәббәти сајәсиндә тәһлүкәсизликдә јашајырыг (Мәзмур 119:157-159). Јеһованын хатырлатмалары јаддашымызы һәрәкәтә ҝәтирир вә биз конкрет һалларда неҹә давранмалы олдуғумузу унутмуруг. Диҝәр тәрәфдән, Аллаһын гајда-ганунлары бизим үчүн ҝөстәришдир вә Јараданын бизә истигамәт вермәк һаггынын олдуғуну һазырлыгла е’тираф едирик. Аллаһын ‘сөзләринин маһијјәтинин һәгигәт’ олдуғуну вә инсанын өз аддымларыны дүзәлтмәк ихтијарында олмадығыны анлајараг, биз Јеһованын рәһбәрлијини севинҹлә гәбул едирик (Мәзмур 119:160; Јеремја 10:23).
20. Нә үчүн ‘бөјүк әмин-аманлыға’ маликик?
20 Јеһованын ганунларына олан мәһәббәт бизә мүгајисәолунмаз сүлһ бәхш едир (Мәзмур 119:161-168). Тә’гибләр бизи «Аллаһын сүлһү»ндән мәһрум едә билмәз (Филипилиләрә 4:6, 7). Биз Јеһованын әдаләтли һөкмләрини о гәдәр гијмәтләндиририк ки, онлара ҝөрә Она тез-тез — «һәр ҝүн једди дәфә» һәмд едирик (Мәзмур 119:161-164). Мәзмурчу охујурду: «Ганунуну севәнләр бөјүк әмин-аманлыг тапырлар, онлар һеч нә илә бүдрәмәзләр» (Мәзмур 119:165). Әҝәр бизләрдән һәр биримиз Јеһованын ганунуну севир вә она риајәт едирсә, һеч ким вә һеч нә бизи бүдрәдә билмәз.
21. Мүгәддәс Китабын һансы нүмунәләри ҝөстәрир ки, јығынҹагда проблемләр јарананда биз бүдрәмәли дејилик?
21 Мүгәддәс Китабда адлары чәкилән чохлары һәр һансы шәраитин онлар үчүн давамлы манеә олмасына јол вермәдиләр. Мәсәлән, мәсиһчи Гај Диотрефин пис әмәлләринә бахмајараг бүдрәмәди, лакин ‘һәгигәтә ҝөрә һәрәкәт етмәјә’ давам етди (3 Јәһја 1-3, 9, 10). Павел араларында, еһтимал ки, фикир ајрылығы олан Еводија вә Синтихијә јалварырды ки, онлар «Рәббә аид гадынлар кими һәмфикир олсунлар». Ҝөрүнүр, онлара проблемләринин һәлл олунмасында көмәк едилди вә онлар Јеһоваја сәдагәтлә хидмәт етмәјә давам етдиләр (Филипилиләрә 4:2, 3). Јығынҹагда јаранан проблемләрин бизи бүдрәтмәсинә јол вермәмәлијик. Ҝәлин ‘бүтүн јолларымызын Онун һүзурунда’ олдуғуну јадда сахлајараг, диггәтимизи Јеһованын гајда-ганунларына риајәт етмәјә ҹәмләшдирәк (Мәзмур 119:168; Сүлејманын мәсәлләри 15:3). Онда ‘бөјүк әмин-аманлыгдан’ бизи һеч нә даими олараг мәһрум едә билмәз.
22. а) Аллаһа итаәт едириксә, һансы үстүнлүјүмүз олаҹаг? б) Мәсиһчи јығынҹағындан узаглашараг азанлара неҹә бахмалыјыг?
22 Јеһоваја даима табе олуругса, Ону арасыкәсилмәдән иззәтләндирмәк үстүнлүјүмүз олаҹаг (Мәзмур 119:169-176). Аллаһын гајда-ганунларына мүвафиг јашајараг руһани тәһлүкәсизликдән һәзз алмагла јанашы, һәм дә ‘дилимиздән һәмдләр’ төкүлмәјә давам едәҹәк (Мәзмур 119:169-171, 174). Бу исә, јашадығымыз ахыр ҝүнләрдә малик ола биләҹәјимиз ән бөјүк шәрәфдир! Мәзмурчу јашамағы вә Аллаһы иззәтләндирмәји арзулајырды, лакин мә’лум олмајан сәбәбләр уҹбатындан өзүнү «итән гузу кими» һисс едирди (Мәзмур 119:175, 176). Мәсиһчи јығынҹағындан узаглашараг «азанлардан» бә’зиләри, еһтимал ки, һәлә дә Аллаһы севир вә Ону иззәтләндирмәк истәјирләр. Буна ҝөрә дә ҝәлин онлара јенидән руһани тәһлүкәсизлик әлдә етмәкдә вә Јеһованы, Онун халгы илә бирликдә севинҹлә иззәтләндирмәкдә көмәк етмәк үчүн әлимиздән ҝәләни әсирҝәмәјәк (Ибраниләрә 13:15; 1 Петер 5:6, 7).
Јолларымыз үчүн даими ишыг
23, 24. Јүз он доггузунҹу мәзмур бизә неҹә көмәк едир?
23 Јүз он доггузунҹу мәзмур бизим үчүн мүхтәлиф саһәләрдә фајдалыдыр. Мәсәлән, о бизи, һәгиги хошбәхтлијин «Рәббин ганунуна ҝөрә јашајанлар» тәрәфиндән әлдә едилдијини ҝөстәрәрәк, Аллаһа даһа чох ҝүвәнмәјә өјрәдир (Мәзмур 119:1). Мәзмурчу бизә Аллаһын ‘сөзләринин маһијјәтинин һәгигәт’ олдуғуну хатырладыр (Мәзмур 119:160). Бу, шүбһәсиз ки, Аллаһын Кәламы олан бүтөв Мүгәддәс Китаба ҝөрә миннәтдарлығымызы артырыр. Јүз он доггузунҹу мәзмурун үзәриндә дәриндән дүшүнмәјимиз бизи Мүгәддәс Јазылары сә’јлә тәдгиг етмәјә тәшвиг едир. Мәзмурчу дәфәләрлә Аллаһа мүраҹиәт едирди: «Мәнә гајдаларыны өјрәт» (Мәзмур 119:12, 68, 135). О, һәм дә јалварырды: «Мәнә ағыл, билик өјрәт, чүнки әмрләринә инанырам» (Мәзмур 119:66). Биз дә Аллаһа бу барәдә јалвармалыјыг.
24 Јеһованын тә’лимләри Она јахынлашмағымызы мүмкүн едир. Мәзмурчу дәфәләрлә өзүнү Аллаһын гулу адландырыр. О, Јеһоваја бу ҹүр тә’сирли сөзләрлә мүраҹиәт едир: «Мән Сәнинәм» (Мәзмур 119:17, 65, 94, 122, 125; Ромалылара 14:8). Јеһоваја хидмәт етмәк вә Ону Шаһидләриндән бири кими иззәтләндирмәк неҹә дә бөјүк шәрәфдир! (Мәзмур 119:7). Сән Падшаһлығын тәблиғчиси кими Аллаһа севинҹлә хидмәт едирсәнми? Әҝәр беләдирсә вә сән даима Онун сөзүнә ҝүвәнәрәк јолларыны ишыгландырмасына изн верирсәнсә, онда Јеһованын бундан сонра да сәнин јардымчын олаҹағына вә хидмәтинә хејир-дуа верәҹәјинә шүбһә етмә!
Неҹә ҹаваб верәрдиниз?
• Аллаһын сөзүндән нә үчүн зөвг алмалыјыг?
• Аллаһын сөзү бизә неҹә көмәк едир?
• Јеһованын хатырлатмалары бизә неҹә көмәк едир?
• Нәјә ҝөрә Јеһованын халгы сүлһ вә тәһлүкәсизликдә јашајыр?
[10-ҹу сәһифәдәки шәкил]
Аллаһын сөзү руһани ишығын мәнбәјидир.