Јеһованын Кәламы ҹанлыдыр
«Зәбур» китабынын бешинҹи һиссәсиндән диггәтәлајиг фикирләр
ДӨВЛӘТЛИ инсан дејә биләр: ‘Јенијетмә оғулларымыз сағлам фидан кими бој атыр, гызларымыз ојулмуш сарај сүтунлары кими ҝүмраһдыр, анбарларымыз долуб-дашыр, отлагда гојунларымыз минләрлә, он минләрлә чохалыр’. Бундан башга, «нә бәхтијардыр белә хејир-дуа алан халг!», дејә варлылар нида едә биләрләр. Лакин там әксинә олараг мәзмурчу дејир: «Нә бәхтијардыр Аллаһы Рәбб [«Јеһова», ЈД] олан халг!» (Мәзмур 144:12-15). Бу башга ҹүр ола биләрми? Јеһова «хошбәхт Аллаһ» (ЈД) олдуғу үчүн, Она хидмәт едәнләр дә хошбәхт олурлар (1 Тимотејә 1:11). Бу һәгигәт 107-дән 150-ә гәдәр олан мәзмурлардан ибарәт Аллаһдан илһам алмыш нәғмәләрин сонунҹу топлусундан ајдын олур.
«Зәбур» китабынын бешинҹи һиссәсиндә Јеһованын мәһәббәт, сәдагәт вә хејирхаһлыг да дахил олмагла, бүтүн ҝөзәл хүсусијјәтләри вурғуланыр. Аллаһла нә гәдәр јахындан таныш олуругса, бир о гәдәр дә чох севир вә Она еһтирамлы горху бәсләјирик. Бу да өз нөвбәсиндә бизә хошбәхтлик ҝәтирир. Бәли, «Зәбур» китабынын бешинҹи һиссәсиндәки мә’лумат бизим үчүн чох дәјәрлидир (Ибраниләрә 4:12).
ЈЕҺОВАНЫН МӘҺӘББӘТИ БИЗӘ ХОШБӘХТЛИК ҜӘТИРИР
Бабил әсарәтиндән ҝери дөнәркән јәһудиләр охујурдулар: «Рәббә шүкүр етсинләр мәһәббәтинә ҝөрә, бәшәр өвладларына ҝөстәрдији харигәләринә ҝөрә» (Мәзмур 107:8, 15, 21, 31). Давуд Аллаһы иззәтләндирәрәк охујурду: «Сәдагәтин булудлара чатыр» (Мәзмур 108:4). Нөвбәти мәзмурда о дуа едир: «Ја Рәбб Аллаһым, Сән мәнә көмәк ет, мәһәббәтинә ҝөрә мәни гуртар» (Мәзмур 109:18, 19, 26). 110-ҹу мәзмур Мәсиһин һакимијјәтинә аид пејғәмбәрликдир. Мәзмур 111:10 ајәсиндә дејилир: «Рәбб горхусу һикмәтин башланғыҹыдыр». Нөвбәти мәзмура әсасән, ‘Рәбдән горхан бәхтијардыр’ (Мәзмур 112:1).
113-дән 118-дәк олан мәзмурларда Јеһоваја һәмд едилир. Гәдимдә ел арасында јајылан адәтләрин топлусу олан үчүнҹү әсрдә јазылмыш Мишнаја әсасән, бу нәғмәләр Пасха вә јәһудиләрин һәр ил кечирилән үч бајрамы заманы охунурду. Мәзмурлар ичиндә вә үмумијјәтлә Мүгәддәс Китабда ән бөјүк фәсил олан 119-ҹу мәзмур Јеһованын кәламыны иззәтләндирир.
Мүгәддәс Китаб суалларына ҹаваблар:
109:23 — «Дүшән көлҝә кими итирәм» сөзләри илә Давуд нә демәк истәјирди? Давуд бәдии диллә, өлүмүнүн јахынлашдығыны һисс етдијини билдирирди (Мәзмур 102:11).
110:1, 2 — ‘[Давудун] Ағасы’ Иса Мәсиһ Аллаһын сағында отураркән нә едирди? Дирилдикдән сонра Иса ҝөјләрә галхды вә 1914-ҹү илдә Падшаһлыг етмәјә башлајанадәк Аллаһын сағында отуруб ҝөзләди. Бу арада Иса мәсһ олунмуш давамчылары үзәриндә һакимијјәт сүрүрдү. О, тәблиғ вә шаҝирд һазырламаг ишинә рәһбәрлик едир, о ҹүмләдән, онлары Падшаһлыгда өзү илә бирликдә һөкмранлыг етмәк үчүн һазырлајырды (Матта 24:14; 28:18-20; Лука 22:28-30).
110:4 — Јеһова нәјә анд ичиб вә «гәрарыны дәјишмәз»? Бу анд Јеһованын Иса Мәсиһ илә бағладығы әһддир. Әһдә ҝөрә Иса Падшаһ вә Баш Каһин кими хидмәт етмәлидир (Лука 22:29).
113:3 — Һансы мә’нада Јеһованын адына «ҝүндоғандан ҝүнбатанадәк» һәмд едилмәлидир? Бу садәҹә олараг бир груп адамын һәр ҝүн Аллаһа ибадәт етмәси демәк дејилдир. Шәргдә доғуб гәрбдә батанадәк ҝүнәшин шүалары бүтүн Јер күрәсини ишыгландырыр. Буна охшар тәрздә, Јеһоваја бүтүн Јер күрәсиндә һәмд едилмәлидир. Мүтәшәккил сурәтдә сә’ј ҝөстәрмәдән буна наил олмаг мүмкүн дејилдир. Јеһованын Шаһидләри олдуғумуз үчүн Аллаһа һәмд едир вә Падшаһлығын тәблиғи ишиндә сә’јлә иштирак едирик. Биз бу үстүнлүјү чох јүксәк гијмәтләндиририк.
116:15 — «Рәббин ҝөзүндә һәр бир мө’минин өлүмү» нә дәрәҹәдә баһадыр? Хидмәтчиләри Јеһоваја о дәрәҹәдә әзиздирләр ки, О онларын һамысынын өлүмүнү һәддиндән артыг баһа һесаб едир. Әҝәр Јеһова буна јол версәјди, онда елә чыхарды ки, дүшмәнләри Ондан ҝүҹлүдүр. Бундан башга, јер үзүндә јени дүнјанын бүнөврәсини тәшкил едәҹәк кимсә галмазды.
119:71 — Әзаб чәкмәјин нә хејри ола биләр? Чәтинликләр бизә Јеһоваја даһа чох е’тибар етмәји, сәмими дуа етмәји, Мүгәддәс Китабы даһа сә’јлә өјрәнмәји вә онун дедикләрини һәјата кечирмәји өјрәдә биләр. Бундан башга, чәтинлик заманы үзә чыхан нөгсанларымызы дүзәлдә биләрик. Әҝәр әзабларын бизи тәмизләмәсинә јол веририксә, онлар бизи һиддәтләндирмәјәҹәк.
119:96 — «Һәр камил шејин гаршысына бир һәдд гојулур» нә демәкдир? Мәзмурчу камилликдән инсан нөгтеји-нәзәриндән данышыр. Јәгин ки, о инсанын камиллик анлајышынын мәһдуд олдуғуну нәзәрдә тутурду. Бунун әксинә олараг Аллаһын ганунларында белә бир мәһдудијјәт јохдур. Онун рәһбәрлији һәјатын һәр саһәсиндә тәтбиг едиләндир. «Ҝөрмүшәм ки, һәр камил шејин гаршысына бир һәдд гојулур, Сәнин әмрләрин исә сәрһәд танымыр», дејә мәзмурчу охујур.
119:164 — Аллаһа «һәр ҝүн једди дәфә» һәмд етмәк сөзләринин мә’насы нәдир? Једди рәгәми чох вахт тамлыг билдирир. Буна ҝөрә дә мәзмурчу Јеһованын һәмдә лајиг олдуғуну сөјләјир.
Бизим үчүн ибрәт дәрсләри:
107:27-31. Һар-Меҝидон заманы мүдрикләрин ‘ағылларына һеч бир чарә ҝәлмәјәҹәк’ (Вәһј 16:14, 16). Онларын мүдриклији һеч кими мәһвдән гуртара билмәјәҹәк. Јалныз Јеһовадан хилас ҝөзләјәнләр ‘мәһәббәтинә ҝөрә Она шүкүр етмәк’ үчүн јашајаҹаглар.
109:30, 31; 110:5. Сол әлдә тутулан галхан дөјүшчүнүн гылынҹ тутан сағ әлини горумурду. Јеһова мәҹази мә’нада Өз хидмәтчиләринин «сағ тәрәфиндә» дајаныр ки, онлар үчүн дөјүшсүн. Беләликлә, Аллаһ онлары горујараг көмәк едир. Бу, ‘Рәббә бол-бол шүкүр сөјләмәк’ үчүн әсаслы сәбәбдир!
113:4-9. Јеһова о гәдәр уҹадыр ки, һәтта ҝөјә бахмаг үчүн әјилир. Бунунла белә, О, јохсула, фәгирә вә сонсуз гадына гаршы шәфгәтлидир. Каинатын Һөкмдары Јеһова тәвазөкардыр вә хидмәтчиләринин дә елә олмасыны истәјир (Јагуб 4:6).
114:3-7. Аллаһын Өз халгы үчүн Гырмызы дәниздә, Иордан чајында вә Синај дағында етдикләри бизә чох бөјүк тә’сир бағышламалыдыр. «Дүнја» илә тәмсил олунан бәшәријјәт Аллаһ гаршысында мәҹази мә’нада ‘ләрзәјә ҝәлмәли’, јә’ни еһтирамлы горхуја бүрүнмәлидир.
119:97-101. Аллаһ Кәламындан мүдриклик, дәрракә вә анлајыш әлдә едәриксә, руһани зәрәрдән мүдафиә олунарыг.
119:105. Аллаһын Кәламы ҝүндәлик проблемләримизин өһдәсиндән ҝәлмәјә көмәк етдијинә ҝөрә аддымларымыза чырагдыр. Һәмчинин, орада Аллаһын ҝәләҹәјә даир нијјәти јазылдығындан, јолларымызы ишыгландырыр.
ӘЗАБЛАРА БАХМАЈАРАГ ХОШБӘХТИК
Биз ағыр шәраитләрә неҹә синә ҝәриб, фәлакәтләрдән сағ чыха биләрик? 120-дән 130-дәк мәзмурларда бу суала ајдын ҹаваб вардыр. Биз Јеһовадан көмәк ҝөзләдијимиз үчүн чәтинликләрә таб ҝәтирир, севинҹимизи горујуруг. «Зијарәт нәғмәләри» адланан бу мәзмурлары, чох ҝүман ки, исраиллиләр иллик бајрамларыны гејд етмәк үчүн Јерусәлимә ҝедәндә охујурдулар.
135 вә 136-ҹы мәзмурлар, көмәксиз бүтләрдән фәргли олараг, Јеһованы Өзүнә мәгбул олан һәр шеји һәјата кечирән Шәхс кими тәсвир едир. 136-ҹы мәзмур ҹаваб нәғмәси олараг јазылмышдыр, һәр ајәнин сонунҹу һиссәси биринҹијә ҹавабдыр. Нөвбәти мәзмурда Јеһоваја Сионда ибадәт етмәк истәјән јәһудиләрин үрәкағрыдан вәзијјәти тәсвир едилир. 138-дән 145-дәк олан мәзмурлар Давуда мәхсусдур. О, Јеһоваја ‘бүтүн гәлбилә шүкүр едир’. Нә үчүн? О дејир: «Сән мәни е’ҹазкар, әсрарәнҝиз јолла јаратмысан» (Мәзмур 138:1; 139:14). Нөвбәти беш мәзмурда Давуд шәр адамлардан мүдафиә олунмаг, тә’гибләрдән гуртулмаг, салеһләрин ону тәнбеһ етмәси вә Аллаһын она дүзҝүн јол ҝөстәрмәси үчүн дуа едирди. О, Јеһованын халгынын хошбәхт олдуғуну вурғулајырды (Мәзмур 144:15). Аллаһын әзәмәтини вә хејирхаһлығыны нәзәрдән кечирәндән сонра Давуд бәјан едирди: «Мәним дилим Рәббә һәмд охујаҹаг, гој Онун мүгәддәс исминә бүтүн бәшәријјәт әбәдилик алгыш етсин!» (Мәзмур 145:21).
Мүгәддәс Китаб суалларына ҹаваблар:
122:3 — Јерусәлим һансы мә’нада ‘сых тикилмишди’? Гәдимдә салынан башга шәһәрләр кими Јерусәлимин евләри дә бир-биринә јахын тикилмишди. Шәһәр јығҹам олдуғундан ону мүдафиә етмәк асан иди. Бундан башга, евләрин јахынлығы сајәсиндә шәһәр сакинләри көмәк вә мүдафиә үчүн бир-биринә архајын олурдулар. Бу, бирликдә ибадәтә ҝәлән Исраилин 12 гәбиләсинин руһани бирлијини ҝөстәрирди.
123:2 — Гулун ҝөзләри илә бағлы нүмунәнин мә’насы нәдир? Гуллар вә кәнизләр ағаларынын вә ханымларынын әлинә ики сәбәбдән бахырдылар: онун нә истәдијини мүәјјән етмәк, мүдафиә олунмаг вә еһтијаҹларыны өдәмәк үчүн. Буна бәнзәр шәкилдә, биз Јеһоваја Онун ирадәсини баша дүшмәк вә лүтфүнү газанмаг үчүн бахырыг.
131:1-3 — Давуд неҹә ‘овунуб сәсини кәсмиш, ана гуҹағында олан көрпә кими’ иди? Ушаг неҹә анасынын гуҹағында овунуб сәсини кәсирсә, Давуд да еләҹә овунуб сакитләширди. Неҹә? О, тәкәббүрлү дејилди, ҝөзүнү јухары јерләрә дикмир вә ҝүҹү чатмајан бөјүк ишләрә ҝиришмирди. Давуд шан-шөһрәт ахтармыр, әксинә, өз мәһдудијјәтләрини баша дүшүр вә тәвазөкарлыг ҝөстәрирди. Хүсусилә дә јығынҹагда имтијазлара ҹан атан заман онун әһвал-руһијјәсини тәглид едириксә, мүдрик давранмыш олуруг.
Бизим үчүн ибрәт дәрсләри:
120:1, 2, 6, 7. Ифтиралар вә кинајәли сөзләр башгаларынын үрәјинә јаралар вура биләр. Дилимизи јүјәнләмәклә биз ‘сүлһү севдијимизи’ ҝөстәририк.
120:3, 4. Әҝәр биз ‘фитнәкар дилли’ инсана таб ҝәтирмәли олуругса, Јеһованын ишләри өз вахтында јолуна гојаҹағыны билмәк бизә тәскинлик верә биләр. ‘Ҹәнҝавәрләр’ бөһтанчылары мүсибәтә дүчар едәҹәкләр. Онлар мүтләг, «јанан одундан дүшән көзләр» илә тәмсил олунан Јеһованын гәзәбли һөкмүнә дүчар олаҹаглар.
127:1, 2. Бүтүн ишләримиздә Јеһованын рәһбәрлијини ахтармалыјыг.
133:1-3. Јеһованын халгынын бирлији раһатлыг, тәравәт ҝәтирир вә фајдалыдыр. Биз башгаларында сәһв ахтарараг, мүбаһисәләрә јол верәрәк вә ја шикајәтләнәрәк бу бирлији парчаламамалыјыг.
137:1, 5, 6. Јеһованын сүрҝүндә олан хидмәтчиләри Сиона — Аллаһын тәшкилатынын о дөврдә јердәки һиссәсинә садиг идиләр. Бәс биз Јеһованын бу ҝүн истифадә етдији тәшкилата садигикми?
138:2. Јеһова о мә’нада ‘исмини, кәламыны һәр шејдән үстүн тутур’ [«кәламыны исминдән үстүн тутур», ЈД] ки, Өз ады наминә вә’д етдији һәр бир шеји ҝөзләдијимиздән артыг јеринә јетирәҹәк. Доғрудан да, бизи ҝөзәл ҝәләҹәк ҝөзләјир.
139:1-6, 15, 16. Јеһова бизим һәрәкәтләримизи, дүшүнҹәләримизи, һәтта дилә ҝәтирмәдијимиз сөзләримизи дә билир. О бизи ана бәтниндә рүшејм кими формалашандан, бәдәнимизин үзвләри јаранмамышдан таныјыр. Аллаһын һәр биримизи ајры-ајрылыгда танымасы елә «әсрарәнҝиздир» ки, ону дәрк етмәк мүмкүн дејил. Тәсәлливериҹидир ки, Јеһова нәинки дүшдүјүмүз чәтин вәзијјәти ҝөрүр, һәм дә онун бизә неҹә тә’сир етдијини анлајыр.
139:7-12. Елә бир уҹгар јер јохдур ки, Аллаһ орада бизи гүввәтләндирә билмәсин.
139:17, 18. Јеһова һаггына билик бизә хошдурму? (Сүлејманын мәсәлләри 2:10). Әҝәр беләдирсә, о заман битиб-түкәнмәз мәмнунлуг тапаҹағыг. Јеһованын фикирләри ‘гум дәнәләриндән чохдур’. Биз Онун һаггында һәмишә өјрәнмәли олаҹағыг.
139:23, 24. Биз Јеһовадан гәлбимиздә «пислијә», јә’ни дүзҝүн олмајан фикирләрә, истәкләрә вә мејлләрә јол вериб-вермәдијимизи јохламасыны вә онлары силиб атмаг үчүн бизә көмәк етмәсини истәмәлијик.
143:4-7. Ән бөјүк чәтинликләрә белә неҹә таб ҝәтирә биләрик? Мәзмурчу бизә јол ҝөстәрир: Јеһованын әмәлләри үзәриндә дүшүнмәк, Онун ишләри һагда фикирләшмәк вә көмәк үчүн дуа етмәк лазымдыр.
«Јаһа һәмд един!»
Мәзмурларын һәр илк дөрд һиссәси Јеһованы иззәтләндирән ифадәләрлә битир (Мәзмур 41:13; 72:19, 20; 89:52; 106:48). Сонунҹу һиссә дә истисна дејил. Мәзмур 150:6 (ЈД) ајәсиндә дејилир: «Еј бүтүн ҹанлы варлыглар, Јаһа һәмд един! Јаһа һәмд един!» Бу, Аллаһын јени дүнјасында ҝерчәкләшәҹәк.
Бизи хошбәхт ҝәләҹәк ҝөзләдијиндән һәгиги Аллаһа һәмд етмәк вә Онун адыны иззәтләндирмәк үчүн әсаслы сәбәбимиз вардыр. Јеһованы таныдығымыз вә Онунла јахшы мүнасибәтимиз олдуғу үчүн дујдуғумуз хошбәхтлик һаггында фикирләшәндә миннәтдарлыгла Ону иззәтләндирмәјә тәшвиг олунмуругму?
[15-ҹи сәһифәдәки шәкил]
Јеһованын мө’ҹүзәли ишләри еһтирам доғурур.
[16-ҹы сәһифәдәки шәкил]
Јеһованын фикирләри ‘гум дәнәләриндән чохдур’.