Јеһованын бөјүклүјү ағласығмаздыр

“Рәбб бөјүкдүр вә чох һәмдә лајигдир; вә онун бөјүклүјү ағласығмаздыр” (МӘЗМУР 145:3).

1, 2. Давуд неҹә инсан иди вә өзүнүн Аллаһ гаршысындакы вәзијјәти барәдә нә дүшүнүрдү?

“МӘЗМУР” китабынын 145-ҹи фәслини кечмишдә јашамыш вә танынмыш бир инсан бәстәләмишдир. О, ҝәнҹ јашларында силаһлы нәһәнҝ адамла үз-үзә ҝәлмиш вә ону өлдүрмүш­дүр. Јеткин јашында оларкән ҹәнҝавәр падшаһ кими, бу мәзмурчу чох дүшмәнләрини мәғлуб етмишдир. Сөһбәт Давуддан, гәдим Исраилин икинҹи падшаһындан ҝедир. Давудун шөһрәти о өлдүкдән сонра да јашамаға давам едир, һәтта бу ҝүн милјонларла инсанлар онун һаггында һеч олмаса нә исә билирләр.

² Әлдә етдији наилијјәтләрә бахмајараг, Давуд тәвазөкар инсан олараг галырды. О, Јеһова һаггында охујурду: “Ҝөјләрини, әлләринин ишләрини, гојдуғун ај вә улдузлары ҝөрүнҹә дедим: Инсан нәдир ки, сән ону анасан? Адәм оғлу нәдир ки, сән ону арајасан?” (Мәзмур 8:3, 4). Өзүнү даһи һесаб етмәк әвәзинә, Давуд дүшмәнләриндән азад олундуғуна ҝөрә бүтүн иззәти Јеһоваја верир вә Она дејирди: “Мәнә гуртулушунун галханыны вердин вә лүтфүн мәни бөјүк етди” (2 Самуел 22:1, 2, 36). Јеһова ҝүнаһкарларла лүтфкарлыгла давранараг тәвазөкарлыг ҝөстәрир, Давуд да Аллаһын лүтфүнү гијмәтләндирирди.

Падшаһ олан Аллаһы јүксәлтмәк

3. а) Давуд кими Исраилин Падшаһы һесаб едирди? б) Давуд Јеһоваја һәмд етмәји нә гәдәр чох арзулајырды?

³ Давуд Аллаһ тәрәфиндән тә’јин едилмиш падшаһ олса да, о, Јеһованы Исраилин әсл Падшаһы һесаб едирди. Давуд дејирди: “Ја Рәбб, падшаһлыг сәниндир вә сән, баш олараг һәр шејдән јүксәксән” (1 Тарихләр 29:11). Вә Давуд Аллаһы Һөкмдар тимсалында ҝөрмәјә неҹә дә шад иди! О охујурду: “Еј Аллаһым, еј Падшаһ, сәни јүксәлдәрәм; вә сәнин исмини әбәдијјән вә даима тәгдис едәрәм. Сәни һәр ҝүн тәгдис ејләрәм; вә сәнин исминә даима вә әбәдијјән һәмд ејләрәм” (Мәзмур 145:1, 2). Давуд әбәдијјәт боју Јеһова Аллаһа һәр ҝүн һәмд етмәји арзу едирди.

4. Мәзмурун 145-ҹи фәсли һансы иддиаларын јалан олдуғуну үзә чыхарыр?

⁴ Мәзмурун 145-ҹи фәсли Шејтанын, Аллаһын Өз јаратдыгларыны азадлыгдан мәһрум едән худбин һөкмдар олмасына даир иддиасынын јалан олдуғуну әсаслы сурәтдә үзә чыхарыр (Тәквин 3:1-5). Бу Мәзмур һәмчинин ашкар едир ки, Шејтанын, Аллаһа итаәт едәнләр буну Она мәһәббәтдән дејил, јалныз өз мәнфәәтләри үчүн едирләр, дејә ирәли сүрдүјү иддиа јаландыр (Ејуб 1:9-11; 2:4, 5). Давуда бәнзәр тәрздә, бу ҝүн Мәсиһин һәгиги давамчылары Иблисин јалан иттиһамларына ҹаваб верирләр. Онлар Јеһоваја әбәдијјәт боју һәмд етмәји арзуладыглары үчүн, Падшаһлығын рәһбәрлији алтындакы әбәди һәјат үмидини јүксәк гијмәтләндирирләр. Исанын фидијә гурбанлығына артыг милјонларла инсанлар иман ҝәтирмәјә башламыш вә Јеһоваја Онун һәср олунмуш вә вәфтиз едилмиш хидмәтчиләри кими хидмәт едирләр (1 Јәһја 5:3; Ромалылара 5:8).

5, 6. Јеһоваја һәмд етмәк вә Ону тәгдис етмәк үчүн һансы имканлар вар?

⁵ Јеһованын хидмәтчиләри олараг Ону тәгдис етмәк вә Она һәмд етмәк кими чохсајлы имканларымызын үзәриндә дүшүнәк. Мәсәлән, Аллаһын Кәламы олан Мүгәддәс Китабдан охудугларымыз бизә дәриндән тә’сир бағышладығы заман, биз дуада Она һәмд едә вә Ону тәгдис едә биләрик. Онун Өз халгы илә рәфтары бизә тәәссүрат бағышлајанда вә ја јаратдығы е’ҹазкар шејләрдә ҝөрдүкләримиз бизи һејрәтләндирәндә, биз Аллаһы тәгдис едиб, Она миннәтдарлыг едә биләрик. Мәсиһчи ҝөрүшләриндә вә ја шәхси сөһбәтләрдә Јеһованын нијјәтләрини һәмиманлыларымызла мүзакирә едәндә дә Ону тәгдис едирик. Јеһованын Падшаһлығынын мараглары үчүн етдијимиз һәр бир “хејирхаһ иш” Она иззәт ҝәтирир (Матта 5:16).

⁶ Бу ҹүр хејирхаһ ишләрин нүмунәси тимсалында, мәсиһчи ҝөрүшләрини кечирмәк үчүн Аллаһын халгынын касыб өлкәләрдә тикдији чохсајлы биналары ҝөстәрмәк олар. Ишин әсас һиссәси башга өлкәләрдән олан һәмиманлыларын малијјә јардымы һесабына јеринә јетирилмишдир. Бә’зи мәсиһчиләр Падшаһлыг Залларынын тикинтисиндә иштирак етмәк үчүн көнүллү олараг һәмин әразиләрә ҝетмишләр. Бүтүн хејирхаһ ишләрдән ән ваҹиби исә — Јеһоваја Падшаһлыг һаггындакы хош хәбәрин тәблиғиндә һәмд етмәкдир (Матта 24:14). Мәзмур 145-ҹи фәслин диҝәр ајәләринин ҝөстәрдији кими, Давуд Аллаһын Падшаһлыг рәһбәрлијини јүксәлдирди (Мәзмур 145:11, 12). Аллаһын мәһәббәтлә етдији рәһбәрлијини сән дә бу ҹүр гијмәтләндирирсәнми? Аллаһын Падшаһлығы барәдә башгалары илә мүнтәзәм сурәтдә сөһбәт едирсәнми?

Аллаһын бөјүклүјүнә даир нүмунәләр

7. Бизи Јеһоваја һәмд етмәјә тәшвиг едән әсас сәбәб нәдир? Изаһ един.

⁷ Мәзмур 145:3 ајәсиндә бизи Јеһоваја һәмд етмәјә тәшвиг едән әсас сәбәб изаһ олунур. Давуд охујурду: “Рәбб бөјүкдүр вә чох һәмдә лајигдир; вә онун бөјүклүјү ағласығмаздыр”. Јеһованын бөјүклүјү һәдсиздир. Инсанлар ону бүтүнлүклә тәдгиг едә, гавраја вә ја өлчә билмәзләр. Буна бахмајараг, Јеһованын ағласығмаз бөјүклүјүнү тәдгиг етмәк, сөзсүз ки, фајдалы олаҹагдыр.

8. Каинат Јеһованын ҝүҹү вә бөјүклүјү һаггында нәји ашкар едир?

⁸ Парлаг шәһәр ишыгларындан хејли кәнарда дуруб, булудсуз ҝеҹә сәмасына бахдығын аны хатырламаға чалыш. Гаранлыг фәзада парылдајан чохсајлы улдузлар сәни һејран етмирдими? Бүтүн бу сәма ҹисимләринин јарадылмасында әкс олунан бөјүклүјүнә ҝөрә сән Јеһоваја һәмд етмәјә тәшвиг һисси дујмурдунму? Лакин сән планетимизин дахил олдуғу галактикадакы улдузларын јалныз кичиҹик бир һиссәсини ҝөрмүсән. Бундан әлавә, һесабламалара ҝөрә јүз милјарддан артыг галактика мөвҹуддур, биз исә телескопсуз онлардан јалныз үчүнү ҝөрә билирик. Доғрудан да, бизим уҹсуз-буҹагсыз Каинатымызы тәшкил едән саја-һесаба ҝәлмәјән улдузлар вә галактикалар, Јеһованын јарадыҹы вә ағласығмаз бөјүклүјүнә шаһидлик едир (Ишаја 40:26).

9, 10. а) Иса Мәсиһлә әлагәдар Јеһованын бөјүклүјүнүн һансы чаларлары ашкар олду? б) Исанын дирилдилмәси бизим иманымыза неҹә тә’сир етмәлидир?

⁹ Јеһованын бөјүклүјүнүн диҝәр тәрәфләрини, Иса Мәсиһлә бағлы олан саһәләрини нәзәрдән кечирәк. Јеһованын бөјүклүјү ондан ҝөрүнүрдү ки, О, Өз Оғлуну јаратмыш вә ону милјард илләр әрзиндә “ме’мар” кими истифадә етмишдир (Сүлејманын мәсәлләри 8:22-31, МКШ). Јеһованын мәһәббәтинин бөјүклүјү, Өзүнүн јеҝанә Оғлуну инсанлардан өтрү фидијә гурбаны кими вермәсиндә ҝөрүнүрдү (Матта 20:28; Јәһја 3:16; 1 Јәһја 2:1, 2). Вә Исаны дирилтдији заман Јеһованын она иззәтли вә өлмәз руһани бәдән вермәси инсан анлајышындан үстүндүр (1 Петер 3:18).

¹⁰ Исанын дирилмәсиндә Јеһованын ағласығмаз бөјүклүјүнүн дәрин тәәссүрат доғуран чох чаларлары әкс олунмушдур. Шүбһәсиз ки, Аллаһ Исанын, ҝөрүнән вә ҝөрүнмәјән шејләрин јарадылмасындакы иштиракына даир јаддашыны ҝери гајтарды (Колослулара 1:15, 16). Иса руһани мәхлугларын, Каинатын, Јерин вә планетимиздәки һәр ҹүр һәјат формасынын јарадылмасы барәдә һәр шеји јадына салды. Инсан олмаздан әввәл Оғулун ҝөјдә вә јердә ҝөрдүкләринә, Јеһова Исанын камил инсан кими јашадығы хатирәләри дә әлавә етди. Исанын дирилдилмәсиндә һәгигәтән дә Јеһованын ағласығмаз бөјүклүјү ҝөрүнүр. Бундан әлавә, бу бөјүк иш, бизи дирилмәнин мүмкүнлүјүнә әмин едир. Бу иш, Аллаһын камил јаддашында олан милјонларла өлүләри Онун һәјата гајтармаға гадир олдуғуна иманымызы мөһкәмләтмәлидир (Јәһја 5:28, 29; Һәвариләрин ишләри 17:31).

Е’ҹазкар вә гүдрәтли ишләр

11. Ерамызын 33-ҹү илинин Пентикост ҝүнү Јеһова һансы бөјүк иши ҝөрмәјә башлады?

¹¹ Исанын дирилдилмәсиндән сонра Јеһова чохлу бөјүк вә е’ҹазкар ишләр ҝөрмүшдүр (Мәзмур 40:5). Ерамызын 33-ҹү илинин Пентикост ҝүнү Јеһова, Мәсиһин мүгәддәс руһла мәсһ едилмиш шаҝирдләриндән ибарәт јени бир халг, “Аллаһын Исраили”ни јаратды (Галатијалылара 6:16). Бу јени руһани халг, бүтүн манеәләри дәф едәрәк о заман мә’лум олан дүнјаја јајылырды. Исанын һәвариләринин өлүмүндән сонра Христиан дүнјасынын јаранмасына ҝәтириб чыхаран дөнүклүјә бахмајараг, Јеһова е’ҹазкар ишләр ҝөрәрәк Өз нијјәтини јеринә јетирмәјә давам едирди.

12. Мүгәддәс Китабын дүнјанын бүтүн әсас дилләриндә әлчатан олмасы нәјә шәһадәт едир?

¹² Мисал үчүн, Мүгәддәс Китаб канону горунуб сахланмыш вә тәдриҹән бүтүн әсас мүасир дилләрә тәрҹүмә олунмушдур. Чох вахт Мүгәддәс Китабы Шејтанын нүмајәндәләри тәрәфиндән ҝөзләнилән өлүм тәһлүкәси алтында, чәтин шәраитләрдә тәрҹүмә едирдиләр. Шүбһәсиз ки, Мүгәддәс Китабын 2 000-дән артыг дилә тәрҹүмә олунмасы, ағласығмаз бөјүклүјә малик олан Јеһова Аллаһын ирадәси олмадан мүмкүн олмазды!

13. Јеһованын бөјүклүјү 1914-ҹү илдән е’тибарән Онун Падшаһлыг нијјәтләри илә әлагәдар неҹә ашкар олмушдур?

¹³ Јеһованын бөјүклүјү һәм дә Онун Падшаһлығы илә әлагәдар ашкар олунмушдур. Мәсәлән, 1914-ҹү илдә О, Өз Оғлу Иса Мәсиһи сәмави Падшаһ кими тахта јүксәлтди. Бундан тезликлә сонра, Иса Шејтана вә онун ҹинләринә гаршы өлчү ҝөтүрдү. Онлар ҝөјдән јерин һүдудларына говулдулар вә инди онлары дибсиз дәринликләр ҝөзләјир (Вәһј 12:9-12; 20:1-3). Һәмин вахтдан Исанын мәсһ едилмиш давамчылары тә’гибләрлә тез-тез гаршылашырдылар. Лакин Јеһова онлары Мәсиһин ҝөрүнмәз бу иштиракы әрзиндә мөһкәмләндирирди (Матта 24:3; Вәһј 12:17).

14. Јеһова 1919-ҹу илдә һансы е’ҹазкар иши јеринә јетирди вә бунун сајәсиндә нәјә наил олунду?

¹⁴ Јеһова 1919-ҹу илдә Өзүнүн бөјүклүјүнү ҝөстәрән даһа бир е’ҹазкар иш ҝөрдү. Исанын мәсһ едилмиш давамчыларыны руһани фәалијјәтсизлик вәзијјәтиндән чыхартды (Вәһј 11:3-11). Нөвбәти илләр әрзиндә мәсһ едилмишләр гурулмуш сәмави Падшаһлыг һаггындакы хош хәбәри сә’јлә тәблиғ етмәјә башладылар. Галан мәсһ едилмиш мәсиһчиләр дә јығылдылар, чүнки, онларын там сајы 144 000 олмалы иди (Вәһј 14:1-3). Мәсиһин мәсһ едилмиш давамчыларынын васитәсилә Јеһова ‘јени јерин’ — салеһ инсан ҹәмијјәтинин тәмәлини гојду (Вәһј 21:1). Бәс мәсһ едилмиш садиг мәсиһчиләрин һамысы ҝөјә галхдыгдан сонра ‘јени јерлә’ нә баш верәҹәк?

15. Мәсһ едилмиш мәсиһчиләр һансы иши башладылар вә бу иш һансы бәһрәләри ҝәтирди?

¹⁵ Бу журналын 1935-ҹи ил 1 вә 15 август бурахылышларында, “Вәһј” китабынын 7-ҹи фәслиндә хатырланан “бөјүк... издиһам”а һәср олунан ваҹиб мәгаләләр дәрҹ олунмушду. Мәсһ едилмиш мәсиһчиләр бүтүн милләтләрдән, гәбиләләрдән, халглардан вә дилләрдән олан бу һәмиманлылары сә’јлә ахтармаға вә өзләри илә бирлијә ҝәтирмәјә башладылар. Бу “бөјүк... издиһам” гаршыдан ҝәлән “бөјүк мәшәггәтдән” сағ чыхаҹаг вә ‘јени јерин’ даими сакинләри кими Ҹәннәтдә әбәдијјән јашаја биләҹәк (Вәһј 7:9-14). Мәсһ едилмиш мәсиһчиләрин башладыглары Падшаһлыг һаггындакы тәблиғ вә шаҝирдләрин һазырланмасы иши сајәсиндә артыг алты милјондан чох инсанын јер үзүндә олаҹаг Ҹәннәтдәки сонсуз һәјата үмидләри вар. Шејтанын вә онун позғун дүнјасынын мүгавимәтинә бахмајараг, јаранан бу ҹүр артыма ҝөрә иззәт кимә верилмәлидир? (1 Јәһја 5:19). Бүтүн бунлары Өз мүгәддәс руһу илә јалныз Јеһова едә биләрди (Ишаја 60:22; Зәкарја 4:6).

Јеһованын ҹалалынын иззәтли бөјүклүјү

16. Нәјә ҝөрә инсанлар Јеһованын “ҹалалынын иззәтли бөјүклүјү”нү һәгиги мә’нада ҝөрә билмирләр?

¹⁶ Јеһованын “валеһедиҹи” вә “гүдрәтли ишләриндән” һеч бири һеч заман унудулмајаҹаг. Давуд јазырды: “Сәнин ишләрини бир нәсил диҝәр нәслә сәна едәҹәк вә гүдрәтли ишләрини билдирәҹәк. Ҹалалынын иззәтли бөјүклүјүнү. Вә валеһедиҹи ишләрини дәрин дүшүнәҹәјәм. Горхунҹ ишләринин гүдрәтини дә сөјләјәҹәкләр; вә мән сәнин бөјүклүјүнү е’лан едәҹәјәм” (Мәзмур 145:4-6). Бәс әҝәр “Аллаһ руһдур”са вә буна ҝөрә дә инсанлара ҝөрүнмәздирсә, Давуд Јеһованын ҹалалынын иззәтли бөјүклүјү барәдә бу гәдәр чох билији һарадан әлдә едә биләрди? (Јәһја 1:18; 4:24).

17, 18. Давудун үрәји нәјин сајәсиндә Јеһованын бөјүклүјү гаршысында еһтирам һисси илә долурду?

¹⁷ Давуд Јеһованы ҝөрә билмәсә дә, Онун бөјүклүјү гаршысында үрәји еһтирам һисси илә долу иди. Мәсәлән, о, Јеһованын пис дүнјаны Үмумдүнја туфанында мәһв етмәси кими гүдрәтли ишләри барәдә Мүгәддәс Јазылардан охуја биләрди. Еһтимал ки, Давуд, Аллаһын исраиллиләри Мисир әсарәтиндән азад едәркән Мисирин сахта аллаһларыны биабыр етмәси барәдә билирди. Бу ҹүр һадисәләр Јеһованын ҹалалынын бөјүклүјү барәдә шаһидлик едир.

¹⁸ Давудун үрәји Јеһованын бөјүклүјү гаршысында јалныз Мүгәддәс Јазылары охумагла дејил, шүбһәсиз ки, һәм дә охудуглары үзәриндә дәриндән дүшүнмәклә дә еһтирам һисси илә долурду. Мәсәлән, о, Јеһованын исраиллиләрә Ганун верәркән баш верән һадисәләр барәдә дүшүнә биләрди. Орада илдырым, шимшәк, гаты булуд вә чох јүксәк шејпур сәси варды. Сина дағы јырғаланыр вә түстүләнирди. Дағын әтәјинә топлашан исраиллиләр, һәтта аловун вә булудун арасындан Јеһованын онлара мәләк васитәсилә сөјләдији “он әмри” дә ешидирдиләр (Тәснијә 4:32-36; 5:22-24; 10:4; Чыхыш 19:16-20; Һәвариләрин ишләри 7:38, 53). Јеһованын бөјүклүјүнүн неҹә дә тә’сирли тәзаһүрүдүр! Аллаһын Кәламыны севән инсанлар Мүгәддәс Јазыларда олан бу парчалар үзәриндә дәриндән дүшүнмәклә, Јеһованын “ҹалалынын иззәтли бөјүклүјүндән” валеһ олмаја билмәзләр. Бу ҝүн биз бүтөв Мүгәддәс Китаба маликик вә һәмин китабда бизә Јеһованын нә гәдәр бөјүк олдуғуну баша дүшмәкдә көмәк едән иззәтә даир мүхтәлиф рө’јаларын тәсвирләри вар (Һезекиел 1:26-28; Даниел 7:9, 10; Вәһј 4-ҹү фәсил).

19. Јеһованын ҹалалы гаршысында даһа чох еһтирам һисси дујмагда бизә нә көмәк едәҹәк?

¹⁹ Давуд һәм дә Аллаһын исраиллиләрә вердији ганунлары өјрәнмәклә Онун бөјүклүјүнә валеһ ола биләрди (Тәснијә 17:18-20; Мәзмур 19:7-11). Јеһованын ганунларына итаәт етмәк Исраил халгыны јүксәлдир вә ону башга халглардан ајырырды (Тәснијә 4:6-8). Әҝәр биз Мүгәддәс Јазылары мүнтәзәм олараг охусаг, онларын үзәриндә дәриндән дүшүнсәк вә ону чалышганлыгла өјрәнсәк, онда Давуд кими биз дә Јеһованын ҹалалы гаршысында даһа чох еһтирам һисси дујаҹағыг.

Аллаһын мә’нәви кејфијјәтләри неҹә дә бөјүкдүр!

20, 21. а) Јеһованын бөјүклүјү Мәзмур 145:7-9 ајәләриндә һансы кејфијјәтләрлә әлагәләндирилир? б) Аллаһын бурада хатырланан кејфијјәтләри Ону севән инсанлара һансы тә’сири бағышлајыр?

²⁰ Артыг јухарыда гејд олундуғу кими, 145-ҹи Мәзмурун биринҹи алты ајәсиндә Јеһованын ағласығмаз бөјүклүјү илә әлагәли ишләринә ҝөрә Ону тәгдис етмәк үчүн әсаслы сәбәбләр ҝәтирилир. 7-дән 9-а кими ајәләр Аллаһын мә’нәви кејфијјәтләрини тәсвир едәрәк Онун бөјүклүјүнү јүксәлдир. Давуд охујурду: “Бөјүк јахшылығынын анылмасыны е’лан едәҹәкләр вә әдаләтини тәрәннүм едәҹәкләр. Рәбб мәрһәмәтли вә рәһмлидир; чох сәбирлидир вә инајәти бөјүкдүр. Рәбб һәр кәсә јахшыдыр; мәрһәмәтләри дә бүтүн ишләри үзәриндәдир”.

²¹ Әввәлҹә Давуд диггәти Јеһованын јахшылығына вә әдаләтлијинә — Шејтан Иблисин суал алтына гојдуғу кејфијјәтләрә јөнәлдир. Бу кејфијјәтләр Аллаһы севән вә Онун рәһбәрлијинә табе олан инсанларда һансы һиссләри ојадыр? Јеһованын јахшылығы вә әдаләтли рәһбәрлик тәрзи Онун хидмәтчиләринә елә севинҹ ҝәтирир ки, онлар Аллаһа һәмд етмәкдән өзләрини сахлаја билмирләр. Бундан әлавә, Јеһованын јахшылығы һамыны әһатә едир. Үмид етмәк истәјирик ки, бу һәлә чох инсанлара төвбә етмәјә вә һәлә ки, чох ҝеҹ дејил һәгиги Аллаһын хидмәтчиләри олмаға көмәк едәҹәк (Һәвариләрин ишләри 14:15-17).

22. Јеһова Өз хидмәтчиләри илә неҹә рәфтар едир?

²² Давуд һәм дә Аллаһын, Мусанын өнүндән кечәркән Өзүнүн вурғуладығы кејфијјәтләри гијмәтләндирирди: “Јеһова, Јеһова, чох аҹыјан вә лүтф едән, ҝеҹ гәзәбләнән вә инајәти вә һәгигәти чох олан” Аллаһдыр (Чыхыш 34:6). Буна ҝөрә дә Давуд бәјан едә билирди: “Рәбб мәрһәмәтли вә рәһмлидир; чох сәбирлидир вә инајәти бөјүкдүр”. Јеһова ағласығмаз дәрәҹәдә бөјүк олса да, хидмәтчиләринин ләјагәтинә һөрмәт едир вә онларла шәфгәтлә давраныр. О, инајәтлә долудур — төвбә едән ҝүнаһкарлары Исанын фидијә гурбанлығы әсасында бағышламаға һазырдыр. Јеһова һәм дә ҝеҹ гәзәбләнәндир, белә ки, Өз хидмәтчиләринә әдаләтин һөкм сүрдүјү јени дүнјаја дахил олмаға мане олан зәифликләрин өһдәсиндән ҝәлмәк имканы верир (2 Петер 3:9, 13, 14).

23. Нөвбәти мәгаләдә һансы ҝөзәл кејфијјәти нәзәрдән кечирәҹәјик?

²³ Давуд Аллаһын инајәтини јүксәлдир. Әслиндә Мәзмурун 145-ҹи фәслинин галан һиссәси Јеһованын бу кејфијјәти неҹә тәзаһүр етдирдијини вә Онун садиг хидмәтчиләринин буна неҹә мүнасибәт бәсләдикләрини ҝөстәрир. Бу фикирләри нөвбәти мәгаләдә мүзакирә едәҹәјик.

Сиз неҹә ҹаваб верәрдиниз?

• Јеһоваја “һәр ҝүн” һәмд етмәк үчүн һансы имканлар вар?

• Һансы нүмунәләр ҝөстәрир ки, Јеһованын бөјүклүјү ағласығмаздыр?

• Јеһованын ҹалалынын иззәтли бөјүклүјү гаршысында даһа чох еһтирам һисси дујмагда бизә нә көмәк едәр?

[8-ҹи сәһифәдәки шәкил]

Каинатымызын галактикалары Јеһованын бөјүклүјү барәдә шаһидлик едир.

[Иҹазә илә]

Courtesy of Anglo-Australian Observatory, photograph by David Malin

[10-ҹу сәһифәдәки шәкил]

Јеһованын бөјүклүјү Иса Мәсиһлә әлагәдар неҹә ашкар олунмушдур?