«Өз идракына етибар етмә»

«Бүтүн гәлбинлә Рәббә ҝүвән, өз идракына етибар етмә» (СҮЛ. МӘС. 3:5).

1, 2. а) Биз һансы вәзијјәтләрлә үзләшә биләрик? б) Чәтин вәзијјәтә дүшәндә, ваҹиб гәрар гәбул етмәли оланда, јахуд да ширникдириҹи тәсирләрлә мүбаризә апаранда кимә бел бағламалыјыг вә нәјә ҝөрә?

СИНТИЈАНЫНa мүдири ширкәтин бир һиссәсини бағлајыб бәзи ишчиләри ишдән чыхармышды. Синтија һисс едир ки, тезликлә бу, онун да башына ҝәләҹәк. О, ишини итирсә, нә едәҹәк? Коммунал вә диҝәр хәрҹләри неҹә өдәјәҹәк? Памела адлы бир баҹы тәблиғчиләрә еһтијаҹ олан әразијә көчмәк истәјир. Ҝөрәсән буну етмәјә дәјәр? Тәхминән 20 јашында олан Самуел адлы ҝәнҹи исә башга проблем нараһат едир. О, ушаглыгда порнографијаја бахыб вә инди онда көһнә вәрдишинә гајытмаг истәји јенидән баш галдырыб. Бәс о, бу истәјини неҹә боға биләр?

² Чәтин вәзијјәтә дүшәндә, ваҹиб гәрар гәбул етмәли оланда, јахуд да ширникдириҹи тәсирләрлә мүбаризә апаранда кимә бел бағлајырсан? Сән јалныз өзүнә ҝүвәнирсән, јохса «гајғы јүкүнү Рәббә [верирсән]»? (Мәз. 55:22). Мүгәддәс Китабда дејилир: «Рәббин ҝөзү салеһләрин үзәриндәдир, гулаглары онларын фәрјадларына ачыгдыр» (Мәз. 34:15). Буна ҝөрә дә бүтүн гәлбимизлә Јеһоваја ҝүвәнмәк вә өз идракымыза етибар етмәмәк олдугҹа ваҹибдир! (Сүл. мәс. 3:5).

3. а) Јеһоваја етибар етмәк нә демәкдир? б) Нәјә ҝөрә бәзиләри өз идракына ҝүвәнир?

³ Бүтүн гәлбимизлә Јеһоваја етибар етмәк Онун дедикләринә ујғун давранараг ирадәсини јеринә јетирмәк демәкдир. Бунун үчүн даима Она дуа етмәли вә үрәкдән Ондан бизә рәһбәрлик вермәсини хаһиш етмәлијик. Лакин чохлары Јеһоваја там ҝүвәнмәкдә чәтинлик чәкирләр. Мисал үчүн, Линн адлы бир баҹы етираф едир: «Јеһоваја там ҝүвәнмәк үчүн һәлә дә ҝәрҝин мүбаризә апарырам». Бунун сәбәби нәдир? Баҹы сөзүнә давам едир: «Атамла һеч бир мүнасибәтим олмајыб, анамдан исә гәтијјән гајғы ҝөрмәмишәм. Буна ҝөрә дә артыг еркән јашларымда өз ајағым үзәриндә дајанмағы өјрәндим». Ушаглығы бу ҹүр кечдијинә ҝөрә Линнә кимәсә там ҝүвәнмәк чәтиндир. Инсанын габилијјәтләри вә һәјатда газандығы уғурлар да онун өзүнә ҝүвәнмәсинә сәбәб ола биләр. Тәҹрүбәсинә архаланан ағсаггалда јығынҹагда јаранан проблемләри Јеһовадан дуада рәһбәрлик диләмәдән һәлл етмәк вәрдиши јарана биләр.

4. Бу мәгаләдә сөһбәт нәдән ҝедәҹәк?

⁴ Дуада Јеһовадан көмәк диләјәндә О, истәјир ки, биз Ондан хаһиш етдикләримизә ујғун давранаг вә Онун рәһбәрлијинә әмәл едәк. Чәтин проблемләримизи Јеһованын үзәринә атмагла онлары өзүмүз һәлл етмәјә чалышмаг арасында таразлығы неҹә горуја биләрик? Гәрарлар гәбул едәркән нәдән еһтијат етмәлијик? Ширникдириҹи вәзијјәтләрә мүгавимәт ҝөстәрмәкдә дуанын ролу нәјә ҝөрә ваҹибдир? Биз бу суаллары Мүгәддәс Китабдакы нүмунәләр әсасында мүзакирә едәҹәјик.

Чәтин вәзијјәтләрдә

5, 6. Ассуријанын падшаһынын һәдә-горхуларына туш ҝәлән Хизгија белә бир вәзијјәтдә неҹә давранды?

⁵ Мүгәддәс Китабда Хизгија падшаһ һагда дејилир: «О, Рәбдән јапышыб Онун јолундан дөнмәди вә Рәббин Мусаја вердији әмрләринә әмәл етди». Бәли, «Хизгија Исраилин Аллаһы Рәббә ҝүвәнди» (2 Пад. 18:5, 6). Бир дәфә Ассурија падшаһы Санхерив јүксәк вәзифәли нүмајәндәләрини бөјүк ордусу илә бирҝә Јерусәлимә ҝөндәрәндә Хизгија падшаһ нә етди? Онун гүдрәтли ордусу артыг Јәһуданын бир нечә истеһкамлы шәһәрини зәбт етмишди, инди исә Санхеривин мәгсәди Јерусәлими әлә кечирмәк иди. Хизгија Јеһованын мәбәдинә ҝедиб дуа етмәјә башлады: «Еј Аллаһымыз Рәбб, инди исә јалварырам, бизи онун әлиндән гуртар вә бүтүн дүнја падшаһлыглары билсинләр ки, ја Рәбб, Сән, јалныз Сән Аллаһсан!» (2 Пад. 19:14—19).

⁶ Хизгија дуасына ујғун давранды. О һәтта мәбәдә ҝетмәздән өнҹә адамларына тапшырды ки, ассуријалыларын истеһзаларына ҹаваб вермәсинләр. Һәмчинин Хизгија мәсләһәт алмаг үчүн адамларыны Јешаја пејғәмбәрин јанына ҝөндәрди (2 Пад. 18:36; 19:1, 2). Белә вәзијјәтдә о, Јеһоваја мәгбул олаҹағыны дәгиг билдији аддымлар атды. О, Јеһованын ирадәсинә зидд олан һеч бир шеј етмәди. Мәсәлән, Мисирдән вә ја гоншу халглардан көмәк истәмәди. Хизгија өз идракына јох, Јеһоваја ҝүвәнди. Јеһованын мәләји Санхеривин ордусундан 185 000 нәфәри гыранда падшаһ «ҝери чәкилиб» Ниневаја гајытды (2 Пад. 19:35, 36).

7. Ханнанын вә Јунусун дуасы бизә неҹә тәсәлли верә биләр?

⁷ Левили Елгананын арвады Ханна сонсуз иди. Белә бир үзүҹү вәзијјәтдә о да Јеһоваја ҝүвәнирди (1 Шам. 1:9—11, 18). Јунус исә дуа етдикдән сонра Јеһова ону бөјүк балығын гарнындан гуртарды. Дуасында о демишди: «Әзаб ичиндә Рәбби чағырдым, О мәнә ҹаваб верди. Өлүләр дијарынын бағрындан фәрјад етдим, Сән мәним сәсими ешитдин» (Јун. 2:1, 2, 10). Вәзијјәтимизин нә дәрәҹәдә аҹынаҹаглы олмасындан асылы олмајараг, Јеһовадан дуада мәрһәмәт диләмәк имканымызын олдуғуну билмәк неҹә дә тәсәлливериҹидир! (Мәзмур 55:1, 16 ајәләрини оху.)

8, 9. Хизгија, Ханна вә Јунус өз дуаларында һансы нараһатчылыгларыны дилә ҝәтирмишдиләр вә онларын нүмунәсиндән биз нә өјрәнирик?

⁸ Хизгија, Ханна вә Јунусун нүмунәсиндән ағыр сынаглар заманы дуа едәркән нәји јадда сахламалы олдуғумуза даир даһа бир ваҹиб дәрс өјрәнирик. Онларын үчү дә бу вәзијјәтләрдә емосионал ағры һисс едирди. Лакин Аллаһын бу хидмәтчиләринин дуаларындан ҝөрүрүк ки, онлар јалныз өзләри вә проблемләриндән тез ҹанларыны гуртармаг барәдә дүшүнмүрдүләр. Аллаһын ады, ибадәт вә Онун ирадәси онлар үчүн ән үмдә мәсәлә иди. Хизгијаны Јеһованын адынын рүсвај олунмасы нараһат едирди. Ханна сөз верди ки, һәсрәтлә ҝөзләдији оғлуну Шилодакы мүгәддәс мәскәндә хидмәт етмәси үчүн верәҹәк. Јунус исә деди: «Әһдими јеринә јетирәҹәјәм» (Јун. 2:9).

⁹ Јеһовадан дуада бизи чәтин вәзијјәтдән хилас етмәсини хаһиш едәндә буну һансы нијјәтдән ирәли ҝәләрәк етдијимизи тәһлил етмәлијик. Бизи јалныз ҹанымызы проблемдән гуртармаг, јохса Јеһованын нијјәти нараһат едир? Сыхынты заманы проблемләр ҝөзүмүзү бағлаја биләр вә белә бир вәзијјәтдә руһани ишләрин арха плана кечәрәк бизим үчүн өз әһәмијјәтини итирмәк тәһлүкәси јарана биләр. Јеһовадан дуада көмәклик диләјәндә ҝәлин диггәтимизи Она, адынын тәгдис олунмасына вә али һөкмранлығынын бәраәт газанмасына јөнәлдәк. Әҝәр белә етсәк, онда проблемимиз истәдијимиз кими һәлл олунмаса да, мүсбәт әһвал-руһијјәмизи горумуш олаҹағыг. Бәзән Јеһова дуаларымыза башга ҹүр ҹаваб верир. Ола билсин, О истәјир ки, биз Онун көмәјилә вәзијјәтимизә таб ҝәтирәк. (Јешаја 40:29; Филипилиләрә 4:13 ајәләрини оху.)

Гәрарлар гәбул едәндә

10, 11. Јеһошафат нә етмәли олдуғуну билмәјәндә неҹә давранды?

¹⁰ Һәјатда ваҹиб мәсәләләрлә әлагәдар гәрарлары неҹә верирсән? Ола биләрми ки, сән әввәлҹә гәрар верирсән, сонра исә Јеһовадан гәрарына хејир-дуа вермәсини истәјирсән? Ҝөрәк моавлылар вә аммонлулар бирләшәрәк Јәһуда падшаһы Јеһошафата гаршы чыханда о, нә етди. Јәһуда падшаһлығынын онлара мүгавимәт ҝөстәрмәјә ҝүҹү јох иди. Белә вәзијјәтдә Јеһошафат неҹә давранды?

¹¹ Мүгәддәс Китабда дејилир: «Јеһошафат горхду вә үзүнү Рәбби ахтармаға дөндәрди». О, бүтүн Јәһудада оруҹ елан етди вә «Рәбдән көмәк диләмәк үчүн» халгы бир араја јығды. Сонра Јеһошафат Јәһуда вә Јерусәлим ҹамаатынын өнүндә дуруб дуа етди. О, дуасында белә деди: «Еј Аллаһымыз, онлара һөкм етмәјәҹәксәнми? Чүнки үзәримизә ҝәлән бу бөјүк гошуна гаршы ҝүҹүмүз јохдур вә биз нә едәҹәјимизи билмирик, анҹаг ҝөзләримиз Сәнин үзәриндәдир». Һәгиги Аллаһ Јеһошафатын дуасыны ешитди вә мөҹүзәви шәкилдә онлары хилас етди (2 Салн. 20:3—12, 17). Хүсусилә руһани мәсәләләрлә бағлы гәрарлар гәбул едәндә мәҝәр биз өз дәрракәмизә етибар етмәк әвәзинә, Јеһоваја ҝүвәнмәли дејилик?

12, 13. Гәрарлар гәбул етмәклә бағлы Давуд падшаһ һансы нүмунәни гојуб?

¹² Бәс проблем бизә асан ҝәләндә нә етмәлијик? Ола билсин, биз дүшүнүрүк ки, әввәлләр башымыза буна бәнзәр иш ҝәлдији үчүн асанлыгла ондан чыхыш јолу тапаҹағыг. Давуд падшаһын нүмунәси белә вәзијјәтләрдә неҹә давранмалы олдуғумузу баша дүшмәјә көмәк едир. Бир дәфә амалеглиләр Зиглаг шәһәринә һүҹум чәкиб Давудун вә адамларынын арвад-ушагларыны әсир апардылар. Давуд Јеһоваја дуада мүраҹиәт едәрәк сорушду: «Бу басгынчыларын архасынҹа дүшсәм, онлара чатараммы?» Јеһова ҹаваб верди: «Ардларынҹа дүш, мүтләг онлара чатаҹагсан вә мүтләг әсирләри гуртараҹагсан». Давуд Аллаһын сөзүнә әмәл етди вә «Амалеглиләрин ҝөтүрүб апардығы һәр бир шеји... ҝери гајтарды» (1 Шам. 30:7—9, 18—20).

¹³ Бу һадисәдән бир гәдәр сонра филиштлиләр Исраилә басгын етдиләр. Давуд бу дәфә дә Јеһовадан рәһбәрлик истәди вә Ондан ајдын ҹаваб алды. Аллаһ деди: «Чых, мүтләг Филиштлиләри сәнә тәслим едәҹәјәм» (2 Шам. 5:18, 19). Бундан гыса мүддәт сонра исә филиштлиләр јенидән Давуда гаршы галхдылар. Бәс бу дәфә о, нә етди? О дүшүнә биләрди: «Артыг ики дәфә буна бәнзәр һадисә башыма ҝәлиб. Гој бу дәфә дә Аллаһын дүшмәнләринә гаршы чыхым вә онлары мәғлуб едим». О, белә фикирләшди, јохса Јеһовадан рәһбәрлик истәди? Давуд өз тәҹрүбәсинә ҝүвәнмәди. О, јенидән Јеһоваја дуа етди. Јәгин, сонрадан белә етдијинә ҝөрә севинирди, чүнки Јеһованын бу дәфәки ҝөстәриши фәргли иди (2 Шам. 5:22, 23). Биз дә әввәлләр үзләшдијимиз проблемләрлә вә вәзијјәтләрлә јенидән үзләшәндә јалныз тәҹрүбәмизә архаланмагдан өзүмүзү ҝөзләмәлијик. (Јеремја 10:23 ајәсини оху.)

14. Јешуанын вә Исраил ағсаггалларынын ҝивеонлуларла олан һадисәсиндән нә өјрәнирик?

¹⁴ Гејри-камил олдуғумуз үчүн һамымыз (һәтта тәҹрүбәли ағсаггаллар белә) еһтијатлы олмалыјыг ки, гәрар гәбул едәркән Јеһовадан рәһбәрлик диләмәји унутмајаг. Ҝәлин ҝөрәк палтарларыны дәјишиб өзләрини узаг бир өлкәдән ҝәлән адамлар кими гәләмә верән фәрасәтли ҝивеонлулар Мусанын хәләфи Јешуанын вә Исраил ағсаггалларынын јанына ҝәләндә нә баш верди. Јешуа вә башгалары Јеһова илә мәсләһәтләшмәдән онларла сүлһ мүгавиләси бағладылар. Јеһова онларын мүгавиләсини ләғв етмәсә дә, бу һадисәнин Мүгәддәс Китабда гејд олунмасынын гајғысына галды ки, биз онларын һәрәкәтинин сәһв олдуғуну биләк (Јешуа 9:3—6, 14, 15).

Ширникдириҹи вәзијјәтләрлә мүбаризә апаранда

15. Ширникдириҹи вәзијјәтләрлә мүбаризә апаранда дуа етмәјин нә үчүн ваҹиб олдуғуну изаһ ет.

¹⁵ Дахилимиздә ҝүнаһ гануну олдуғундан биз ҝүнаһлы арзуларымызла усанмадан мүбаризә апармалыјыг (Ром. 7:21—25). Бу дөјүшдә галиб ҝәлмәк мүмкүндүр. Неҹә? Иса давамчыларына демишди ки, ширникдириҹи вәзијјәтләрдә мүгавимәт ҝөстәрә билмәјимиз үчүн дуа етмәк олдугҹа ваҹибдир. (Лука 22:40 ајәсини оху.) Аллаһа дуа едәндән сонра пис арзулар вә фикирләр бизи тәрк етмәсә, биз јенә дә Аллаһа дуа едәрәк бу сынағын өһдәсиндән ҝәлмәк үчүн бизә мүдриклик вермәсини хаһиш етмәлијик. Мүгәддәс Китаб бизи әмин едир ки, Јеһова «сәхавәтлә вә гынамадан верән» Аллаһдыр (Јаг. 1:5). Јагуб һәмчинин јазмышды: «Аранызда [руһани ҹәһәтдән] хәстә олан вармы? Гој јығынҹағын ағсаггалларыны чағырсын. Онлар Јеһованын ады илә онун башына јағ сүртүб онун үчүн дуа едәрләр. Иманла едилән дуа хәстәни сағалдаҹаг» (Јаг. 5:14, 15).

16, 17. Ширникдириҹи вәзијјәт јарананда дуа етмәјин ән јахшы вахты һансыдыр?

¹⁶ Биз ширникдириҹи вәзијјәтләрин өһдәсиндән дуа етмәдән ҝәлә билмәрик, анҹаг вахтында дуа етмәјин ваҹиблијини дә унутмамалыјыг. Сүлејманын мәсәлләри 7:6—23 ајәләриндә һаггында бәһс олунан ҝәнҹ оғланын башына ҝәләнләрин үзәриндә дүшүнмәјә дәјәр. Алагаранлыгда о, бир күчә илә ҝедирди вә билирди ки, һәмин күчәдә әхлагсыз гадын јашајыр. Гадынын инандырыҹы ширин сөзләринә алданараг оғлан кәсилмәјә апарылан өкүз кими онун ардынҹа дүшдү. Оғланы јолуну һәмин күчәдән салмаға нә вадар етди? О, «ганмаз», јәни тәҹрүбәсиз иди вә ола билсин ки, пис арзулары илә мүбаризә апарырды (Сүл. мәс. 7:7). Дуанын нә заман она даһа чох фајдасы дәјә биләрди? Дүздүр, гадын онунла сөһбәт етдији мүддәтдә дуа етмәсинин она фајдасы дәјә биләрди. Амма әҝәр о, буну гадынын олдуғу күчә илә ҝетмәк фикри ағлына ҝәлән ан етсәјди, онун үчүн даһа јахшы оларды.

¹⁷ Бу ҝүн, ола билсин, кимсә порнографијаја бахмамаг үчүн өзү илә ҝүҹлү мүбаризә апарыр. Әҝәр о адам биләрәкдән әхлагсыз шәкилләрин вә видеоларын олдуғу сајтлара дахил олурса, мәҝәр бу, «Сүлејманын мәсәлләри» китабынын 7-ҹи фәслиндә тәсвир олунан оғланын вәзијјәтинә бәнзәмир? О неҹә дә тәһлүкәли јола гәдәм гојур! Биздә порнографијаја бахмаг истәји баш галдыранда ону дәф етмәк үчүн әввәлҹәдән дуа етмәлијик вә һәмин сајтлара апаран «јолларла» ҝетмәмәлијик.

18, 19. а) Нәјә ҝөрә ширникдириҹи вәзијјәтләрә мүгавимәт ҝөстәрмәк асан дејил вә бунун өһдәсиндән мүвәффәгијјәтлә неҹә ҝәлә биләрик? б) Сән нә етмәк әзминдәсән?

¹⁸ Ширникдириҹи вәзијјәтләрә мүгавимәт ҝөстәрмәк вә ја пис вәрдишләрин өһдәсиндән ҝәлмәк асан дејил. Һәвари Павел јазмышды: «Чүнки бәдән өз истәкләри илә руһа гаршыдыр, руһ да бәдәнә гаршыдыр». Буна ҝөрә дә «бу гаршыдурма үзүндән» биз етмәк истәдијимизи етмирик (Галат. 5:17). Бу мүбаризәдә галиб ҝәлмәк үчүн биз пис фикир вә арзуларын үрәјимиздә тәзә-тәзә баш галдырдығы вахт сәмими-гәлбдән дуа етмәли вә дуаларымыза мүвафиг давранмалыјыг. Үзләшдијимиз «сынагларда гејри-ади бир шеј јохдур» вә Јеһованын көмәјилә биз Она садиг гала биләрик (1 Кор. 10:13).

¹⁹ Истәр чәтин вәзијјәтә дүшәк, истәр ваҹиб гәрарлар гәбул етмәли олаг, истәрсә дә пис фикир вә арзуларла мүбаризә апараг Јеһова бизә ҝөзәл әнам олан дуа етмәк имканыны вериб. Дуа етмәклә биз Она ҝүвәндијимизи ҝөстәририк. Һәмчинин биз даима Аллаһдан бизә рәһбәрлик верән вә мөһкәмләндирән мүгәддәс руһ диләмәлијик (Лука 11:9—13). Ҝәлин һәр заман Јеһоваја ҝүвәнәк вә өз идракымыза етибар етмәјәк.

[Һашијә]

Јадыныздадырмы?

• Хизгијанын, Ханнанын вә Јунусун нүмунәсиндән Јеһоваја ҝүвәнмәк барәдә нә өјрәндин?

• Давуд вә Јешуанын нүмунәси неҹә ҝөстәрир ки, гәрар верәркән диггәтли олмалыјыг?

• Хүсусилә нә заман дуа етмәлијик?

[9–ҹу сәһифәдәки шәкил]

Ширникдириҹи вәзијјәт јарананда дуа етмәк үчүн ән јахшы вахт һансыдыр?