Јеһова «ахыры әввәлдән» билдирән Аллаһдыр
‘Ахыры әввәлдән, баш вермәмиш һадисәләри әзәлдән билдирән Мәнәм’ (ЈЕШАЈА 46:10).
1, 2. Бабилин сүгуту илә бағлы һадисәләрдә диггәтәлајиг олан нәдир вә бу факт Јеһова һаггында нәји ачыглајыр?
ҜЕҸӘ јарысыдыр. Дүшмән әсҝәрләри Фәрат чајынын јатағы бојунҹа ирәлиләјәрәк, һәдәфләри олан гүдрәтли Бабил шәһәринин үзәринә ҝизли һүҹума кечирләр. Шәһәрин дарвазаларына јахынлашанда, онларын гаршысында гејри-ади бир мәнзәрә ҹанланыр. Бабилин икитајлы нәһәнҝ дарвазалары ачыгдыр! Әсҝәрләр чајын јатағындан галхыб шәһәрә дахил олурлар. Шәһәр бир ҝөз гырпымында алыныр. Гошунун башчысы Кир тезликлә ишғал олунмуш торпағы нәзарәти алтына алыр, бир мүддәт сонра исә әсарәтдә олан исраиллиләрин азад олунмасы һаггында фәрман верир. Сүрҝүндә олан минләрлә јәһуди Јеһоваја ибадәти бәрпа етмәк үчүн Јерусәлимә гајыдыр (2 Салнамәләр 36:22, 23; Езра 1:1-4).
2 Б. е. ә. 539-537-ҹи илләрә аид олан һәмин һадисәләрин ҝерчәклији һазырда бир чох тарихчиләр тәрәфиндән тәсдиг олунмушдур. Ән мараглысы исә одур ки, бу һадисәләрин баш верәҹәји артыг 200 ил әввәл мә’лум иди. Јешаја пејғәмбәр, Јеһовадан илһам алараг Бабилин сүгутуну габагҹадан тәсвир етмишди (Јешаја 44:24–45:7). Аллаһ тәкҹә Бабилин сүгуту илә бағлы һадисәләри дејил, һәм дә ону истила едәҹәк сәркәрдәнин адыны да ачыгламышдыa. Јеһова, о дөврдә Онун шаһидләри олан исраиллиләрә үз тутараг сөјләмишди: «Гәдимдән бәри олан һадисәләри хатырлајын, чүнки Аллаһ Мәнәм, башгасы јохдур, Мәнәм Аллаһ, Мәнә бәнзәри јохдур! Ахыры әввәлдән, баш вермәмиш һадисәләри әзәлдән билдирән... Мәнәм» (Јешаја 46:9, 10а). Бәли, Јеһова баш верәҹәк һадисәләри габагҹадан ҝөрә билән Аллаһдыр.
3. Биз инди һансы суаллары мүзакирә едәҹәјик?
3 Аллаһ ҝәләҹәк һаггында чохму билир? Јеһова һәр биримизин нә едәҹәјини әввәлҹәдән билирми? Бизим ҝәләҹәјимиз габагҹадан мүәјјән олунубму? Бу суаллары биз бу вә нөвбәти мәгаләдә мүзакирә едәҹәјик.
Јеһова пејғәмбәрликләр Аллаһыдыр
4. Мүгәддәс Китабда гәләмә алынан пејғәмбәрликләрин Мүәллифи кимдир?
4 Ҝәләҹәји габагҹадан ҝөрмәјә гадир олан Јеһова Өз хидмәтчиләринә илһам верәрәк Мүгәддәс Китабда бир чох пејғәмбәрликләри јаздырмышдыр. Бу пејғәмбәрликләр бизә Аллаһын нә етмәк нијјәтиндә олдуғуну әввәлҹәдән билмәјә имкан верир. О бәјан едир: «Будур, әввәлки ишләр һәјата кечди, инди Мән тәзә ишләри бәјан едирәм, онлар јетишмәмишдән әввәл сизи хәбәрдар едирәм» (Јешаја 42:9). Аллаһын халгы неҹә дә бөјүк шәрәфә лајиг ҝөрүлүб!
5. Јеһованын нә едәҹәјини габагҹадан билмәјимиз үзәримизә һансы мәс’улијјәти гојур?
5 Пејғәмбәр Амос бизи әмин едир: «Худавәнд Рәбб гулу олан пејғәмбәрләрә Өз нијјәтини ачмадан һеч нә етмир». Аллаһын нијјәтини габагҹадан билмәк пејғәмбәрләрин үзәринә мәс’улијјәт гојурду. Амосун вердији парлаг нүмунәјә диггәт јетирин: «Шир нә’рә чәкәндә ким ондан горхмаз?» Ширин нә’рәсинә јахынлыгда олан инсанлар вә һејванлар дәрһал реаксија вердикләри кими, еләҹә дә Амос кими пејғәмбәрләр Јеһованын бәјаннамәләрини тә’хирә салмадан е’лан едирдиләр. «Худавәнд Рәбб сөјләјәндә ким пејғәмбәрлик етмәз?» (Амос 3:7, 8).
Јеһованын ‘кәлмәси һәјата кечир’
6. Бабилин деврилмәси илә әлагәдар Јеһованын ‘нијјәти’ неҹә јеринә јетди?
6 Пејғәмбәри Јешаја васитәсилә Јеһова демишди: «Нијјәтим баш тутаҹаг, истәдијим һәр шеји едәҹәјәм» (Јешаја 46:10б). Аллаһын Бабилә аид ‘нијјәти’ — Кири Мидијадан чағырыб, бу шәһәри фәтһ етмәк вә Бабил дөвләтини јох етмәк иди. Јеһова бу нијјәтини хејли әввәл билдирмишди. Артыг гејд олундуғу кими, пејғәмбәрлик дәгигликлә 539-ҹу илдә јеринә јетди.
7. Нә үчүн әмин ола биләрик ки, Јеһованын ‘кәлмәси’ һәмишә ‘һәјата кечир’?
7 Кирин Бабили фәтһ етмәсиндән тәхминән дөрд әср әввәл Јәһуда падшаһы Јеһошафат аммонлуларын вә моавлыларын бирләшмиш ордулары илә үзләшмәли олду. О инамла дуа едирди: «Ја Рәбб, аталарымызын Аллаһы, ҝөјләрдә олан Аллаһ Сән дејилмисән? Бүтүн милләтләрин падшаһлыглары үзәринә һаким олан Сән дејилсәнми? Гүдрәтлә гүввәт Сәнин әлиндәдир вә һеч ким Сәнә гаршы дура билмәз» (2 Салнамәләр 20:6). Јешајада да белә бир әминлик вар иди: «Ордулар Рәббинин һөкмүнү ким боша чыхара биләр? Галхмыш әлини ким ҝери дөндәрә биләр?» (Јешаја 14:27). Психи хәстәликдән сонра ағлы башына гајыдан Бабил падшаһы Навуходоносор да тәвазөкарлыгла е’тираф етди: «[Аллаһын] әлини сахлајаҹаг вә Она “Нә едирсән?” дејәҹәк бир кәс јохдур» (Даниел 4:35). Бәли, Јеһова халгыны әмин едир: «Ағзымдан чыхан кәлмә дә... бош јерә јаныма гајытмаз, анҹаг истәдијими јеринә јетирәр, ону ҝөндәрдијим иш иҹра олунсун дејә һәјата кечирәр» (Јешаја 55:11). Биз там әмин ола биләрик ки, Јеһованын ‘кәлмәси’ һәмишә ‘һәјата кечир’. Онун нијјәтинин јеринә јетмәсинә һеч ким мане ола билмәз.
Аллаһын ‘әзәли мәгсәди’
8. Аллаһын ‘әзәли мәгсәди’ нәдир?
8 Ефеслиләрә мәктубунда һәвари Павел Аллаһын ‘әзәли мәгсәди’ олдуғуну сөјләјир (Ефеслиләрә 3:11). Бу о демәк дејил ки, Аллаһын тәртиб едилмиш хүсуси фәалијјәт планы вар. Бу ифадә Јеһованын бәшәријјәт вә јер үчүн олан нијјәтини јеринә јетирмәк гәтијјәтинә аиддир (Јарадылыш 1:28). Онун мәгсәдинин мүтләг баш тутаҹағына әмин олмаг үчүн ҝәлин Мүгәддәс Китабда јазылмыш илк пејғәмбәрлији нәзәрдән кечирәк.
9. Јарадылыш 3:15 ајәси Аллаһын нијјәти илә неҹә бағлыдыр?
9 Јарадылыш 3:15 ајәсиндә јазылмыш вә’д ҝөстәрир ки, Адәм вә Һәвва ҝүнаһ ишләдәндән дәрһал сонра Јеһова мүәјјән етди ки, Онун символик арвады ушаг, оғул доғаҹаг. Јеһова, гадын илә Шејтанын вә онларын зүрријјәтләри арасындакы дүшмәнчилијин нәтиҹәләрини дә габагҹадан ҝөрмүшдү. О, символик арвадынын Зүрријјәтинин дабанындан санҹылмасына јол версә дә, мүәјјән етдији вахтда, Зүрријјәт иланы, јә’ни вә ја Шејтан Иблиси башындан вурмалы иди. Бу арада, Јеһованын нијјәти сечдији нәсил шәҹәрәси васитәсилә уғурла һәјата кечирди: вә’д едилмиш Мәсиһ јер үзүнә ҝәлди (Лука 3:15, 23-38; Галатијалылара 4:4).
Јеһова габагҹадан нәји мүәјјән едир?
10. Јеһова Адәм вә Һәвванын ҝүнаһ ишләдәҹәјәни әввәлдән мүәјјән етмишдими? Изаһ един.
10 Исанын Аллаһын нијјәтиндә тутдуғу мөвгејиндән данышан һәвари Петер јазырды: «[Иса] дүнја јаранмаздан әввәл тә’јин едилди, амма бу ахыр заманларда сизин үчүн изһар олунду» (1 Петер 1:20). Јеһова Адәм вә Һәвванын ҝүнаһ едәҹәјини вә Иса Мәсиһин фидијә гурбанлығына еһтијаҹ олаҹағыны әввәлҹәдән мүәјјән етмишди? Хејр. «Јаранмаздан» сөзү јунан дилиндә һәрфи мә’нада «[тохум] ахытмаг» мә’насыны дашыјыр. Адәм вә Һәвва ҝүнаһ ишләтмәздән әввәл «тохумун ахыдылмасы», јә’ни һамилә галан олмушдуму? Хејр. Адәм вә Һәвванын ушаглары онлар итаәтсизлик ҝөстәрдикдән сонра доғулду (Јарадылыш 4:1). Беләликлә, үсјандан дәрһал сонра, лакин Һәвва һәлә ушаға галмаздан әввәл Јеһова ‘Зүрријјәтин’ олаҹағыны мүәјјән етди. Исанын өлүб дирилмәси сајәсиндә мәһәббәтдән ирәли ҝәлән фидијә тәдбири ҝөрүлдү. Бу гурбанлығын васитәсилә, мирас галмыш ҝүнаһ вә Шејтанын бүтүн ҹәһдләри һеч едиләҹәк (Матта 20:28; Ибраниләрә 2:14; 1 Јәһја 3:8).
11. Јеһова, нијјәтинин һәјата кечирилмәсинин ҝедишатында нәји габагҹадан мүәјјән етди?
11 Аллаһ Өз нијјәтинин јеринә јетмәсинин ҝедишатына даир бир шеји дә габагҹадан мүәјјән етмишди. Бу, Павелин ефеслиләрә јаздығы мәктубунда, хүсусилә «һәм ҝөјләрдә, һәм дә јердә олан һәр шеји Мәсиһин башчылығы алтында бирләшдирмәкдир» сөзләриндән ҝөрүнүр. Сонра ‘ҝөјләрдә олан шејләрә’, јә’ни Мәсиһин һәмварисләри олмаг үчүн сечиләнләрә истинад едәрәк Павел изаһ едир: «Өз ирадәсинин гәрарына ҝөрә, һәр шеји иҹра едән Аллаһын мәгсәдинә әсасән Мәсиһдә әввәлдән тә’јин едилдик» (Ефеслиләрә 1:10, 11). Бәли, Јеһова габагҹадан мүәјјән етмишди ки, мәһдуд сајда инсанлар Аллаһын гадынынын Зүрријјәтинин икинҹи дәрәҹәли һиссәсини тәшкил едәҹәк вә Мәсиһлә бәрабәр фидијәнин ҝәтирдији хејир-дуалары итаәткар бәшәријјәтин үзәринә јағдыраҹаглар (Ромалылара 8:28-30). Һәвари Петер онлары «мүгәддәс милләт» адландырыр (1 Петер 2:9). Һәвари Јәһјаја вәһјдә Мәсиһин һәмварисләринин сајынын 144 000 олаҹағыны билмәк шәрәфи нәсиб олмушдур (Вәһј 7:4-8; 14:1, 3). Падшаһ Иса илә бирликдә онлар Аллаһын ‘иззәтинин мәдһ едилмәси’ үчүн хидмәт едирләр (Ефеслиләрә 1:12-14).
12. 144 000 нәфәр конкрет шәхсин габагҹадан мүәјјән олунмадығыны һарадан билирик?
12 144 000 нәфәрин габагҹадан мүәјјән едилмәси о демәк дејилдир ки, Аллаһ конкрет шәхсләрин алнына Она сәдагәтлә хидмәт едәҹәкләрини јазыб. Јунанҹа Мүгәддәс Јазыларда олан нәсиһәт вә ҝөстәришләр, әсас е’тибарилә мәсһ олунмушлары нөгсансызлыгларыны горумаг вә сәмави мүкафатларына лајиг јашамаг үчүн онлара рәһбәрлик вермәк вә ҝүҹләндирмәкдән өтрү јазылмышдыр (Филипилиләрә 2:12; 2 Салониклиләрә 1:5, 11; 2 Петер 1:10, 11). Јеһова габагҹадан билирди ки, бу мәгсәдинә хидмәт етмәјә мүвафиг олан 144 000 нәфәр адам тапылаҹаг. Бу сырада кимләрин олаҹағы дә’вәт олунмушларын неҹә јашајаҹагларындан асылыдыр вә һәр биринин шәхси гәрарыдыр (Матта 24:13).
Јеһова габагҹадан нәләри билир?
13, 14. Јеһованын ҝәләҹәји ҝөрмә габилијјәтиндән неҹә истифадә етмәси нә илә таразлашыр вә нә үчүн?
13 Јеһова пејғәмбәрликләр сөјләјән вә нијјәти олан Аллаһдыр. Бәс О Өзүнүн ҝәләҹәји ҝөрмәк габилијјәтиндән неҹә истифадә едир? Һәр шејдән әввәл, Мүгәддәс Китаб бизи әмин едир ки, Аллаһын ишләри доғру вә салеһдир, онлар мәһәббәтдән ирәли ҝәлир. Ерамызын биринҹи әсриндә һәвари Павел јәһудиләрдән олан мәсиһчиләри мәктубунда әмин едирди ки, «Аллаһын јалан данышмасы гејри-мүмкүн олан ики дәјишмәз шеј» вардыр, бу Онун анды вә вә’дидир (Ибраниләрә 6:17, 18). Шаҝирд Титуса јаздығы мәктубунда да Павел бу фикри ифадә етмишди. О јазырды: ‘Аллаһ јалан данышмыр’ (Титуса 1:2).
14 Јеһова һәдсиз ихтијара малик олса да, һеч вахт әдаләтсиз давранмыр. Муса Јеһованы «садиг, һеч заман һагсызлыг етмәјән, адил вә доғру олан» Аллаһ кими тәсвир етмишди (Ганунун тәкрары 32:4). Јеһованын бүтүн етдикләри Онун ҝөзәл шәхсијјәтинә ујғундур. Аллаһын һәрәкәтләри, шәхсијјәтинин әсас кејфијјәтләри олан мәһәббәт, мүдриклик, әдаләт вә ҝүҹү илә мүкәммәл бир шәкилдә таразлашыр.
15, 16. Еден бағында Јеһова Адәмин гаршысына һансы сечими гојду?
15 Аллаһын Өз әсас кејфијјәтләрини Еден бағында баш вермиш һадисәләрдә неҹә тәзаһүр етдирдији барәсиндә дүшүнүн. Мәһәббәтли ата кими Јеһова инсанлары лазым олан һәр шејлә тә’мин етмишди. О, Адәмә дүшүнмәк, мүһакимә јүрүтмәк вә нәтиҹә чыхармаг габилијјәти вермишди. Әсас е’тибарилә инстинктлә һәрәкәт едән һејванлардан фәргли олараг, Адәмин сечим етмәк габилијјәти варды. Ону јаратдыгдан сонра Аллаһ ҝөјдәки тахтындан бахыб «ҝөрдү ки, јаратдығы һәр шеј чох јахшыдыр» (Јарадылыш 1:26-31; 2 Петер 2:12).
16 Јеһова Адәмә «хејирлә шәри билмә ағаҹынын мејвәсиндән» јемәмәк әмрини верәндә, Адәмин дүзҝүн гәрар гәбул етмәси үчүн она ајдын ҝөстәриш дә верди. О, Адәмә бир ағаҹ истисна олмагла «бағдакы бүтүн ағаҹларын бәһрәсиндән» јемәјә иҹазә верди вә гадаған етдији ағаҹын мејвәсиндән јемәјин ҝәтирәҹәји фәлакәтдән ону хәбәрдар етди (Јарадылыш 2:16, 17). Аллаһ, Адәми һәрәкәтләринин нәтиҹәләриндән аҝаһ етди. Бәс Адәм нә етди?
17. Биз нә үчүн дејә биләрик ки, Јеһова ҝәләҹәји ҝөрмә габилијјәтиндән сечиҹи сурәтдә истифадә едир?
17 Бахмајараг ки, Јеһованын ҝәләҹәји ҝөрмәк габилијјәти вардыр, ҝөрүнүр, О, Адәм вә Һәвванын нә едәҹәјини габагҹадан ҝөрмәмәји гәрара алды. Буна ҝөрә дә, суал Јеһованын ҝәләҹәји ҝөрә билмәјиндә дејил, буну етмәк гәрарына ҝәлиб-ҝәлмәмәсиндәдир. Бундан башга, биз әмин ола биләрик ки, мәһәббәтли Аллаһ Јеһова, һәмин үсјаны вә онун кәдәрли нәтиҹәләрини әввәлҹәдән гәсдән вә гәддарлыгла мүәјјән етмәмишди (Матта 7:11; 1 Јәһја 4:8). Беләликлә, Јеһова ҝәләҹәји ҝөрмә габилијјәтиндән сечиҹи сурәтдә, јә’ни Өз гәрарына әсасән истифадә едир.
18. Јеһованын ҝәләҹәји ҝөрмә габилијјәтиндән сечиҹи сурәтдә истифадә етмәси нә үчүн Онун мүкәммәл олмадығына ишарә етмир?
18 Јеһованын ҝәләҹәји ҝөрмә габилијјәтиндән сечиҹи сурәтдә истифадә етмәси Онун мүкәммәл олмадығынымы билдирир? Гәтијјән, јох! Муса Аллаһын ‘Гаја’, ‘ишләринин камил’ олдуғуну сөјләмишди. О, инсанларын ҝүнаһларынын нәтиҹәләри үчүн мәс’улијјәт дашымыр. Бу ҝүн биз илк инсанларын итаәтсизлијинә ҝөрә ҝүнаһын фәлакәтли нәтиҹәләрини үзәримиздә һисс едирик. Һәвари Павел буну белә изаһ етди: «Ҝүнаһ тәк бир адам васитәсилә вә өлүм ҝүнаһ васитәсилә дүнјаја ҝирди, еләҹә дә өлүм бүтүн инсанлара кечди; чүнки һамы ҝүнаһ ишләтмишдир» (Ганунун тәкрары 32:4, 5; Ромалылара 5:12; Јеремја 10:23).
19. Нөвбәти мәгаләдә һансы суаллары арашдыраҹағыг?
19 Өјрәндикләримиздән белә нәтиҹәјә ҝәлдик ки, Јеһова әдаләтсиз давранмыр (Мәзмур 33:5). Әксинә, Јеһованын габилијјәтләри, кејфијјәтләри вә нормалары Онун нијјәтилә узлашыр (Ромалылара 8:28). Пејғәмбәрликләр Аллаһы Јеһова «ахыры әввәлдән, баш вермәмиш һадисәләри әзәлдән» сөјләјир (Јешаја 46:9, 10). Биз, һәмчинин ҝөрдүк ки, О, ҝәләҹәји ҝөрмәк габилијјәтиндән сечиҹи сурәтдә истифадә едир. Бәс бу бизә неҹә тә’сир едә биләр? Биз неҹә әмин ола биләрик ки, гәрарларымыз Аллаһын мәһәббәтли нијјәтинә мүвафигдир? Белә давранмағымыз бизә һансы хејир-дуалары ҝәтирәҹәк? Нөвбәти мәгаләдә бу суаллары арашдыраҹағыг.
[Һашијә]
a Јеһованын Шаһидләри тәрәфиндән дәрҹ едилмиш «Һамы үчүн олан китаб» брошүрасынын 28-ҹи сәһифәсинә бахын.
Изаһ едә биләрсинизми?
• Гәдимдә баш верән һансы һадисәләр сүбут едир ки, Аллаһын ‘кәлмәси’ һәмишә ‘һәјата кечир’?
• Јеһова ‘әзәли мәгсәди’ илә әлагәдар нәји габагҹадан мүәјјән етмишдир?
• Јеһова ҝәләҹәји билмә габилијјәтиндән неҹә истифадә едир?
[23-ҹү сәһифәдәки шәкил]
Аллаһ Исанын өлүб, сонрадан дириләҹәјини габагҹадан сөјләмишди.
[24-ҹү сәһифәдәки шәкил]
Јеһова Адәм илә Һәвванын неҹә давранаҹағыны габагҹаданмы мүәјјән етмишди?