Јеһованын Кәламы ҹанлыдыр
«Јешаја» китабындан диггәтәлајиг фикирләр — II һиссә
ПЕЈҒӘМБӘР тә’јин олунан Јешаја хидмәтинә сәдагәтлә давам едир. Онгәбиләли Исраил падшаһлығына гаршы сөјләдији һөкмләр артыг јеринә јетиб. Инди исә о, Јерусәлимин ҝәләҹәји һаггында бәјан едир.
Јерусәлим јерлә јексан олунаҹаг вә әһали әсир апарылаҹаг. Анҹаг виранәлик даими олмајаҹаг. Бир гәдәр вахт сонра һәгиги ибадәт бәрпа олунаҹаг. Јешаја 36:1–66:24 ајәләриндә јазылан әсас хәбәр бундан ибарәтдирa. Бу фәсилләрдә јазылан пејғәмбәрликләр бизим үчүн дә фајдалыдыр, чүнки онларын чоху әсас е’тибарилә бизим ҝүнләрдә јеринә јетир вә ја јахын ҝәләҹәкдә јеринә јетәҹәк. Һәмчинин, «Јешаја» китабынын бу һиссәсиндә Мәсиһә аид мөһтәшәм пејғәмбәрликләр дә вардыр.
«БИР ҜҮН ҜӘЛӘҸӘК КИ...»
Хизгија падшаһын 14-ҹү илиндә (б. е. ә. 732-ҹи ил) ассуријалылар Јәһудејаја сохулурлар. Јеһова Јерусәлими мүдафиә едәҹәјинә сөз верир. Јеһованын мәләји тәкбашына 185 000 ассуријалы әсҝәри мәһв едәндә ишғал олунмаг тәһлүкәси совушур.
Хизгија хәстәлијә дүчар олур. Јеһова падшаһын дуасына ҹаваб олараг ону сағалдыр вә өмрүнү 15 ил артырыр. Бабил падшаһы ону сағалмасы мүнасибәтилә тәбрик етмәк үчүн елчиләри ҝөндәрәндә, Хизгија ағылсызлыг едиб бүтүн хәзинәсини онлара ҝөстәрир. Јешаја Јеһованын хәбәрини Хизгијаја чатдырараг дејир: «Бир ҝүн ҝәләҹәк ки, сәнин сарајында олан һәр шеј вә аталарынын бу ҝүнә гәдәр јығдыглары шејләр Бабилә апарылаҹаг» (Јешаја 39:5, 6). 100 илдән бир гәдәр кечәндән сонра бу пејғәмбәрлик јеринә јетир.
Мүгәддәс Китаб суалларына ҹаваблар:
38:8 — Көлҝә нәјин үстүндән ҝери чәкилирди? Б. е. ә. сәккизинҹи әсрдә ҝүнәш саатларындан Мисир вә Бабилистанда артыг ҝениш истифадә олунурду. Ола билсин, Хизгијанын атасы Ахаз да белә бир саат әлдә етмишди. Бәлкә дә, бу ајәдә һәмин саатдан сөһбәт ҝедир. Һәм дә «ҝүнәш сааты» кими тәрҹүмә олунан ибрани сөзү һәрфи мә’нада «пиллә» демәк олдуғу үчүн, бурада сарајын ичиндәки пилләкән дә нәзәрдә тутула биләр. Пилләкәнин јанындакы сүтунун пилләләрин үстүнә тәдриҹән дүшән көлҝәси вахты өлчмәјә көмәк едирди.
Бизим үчүн ибрәт дәрсләри:
36:2, 3, 22. Шевна сарај рәиси вәзифәсиндән кәнар едилсә дә она падшаһын гуллуғунда јени сарај рәисинин мирзәси кими хидмәт етмәјә иҹазә верилди (Јешаја 22:15, 19). Әҝәр Јеһованын тәшкилатында бизә һәвалә олунан мәс’улијјәтдән мүәјјән сәбәбә ҝөрә узаглашдырылмышыгса, мәҝәр Аллаһын иҹазә вердији иши ҝөрәрәк хидмәти давам етдирмәли дејиликми?
37:1, 14, 15; 38:1, 2. Чәтинлијә дүшән заман дуада Јеһоваја мүраҹиәт етмәли вә бүтүнлүклә Она е’тибар етмәлијик.
37:15-20; 38:2, 3. Јерусәлим ассуријалылар тәрәфдән ишғал олунмаг тәһлүкәси алтында икән Хизгијаны даһа чох о нараһат едирди ки, Јерусәлимин истиласы Јеһованын адына ләкә ҝәтирәҹәк. Өлүмҹүл хәстә олдуғуну өјрәнәндә Хизгија өзүнү дүшүнмәди. Ону нараһат едән әсас мәсәлә Давуд сүлаләсини давам етдирәҹәк варисин олмамасы иди. Һәмчинин, ассуријалылара гаршы саваша кимин башчылыг едәҹәји суалы да ону раһат бурахмырды. Хизгија кими биз дә Јеһованын адынын иззәтләнмәсини вә нијјәтинин јеринә јетмәсини һәјатымызын хиласындан даһа ваҹиб һесаб едирик.
38:9-20. Хизгијанын һәмд нәғмәсиндән өјрәнирик ки, һәјатда Јеһованы иззәтләндирә билмәкдән ваҹиб бир шеј јохдур.
«ЈЕНИДӘН ГУРУЛАҸАГ»
Јерусәлимин дағыдылаҹағыны вә халгын Бабилә сүрҝүн едиләҹәјини сөјләјәндән дәрһал сонра, Јешаја бәрпа һаггында пејғәмбәрлик едир (Јешаја 40:1, 2). «Јерусәлим... “јенидән гурулаҹаг”» (Јешаја 44:28). Бабил илаһиләринин бүтләри «ағыр јүк» кими апарылаҹаг (Јешаја 46:1). Бабил сүгута уғрајаҹаг. Бүтүн бунлар ики әср сонра һәгигәтә чеврилир.
Јеһова Өз хидмәтчисини ‘милләтләрә нур едәҹәк’ (Јешаја 49:6). Бабилин ‘ҝөјләри’ вә ја һакимијјәт саһибләри «дағылаҹаг түстү кими» јох олаҹаг, тәбәәләри «гырылаҹаг», анҹаг әсир апарылан Сион гызы ‘зәнҹири бојнундан гыраҹаг’ (Јешаја 51:6; 52:2). Јанына ҝәлиб Она гулаг асанлара Јеһова дејир: «Мән сизинлә әбәди әһд, Давуда вә’д етдијим садиг мәһәббәт әһди кәсәҹәјәм» (Јешаја 55:3). Әҝәр һәјатымызы Аллаһын әдаләтли тәләбләринә ујғун гурсаг, ‘Рәблә үнсијјәтдән зөвг алаҹағыг’ (Јешаја 58:14). Диҝәр тәрәфдән исә инсанларын бурахдығы сәһвләр Аллаһла онларын арасында ‘ајрылыг салыр’ (Јешаја 59:2).
Мүгәддәс Китаб суалларына ҹаваблар:
40:27, 28 — Нә үчүн исраиллиләр дејирдиләр: «Рәбб башыма ҝәләнләри билмир, Аллаһым мәним һаггыма диггәтсизлик едир»? Бабилдә олан бә’зи јәһудиләр зәнн едирдиләр ки, онларын чәкдији изтираблары Јеһова ҝөрмүр вә ја онлардан хәбәрсиздир. Онларын јадына салынды ки, һеч вахт јорулуб тагәтдән дүшмәјән дүнјанын Јараданы Јеһова үчүн Бабил әлчатмаз дејил.
43:18-21 — Нәјә ҝөрә сүрҝүндән гајыданлара дејилмишди ки, көһнә һадисәләри јада салмасынлар? Бу о демәк дејилди ки, онлар Јеһованын кечмишдә халгыны хилас етдијини унутмалы идиләр. Әксинә, Јеһова истәјирди ки, онлар өзләринин ҝөрәҹәкләри ‘тәзә бир шејә’ ҝөрә, мәсәлән, Јерусәлимә сәһрадан кечән бирбаша јолла саламат чатдыгларына ҝөрә Она һәмд етсинләр. «Бөјүк мәшәггәтдән» чыхан ‘бөјүк издиһамын’ да Јеһованы иззәтләндирмәк үчүн јени вә шәхси сәбәбләри олаҹаг (Вәһј 7:9, 14).
49:6 — Әҝәр Мәсиһ јер үзүндә оларкән анҹаг Исраил оғулларына хидмәт етмишдисә, о неҹә «милләтләрә нур» ола биләр? Бу, Исанын өлүмүндән сонра баш верди. Јешаја 49:6 ајәсиндәки сөзләр онун шаҝирдләринә аид едилир (Һәвариләрин ишләри 13:46, 47). Бизим ҝүнләрдә бөјүк издиһамын көмәји илә мәсһ олунмуш мәсиһчиләр «милләтләрә нур» олараг «дүнјанын ән узаг јерләринә» гәдәр халглара билик верирләр (Матта 24:14; 28:19, 20).
53:10, (КМ) — Оғлунун өлүмү һансы мә’нада Јеһоваја «хош ҝөрүндү»? Шәфгәтли вә рәһмли Аллаһа севимли Оғлунун изтирабларыны ҝөрмәк чох ағыр иди. Буна бахмајараг, Исанын үрәкдән итаәт ҝөстәрмәси, о ҹүмләдән, изтираб вә өлүмү сајәсиндә әлдә едилән һәр шеј Она хош иди (Сүлејманын мәсәлләри 27:11; Јешаја 63:9).
53:11 — Мәсиһ һансы билијин васитәсилә «чохларына бәраәт газандыраҹаг»? Бу, Исанын јер үзүнә ҝәлиб инсан кими јашајаркән, өлүмәдәк һагсыз изтираблар чәкәркән әлдә етдији биликдир (Ибраниләрә 4:15). Беләликлә о, мәсһ олунмуш мәсиһчиләри вә бөјүк издиһамы Аллаһын өнүндә бәраәт газанмалары үчүн зәрури олан фидијә гурбанлығы илә тә’мин етди (Ромалылара 5:19; Јагуб 2:23, 25).
56:6 — ‘Јаделлиләр’ кимләрдир вә онлар неҹә Јеһованын ‘әһдинә итаәт едирләр’? ‘Јаделлиләр’ Исанын ‘башга гојунларыдыр’ (Јәһја 10:16). Онлар әһдин ганунларына табе олмагла, онунла бағлы тәдбирләрдә иштирак етмәклә, мәсһ олунанларла ејни руһани гиданы гәбул етмәклә, о ҹүмләдән, тәблиғ вә шаҝирд һазырламаг ишиндә онлара көмәк етмәклә јени әһдә итаәт едирләр.
Бизим үчүн ибрәт дәрсләри:
40:10-14, 26, 28. Јеһова ҝүҹлү ејни заманда мүлајим, һәр шејә гадир вә сонсуз һикмәтә саһибдир. Онун дәрракәси анлаја биләҹәјимиздән гат-гат үстүндүр.
40:17, 23; 41:29; 44:9; 59:4. Сијаси иттифаг вә бүтләр «пучдур». Онлара ҝүвәнмәјин һеч бир мә’насы јохдур.
42:18, 19; 43:8. Аллаһын Кәламына мәһәл гојмамаг, «садиг вә ағыллы гул» васитәсилә верилән мәсләһәтләрә гулаг асмамаг руһани ҹәһәтдән кар вә кор олмаг демәкдир (Матта 24:45).
43:25. Јеһова асилијимизи Өз хатиринә силир. Јеһованын адынын иззәтләндирилмәси ҝүнаһ вә өлүм көләлијиндән гуртулараг әбәди һәјата наил олмағымыздан даһа үстүндүр.
44:8. Гаја кими мөһкәм вә сарсылмаз Јеһова бизә дајагдыр. Биз һеч заман Аллаһ һаггында шаһидлик етмәјә горхмамалыјыг! (2 Шамуел 22:31, 32).
44:18-20. Бүтпәрәстлик етмәк үрәјин чүрүк олмасындан хәбәр верир. Үрәјимиздә Јеһоваја мәхсус олан јери һеч нә тутмамалыдыр.
46:10, 11. Нијјәтләрини јеринә јетирә билмәси Јеһованын Һәгиги Аллаһ олдуғуна данылмаз сүбутдур.
48:17, 18; 57:19-21. Әҝәр хиласы Јеһовадан ҝөзләсәк, Она јахынлашсаг вә әмрләринә диггәтлә јанашсаг, онда әмин-аманлығымыз ахар чајын сулары кими бол, салеһ әмәлләримиз дәниз далғалары тәк чох олаҹаг. Аллаһын Кәламына әһәмијјәт вермәјәнләр исә «санки далғаланан дәниздир». Онларда әмин-аманлыг јохдур.
52:5, 6. Бабиллиләр јанлыш олараг белә нәтиҹәјә ҝәлдиләр ки, һәгиги Аллаһ зәифдир. Онлар баша дүшмүрдүләр ки, Исраилин көләлијә дүшмәсинин сәбәби Јеһованын ондан наразы олмасы иди. Башгаларынын башына фәлакәт ҝәләндә онун сәбәби барәдә тәләм-тәләсик нәтиҹә чыхармамалыјыг.
52:7-9; 55:12, 13. Падшаһлығын тәблиғи вә шаҝирд һазырламаг ишиндә севинҹлә иштирак етмәк үчүн ән азы үч сәбәбимиз вар. Бизим ајагларымыз руһән аҹ, тәвазөкар инсанлар үчүн ҝөзәлдир. Биз Јеһованы ‘өз ҝөзләримизлә ҝөрүрүк’, јә’ни онунла јахын мүнасибәтләримиз вар. Һәмчинин, биз руһани фираванлыгда јашајырыг.
52:11, 12. «Рәббин әшјаларыны» дашымаға, јә’ни мүгәддәс хидмәти иҹра етмәјә лајиг олмаг үчүн руһани вә әхлаги ҹәһәтдән тәмиз олмалыјыг.
58:1-14. Өзүнү јаландан мө’мин вә салеһ ҝөстәрмәјин һеч бир мә’насы јохдур. Һәгиги хидмәтчиләр Аллаһа садиглији вә гардаш мәһәббәтини тәмиз үрәклә етдикләри ишләрдә ҝөстәрмәлидирләр (Јәһја 13:35; 2 Петер 3:11).
59:15б-19. Јеһова инсанларын ишләрини ҝөрүр вә вахты ҝәләндә онлара мүдахилә едир.
О, «РӘББИН ӘЛИНДӘ ШӘРӘФ ТАҸЫ» ОЛАҸАГ
Һәгиги ибадәтин кечмишдә вә бизим ҝүнләримиздә бәрпасы һаггында Јешаја 60:1 ајәсиндә дејилир: «Галх, ишыглан, чүнки нурун ҝәлди, Рәббин иззәти үзәринә ҝәлди!» Сион «Рәббин әлиндә шәрәф таҹы» олаҹаг (Јешаја 62:3).
Бабилдә сүрҝүндә оларкән төвбә едәҹәк һәмвәтәнләри үчүн Јешаја дуа едир (Јешаја 63:15–64:12). Һәгиги хидмәтчиләри јаланчы хидмәтчиләрә гаршы гојандан сонра, пејғәмбәр Јеһованын Өз хидмәтчиләринә верәҹәји хејир-дуалардан данышыр (Јешаја 65:1–66:24).
Мүгәддәс Китаб суалларына ҹаваблар:
61:8, 9 — «Әбәди әһд» нәдир вә «нәсилләриндән төрәјәнләр» кимләрдир? Бу, Јеһованын мәсһ олунмушларла бағладығы јени әһддир. «Нәсилләриндән төрәјәнләр» исә онларын хәбәринә һај верән милјонларла ‘башга гојунлардыр’ (Јәһја 10:16).
63:5 — Аллаһын гејзи Она һансы мә’нада дајагдыр? Аллаһ Өз ‘гејзини’, јә’ни әдаләтли һиддәтини идарә едир. Аллаһын гејзи Она дајаг олараг салеһ һөкмләрини иҹра етмәјә Ону тәшвиг едир.
Бизим үчүн ибрәт дәрсләри:
64:6. Гејри-камил инсанлар өзләрини хилас едә билмәзләр. Ҝүнаһларынын бағышланмасына ҝәлдикдә исә онларын салеһ ишләри мурдар әскидән башга бир шеј дејилдир (Ромалылара 3:23, 24).
65:13, 14. Јеһова садиг хидмәтчиләринин руһани еһтијаҹларыны һәртәрәфли тә’мин етмәклә онлара хејир-дуа верир.
66:3-5. Јеһова икиүзлүлүјә нифрәт едир.
«Севинин»
Бабилдә сүрҝүндә олан садиг јәһудиләр үчүн һәгиги ибадәтин бәрпасы һаггында пејғәмбәрликләр неҹә дә тәсәлливериҹи олмалы иди! Јеһова дејирди: «Јаратдығыма әбәдилик севинин, шадланын. Чүнки севинҹ үчүн јени Јерусәлими, сакинләрини хошбәхтлик үчүн јарадаҹағам» (Јешаја 65:18).
Биз дә јер үзүнү гаранлығын, халглары исә гаты зүлмәтин бүрүдүјү бир вахтда јашајырыг (Јешаја 60:2). «Чәтин анлар» ҝәлиб чатмышдыр (2 Тимотејә 3:1). Буна ҝөрә дә, Јеһованын «Јешаја» китабы васитәсилә вердији гуртулуш хәбәри бизи дә чох руһландырыр (Ибраниләрә 4:12).
[Һашијә]
a Јешаја 1:1–35:10 ајәләри «Ҝөзәтчи Гүлләси»нин 2006-ҹы ил 1 декабр сајындакы «Јеһованын кәламы ҹанлыдыр. “Јешаја” китабындан диггәтәлајиг фикирләр — I һиссә» адлы мәгаләдә арашдырылыр.
[4-ҹү сәһифәдәки шәкил]
Хизгијанын ассуријалыларын әлиндән хилас олмаг үчүн дуа етмәсинин әсас сәбәбини билирсәнми?
[7-ҹи сәһифәдәки шәкил]
«Сүлһ хәбәри ҝәтирән, дағлары ашыб-ҝәлән мүждәчинин ајаглары неҹә дә ҝөзәлдир!»