‘Һәјаты сечин ки, јашаја биләсиниз’

‘Гаршынызда һәјатла өлүмү, бәрәкәтлә лә’нәти гојдум. Һәјаты сечин ки, сиз вә өвладларыныз јашаја биләсиниз’ (ГАНУНУН ТӘКРАРЫ 30:19).

1, 2. Инсан һансы мә’нада Аллаһын сурәтиндә јарадылыб?

‘ӨЗ СУРӘТИМИЗӘ вә бәнзәримизә ҝөрә инсан јарадаг’. Аллаһын бу сөзләри Мүгәддәс Китабын илк фәслиндә јазылыб. Јарадылыш 1:26, 27 ајәләринә әсасән «Аллаһ инсаны Өз сурәтиндә јаратды, Аллаһын сурәтиндә јаратды». Беләликлә, илк инсан јердәки бүтүн варлыглардан фәргли шәкилдә јарадылды. О, Јараданына бәнзәјирди. Онун дүшүнмәк, һәмчинин мәһәббәт, әдаләт, мүдриклик вә ҝүҹ кими кејфијјәтләри тәзаһүр етдирмәк габилијјәти вар иди. О, виҹдан адлы ән’ама малик иди. Виҹдан инсана фајда ҝәтирир, сәмави Атасыны севиндирән гәрарлар чыхармагда она көмәк едирди (Ромалылара 2:15). Гысаҹа десәк, Адәмин ирадә азадлығы вар иди. Јаратдығы оғлуну мүшаһидә едәрәк Јеһова Өз әл ишинә белә гијмәт верди: ‘Чох јахшы’ (Јарадылыш 1:31; Мәзмур 95:6).

² Адәмин нәсли олдуғумуз үчүн биз дә Аллаһын сурәтиндә вә бәнзәриндәјик. Бәс нә едиб-етмәјәҹәјимизи өзүмүз сечә биләрикми? Јеһованын баш верәҹәкләри габагҹадан билмә габилијјәтинә бахмајараг, О, һәр биримизин һәрәкәтләрини вә талејини мүәјјән етмир. О истәмир ки, јерүзү өвладларынын һәјатыны алын јазысы идарә етсин. Азад ирадә, дүзҝүн гәрарлар верә билмәјимиз үчүн бизә бәхш олунуб. Буну анламаг үчүн ҝәлин Исраил халгынын тарихиндән бир һадисәјә диггәт јетирәк (Ромалылара 15:4).

Исраилдә сечим азадлығы

3. Он әмрдән биринҹиси һансыдыр вә садиг исраиллиләр она табе олмағы неҹә сечдиләр?

³ Јеһова исраиллиләрә демишди: «Сәни Мисир торпағындан, көләлик дијарындан чыхаран Аллаһын Рәбб Мәнәм» (Ганунун тәкрары 5:6). Ерамыздан әввәл 1513-ҹү илдә Исраил халгы Мисир әсарәтиндән мө’ҹүзәли бир шәкилдә азад олунду. Буна ҝөрә дә онларда Аллаһын сөзләринин һәгигилијинә шүбһә етмәјә сәбәб јох иди. Тәмсилчиси Муса васитәсилә вердији Он әмрдән биринҹисиндә Јеһова е’лан етмишди: «Мәндән башга аллаһларын олмасын» (Чыхыш 20:1, 3). О вахт Исраил халгы Аллаһа табе олмағы сечди. Онлар көнүллү сурәтдә Јеһоваја һәср олундулар (Чыхыш 20:5; Сајлар 25:11).

4. а) Муса исраиллиләрин гаршысына һансы сечими гојмушду? б) Бизим бу ҝүн һансы сечими етмәк имканымыз вардыр?

⁴ Тәхминән 40 ил сонра, Муса исраиллиләрин јени нәслинә, гаршыларында дуран сечими ҹиддиликлә хатырлатды: «Гаршынызда һәјатла өлүмү, бәрәкәтлә лә’нәти гојдуғум үчүн бу ҝүн ҝөјү вә јери сизә шаһид тутурам. Һәјаты сечин ки, сиз вә өвладларыныз јашаја биләсиниз» (Ганунун тәкрары 30:19). Бизим дә бу ҝүн сечим етмәк имканымыз вар. Биз ја Јеһоваја сәдагәтлә хидмәт едиб әбәди һәјата наил олмағы, ја да Она итаәтсизлик ҝөстәрмәклә, аҹы нәтиҹәләр газанмағы сечә биләрик. Ҝәлин, мүхтәлиф сечимләр етмиш ики шәхсин нүмунәсини нәзәрдән кечирәк.

5, 6. Јешуа һансы сечими етди вә бу нә илә нәтиҹәләнди?

⁵ Б. е. ә. 1473-ҹү илдә Јешуа исраиллиләри Вә’д едилмиш дијара ҝәтириб чыхарды. Өлүмүндән габаг сөјләдији тә’сирли нитгиндә Јешуа бүтүн халга мүраҹиәт етди: «Әҝәр Рәббә гуллуг етмәк ҝөзүнүздә писдирсә, бу ҝүн кимә гуллуг едәҹәјинизи өзүнүз сечин. Аталарынызын гуллуг етдикләри Фәрат чајынын о тајындакы аллаһларамы, јохса торпагларында јашадығыныз Еморлуларын аллаһларынамы гуллуг едәҹәксиниз?» Сонра аиләсини нәзәрдә тутараг деди: «Мән вә мәним евимдәкиләр Рәббә гуллуг едәҹәк» (Јешуа 24:15).

⁶ Бундан габаг, Јеһова Јешуаја ҹәсарәтли вә мөһкәм олмағы, Ганунундан чыхмамағы нәсиһәт етмишди. Ганун китабыны ҝеҹә-ҝүндүз алчаг сәслә охумагла, Јешуа һәјатда уғур газана биләрди (Јешуа 1:7, 8). Бәли, о һәгигәтән дә уғурлу һәјат сүрдү. Јешуанын сечими чохлу хејир-дуа ҝәтирди. О дејирди: «Рәббин Исраил нәслинә сөјләдији бүтүн јахшы сөзләрдән һеч бири боша чыхмады, һамысы јеринә јетди» (Јешуа 21:45).

7. Јешајанын ҝүнләриндә бә’зи исраиллиләр һансы сечими етдиләр вә бунун нәтиҹәси нә олду?

⁷ Инди исә бундан тәхминән 700 ил сонра Исраилдә мөвҹуд олан вәзијјәтә диггәт јетирәк. О вахт бир чох исраиллиләр бүтпәрәст ајинләрә риајәт едирди. Мәсәлән, илин ахырынҹы ҝүнү халг дадлы јемәкләр вә ширин шәраб олан сүфрә архасына топлашырды. Бу ади гонаглыг мәҹлиси дејил, јаланчы танрыларын шәрәфинә тәшкил олунмуш дини мәрасим иди. Пејғәмбәр Јешаја Аллаһын бу ҹүр хаинлијә неҹә мүнасибәт бәсләдијини јазырды: ‘Сиз Рәбби тәрк етдиниз, мүгәддәс дағымы унутдунуз, Тале аллаһына сүфрә ачдыныз, Гисмәт аллаһына ҹамларда шәраб тәгдим етдиниз’. Онлар инанырдылар ки, иллик мәһсул Јеһованын хејир-дуасындан дејил, Тале вә Гисмәт аллаһларыны мәмнун етмәләриндән асылыдыр. Сәрбәст сечим едиб үсјанкар руһ нүмајиш етдирмәклә онлар өз талеләрини һәлл етдиләр. Јеһова е’лан етди: «Мән дә сизи гылынҹа гисмәт едәҹәјәм, һамыныз гырылмаг үчүн диз чөкәҹәксиниз. Чүнки Мән чағыранда сиздән ҹаваб алмадым, данышанда гулаг асмадыныз. Ҝөзүмдә пис оланы етдиниз, Мәнә мәгбул олмајаны сечдиниз» (Јешаја 65:11, 12). Ағылсыз сечимләри онларын мәһвинә сәбәб олду. Нә Тале, нә дә Гисмәт танрысы буна мане ола билмәди.

Дүзҝүн сечими неҹә етмәк олар?

8. Ганунун тәкрары 30:20 ајәсинә әсасән, дүзҝүн сечим етмәк үчүн һансы шәртләри јеринә јетирмәк лазымдыр?

⁸ Муса Исраил халгыны һәјаты сечмәјә чағыранда, онларын јеринә јетирмәли олдуглары үч шәрти садалады: ‘Аллаһыныз Рәбби севин, Онун сөзүнү динләјин вә Она бағланын’ (Ганунун тәкрары 30:20, КМ). Ҝәлин дүзҝүн сечим етмәк үчүн бу шәртләрин һәр бирини нәзәрдән кечирәк.

9. Јеһоваја олан мәһәббәтимизи неҹә нүмајиш етдирә биләрик?

⁹ Аллаһымыз Јеһованы севмәк. Биз Јеһованы севдијимиз үчүн Она хидмәт етмәји сечмишик. Исраил халгынын ҝүнләриндәки хәбәрдаредиҹи нүмунәләрә диггәт јетирәрәк, биз әхлагсызлыг етмәјә мејл ојадан һәр бир шејә мүгавимәт ҝөстәрир, бизи вар-дөвләт һәрислији тәләсинә сала билән һәјат тәрзиндән гачынырыг (1 Коринфлиләрә 10:11; 1 Тимотејә 6:6-10). Биз Јеһоваја садиг галыр вә Онун гајда-ганунуна риајәт едирик (Јешуа 23:8; Мәзмур 119:5, 8). Исраиллиләр Вә’д едилмиш дијара ҝирмәздән әввәл Муса онлара демишди: «Бахын Аллаһым Рәббин мәнә әмр етдији гајда вә һөкмләри сизә өјрәтмишәм ки, мүлк олараг алмаг үчүн дахил олаҹағыныз торпагда бунлара әмәл едәсиниз. Онлара диггәтлә риајәт един. Бу, диҝәр халглара нә гәдәр мүдрик вә агил олдуғунузу ҝөстәрәр» (Ганунун тәкрары 4:5, 6). Инди, Јеһованын ирадәсини һәјатымызда биринҹи јерә гојмагла Она олан мәһәббәтимизи нүмајиш етдирмәјин әсл вахтыдыр. Әҝәр белә етсәк, мүтләг хејир-дуа алаҹағыг (Матта 6:33).

10-12. Нуһун ҝүнләриндә баш верәнләрдән өзүмүзә һансы ибрәт дәрси алырыг?

¹⁰ Аллаһын сөзүнү динләмәк. Нуһ «салеһлик тәблиғчиси» иди (2 Петер 2:5). Дашгындан габаг јашајан инсанларын, демәк олар ки, һамысы позғунлашмышды вә Нуһун хәбәрдарлығына әһәмијјәт вермирдиләр. Бунун нәтиҹәси нә олду? ‘Туфан ҝәлиб һамысыны апарды’. Иса, ‘Инсан Оғлунун ҝәлиши [«иштиракы», ЈД]’ заманы охшар вәзијјәтин мөвҹуд олаҹағы һагда хәбәрдарлыг вермишди. Нуһун ҝүнләриндә баш верәнләр бу ҝүн Аллаһын хәбәринә диггәт јетирмәмәји гәрара алан инсанлар үчүн ҹидди хәбәрдарлыгдыр (Матта 24:39).

¹¹ Аллаһын мүасир хидмәтчиләри тәрәфиндән е’лан едилән хәбәрдарлыға истеһза едәнләр бунун онлара нә ҝәтирәҹәјини баша дүшмәлидирләр. Белә ришхәндчиләр һаггында һәвари Петер дејирди: «Белә дүшүнәнләр билмирләр ки, ҝөјләр гәдим заманларда Аллаһын кәламы илә јаранды, јер дә судан вә су васитәсилә тәшкил едилди. О заманкы дүнја да һәмин суларла боғулуб мәһв олду. Индики ҝөјләр вә јер исә ода верилмәк үчүн ејни кәлам илә сахланыб, аллаһсыз адамларын мәһкәмә вә һәлак ҝүнүнә гәдәр һифз олунурлар» (2 Петер 3:3-7).

¹² Нуһ вә онун аиләси исә фәргли бир сечим етдиләр. «Нуһ иман васитәсилә, һәлә заһир олмајан шејләр һаггында Аллаһ тәрәфиндән хәбәрдар едилиб... ихласкарлыгла ҝәми һазырлады». Онун бу хәбәрдарлыға диггәт јетирмәси аиләсинә хилас ҝәтирди (Ибраниләрә 11:7). Ҝәлин Аллаһын хәбәрдарлығыны ешитмәкдә ити, Она итаәткарлыгла табе олмагда гәтијјәтли олаг (Јагуб 1:19, 22-​25).

13, 14. а) Јеһоваја ‘бағланмаг’ нә үчүн һәјати ваҹибдир? б) ‘Дулусчумуз’ Јеһоваја бизи формалашдырмаға неҹә имкан верә биләрик?

¹³ Јеһоваја бағланмаг. ‘Һәјаты сечиб јашаја билмәк’ үчүн Јеһованы тәкҹә севмәк вә Она гулаг асмаг кифајәт етмир, биз һәм дә Јеһоваја ‘бағланмалы’, јә’ни Онун ирадәсини тә’кидлә јеринә јетирмәлијик. Иса демишди: «Өз ҹанларынызы сәбирлә хилас един» (Лука 21:19). Әслиндә етдијимиз сечим үрәјимиздә оланлары ашкара чыхарыр. Сүлејманын мәсәлләри 28:14 ајәсиндә гејд олунур: «Һәмишә Рәбдән горхан бәхтијардыр, үрәји инадкар бәлаја дүшәр». Гәдим Мисирин һөкмдары фир’он буна даир бир нүмунәдир. Он ҹәза нөвбә илә Мисирин үзәринә ҝөндәрилдикҹә, фир’он Аллаһдан горхмаг әвәзинә, үрәјини инадкар едирди. Фир’онун итаәтсизлик ҝөстәрмәсинә сәбәбкар Јеһова дејилди, амма О, бу гүрурлу һөкмдара сечимини етмәк имканы верди. Јеһованын фир’она аид сөзләриндән ҝөрүнүр ки, Онун ирадәси јеринә јетди: «Мән сәни она ҝөрә јүксәлтдим ки, гүдрәтими сәнин васитәнлә ҝөстәрим вә Мәним адым бүтүн јер үзүндә е’лан едилсин» (Ромалылара 9:17).

¹⁴ Исраилин фир’онун әсарәтиндән хилас олмасындан әсрләр кечдикдән сонра пејғәмбәр Јешаја демишди: «Ја Рәбб, Сәнсән Атамыз: биз ҝилик, Сән исә дулусчу, биз һамымыз Сәнин әлинин ишијик» (Јешаја 64:8). Шәхси өјрәнмә вә өјрәндикләримизи һәјатымызда тәтбиг етмәк васитәсилә, Јеһоваја бизи формалашдырмаға имкан вердикдә, тәдриҹән јени мәнлији ҝејирик. Биз даһа һәлим вә үзүјола олуруг. Аллаһы сәмими гәлбдән разы салмаға чалышдығымыз үчүн Она сәдагәтлә бағланмаг бизим үчүн даһа асан олур (Ефеслиләрә 4:23, 24; Колослулара 3:8-10).

«Бунлары... өјрәдин»

15. Ганунун тәкрары 4:9 ајәсинә әсасән, Муса Исраил халгына һансы ики тәләби хатырлатды?

¹⁵ Муса Вә’д едилмиш дијарын астанасында дуран Исраил халгына сөјләди: «Анҹаг диггәтли олун. Ҝөзүнүзлә ҝөрдүкләринизи унутмамаг вә өмүр боју јаддан чыхармамаг үчүн бөјүк сә’ј ҝөстәрин. Бунлары өвладларыныза, нәвәләринизә өјрәдин» (Ганунун тәкрары 4:9). Јеһованын хејир-дуаларыны әлдә етмәк вә мирас алаҹаглары дијарда хошбәхт јашамаг үчүн халг Јеһова Аллаһын гаршысында ики тәләби јеринә јетирмәли иди. Онлар ҝөзләри гаршысында Аллаһын етдији мө’ҹүзәләри унутмамалы вә онлары ҝәләҹәк нәсилләринә данышмалы идиләр. Аллаһын халгы кими, ‘һәјаты сечиб јашамаг истәјириксә’, биз дә ејни ҹүр һәрәкәт етмәлијик. Бәс Јеһованын бизим үчүн етдији һансы ишләрини ҝөрмүшүк?

16, 17. а) Ҝилеад мәктәбини битирмиш миссионерләр Падшаһлығын тәблиғи ишиндә һансы ишләри ҝөрә билмишләр? б) Хидмәтдә сә’ји зәифләмәјән мәсиһчиләрин нүмунәсиндән данышын.

¹⁶ Тәблиғ вә шаҝирд һазырламаг ишимизи Јеһованын хејир-дуаландырдығыны ҝөрдүјүмүзә ҝөрә чох севинирик. Ҝөзәтчи Гүлләсинин Мүгәддәс Китаб мәктәби — Ҝилеад 1943-ҹү илдә ачыландан, бир чох өлкәләрдә шаҝирд һазырламаг иши фәал сурәтдә кечирилмәјә башланды. Гоҹа јашларына вә физики зәифликләринә бахмајараг, мәктәбин еркән мә’зунлары олан миссионерләр һәлә дә Падшаһлығын тәблиғи ишиндә сә’јлә чалышмаға давам едирләр. Ҝөзәл нүмунәләрдән бири Ҝилеад мәктәбини 1944-ҹү илдә битирән Мери Олсондур. О, миссионер кими әввәлҹә Колумбијада, сонра Уругвајда, инди исә Пуерто- Рикода хидмәт едир. Гоҹа јашына бахмајараг, Олсон баҹы тәблиғ ишиндә сә’јини индијәдәк горујуб. О испан дилини билир вә јерли тәблиғчиләрлә бирликдә тәблиғ хидмәтиндә иштирак етмәјә һәр һәфтә вахт ајырыр.

¹⁷ Ҝилеад мәктәбини 1947-ҹи илдә битирән, һазырда дул олан Ненси Портер һәлә дә Баһам адаларында хидмәт едир. О да тәблиғ иши илә даима мәшғул олан миссионердир. Портер баҹы өз тәрҹүмеји-һалында дејир: «Башгаларына Мүгәддәс Китаб һәгигәтләрини өјрәтмәк мәнә хүсуси севинҹ бәхш едир. О мәнә руһани ишләрлә мәшғул олмаг үчүн јахшы тәртиб олунмуш ҹәдвәл гурмаға көмәк едир, бу һәјатыма сабитлик вә низам-интизам ҝәтирир»a. Портер баҹы вә башга садиг хидмәтчиләр өз һәјатларына ҝери баханда, Јеһованын онлар үчүн нә етдијини унутмурлар. Бәс биз неҹә? Әразимиздә Падшаһлыг ишинә вердији хејир-дуалара ҝөрә Јеһоваја миннәтдарыгмы? (Мәзмур 68:11).

18. Миссионерләрин тәрҹүмеји-һалларындан нә өјрәнә биләрик?

¹⁸ Узун илләр Јеһоваја сәдагәтлә хидмәт едән бу баҹы-гардашларын индијәдәк ҝөрдүкләри ишләр бизи чох севиндирир. Онларын һәјатлары һаггында охумаг бизи чох руһландырыр, чүнки Јеһованын бу садиг хидмәтчиләри үчүн нәләр етдијини ҝөрәндә, Аллаһа хидмәт етмәк гәтијјәтимиз мөһкәмләнир. Сән мүнтәзәм олараг «Ҝөзәтчи Гүлләси»ндә чап олунан бу тәрҹүмеји-һаллары охујуб үзәриндә дүшүнүрсәнми?

19. Мәсиһчи валидејнләр «Ҝөзәтчи Гүлләси»ндә дәрҹ олунан тәрҹүмеји-һаллардан неҹә јарарлана биләрләр?

¹⁹ Муса исраиллиләрә хатырлатды ки, Јеһованын онлар үчүн нәләр етдијини унутмамалыдырлар, бу шејләр онларын бүтүн һәјатлары боју үрәкләриндән чыхмамалыдыр. Сонра о, әлавә етди: «Бунлары өвладларыныза, нәвәләринизә өјрәдин» (Ганунун тәкрары 4:9). Тәрҹүмеји-һалларын хүсуси тә’сири вардыр. Бөјүјән ҝәнҹләрә јахшы нүмунә лазымдыр. Субај баҹылар јашҹа бөјүк садиг баҹыларын «Ҝөзәтчи Гүлләси»ндә дәрҹ олунан һәјат нүмунәләриндән өзләринә дәрс ала биләрләр. Өз өлкәләриндә әҹнәби дилли саһәдә хидмәт етмәк һәм баҹылара, һәм дә гардашлара хош хәбәри јајмаг имканыны верир. Мәсиһчи валидејнләр, ушагларынызын таммүддәтли хидмәти һәјат јолу сечмәләринә көмәк етмәк үчүн нәјә ҝөрә Ҝилеад мәктәбини битирмиш садиг миссионерләрин вә диҝәр хидмәтчиләрин һәјат нүмунәләриндән истифадә етмәјәсиниз?

20. ‘Һәјаты сечмәк’ үчүн биз нә етмәлијик?

²⁰ Бәс һәр биримиз һәјаты неҹә сечә биләрик? Ҝөзәл ән’ам олан ирадә азадлығындан истифадә едәрәк Јеһоваја Ону севдијимизи ҝөстәрмәклә вә имканымыз чатан гәдәр хидмәтдә әлимиздән ҝәләни етмәклә. Мусанын бәјан етдији кими, Јеһова ‘һәјатыныздыр, сизи узун өмүрлү едәр’ (Ганунун тәкрары 30:19, 20).

[Һашијә]

Хатырлајырсынызмы?

• Бир-бириндән фәргләнән ики сечим нүмунәсиндән сиз нә өјрәндиниз?

• ‘Һәјаты сечмәк’ үчүн һансы шәртләри јеринә јетирмәлијик?

• Һансы ики тәләби јеринә јетирмәлијик?

[26-ҹы сәһифәдәки шәкил]

‘Гаршынызда һәјатла өлүмү гојдум’.

[27-ҹи сәһифәдәки шәкил]

Аллаһын сөзүнү динләмәк Нуһу вә онун аиләсини хилас етди.

[28-ҹи сәһифәдәки шәкил]

Мери Олсон

[28-ҹи сәһифәдәки шәкил]

Ненси Портер