Шејтана гаршы дурун вә о гачаҹаг!

«Аллаһа табе олун, иблисә исә гаршы дурун вә о, сиздән гачаҹагдыр» (ЈАГУБ 4:7).

1, 2. а) «Јешаја» китабынын 14-ҹү фәслиндәки парчада Иблисин һансы хүсусијјәти әкс етдирилиб? б) Бу мәгаләдә һансы суаллары мүзакирә едәҹәјик?

ИБЛИС тәкәббүрүн тәҹәссүмүдүр. Онун гүруру Јешаја пејғәмбәрин сөзләриндә өз әксини тапыр. О, Бабилистан дүнја империјасы олмаздан 100 ил әввәл «Бабил падшаһы»нын өзү һаггында һансы фикирдә олмасыны белә тәсвир едир: «Ҝөјләрә галхаҹағам, тахтымы Аллаһын улдузлары [Давудун нәслиндән олан падшаһларын] үзәриндә јүксәкләрә јерләшдирәҹәјәм... өзүмү Һагг-Таала кими апараҹағам» (Јешаја 14:3, 4, 12-15; Сајлар 24:17). «Бабил падшаһы»нын гүруру «бу әсрин танрысы» олан Шејтанын руһуна чох бәнзәјир (2 Коринфлиләрә 4:4). Лакин Бабил падшаһлығы биабырчылыгла сүгута јетдији кими, Шејтанын тәкәббүрү дә фәлакәтлә сона чатаҹаг.

² Нә гәдәр ки Шејтан мөвҹуддур, бизи бә’зи суаллар марагландыра биләр: бәс Шејтандан горхмаг лазымдырмы? О, инсанлары нә үчүн мәсиһчиләри тә’гиб етмәјә тәһрик едир? Өзүмүзү Шејтанын кәләкләриндән неҹә горуја биләрик?

Иблисдән горхмаг лазымдырмы?

3, 4. Мәсһ едилмишләр вә јер үзүндә әбәди јашамаг үмиди олан диҝәр мәсиһчиләр Иблисдән нәјә ҝөрә горхмурлар?

³ Иса Мәсиһин Вәһј 2:10 ајәсиндәки сөзләри мәсһ едилмиш мәсиһчиләри чох үрәкләндирир: «Чәкәҹәјин әләмләрдән горхма. Будур, иблис сизләрдән бә’зиләрини зиндана атаҹаг ки, имтаһан олунасыныз. Вә сиз он ҝүн әзаб ичиндә олаҹагсыныз. Өлүм баһасына да олса садиг гал, Мән сәнә һәјат таҹыны верәҹәјәм». Мәсһ едилмишләр вә јер үзүндә әбәди јашамаг үмиди олан мәсиһчиләр Иблисдән горхмурлар. Лакин бу о демәк дејил ки, онлар тәбиәтҹә горхмаз олдугларына ҝөрә Иблисдән горхмурлар. Онларын горхмамасына сәбәб Аллаһа олан еһтирам долу горху һиссидир. Мәсиһчиләр Онун ‘ганадларынын көлҝәсинә сығынырлар’ (Мәзмур 34:9; 36:7).

⁴ Иса Мәсиһин еркән давамчылары горхмазлыгла мүхтәлиф әзаблара таб ҝәтирмиш вә өлүмәдәк садиг галмышлар. Онлар Шејтан Иблисдән горхмурдулар, чүнки Јеһованын Өз садиг хидмәтчиләрини һеч вахт тәрк етмәдијини билирдиләр. Бу ҝүн дә, мәсһ олунмуш мәсиһчиләр вә онларын әмәкдашлары амансыз тә’гибләрә бахмајараг, Аллаһа садиг галмаға гәти гәрарлыдырлар. Бунунла белә, һәвари Павел мәктубларындан бириндә јазмышды ки, Шејтан өлүм јетирә биләр. Мәҝәр бу, горхмаг үчүн кифајәт дејилми?

5. Ибраниләрә 2:14, 15 ајәләриндән биз нә өјрәнирик?

⁵ Павел јазырды ки, Иса «гана вә әтә мүштәрәк олду» ки, «өлүм үзәриндә һакимијјәтә малик оланы [«өлүм јетирә биләни», ЈД], јә’ни, иблиси өлүм васитәсилә тә’сирсиз һала ҝәтирсин вә өмүрләри боју өлүм горхусу сәбәбилә әсарәтә дүшәнләрин һамысыны азад етсин» (Ибраниләрә 2:14, 15). Шејтан, «өлүм јетирә билән» бир варлыг кими, Јәһуда Искарјоту тә’сири алтына салды, Исаны е’дам етдирмәкдән өтрү јәһуди рәһбәрләри вә ромалылардан истифадә етди (Лука 22:3; Јәһја 13:26, 27). Лакин Иса өзүнүн фидијә гурбанлығы сајәсиндә ҝүнаһлы бәшәријјәти Шејтанын әсарәтиндән гуртарыр вә она әбәди јашамаг үмидини верир (Јәһја 3:16).

6, 7. Шејтан нә дәрәҹәдә ‘өлүм јетирә биләр’?

⁶ Иблис нә дәрәҹәдә ‘өлүм јетирә биләр’? Һәлә башланғыҹдан, Шејтан јаланлары вә ујдурмалары илә инсанларын өлүмүнә сәбәб олду. Адәм Шејтанын тәһрики илә ҝүнаһ ишләтди, сонра ҝүнаһы вә онун ҝәтирдији өлүмү бәшәр аиләсинә мирас гојду (Ромалылара 5:12). Шејтанын јердәки хидмәтчиләри, Иса Мәсиһлә даврандыглары кими, Јеһованын Шаһидләрини дә бә’зән өлүмәдәк тә’гиб етмишләр.

⁷ Лакин биз һеч дә дүшүнмәмәлијик ки, Иблис истәдији һәр бир адамын өлүмүнә сәбәб ола биләр. Јеһова Она мәхсус оланлары горујур вә Шејтана һеч вахт имкан вермәз ки, хидмәтчиләрини јер үзүндән тамамилә силиб атсын (Ромалылара 14:8). Дүздүр, Јеһова халгынын тә’гибләрлә үзләшмәсинә јол верир, һәтта бә’зән елә олур ки, Иблисин һүҹумлары уҹбатындан хидмәтчиләриндән бә’зиләри һәјатларыны белә итирир. Лакин Мүгәддәс Јазылар, адлары Аллаһын ‘јаддаш китабына јазыланлар’ үчүн ҝөзәл бир үмид верир — онлар дириләҹәкләр. Иблис исә бунун гаршысыны һеч ҹүр ала билмәз! (Малаки 3:16; Јәһја 5:28, 29; Һәвариләрин ишләри 24:15).

Шејтан бизи нәјә ҝөрә тә’гиб едир?

8. Иблис нәјә ҝөрә Аллаһын хидмәтчиләрини тә’гиб едир?

⁸ Биз Аллаһын садиг хидмәтчиләри олдуғумуза ҝөрә Иблисин бизи тә’гиб етмәси тәәҹҹүблү дејил. Онун әсас мәгсәди бизи иманымыздан дөндәрмәкдир. Бизим үчүн ән дәјәрли шеј сәмави Атамызла олан мүнасибәтимиздир. Шејтан да бу мүнасибәтләри позмаг истәјир. Бу бизи тәәҹҹүбләндирмәмәлидир. Һәлә Еден бағында Јеһова габагҹадан Өз символик ‘гадыны’ илә ‘иланын’ вә онларын «зүрријјәтләри» арасында дүшмәнчилијин олаҹағыны хәбәр вермишди (Јарадылыш 3:14, 15, КМ). Мүгәддәс Јазылар Шејтаны «гәдим илан» адландырыр вә онун вахтынын аз, гәзәбинин исә бөјүк олдуғуну сөјләјир (Вәһј 12:9, 12). Ики тәрәфин «зүрријјәти» арасында дүшмәнчилик һәлә давам етдијиндән, Јеһоваја сәдагәтлә хидмәт едәнләр тә’гиб олунаҹагларыны ҝөзләјирләр (2 Тимотејә 3:12). Сән Шејтанын тә’гибләринин архасында дуран әсас сәбәби баша дүшүрсәнми?

9, 10. Иблис һансы мүбаһисәли суалы ортаја гојуб вә бу суал инсанларын давраныш тәрзи илә неҹә бағлыдыр?

⁹ Иблис Аллаһын һөкмранлығына даир мүбаһисәли суал галдырды вә бунунла әлагәдар башга бир суал да ирәли сүрдү: инсанлар өз Јараданына садиг галаҹаглармы? Шејтан салеһ Әјјубун үстүнә тә’гибләр јағдырмаға башлады. Нәјә ҝөрә? О, Әјјубун нөгсансызлыг јолундан дөнмәсини истәјирди. Иблис о вахт Әјјубун арвады илә онун үч нәфәр ‘адаминҹидән тәсәлличиләриндән’ өз мәгсәдләри үчүн истифадә едирди. «Әјјуб» китабында јазылдығы кими, Иблис Јеһоваја мејдан охујараг, белә бир фикир ирәли сүрдү: Аллаһ она инсанлары сынамаға иҹазә версә, һеч бир инсан Аллаһа садиг галмајаҹаг. Лакин Әјјуб нөгсансызлыг јолундан дөнмәди вә Шејтанын јаланчы олдуғу сүбута јетирилди (Әјјуб 1:8–2:9; 16:2; 27:5; 31:6). Мәһз бу сәбәбдән Шејтан Јеһованын Шаһидләрини тә’гиб едиб, онларын нөгсансызлыг јолундан дөнмәләрини вә өз иддиасынын доғрулуғуну сүбут етмәк истәјир.

¹⁰ Буну билмәјимиз ҹәсарәтли вә мөһкәм олмағымыза көмәк едәҹәк (Ганунун тәкрары 31:6). Бизим Аллаһымыз Каинатын Һөкмдарыдыр вә нөгсансызлығымызы горумаг үчүн Өзү бизә јардым едәҹәк. Ҝәлин садиг галмагла Јеһованын үрәјини даима севиндирәк. Бунунла Аллаһымыз Она истеһза едән Шејтан Иблисә ҹаваб верә биләҹәк (Сүлејманын мәсәлләри 27:11).

«Бизи һијләҝәрдән хилас ет»

11. «Бизи имтаһана чәкмә» сөзләри алтында нә нәзәрдә тутулур?

¹¹ Нөгсансызлығы горумаг асан иш дејил, бунун үчүн Јеһоваја үрәкдән дуа етмәк лазымдыр. Исанын өјрәтдији нүмунәви дуа бу ишдә хүсусилә бөјүк көмәк ола биләр. Дуанын бир һиссәсиндә Иса белә демишди: «Бизи имтаһана чәкмә, фәгәт бизи һијләҝәрдән хилас ет» (Матта 6:13, И–93). Јеһова бизи ҝүнаһлы ишләрлә имтаһана чәкмир (Јагуб 1:13). Дүздүр, Мүгәддәс Јазылары охујанда һәрдән елә тәәссүрат јараныр ки, бә’зи пис һадисәләрин сәбәбкары Аллаһдыр, анҹаг һәгигәтдә Јеһова онларын баш вермәсинә садәҹә јол верир (Рут 1:20, 21). Исанын өјрәтдији кими дуа етмәклә, биз Јеһовадан хаһиш едирик ки, Шејтанын бизи аздырмасына јол вермәсин. Биз Јеһованын буна јол вермәјәҹәјинә әминик, чүнки Мүгәддәс Китабда Онун һаггында јазылыб: «Аллаһ садигдир; О, ҝүҹүнүздән артыг имтаһан олунманыза разылыг вермәз, лакин имтаһан илә јанашы, гуртулушу да тә’мин едәҹәкдир ки, таб ҝәтирә биләсиниз» (1 Коринфлиләрә 10:13).

12. Нә үчүн «бизи һијләҝәрдән хилас ет» дејә дуа етмәлијик?

¹² Шаҝирдләринә өјрәтдији дуада имтаһан олунма һаггында данышдыгдан сонра Иса деди: «Бизи һијләҝәрдән хилас ет». Мүгәддәс Китабын бә’зи тәрҹүмәләриндә бу ајә фәргли тәрҹүмә едилиб, мәсәлән, 1996-ҹы илдә нәшр едилмиш «Инҹил» китабында дејилир: «Бизи шәрдән хилас ет». Мараглыдыр ки, Мүгәддәс Китабда «хилас ет» кими тәрҹүмә едилән јунан сөзү әсасән шәхсијјәтә аид едилир, бу сәбәбдән дә «Маттанын Мүждәси»ндә Иблисин нә үчүн «имтаһан едән» бир шәхсијјәт симасында чыхыш етмәси биздә тәәҹҹүб доғурмур (Матта 4:3, 11). Буна ҝөрә дә, «һијләҝәрдән», јә’ни Шејтан Иблисдән хилас олмаг үчүн Јеһоваја дуа етмәк сон дәрәҹә зәруридир. О чалышыр ки, бизи Аллаһа гаршы ҝүнаһ ишләтмәјә тәһрик етсин (1 Салониклиләрә 3:5). Сәмави Атамыза «бизи һијләҝәрдән хилас ет» дејә јалвараркән, бизә Иблисин кәләкләринә дүшмәмәк үчүн рәһбәрлик ҝөстәрмәсини вә көмәк етмәсини хаһиш едирик.

Иблисин сизә кәләк ҝәлмәсинә јол вермәјин

13, 14. Коринфлиләр нәјә ҝөрә әхлагсызлыг етмиш мәсиһчијә гаршы мүнасибәтләрини дәјишмәли идиләр?

¹³ Павел Коринф јығынҹағындакы мәсиһчиләри бир-бирләрини бағышламаға тәшвиг едирди: «Кимә бир шеј бағышласаныз, мән дә бағышлајарам; чүнки бағышладығым шеји — әҝәр бир шеј бағышладымса — сизин үчүн Мәсиһин һүзурунда бағышладым ки, Шејтан бизә үстүн ҝәлмәсин [«кәләк ҝәлмәсин», ЈД]; чүнки онун фитнәләриндән хәбәрсиз дејилик» (2 Коринфлиләрә 2:10, 11). Иблис бизә ҹүрбәҹүр јолларла кәләк ҝәлә биләр. Бәс бу сөзләри јазмаға Павели тәшвиг едән нә иди?

¹⁴ Мәсиһчиләр әхлагсыз бир инсанын јығынҹагда галмасына јол вердикләринә ҝөрә, Павел онлары мәзәммәт едирди. Јығынҹаг ‘бүтпәрәстләрдә белә раст ҝәлинмәјән’ әхлагсызлыға ҝөз јумурду. Бу вәзијјәт ҝәрәк ки, Шејтаны севиндирирди. Сонда, ҝүнаһ ишләтмиш адам јығынҹагдан кәнар едилди (1 Коринфлиләрә 5:1-5, 11-13). Бир мүддәтдән сонра о, тутдуғу әмәлиндән пешман олду. Әҝәр коринфлиләр бу адамы бағышлајыб ону јығынҹагда бәрпа етмәсәјдиләр, онда Иблис онлара башга јолла кәләк ҝәлмиш оларды. Һансы јолла? Мәсиһчиләр Шејтанын өзү кими сәрт вә мәрһәмәтсиз олардылар. Әҝәр пешманчылыг чәкән инсан бу сәбәбдән ‘һәддиндән артыг кәдәрә гәрг олуб’, Аллаһа хидмәт етмәкдән тамамилә әлини үзсәјди, онда хүсусилә ағсаггаллар, мәрһәмәтлә долу олан Јеһова Аллаһын гаршысында мәс’улијјәт дашымалы олаҹагдылар (2 Коринфлиләрә 2:7; Јагуб 2:13; 3:1). Елә бир мәсиһчи тапылмаз ки, гәддар, сәрт вә мәрһәмәтсиз олмагда Шејтана бәнзәмәк истәсин.

Аллаһын зиреһләри бизи горујур

15. Биз һансы мүһарибәдә иштирак едирик вә гәләбәмиз нәдән асылыдыр?

¹⁵ Әҝәр Аллаһын бизи Иблисдән хилас етмәсини истәјириксә, пис руһи гүввәләрә гаршы руһани мүһарибә апармалыјыг. Бу мүһарибәдә галиб чыхмағымыз ‘Аллаһын бүтүн зиреһләрини ҝејмәјимиздән’ асылыдыр (Ефеслиләрә 6:11-18). Мәсәлән, бу зиреһләрдән бири ‘дөшә тахылан салеһлик зиреһидир’ (Ефеслиләрә 6:14). Гәдим Исраилин падшаһы Шаул Аллаһын сөзүндән чыхдығы үчүн Аллаһ ону Өз мүгәддәс руһундан мәһрум етди (1 Шамуел 15:22, 23). Әҝәр биз салеһ давраныр вә Аллаһын бүтүн зиреһләринин ҝејириксә, онда Аллаһ бизә Өз мүгәддәс руһуну, һәмчинин Шејтан вә онун ҹинләриндән лазыми мүһафизәни верәҹәк (Сүлејманын мәсәлләри 18:10).

16. Шәр руһи гүввәләрдән даими мүһафизәни неҹә әлдә етмәк олар?

¹⁶ Шәр руһи гүввәләрдән даима горунмаг үчүн һәр шејдән башга, Аллаһын Кәламыны мүнтәзәм охумалы вә өјрәнмәли, ‘садиг нөкәрбашынын’ тәгдим етдији нәшрләрдән јахшыҹа фајдаланмалыјыг (Лука 12:42). Белә олдугда, Павелин мәсләһәтинә мүвафиг олараг, зеһнимизи сағлам руһани дүшүнҹәләрлә гидаландыраҹағыг: «Гардашлар, доғру, еһтирамлы, әдаләтли, пак, ҹазибәли, е’тибарлы олан нә варса, әҝәр бир фәзиләт вә тә’рифә лајиг бир шеј варса, бунлары дүшүнүн» (Филипилиләрә 4:8).

17. Хош хәбәри кејфијјәтлә бәјан етмәјә бизә нә көмәк едәҹәк?

¹⁷ Јеһова ‘ајагларымыза сүлһ Мүждәсини тәблиғ етмәк һазырлығыны ҝејдирир’ (Ефеслиләрә 6:15). Биз мәсиһчи ҝөрүшләриндә мүнтәзәм иштирак етмәклә Аллаһын Падшаһлығы һаггындакы мүждәни кејфијјәтлә тәблиғ етмәк үчүн лазыми биликләрә јијәләнирик. Инсанлара Аллаһ барәдә һәгигәтләри өјрәдәрәк, Шејтанын фитнәләриндән руһани ҹәһәтдән азад олмаларыны ҝөрәндә үрәјимиз неҹә дә севинир! (Јәһја 8:32). ‘Руһун гылынҹы’, јә’ни Аллаһын Кәламы олмадан јалан тә’лимләри вә «истеһкамлары јыхмаг» мүмкүнсүз оларды (Ефеслиләрә 6:17; 2 Коринфлиләрә 10:4, 5). Аллаһын Кәламындан мәһарәтлә истифадә етмәклә биз башгаларына һәгигәти өјрәдәҹәк вә өзүмүзү Иблисин фырылдагларындан горујаҹағыг.

18. Биз Иблисин һијләләринә неҹә гаршы дура биләрик?

¹⁸ Руһани зиреһләримиз һаггында сөһбәтини Павел белә ачды: «Рәббдә вә Онун үстүн гүдрәтиндә гүввәтләнин. Иблисин һијләләринә гаршы дура билмәк үчүн Аллаһын бүтүн зиреһләрини ҝејинин» (Ефеслиләрә 6:10, 11). «Гаршы дурмаг» кими тәрҹүмә едилмиш јунан сөзү — әсҝәрин өз мөвгејиндә дурмасы мә’насыны дашыјыр. Шејтан бирлијимизи позмаг, тә’лимләримизи тәһриф етмәк вә бизи тутдуғумуз нөгсансызлыг јолундан дөндәрмәк үчүн мүхтәлиф фырылдаглара әл атса да, биз руһани мүһарибәјә әзмлә давам етмәлијик. Иблис, нөгсансызлығыны горумаға гәтијјәтли олан адамы дәф етмәк ҝүҹүндә дејил!a

Иблисә гаршы дурун вә о сиздән гачаҹаг

19. Шејтана фәал сурәтдә гаршы дурмағын үсулларындан бири һансыдыр?

¹⁹ Иблисә вә онун һакимијјәти алтында олан пис руһи гүввәләрә гаршы апардығымыз руһани мүһарибәдә уғурлу ола биләрик. Шејтанын гаршысында горхудан тир-тир әсмәјә дә сәбәб јохдур. Нијә? Ҝөрүн шаҝирд Јагуб нә јазыр: «Аллаһа табе олун, иблисә исә гаршы дурун вә о, сиздән гачаҹагдыр» (Јагуб 4:7). Шејтана вә пис руһани варлыглара фәал сурәтдә гаршы дурмағын үсулларындан бири — мистикадан, јә’ни ҹадуҝәрлијин һәр бир нөвүндән вә бу ишләрлә мәшғул оланлардан узаг дурмагдыр. Мүгәддәс Јазылардан ајдын ҝөрүнүр ки, Јеһованын хидмәтчиси ҝәләҹәкдән хәбәр верән әламәтләри изләмәкдән, астролоҝија вә ја улдуз фалындан, спиритизм вә бахыҹылыг кими әмәлләрдән имтина етмәлидир. Әҝәр биз руһани ҹәһәтдән фәал вә мөһкәмиксә, онда киминсә бизә ҹаду едәҹәјиндән горхмалы дејилик (Сајлар 23:23; Ганунун тәкрары 18:10-12; Јешаја 47:12-15; Һәвариләрин ишләри 19:18-20).

20. Биз неҹә Иблисә гаршы дура биләрик?

²⁰ Биз Мүгәддәс Китаб нормаларына вә һәгигәтләринә садиг галмагла Иблисә ‘гаршы дура’ биләрик. Бу дүнјанын «танрысы» Шејтан олдуғу үчүн, дүнја өз аллаһынын норма вә ганунларына әсасән јашајыр (2 Коринфлиләрә 4:4). Биз исә бу дүнјаја хас олан гүруру, худбинлији, әхлагсызлығы, зоракылығы вә вар-дөвләт һәрислијини рәдд едирик. Биз билирик ки, сәһрада имтаһан олунан заман Иса Мүгәддәс Јазылардан истифадә едәрәк Иблисә гаршы дуранда, Иблис гачды (Матта 4:4, 7, 10, 11). Ејнилә, әҝәр биз Јеһоваја бүтүн үрәјимиз вә зеһнимизлә табе олур вә дуа етмәклә үмидимизи Она бағлајырыгса, онда Шејтан биздән гачаҹаг (Ефеслиләрә 6:18). Јеһова Аллаһын вә Онун севимли Оғлунун көмәклији сајәсиндә, бизә һеч ким, һәтта Иблис дә, дүзәлмәз зәрәр вура билмәз! (Мәзмур 91:9-11).

[Һашијә]

Неҹә ҹаваб верәрдиниз?

• Шејтан Иблисдән горхмалыјыгмы?

• Шејтан мәсиһчиләрин үзәринә нә үчүн тә’гибләр јағдырыр?

• «Һијләҝәрдән» хилас олмаг үчүн нәјә ҝөрә дуа етмәк лазымдыр?

• Апардығымыз руһани мүһарибәдә неҹә гәләбә газана биләрик?

[13-ҹү сәһифәдәки шәкил]

Иблис Јеһованын јаддашында оланларын дирилмәсинә һеч ҹүр мане ола билмәз.