Үмумдүнја гардашлыг

ТӘХМИНӘН 1500 ил әрзиндә Исраил халгы Јеһованын адыны дашыјан бир халг олуб. Сонра Јеһова «диҝәр халглардан Өз адыны дашыјан бир халг» тәшкил етди (Һәв. 15:14). Јеһованын адыны дашыјан бу халгын нүмајәндәләри дүнјанын һансы ҝушәсиндә јашамаларындан асылы олмајараг, бир фикрә, бир амала хидмәт едәрәк Онун шаһиди олмалы иди. Бу халгын тәшкил олунмасы үчүн Исанын шаҝирдләринә вердији нөвбәти тапшырығы јеринә јетирмәк лазым иди: «Ҝедин вә бүтүн халгларын ичиндә шаҝирд һазырлајын, онлары Ата, Оғул вә мүгәддәс руһ ады илә вәфтиз един, сизә әмр етдијим һәр шејә риајәт етмәји онлара өјрәдин» (Мәт. 28:19, 20).

² Һәјатынызы Јеһоваја һәср етмәклә вә вәфтиз олмагла сиз Иса Мәсиһин шаҝирди олмусунуз. Сиз милли вә етник мәнсубијјәтиндән, мадди вәзијјәтиндән асылы олмајараг, бирлик ичиндә јашајан үмумдүнја мәсиһи гардашлығынын үзвүсүнүз (Зәб. 133:1). Буна ҝөрә дә јығынҹағыныздакы баҹы-гардашлары севирсиниз, онлара һөрмәт едирсиниз. Әввәлләр олсајды, бәлкә дә, онлардан бәзиләри илә ирги вә милли мәнсубијјәтинә ҝөрә, јахуд да тәһсил сәвијјәсинә ҝөрә мүнасибәт сахламаздыныз. Инди сизи онларла бүтүн бағлардан, сосиал, дини вә аилә бағларындан мөһкәм олан гардашлыг мәһәббәти бирләшдирир (Марк 10:29, 30; Кол. 3:14; 1 Бут. 1:22).

ДҮШҮНҸӘ ТӘРЗИМИЗИ ДӘЈИШИРИК

³ Әҝәр кимсә инсанлара иргинә, сијаси вә сосиал вәзијјәтинә ҝөрә, јахуд башга сәбәбдән бәсләдији гәрәзли мүнасибәти аша билмирсә, биринҹи әсрдәки јәһуди мәсиһиләрдән нүмунә ҝөтүрә биләр; бу мәсиһиләр динләринин тәсири алтында башга милләтләрә гаршы јаранмыш гәрәзли мүнасибәтә галиб ҝәлмишдиләр. Јеһова Бутруса ромалы јүзбашы Корнилинин јанына ҝетмәји бујуранда она бу тапшырығы јеринә јетирмәк үчүн көмәк етмишди (Һәв., фәс. 10).

⁴ Бутруса вәһјдә дејилмишди ки, јәһудиләр үчүн һарам бујрулан һејванлары кәсиб јесин. Бутрус бу әмрдән бојун гачыранда ҝөјдән бир сәда ҝәлир: «Бир дә Аллаһын пак етдији шејләрә мурдар демә» (Һәв. 10:15). Бутрус алдығы тапшырығы, јәни башга милләтдән олан инсанын јанына ҝетмәк тапшырығыны јеринә јетирә билсин дејә Аллаһ бу шәкилдә ишә гарышды. Јеһованын әмринә бојун әјәрәк Бутрус Корнилинин евиндә јығышан инсанлара белә демишди: «Сиз јахшы билирсиниз ки, јәһудиләрин ганунуна ҝөрә башга милләтдән олан адамла үнсијјәт гурмаг вә ја онун јанына ҝетмәк дүзҝүн дејил. Лакин Аллаһ мәнә ҝөстәрди ки, мән һеч кәси мурдар вә ја натәмиз сајмамалыјам. Буна ҝөрә дә мәни чағыранда етираз етмәјиб ҝәлдим» (Һәв. 10:28, 29). Бундан сонра Бутрус Јеһованын Корнилидән вә онун ев әһлиндән разы олдуғуна шаһид олду.

⁵ Али тәһсилли фәриси олан тарслы Шаул өзүнү ашағы тутуб әввәлләр јухарыдан ашағы бахдығы инсанларла мүнасибәт сахлајырды. Һәтта онларын ҝөстәришләринә бојун әјирди (Һәв. 4:13; Гал. 1:13—20; Филип. 3:4—11). Тәсәввүр едирсиниз, Серҝи Паулус, Диониси, Тамар, Филимон, Онисим вә диҝәр инсанлар хош хәбәри гәбул едиб Мәсиһин шаҝирди оланда дүшүнҹә тәрзләрини дәјишмәк үчүн нәләр етмәли идиләр (Һәв. 13:6—12; 17:22, 33, 34; Флм. 8—20).

АРАМЫЗДАКЫ БИРЛИЈИ ГОРУЈАГ

⁶ Сөзсүз ки, баҹы-гардашларын мәһәббәти сизә Јеһова Аллаһа јахынлашмаға вә Онун тәшкилатына гошулмаға көмәк едиб. Шаҝирдләрини дүнјадан фәргләндирән бу ҹәһәт барәдә Иса Мәсиһ демишди: «Сизә јени бир әмр верирәм: бир-биринизи севин. Бир-биринизи мән сизи севдијим кими севин. Аранызда мәһәббәт олса, һамы биләҹәк ки, сиз мәним шаҝирдимсиниз» (Јәһ. 13:34, 35). Сиз бу ҹәһәти Јеһованын халгынын ичиндә ајдын ҝөрмүсүнүз. Јәгин сиз дәрк едәндә ки, јығынҹагдакы мәһәббәт бејнәлхалг гардашлығын арасындакы мәһәббәтин јалныз кичик зәррәсидир, Јеһоваја вә Онун тәшкилатына олан миннәтдарлығыныз бирә-беш артыб. Мүгәддәс Китабда пејғәмбәрлик олунмушду ки, ахырзаманда халглар сүлһ вә бирлик ичиндә Јеһоваја ибадәт едәҹәк; бу пејғәмбәрлик сизин дә үзәриниздә јеринә јетир (Мик. 4:1—5).

⁷ Инсанлар арасында нифаг салан сајсыз-һесабсыз амилләри нәзәрә алсаг, «һәр халга, һәр тајфаја, һәр үммәтә вә һәр дилә мәнсуб адамлардан ибарәт» бир халгын олмасы ағласығмаз бир шејдир (Вәһј 7:9). Техноложи ҹәһәтдән инкишаф етмиш ҹәмијјәтдә јашајан инсанларла гәдим адәт-әнәнәләрлә јашајан инсанлар арасындакы фәрги тәсәввүр един. Ејни халгдан вә ејни иргдән олан инсанларын арасында ҝедән дини мүнагишәләрә фикир верин. Милләтчилик руһу ҝет-ҝедә даһа чох габардығы үчүн халглар арасында сијаси чәкишмәләр артыб. Инсанларын мадди дурумундакы фәрги вә ҹәмијјәти парчалајан сајсыз-һесабсыз диҝәр амилләри нәзәрә алсаг, бүтүн халглардан, дилләрдән, гәбиләләрдән вә тәбәгәләрдән олан инсанлар арасында түкәнмәз мәһәббәт вә сүлһ јалныз вә јалныз Аллаһын мөҹүзәси илә ола биләр (Зәк. 4:6).

⁸ Бу бирлик, бу һәмрәјлик артыг реалдыр вә сиз һәјатынызы Јеһоваја һәср едиб вәфтиз оланда бу меһрибан гардашлығын бир парчасы олмусунуз. Јәгин сиз хошбәхтсиниз ки, бу ҹүр инсанларын арасындасыныз, амма сизин үзәринизә бу бирлији горумаг мәсулијјәти дүшүр. Бунун үчүн һәвари Булусун Галатијалылара 6:10 ајәсиндә јазылан мәсләһәтинә әмәл етмәк ваҹибдир: «Нә гәдәр ки әлимиздә фүрсәт вар, һамыја, әләлхүсус, иман гардашларымыза јахшылыг едәк». Нөвбәти мәсләһәт дә бу саһәдә чох фајдалыдыр: «Һиккә илә, тәкәббүрлә һеч нә етмәјин. Әксинә, тәвазөкар олуб башгаларыны өзүнүздән үстүн сајын. Тәкҹә өзүнүзү фикирләшмәјин, башгаларыны да фикирләшин» (Филип. 2:3, 4). Баҹы-гардашларымыза инсан ҝөзү илә јох, Јеһованын ҝөзү илә бахмаға чалышсаг, арамызда һәмишә сүлһ вә меһрибанчылыг олаҹаг (Ефес. 4:23, 24).

БИР-БИРИНИЗИН ГЕЈДИНӘ ГАЛЫН

⁹ Һәвари Булусун тәсвир етдији кими, јығынҹаг, санки, бир бәдәндир вә орада олан һәр кәс бир-биринин гејдинә галыр (1 Кор. 12:14—26). Бәзи баҹы-гардашларымызла бизи ајыран узаг мәсафәләр бизә онларын рифаһыны дүшүнмәјә мане олмур. Һансыса гардашымыз тәгиб олунанда галанларымыз она ҝөрә нараһат олуруг. Баҹы-гардашларымыздан кимсә касыб јашајанда, тәбии фәлакәтдән, мүһарибәдән, вәтәндаш гаршыдурмасындан зәрәр чәкәндә о бири баҹы-гардашлар онлара јубанмадан руһани вә мадди көмәк ҝөстәрир (2 Кор. 1:8—11).

¹⁰ Биз һәр ҝүн бир-биримиз үчүн дуа етмәлијик. Кимсә өз ҝүнаһлы тәбиәти илә мүбаризә апарыр. Бәзиләринин чәкдији әзаблар һамыја бәллидир. Амма еләләри вар ки, онларын проблемләриндән әксәријјәтин хәбәри јохдур, мәсәлән, кимәсә иманына ҝөрә иш јолдашлары вә аилә үзвләри гаршы чыхыр (Мәт. 10:35, 36; 1 Салон. 2:14). Бүтүн бунларын бизә дә тәсири вар, чүнки биз үмумдүнја гардашлығын үзвүјүк (1 Бут. 5:9). Арамызда Јеһоваја хидмәтдә ағыр зәһмәт чәкән, тәблиғ ишиндә вә јығынҹагларын идарәсиндә үзәринә мәсулијјәт ҝөтүрән гардашлар вар. Еләләри вар ки, үмумдүнја тәблиғ ишини идарә едир. Ола билсин, бу инсанлара шәхсән көмәк етмәк үчүн әлимиздән һеч нә ҝәлмир. Амма биз онлар үчүн дуа едә биләрик, чүнки буна еһтијаҹлары вар. Бунунла биз онлары севдијимизи вә сәмими-гәлбдән онларын рифаһыны дүшүндүјүмүзү сүбут едирик (Ефес. 1:16; 1 Салон. 1:2, 3; 5:25).

¹¹ Бу ахырзаманда әзабларла долу дүнјада Јеһованын халгы бир-биринин дадына чатмаға һәмишә һазыр олмалыдыр. Зәлзәлә вә дашгын кими тәбии фәлакәтләр нәтиҹәсиндә зәрәр чәкәнләрә һуманитар јардым ҝөстәрмәк үчүн чохлу ҝүҹ сәрф олунур. Илк мәсиһиләр бу саһәдә ҝөзәл нүмунә гојублар. Јәһудијјәдәки мәсиһиләр аҹлыгдан әзијјәт чәкәндә Антакјада јашајан баҹы-гардашлары ҹан-дилдән онлара јардым етмишдиләр (Һәв. 11:27—30; 20:35). Һәвари Булус коринфлиләри тәшвиг етмишди ки, низам-интизамла һәјата кечирилән јардым ишини дәстәкләсинләр (2 Кор. 9:1—15). Бизим дөврдә дә баҹы-гардашларымыз фәлакәт уҹбатындан еһтијаҹ ичинә дүшәндә һәм тәшкилат, һәм дә мәсиһиләр ајры-ајрылыгда ҹәлд һәрәкәтә кечиб әлләриндән ҝәлән јардымы ҝөстәрирләр.

ЈЕҺОВАНЫН ИРАДӘСИНИ ЈЕРИНӘ ЈЕТИРМӘК ҮЧҮН БИРЛӘШМИШИК

¹² Бизим бејнәлхалг гардашлығымыз Јеһованын ирадәсини јеринә јетирмәк үчүн тәшкил олунуб. Һал-һазырда Јеһованын ирадәси ондан ибарәтдир ки, Падшаһлыг һаггында бу мүждә халгларын һамысына шәһадәт олсун дејә, бүтүн јер үзүндә тәблиғ едилсин (Мәт. 24:14). Јеһова истәјир ки, биз бу тапшырығы јеринә јетирмәклә јанашы, һәмчинин Онун јүксәк әхлаг нормаларына ујғун јашајаг (1 Бут. 1:14—16). Биз бир-биримизә табе олмалы вә хош хәбәрин һәр јанда јајылмасы үчүн әлимиздән ҝәләни етмәлијик (Ефес. 5:21). Инди өзүмүзә ҝүн ағламағын вахты дејил, бу ҝүн биз Аллаһын Падшаһлығыны һәр шејдән үстүн тутмалыјыг (Мәт. 6:33). Буну јадда сахласаг вә хош хәбәр наминә чијин-чијинә чалышсаг, инди севинҹимиз бирә-беш артаҹаг, ҝәләҹәкдә исә түкәнмәз немәтләр алаҹағыг.

¹³ Јеһованын Шаһидләри тајы-бәрабәри олмајан, бу дүнјанын ишләринә гарышмајан, пак вә Аллаһын ишиндә шүҹаәт ҝөстәрән бир халгдыр (Тит. 2:14). Бизи бу дүнјадан фәргләндирән Јеһоваја ибадәтимиздир. Биз нәинки бүтүн дүнјадакы баҹы-гардашларымызла чијин-чијинә чалышырыг, һәм дә һәгигәтин пак дилиндә данышырыг, бизим сөзләримизлә әмәлләримиз бир-биринә ујғун ҝәлир. Бу һагда Јеһова узун илләр габаг Сәфәнја пејғәмбәр васитәсилә хәбәр вермишди: «Мән халгларын дилини дәјишиб онлара саф дил верәҹәјәм ки, һамысы Јеһованын адыны чағырсын, чијин-чијинә Она гуллуг етсин» (Сәф. 3:9).

¹⁴ Сонра Јеһова Аллаһ Сәфәнја пејғәмбәрә илһам верәрәк бу ҝүн вар олан бејнәлхалг гардашлығы тәсвир етмишди: «Исраилин сағ галанлары артыг һагсызлыг етмәјәҹәк. Онлар јалан данышмајаҹаг, дилләриндә јалан олмајаҹаг. Онлар јејиб дојаҹаг, узаныб динҹәләҹәкләр, онлары үркүдән олмајаҹаг» (Сәф. 3:13). Јеһованын һәгигәт Кәламыны гаврамагла, дүшүнҹә тәрзимизи дәјишмәклә вә һәјатымызы Јеһованын нормаларына ујғунлашдырмагла бирлик ичиндә чијин-чијинә чалышырыг. Биз инсан нөгтеји-нәзәри илә мүмкүн олмајан бир шејә наил олмушуг. Бәли, биз бу дүнјадан ајрылмыш, Аллаһын адына шәрәф ҝәтирән бир халгыг (Мик. 2:12).