Нәјә ҝөрә нөгсансызлыг тәзаһүр етдирмәлијик?
«Мәнә һөкм ет, ја Рәбб, салеһлијимә, камиллијимә [«нөгсансызлығыма», ЈД] ҝөрә» (МӘЗ. 7:8).
1, 2. Һансы вәзијјәтләрдә мәсиһчи нөгсансызлығы тәһлүкә алтына алыныр?
ҮЧ МҮХТӘЛИФ вәзијјәти тәсәввүр ет: бир оғланы синиф јолдашлары лаға гојурлар. Онлар ону өзүндән чыхмаға, ола билсин, сөјүш сөјмәјә вә ја дава салмаға тәһрик едирләр. О әвәзини чыхаҹагмы, јохса өзүнү сахлајыб орадан узаглашаҹаг? Әр евдә тәк отуруб Интернетдә мүәјјән мәлумат ахтарыр. Бирдән мониторда әдәбсиз веб-сајта јөнәлдән бир пәнҹәрә чыхыр. О буна ширникиб һәмин сајта ҝирәҹәкми, јохса гәтијјәтлә ондан гачынаҹаг? Мәсиһчи гадын бир нечә баҹы илә сөһбәт едир вә тәдриҹән сөһбәт јығынҹагдан бир баҹы барәдә гејбәтә чеврилир. О бу зәрәрли сөһбәтә гошулаҹагмы, јохса мөвзуну дәјишмәјә чалышаҹаг?
2 Бу үч вәзијјәт бир-бириндән фәргләнсә дә, онларын үмуми бир ҹәһәти вар: бу вәзијјәтин һәр бириндә мәсиһчи нөгсансызлығыны тәзаһүр етдирмәк үчүн мүбаризә апармаг тәләб олунур. Гајғыларын, тәләбатларын вә мәгсәдләринлә бағлы мәсәләләрдә өз нөгсансызлығыны дүшүнүрсәнми? Инсанлар ҝүндәлик һәјатларында хариҹи ҝөрүнүшләри, сағламлыглары, пул газанмағын чәтинлији, достлуг, бәлкә дә, романтик мүнасибәтләринин пис вә јахшы анлары барәдә дүшүнүрләр. Биз бу кими мәсәләләрә чохлу вахт сәрф едә биләрик. Бәс Јеһова үрәјимизи јохлајанда әсасән нәјә фикир верир? (Мәз. 139:23, 24). Бизим нөгсансызлығымыза.
3. Јеһова һансы хүсуси сечими өһдәмизә бурахыб вә бу мәгаләдә нәји мүзакирә едәҹәјик?
3 «Һәр бир јахшы бәхшиш вә һәр камил һәдијјә» верән Јеһова бизә мүхтәлиф әнамлар бәхш етмишдир (Јаг. 1:17). Мәсәлән, О бизә бәдән, шүур, сағламлыг вә ҹүрбәҹүр баҹарыглар вериб (1 Кор. 4:7). Бунунла белә, Јеһова бизи нөгсансызлыг тәзаһүр етдирмәјә мәҹбур етмир. О бу хүсусијјәти инкишаф етдириб-етдирмәмәк сечимини бизим өһдәмизә бурахыр (Ганун. т. 30:19). Буна ҝөрә дә нөгсансызлығын нә олдуғуну арашдырмалыјыг. Биз һәмчинин бу хүсусијјәтин нәјә ҝөрә чох ваҹиб олдуғуну ҝөстәрән үч сәбәби дә нәзәрдән кечирәҹәјик.
Нөгсансызлыг нәдир?
4. Нөгсансызлыг өзүнә нәји дахил едир вә Јеһованын һејван гурбанларына даир ганунундан нә өјрәнирик?
4 Бир чох инсанлар нөгсансызлығын нә олдуғуну дәгиг билмирләр. Мәсәлән, сијасәтчиләр өз нөгсансызлыглары илә өјүнәндә чох вахт бу сөзүн алтында дүрүстлүјү нәзәрдә тутурлар. Бу хүсусијјәт ваҹиб олса да, нөгсансызлығын јалныз бир һиссәсидир. Мүгәддәс Китабда ҝөстәрилдији кими, нөгсансызлыг өзүнә әхлаги бүтөвлүјү вә гүсурсузлуғу дахил едир. Нөгсансызлыг сөзү илә әлагәли ишләнән ибрани сөзләри гүсурсуз, там, јахуд ејибсиз мәналарыны верән сөзүн көкүндән јараныб. Бу сөзләрдән бири Јеһоваја тәгдим олунан гурбанлара даир истифадә олунурду. Јеһова јалныз гүсурсуз вә ја ејибсиз һејван гурбанларыны гәбул едирди. (Левилиләр 22:19, 20 ајәләрини оху.) Јеһова Онун ҝөстәришинә мәһәл гојмајыб топал, хәстә, јахуд кор һејванлардан гурбан ҝәтирәнләри ҹидди мүһакимә едирди (Мал. 1:6-8).
5, 6. а) Һансы нүмунәләр ҝөстәрир ки, биз адәтән гүсурсуз вә ја бүтөв олан шејләри гијмәтләндиририк? б) Гејри-камил инсанлара аид едилдикдә нөгсансызлыг камиллик демәкдирми? Изаһ ет.
5 Гүсурсуз вә ја бүтөв олан шејләри ахтармаг вә гијмәтләндирмәк тәбиидир. Тәсәввүр едәк ки, бир китаб коллексијачысы узун сүрән ахтарышлардан сонра чох гијмәтли бир китаб тапыр, амма онун бәзи ваҹиб сәһифәләринин чатышмадығыны ашкар едир вә мәјус олуб ону јеринә гојур. Диҝәр нүмунәни тәсәввүр едәк: бир гадын дәниз саһилиндә ҝәзә-ҝәзә далғаларын саһилә ҝәтирдији балыггулагларыны топлајыр. Онларын ҝөзәллијинә вә мүхтәлифлијинә валеһ олан бу гадын јахындан бахмаг үчүн онлардан бирини ҝөтүрмәјә әјилир. Онлардан һансыны ҝөтүрәҹәк? Тәбии ки, бүтөв, јәни зәдәсиз оланы. Ејнилә Аллаһ да гүсурсуз инсанлары ахтарыр (2 Салн. 16:9).
6 Бәлкә, сән дүшүнүрсән ки, јалныз камил инсан нөгсансыз ола биләр. Биз ҝүнаһлы вә гејри-камил олдуғумуз үчүн бир нечә сәһифәси чатышмајан китаб, јахуд зәдәләнмиш балыггулаглары кими олдуғумузу дүшүнмәјә мејлли ола биләрик. Сән дә өзүнү бәзән белә һисс едирсәнми? Биз әмин ола биләрик ки, Јеһова биздән там камиллик вә һеч вахт ҝүҹүмүз чатмајан шејләри ҝөзләмирa (Мәз. 103:14; Јаг. 3:2). Лакин О, нөгсансызлыг тәзаһүр етдирәҹәјимизи ҝөзләјир. Камиллик вә нөгсансызлыг арасында фәрг вармы? Бәли, вар. Нүмунә үчүн: бир ҝәнҹ оғлан бир гызы севир вә онунла евләнмәјә һазырлашыр. Онун гыздан камиллик ҝөзләмәси ағылсызлыг оларды. Амма гыздан ону бүтүн үрәклә севмәсини, јәни јалныз она романтик севҝи бәсләмәсини ҝөзләмәк мүдриклик оларды. Буна бәнзәр тәрздә, Јеһова да «хүсуси сәдагәт тәләб едән» Аллаһдыр (Чых. 20:5, ЈД). Јеһова биздән камиллик јох, Ону бүтүн үрәклә севмәјимизи, јәни јалныз Она ибадәт етмәјимизи ҝөзләјир.
7, 8. а) Иса нөгсансызлыға даир һансы нүмунәни гојмушду? б) Мүгәддәс Китаба әсасән, нөгсансызлыг сөзүнүн әсл мәнасы нәдир?
7 Исадан ганунлардан һансынын ән ваҹиб олдуғуну сорушанда вердији ҹавабы хатырлаја биләрик. (Марк 12:28-30 ајәләрини оху.) Иса ҹавабында дедији сөзләрә ујғун јашајырды. О, Јеһованы бүтүн үрәклә, ҹанла, дүшүнҹә вә гүввәтлә севмәкдә ән бөјүк нүмунәни гојмушду. Иса ҝөстәрмишдир ки, нөгсансызлыг садәҹә сөздә јох, тәмиз нијјәтләрдән ирәли ҝәлән әмәлләрдә тәзаһүр олунур. Нөгсансызлыг тәзаһүр етдирмәк Исанын изләри илә ҝетмәјимизи тәләб едир (1 Пет. 2:21).
8 Беләликлә, Мүгәддәс Китаба әсасән, нөгсансызлыг сөзү сәмави Атамыз олан Јеһова Аллаһа, Онун ирадәси вә нијјәтинә бүтүн үрәкдән садиг галмаг мәнасыны верир. Нөгсансызлыг тәзаһүр етдирмәк ҝүндәлик һәјатымызда илк нөвбәдә Јеһова Аллаһы разы салмаг демәкдир. Онун ән ваҹиб сајдығы шејләр бизим үчүн дә ән ваҹиб олаҹаг. Ҝәлин бунун нә үчүн әһәмијјәтли олдуғунун үч сәбәбини нәзәрдән кечирәк.
1. Нөгсансызлығымыз вә һөкмранлыға даир мүбаһисәли мәсәлә
9. Бизим шәхси нөгсансызлығымыз али һөкмранлыг мәсәләси илә неҹә бағлыдыр?
9 Јеһованын һөкмранлыг һүгугу бизим нөгсансызлығымыздан асылы дејил. Онун һөкмранлығы әдаләтли вә әбәдидир, һәмчинин бүтүн каинаты әһатә едир. Бу, һәр һансы бир варлығын сөзүндән вә һәрәкәтиндән асылы олмајараг, һәмишә белә олаҹаг. Лакин Аллаһын һөкмранлығына һәм ҝөјдә, һәм дә јердә бөһтан атылмышдыр. Буна ҝөрә Онун һөкмранлығына бәраәт газандырылмалыдыр, јәни бүтүн шүурлу варлыгларын гаршысында онун гануни, әдаләтли вә мәһәббәт долу олдуғу сүбут едилмәлидир. Јеһованын Шаһидләри олан бизләрә гулаг асмаг истәјән һәр бир инсанла Аллаһын али һөкмранлығы барәдә сөһбәт етмәк хошдур. Бу мәсәләдә Аллаһын тәрәфини неҹә тута биләрик? Һөкмдарымызын Јеһова олдуғуну неҹә ҝөстәрә биләрик? Нөгсансызлыг тәзаһүр етдирмәклә.
10. Шејтан инсанларын нөгсансызлығына даир нәји иддиа етди вә сән буна неҹә ҹаваб вермәк истәрдин?
10 Ҝәл ҝөрәк, сәнин нөгсансызлығын бу мәсәләјә неҹә ҹәлб олунуб. Шејтан иддиа едирди ки, һеч бир инсан Аллаһын һөкмранлығыны дәстәкләмәјәҹәк вә һеч ким Аллаһа тәмәннасыз мәһәббәтлә хидмәт етмәјәҹәк. Иблис чохсајлы руһани варлыгларын гаршысында Јеһоваја деди: «Дәри әвәзинә дәри! Инсан ҹанына ҝөрә һәр шејини верәр» (Әјј. 2:4). Фикир вер ки, Шејтан бу бөһтаны јалныз салеһ Әјјуба јох, бүтүн бәшәријјәтин үнванына демишди. Буна ҝөрә дә Мүгәддәс Китаб Шејтаны «гардашларымызын иттиһамчысы» адландырыр (Вәһј 12:10). О, сән дә дахил олмагла, мәсиһчиләрин садиг галмајаҹагларыны иддиа едәрәк Јеһоваја истеһза едир. Шејтан иддиа едир ки, сән өз ҹаныны хилас етмәк үчүн Јеһоваја хәјанәт едәҹәксән. Сәнә гаршы ирәли сүрүлән бу иттиһам барәдә нә дүшүнүрсән? Шејтанын јаланчы олдуғуну сүбут етмәк фүрсәтиндән истифадә етмәздинми? Буну нөгсансызлыг тәзаһүр етдирмәклә ҝөстәрә биләрсән.
11, 12. а) Һансы нүмунәләр ҝөстәрир ки, ҝүндәлик гәрарларымыз нөгсансызлығымыза даир мүбаһисәли мәсәлә илә бағлыдыр? б) Нөгсансызлыг тәзаһүр етдирмәк нә үчүн шәрәфдир?
11 Беләликлә, сәнин нөгсансызлығына даир мүбаһисәли мәсәләјә ҝөрә ҝүндәлик давранышын вә сечимләрин мүһүм әһәмијјәт кәсб едир. Јухарыда ҝәтирилән үч вәзијјәтә јенидән нәзәр салаг. Нөгсансызлыгларыны горумаг үчүн онлар нә етмәлидир? Синиф јолдашлары тәрәфиндән истеһзаја мәруз галан оғланда өз гәзәбини онларын үстүнә төкмәк истәји јаранса да, «еј севимлиләр, гисас алмајын, анҹаг Аллаһын гәзәбинә јол верин. Чүнки јазылмышдыр: “Рәбб дејир: Гисас Мәнимдир, әвәзини Мән верәҹәјәм”» нәсиһәтини јадына салыр вә орадан узаглашыр (Ром. 12:19). Интернетдән истифадә едән әр еротик материаллара баха биләрди, амма Әјјубун сөзләриндә әкс олунан принсипи хатырлајыр: «Ҝөзләрим үчүн әһд етмишәм, ҝөзүм бир гыза бахармы?» (Әјј. 31:1). О, зәһәрли бир шеј имиш кими, әхлагы позан шәкилләрә бахмагдан имтина едир. Бир нечә баҹы илә сөһбәт едән баҹымыз сөһбәтин гејбәтә чеврилдијини ҝөрүб, «һәр биримиз јахшылыг наминә өз гоншумузун гајғысына галмалыјыг ки, о руһән инкишаф етсин» ҝөстәришини јадына салараг мөвзуну дәјишир (Ром. 15:2). Онун бу сөһбәти башгасына данышмасы руһән инкишафетдириҹи олмазды. Бу онун мәсиһчи баҹысынын адына ләкә ҝәтирәр вә сәмави Атасына хош ҝәлмәзди. Буна ҝөрә о, дилини ҹиловлајыр вә мөвзуну дәјишир.
12 Бу вәзијјәтләрин һәр бириндә мәсиһчи етдији сечимлә санки белә дејир: «Јеһова мәним Рәһбәримдир. Бу мәсәләдә Онун истәдији кими давранмаға чалышаҹағам». Сечим едәндә вә гәрар гәбул едәндә сән дә Јеһованы разы салмаға чалышырсанмы? Әҝәр беләдирсә, Сүлејманын мәсәлләри 27:11 ајәсиндәки фәрәһләндириҹи сөзләрә доғрудан да әмәл едирсән: «Оғлум, һикмәтли ол, гој гәлбим севинсин, онда мәни утандырана ҹаваб верә биләрәм». Аллаһын үрәјини севиндирмәк неҹә дә бөјүк шәрәфдир! Мәҝәр бу, нөгсансызлыг тәзаһүр етдирмәк үчүн ҝөстәрдијимиз һәр бир сәјә дәјмәзми?
2. Јеһова нөгсансызлығымыз әсасында һөкм едир
13. Әјјубун вә Давудун сөзләри неҹә ҝөстәрир ки, Јеһова бизә нөгсансызлығымызын әсасында һөкм едир?
13 Биз ҝөрүрүк ки, нөгсансызлыг Јеһованын һөкмранлығынын тәрәфини тутмағымыза көмәк едир. Јеһова мәһз бунун сајәсиндә бизә һөкм едир. Әјјуб бу һәгигәти јахшы дәрк едирди. (Әјјуб 31:6 ајәсини охуb.) О билирди ки, бүтүн бәшәријјәт Аллаһын «һагг тәрәзисиндә»дир вә О, нөгсансызлығымызы јохламаг үчүн мүкәммәл әдаләт принсипләриндән истифадә едир. Давуд да буна охшар фикри сөјләмишди: «Рәбб халглар үзәриндә һакимлик едир; мәнә һөкм ет, ја Рәбб, салеһлијимә, камиллијимә [«нөгсансызлығыма», ЈД] ҝөрә мәнә һагг газандыр! [...] Еј адил Аллаһ, чүнки Сән дүшүнҹәләри, һиссләри билирсән» (Мәз. 7:8, 9). Аллаһын дахили варлығымызын дәринликләрини, јәни ‘дүшүнҹә вә һиссләримизи’ ҝөрдүјүнү билирик. Буна ҝөрә дә, Аллаһын биздә нә ахтардығыны јадда сахламалыјыг. Давудун дедији кими, Јеһова бизә нөгсансызлығымызын әсасында һөкм едир.
14. Нәјә ҝөрә биз һеч заман фикирләшмәмәлијик ки, гејри-камил вә ҝүнаһлы олмағымыз нөгсансызлыг тәзаһүр етдирмәјимизә әнҝәлдир?
14 Бу ҝүн дә Јеһова Аллаһын милјардларла инсанын үрәјини арашдырдығыны тәсәввүр ет (1 Салн. 28:9). О, мәсиһчи нөгсансызлығыны тәзаһүр етдирән кәсләри тез-тезми тапыр? Бу, доғрудан да, надир һалдыр! Амма биз нөгсансызлығы горумаг үчүн чох гүсурлу олдуғумузу дүшүнмәли дејилик. Әксинә, гејри-камиллијимизә бахмајараг, Давуд вә Әјјуб кими, бизим дә әмин олмаға тутарлы сәбәбләримиз вар ки, Јеһова нөгсансызлығымызы горудуғумузу ҝөрәҹәк. Јадда сахла ки, камиллик нөгсансызлыг тәзаһүр етдирәҹәјимизә зәманәт вермир. Јер үзүндә јалныз үч камил инсан јашамышды вә онларын икиси — Адәм вә Һәвва нөгсансызлығыны горумады. Амма милјонларла гејри-камил инсанлар буну баҹармышды. Буну сән дә едә биләрсән.
3. Нөгсансызлыг үмидимиз үчүн ваҹибдир
15. Давуд нөгсансызлығын ҝәләҹәк үмидимиз үчүн ваҹиб олдуғуну неҹә ҝөстәрди?
15 Јеһова бизә нөгсансызлығымыз әсасында һөкм етдијинә ҝөрә нөгсансызлыг ҝәләҹәјә үмидимиз үчүн ваҹибдир. Давуд бунун һәгигәт олдуғуну билирди. (Мәзмур 41:12 ајәсини охуc.) О, Аллаһын она әбәди лүтф ҝөстәрәҹәјинә үмид бәсләјирди. Мүасир һәгиги мәсиһчиләр кими, Давуд әбәди јашајаҹағына вә Јеһова Аллаһа хидмәт етмәклә Она јахынлашаҹағына үмид едирди. Давуд билирди ки, бу үмидин ҝерчәкләшмәсини ҝөрмәк истәјирсә, өз нөгсансызлығыны горујуб сахламалыдыр. Ејнилә, әҝәр биз нөгсансызлығымызы горујуругса, Јеһова бизә дајаг олур, тәлим, рәһбәрлик вә хејир-дуа верир.
16, 17. а) Сән нәјә ҝөрә нөгсансызлығыны горумаға гәти гәрарлысан? б) Нөвбәти мәгаләдә һансы суаллар арашдырылаҹаг?
16 Үмид инди хошбәхт олмағымыз үчүн чох ваҹибдир. Үмид чәтин заманлара таб ҝәтирмәк үчүн бизә лазым олан севинҹи верә, үстәлик, дүшүнҹә тәрзимизи дә горуја биләр. Унутма, Мүгәддәс Китаб үмиди дәбилгәјә бәнзәдир (1 Салон. 5:8). Дәбилгә дөјүшдә әсҝәрин башыны горудуғу кими, үмид дә бизим зеһнимизи мәһвә доғру ҝедән бу көһнә дүнјада Шејтанын јајдығы мәнфи, бәдбин фикирләрдән мүһафизә едәҹәк. Үмидимиз олмајанда һәјат мәнасыз ҝөрүнүр. Биз өзүмүзү дүрүстлүклә нәзәрдән кечирмәли, нөгсансызлығымызын вә онунла бағлы үмидимизин һансы вәзијјәтдә олдуғуну диггәтлә арашдырмалыјыг. Јаддан чыхарма ки, нөгсансызлыг тәзаһүр етдирмәклә сән Јеһованын али һөкмранлығыны дәстәкләјир вә ҝәләҹәјә олан гијмәтли үмидини горујурсан. Даима нөгсансызлығыны гору!
17 Нөгсансызлыг бу гәдәр ваҹиб олдуғу үчүн нөвбәти суаллары нәзәрдән кечирмәлијик. Нөгсансызлыға неҹә јијәләнә биләрик? Ону неҹә горумаг олар? Вә әҝәр кимсә нөгсансызлығыны итирибсә, нә едә биләр? Бу суаллар нөвбәти мәгаләдә арашдырылаҹаг.
[Һашијәләр]
a Иса демишди: «Сәмави Атаныз камил олдуғу кими, сиз дә камил олун» (Мат. 5:48). Иса ајдын шәкилдә ҝөстәрди ки, һәтта гејри-камил инсанлар белә мүәјјән мәнада гүсурсуз вә ја камил ола биләрләр. Биз башгаларыны үрәкдән севмәк әмринә риајәт едә, бунунла да Аллаһы разы сала биләрик. Јеһоваја ҝәлдикдә исә, О, мүтләг мәнада камилдир. «Нөгсансызлыг» сөзү Она аид едилдикдә камиллији дә өзүнә дахил едир (Мәз. 18:30).
b Әјјуб 31:6: «Гој Аллаһ мәни һагг тәрәзисиндә чәксин, камил [«нөгсансыз», ЈД] олдуғуму ҝөрсүн».
c Мәзмур 41:12: «Камил [«нөгсансыз», ЈД] олдуғум үчүн мәндән мөһкәм јапышдын, мәни һүзурунда әбәдилик дајандырдын».
Неҹә ҹаваб верәрдиниз?
• Нөгсансызлыг нәдир?
• Нөгсансызлыг али һөкмранлыг мәсәләси илә неҹә бағлыдыр?
• Нөгсансызлыгла үмидимиз арасында һансы бағлылыг вар?
[5-ҹи сәһифәдәки шәкилләр]
Ҝүндәлик һәјатымызда нөгсансызлығымыз үчүн чохлу тәһлүкәләр јараныр