Бөјүк Мүәллими тәглид ет
«Неҹә динләдијинизә диггәт верин» (ЛУКА 8:18).
1, 2. Исанын хидмәти әрзиндә инсанларла неҹә даврандығына нә үчүн диггәт јетирмәлијик?
ШАҜИРД һазырламаг иши илә мәшғул олан Бөјүк Мүәллимимиз Иса Мәсиһ давамчыларына деди: «Неҹә динләдијинизә диггәт верин» (Лука 8:16-18). Бу принсип бизим мәсиһчи хидмәтимизә дә аиддир. Әҝәр руһани тә’лимә диггәт јетирсәк, она ујғун давранаҹаг вә Падшаһлығын баҹарыглы тәблиғчиси олаҹағыг. Дүздүр, бу ҝүн Исанын сәсини ешитмәк мүмкүн дејил, анҹаг онун тә’лимләри вә фәалијјәти барәдә Мүгәддәс Јазылардан охуја биләрик. Иса хидмәти әрзиндә адамларла неҹә давранырды вә бу һагда Мүгәддәс Китабда нә дејилир?
2 Иса хош хәбәрин мүкәммәл тәблиғчиси иди вә Аллаһын Кәламындакы һәгигәти өјрәтмәкдә ән ҝөзәл нүмунә гојмушду (Лука 8:1; Јәһја 8:28). Шаҝирд һазырламаг иши өзүнә һәм тәблиғ етмәји, һәм дә өјрәтмәји дахил едир. Бунунла белә, бә’зи тә’рифәлајиг тәблиғчиләрә инсанлары өјрәтмәк асан баша ҝәлмир. Тәблиғ ишинә хош хәбәри бәјан етмәк дахил олдуғу һалда, инсанлара Јеһова вә Онун нијјәтләри һаггында өјрәтмәк адәтән шаҝирд һазырлајанын онунла сых мүнасибәт гурмасыны тәләб едир (Матта 28:19, 20). Буна Иса Мәсиһи — шаҝирд һазырламагда Бөјүк Мүәллими тәглид етмәклә наил ола биләрик (Јәһја 13:13).
3. Исаны тәглид етмәјимиз шаҝирд һазырламаг ишимизә неҹә тә’сир едәҹәк?
3 Әҝәр биз Исанын тә’лим методларындан истифадә етсәк, һәвари Павелин нәсиһәтинә риајәт етмиш оларыг: «Һәр фүрсәтдән истифадә едәрәк, хариҹдәкиләрлә һикмәтли давранын. Гој сөзүнүз һәмишә нәвазишли олсун вә она дуз гатылмыш кими олсун ки, сиз һәр адама неҹә ҹаваб вермәк лазым олдуғуну биләсиниз» (Колослулара 4:5, 6). Исанын шаҝирд һазырламаг ишиндә гојдуғу нүмунәни тәглид етмәк үчүн сә’ј ҝөстәрмәлијик, белә етмәклә баҹарыглы мүәллим олаҹағыг вә «һәр адама» онун тәләбатларына ујғун ‘ҹаваб верә’ биләҹәјик.
Иса адамлары өз фикирләрини сөјләмәјә тәшвиг едирди
4. Исанын диггәтлә гулаг асмағы баҹардығыны һарадан билирик?
4 Һәлә ушаг икән Исанын башгаларыны динләмәк вә онлары өз фикирләрини сөјләмәјә тәшвиг етмәк вәрдиши варды. Мәсәлән, 12 јашы оланда валидејнләри Јусифлә Мәрјәм ону мә’бәддә мүәллимләрин арасында тапмышды. О, «онлары динләјир, суаллар верирди» (Лука 2:46). Иса мә’бәдә орадакы мүәллимләри өз билији илә пәрт етмәјә јох, онлары динләмәјә вә суаллар вермәјә ҝетмишди. Ҝөрүндүјү кими, Исанын Аллаһ вә инсанлар гаршысында лүтфдә тәрәгги етмәсинә көмәк едән хүсусијјәтләрдән бири диггәтлә гулаг асмаг баҹарығы иди (Лука 2:52).
5, 6. Һарадан билирик ки, Иса өјрәтдији инсанлара диггәтлә гулаг асырды?
5 Иса вәфтиз едилиб Мәсиһ кими мәсһ олунандан сонра да, адамлары динләјәрәк мараг ҝөстәрмәјә давам едирди. Исанын тә’лим вермәк ишинә башы о гәдәр гарышмырды ки, она гулаг асмаға ҝәләнләрә һеч фикир вермәсин. О, тез-тез сөһбәтинә ара верир, онларын фикрини сорушур вә ҹавабларына гулаг асырды (Матта 16:13-15). Мисал үчүн, Мартанын гардашы Лазар өләндә Иса она деди: «Ким јашајыб Мәнә иман едәрсә, әсла өлмәз». Сонра ондан сорушду: «Буна иман едирсәнми?» Шүбһә јохдур ки, Иса Мартанын ҹавабыны динләди: «Бәли, ја Рәбб, иман етдим ки, дүнјаја ҝәлән Аллаһын Оғлу Мәсиһ Сәнсән» (Јәһја 11:26, 27). Мартанын өз иманыны белә тәзаһүр етдирмәси Исаны неҹә дә севиндирди!
6 Бир чох шаҝирдләри Исаны тәрк едәндә, о, һәвариләринин фикрини өјрәнмәк мәгсәди илә сорушду: «Јохса сиз дә ҝетмәк истәјирсиниз?» Шимон Петер ҹаваб верди: «Ја Рәбб, биз кимин јанына ҝедә биләрик? Әбәди һәјатын сөзләри Сәндәдир. Биз дә иман етдик вә билирик ки, Јашајан Аллаһын Оғлу Мәсиһ Сәнсән» (Јәһја 6:66-69). Бу сөзләри ешитмәк Исаја неҹә дә хош иди! Мүгәддәс Китабы өјрәнән адамын өз иманыны бу ҹүр ифадә етмәси, әлбәттә ки, бизи чох севиндирәҹәк.
Иса һөрмәтлә динләјирди
7. Бир чох самаријалы нәјин сајәсиндә Исаја иман етди?
7 Иса Мәсиһин мәһарәтли мүәллим олмасынын диҝәр сәбәби, инсанларын гејдинә галмасы вә онлары һөрмәтлә динләмәси иди. Мәсәлән, Иса бир дәфә Сухарда Јагубун су гујусунун јанында самаријалы гадына тәблиғ етмишди. Сөһбәт заманы данышан јалныз Иса дејилди, о, гадынын дедикләринә дә гулаг асырды. Сөһбәти әснасында Иса онун ибадәтлә марагландығына фикир верди вә она деди ки, Аллаһ Она руһән вә һәгигәтән ибадәт едәнләри ахтарыр. Иса бу гадына һөрмәт вә мараг ҝөстәрди, гадын да ҝедиб башгаларына Иса һагда данышды вә «гадынын сөзүнә ҝөрә о шәһәрдә самаријалыларын бир чоху Исаја иман етдиләр» (Јәһја 4:5-29, 39-42).
8. Инсанларын адәтән өз фикирләрини сөјләмәји хошладыгларыны билмәјимиз хидмәтдә сөһбәтә башламағымыза неҹә көмәк едә биләр?
8 Инсанлар адәтән өз фикирләрини сөјләмәји хошлајырлар. Мисал үчүн, гәдим Афинанын сакинләри өз фикирләрини сөјләмәји вә јени бир шејә гулаг асмағы севирдиләр. Бу, һәвари Павелә Ареопагда тә’сирли бир нитглә чыхыш етмәк имканы верди (Һәвариләрин ишләри 17:18-34). Хидмәт заманы бир инсанла сөһбәтә башлајанда белә дејә биләрсән: «Сизә она ҝөрә ҝәлмишәм ки, бу мәсәләјә даир [мөвзунун адыны де] фикринизи өјрәнмәк истәјирәм». Һәмсөһбәтинин фикирләрини динләјиб сөһбәтә давам ет, јахуд суал вер. Сонра Мүгәддәс Китабын бу һагда нә дедијини нәзакәтлә ҝөстәр.
Иса сөһбәтә неҹә башламағы билирди
9. Иса Клеопаја вә онун јол јолдашына ‘Мүгәддәс Јазылары изаһ етмәздән’ өнҹә нә етди?
9 Иса сөһбәтә башламаг үчүн сөз тапмагда һеч вахт чәтинлик чәкмирди. О, јахшы динләјиҹи олмагдан савајы, чох вахт инсанларын нә һагда дүшүндүкләриндән аҝаһ иди вә нә дејәҹәјини дәгиг билирди (Матта 9:4; 12:22-30; Лука 9:46, 47). Ҝәлин бир нүмунәни нәзәрдән кечирәк. Иса дирилдикдән бир гәдәр сонра онун ики шаҝирди Јерусәлимдән Аммауса ҝедирди. Мүгәддәс Китабда дејилир ки, «онлар сөһбәт едиб өз араларында ҝөтүр-гој едәркән, Иса Өзү јахынлашыб онларла бәрабәр ҝетди; амма онларын ҝөзләри тутулмушду, белә ки, онлар Ону танымадылар. Иса исә онлара деди: “Јол ҝедә-ҝедә өз аранызда нә һагда данышырсыныз вә нијә белә гәмлисиниз?” Онлардан ады Клеопа олан бириси Исаја ҹаваб вериб деди: “Сән Јерусәлими зијарәт едәнләрдән бириси ола-ола неҹә олур ки, бу ҝүнләрдә орада баш верән шејләрдән бихәбәрсән?” Вә Иса онлара деди: “Һансы шејләрдән?”» Онлар Назаретли Исанын инсанлары неҹә өјрәтдији, мө’ҹүзәләр ҝөстәрдији, е’дам едилмәси вә бә’зиләринин дедијинә ҝөрә, дирилмәси һагда данышанда Бөјүк Мүәллим онлара гулаг асырды. Иса Клеопаја вә онун јол јолдашына өз фикирләрини сөјләмәјә имкан верди. Сонра исә, билмәли олдуглары шејләри онлара Мүгәддәс Јазылар әсасында изаһ етди (Лука 24:13-27, 32).
10. Хидмәтдә гаршылашдығын адамын нәјә инандығыны неҹә өјрәнә биләрсән?
10 Ола билсин, сән ев саһибинин дини бахышлары барәдә һеч нә билмирсән. Буну өјрәнмәк үчүн дејә биләрсән ки, инсанларын дуа һаггында нә дүшүндүкләрини өјрәнмәк сәнин үчүн хошдур. Сонра соруша биләрсән: «Неҹә фикирләширсиниз, бизим дуаларымыза кимсә гулаг асырмы?» Һәмсөһбәтинин ҹавабындан онун фикри вә е’тигады барәдә чох шеј өјрәнә биләрсән. Әҝәр һәмин адам Аллаһ һаггында сөһбәт етмәји хошлајырса, онун е’тигады барәдә даһа артыг мә’лумат алмаг үчүн соруша биләрсән: «Сизҹә, Аллаһ бүтүн дуалары динләјирми, јохса елә дуалар вар ки, онлары гәбул етмир?» Белә суаллар сәмими үнсијјәтә јол ача биләр. Мүнасиб вахтда Мүгәддәс Јазылардан лазыми фикирләри бөлүшмәк олар, амма буну нәзакәтлә, һәмсөһбәтинин е’тигадыны тәнгид етмәдән етмәк лазымдыр. Әҝәр о, сәни мәмнунијјәтлә динләјирсә, ола билсин, она јенидән баш чәкмәјини истәсин. Бәс онун вердији суалын ҹавабыны билмирсәнсә, онда неҹә? Сән бу суалы арашдыра вә ‘малик олдуғун үмид барәсиндә мүлајимликлә вә еһтирамла ҹаваб вермәк үчүн’ һазырлашыб ҝәлә биләрсән (1 Петер 3:15).
Иса ләјагәтли оланлары өјрәдирди
11. Өјрәдилмәјә ләјагәтли оланлары тапмагда бизә нә көмәк едәҹәк?
11 Камил инсан олан Иса Мәсиһ, өјрәдилмәјә ләјагәтли олан кәсләри танымаг бәсирәтинә малик иди. Әбәди һәјата дүзҝүн мүнасибәтлә јанашанлары тапмаг бизим үчүн кифајәт гәдәр чәтин мәсәләдир (Һәвариләрин ишләри 13:48). Иса һәвариләрә: «Һансы шәһәрә, ја кәндә ҝирсәниз орада ләјагәтли кимдирсә ахтарын», — дејә тапшырыг верәндә, һәмин проблем онларын да гаршысында дурурду (Матта 10:11). Исанын һәвариләри кими, биз дә Мүгәддәс Китаб һәгигәтләрини динләмәк вә онлары өјрәнмәк истәјән инсанлары ахтармалыјыг. Биз һәр бир инсана диггәтлә гулаг асдығымыз вә ҝәтирдијимиз хәбәрә онларын неҹә мүнасибәт ҝөстәрдикләринә фикир вердијимиз тәгдирдә, ләјагәтли оланлары тапа биләрик.
12. Мараг ҝөстәрән адама көмәк етмәјә неҹә давам едә биләрсән?
12 Падшаһлыг һаггындакы хош хәбәрә мараг ҝөстәрән инсаны тәрк етдикдән сонра јахшы оларды ки, онун руһани тәләбатлары һагда дүшүнмәјә давам едәсән. Әҝәр сән хош хәбәри тәблиғ етдијин инсан барәдә өјрәндикләрини гејд етсән, она руһани көмәк ҝөстәрә биләҹәксән. Марагланан инсана тәкрар баш чәкәндә онун е’тигады, әһвал-руһијјәси вә ја шәраити һагда даһа чох өјрәнмәк үчүн ону диггәтлә динлә.
13. Инсанларын Аллаһын Кәламына мүнасибәтини неҹә өјрәнә биләрик?
13 Инсанларын Аллаһын Кәламына мүнасибәтини неҹә өјрәнә биләрсән? Бә’зи һалларда сорушмаг олар: «Сизҹә, Мүгәддәс Китабы баша дүшмәк чәтиндирми?» Инсанын ҹавабындан онун руһани мәсәләләр барәдә фикрини өјрәнмәк олар. Диҝәр үсул, Мүгәддәс Китабдан бир ајә охумаг, сонра исә белә бир суал вермәкдир: «Бу һагда нә дејәрдиниз?» Иса кими, сән дә дүшүнүлмүш суаллар вермәклә хидмәтдә даһа мүвәффәгијјәтли ола биләрсән. Анҹаг бир шеји унутма.
Иса суаллардан мәһарәтлә истифадә едирди
14. Инсаны сорғу-суала тутмадан онун фикри илә неҹә марагланмаг олар?
14 Инсанын фикри илә марагланаркән, ону пәрт едән суаллар вермә. Исадан нүмунә ҝөтүр. О, инсанлары јерсиз сорғу-суала тутмурду, әксинә, инсанлары дүшүнмәјә тәшвиг едән суаллар верирди. Иса һәм дә сәмими инсанлара тәравәт вә раһатлыг ҝәтирән диггәтли динләјиҹи иди (Матта 11:28). Мүхтәлиф инсанлар она асанлыгла јахынлашыб дәрдләрини сөјләјә билирдиләр (Марк 1:40; 5:35, 36; 10:13, 17, 46, 47). Әҝәр инсан Мүгәддәс Китаб вә онун тә’лимләри һагда фикирләрини сәмими бөлүшүрсә, ону сорғу-суала тутмамалыјыг.
15, 16. Инсан дини мәсәләләрә даир өз фикирләрини бөлүшсүн дејә, ону сөһбәтә неҹә ҹәлб етмәк олар?
15 Суаллардан мәһарәтлә истифадә етмәклә јанашы, мараглы бир шеј сөјләмәклә вә инсанын ҹавабыны динләмәклә ону үнсијјәтә тәшвиг етмәк олар. Мәсәлән, Иса Накдимона демишди: «Бир кимсә јенидән доғулмаса, Аллаһын Сәлтәнәтини ҝөрә билмәз» (Јәһја 3:3). Бу сөзләр Накдимонда елә мараг ојатды ки, о, јериндәҹә суал вериб ҹавабыны динләди (Јәһја 3:4-20). Сән дә белә үсулла инсанлары сөһбәтә ҹәлб едә биләрсән.
16 Бу ҝүн Африка, Шәрги Авропа вә Латын Америкасы кими јерләрдә бир чох јени динләрин әмәлә ҝәлмәси сөһбәтин әсас мөвзусуна чеврилиб. Буна охшар әразиләрдә сөһбәтә белә башламаг олар: «Бу гәдәр динләрин мөвҹуд олмасы мәни нараһат едир. Амма мән үмид бәсләјирәм ки, тезликлә бүтүн милләтләрдән олан инсанлар һәгиги диндә бирләшәҹәкләр. Белә олмасыны истәјәрдинизми?» Мүгәддәс Китабын вердији үмид барәдә мараглы бир шеј демәклә инсаны өз фикрини сөјләмәјә тәшвиг едә биләрсән. Инсанлара садә суаллара ҹаваб вермәк асандыр (Матта 17:25). Һәмсөһбәтин өз фикрини сөјләдикдән сонра, бир-ики ајә охумагла вердијин суала өзүн дә ҹаваб вер (Јешаја 11:9; Сефанја 3:9). Диггәтлә гулаг ассан вә инсанын ҹавабыны өз гејд китабчанда јазсан, ҝәлән дәфә нә һагда данышаҹағынызы мүәјјән едә биләрсән.
Иса ушаглары динләјирди
17. Исанын ушаглара мараг ҝөстәрдијини һарадан билирик?
17 Иса јалныз бөјүкләрә јох, һәмчинин ушаглара да мараг ҝөстәрирди. О, ушагларын ојнадығы ојунлардан вә нә һагда данышдыгларындан хәбәрдар иди. Бә’зән о, ушаглары өз јанына чағырырды (Лука 7:31, 32; 18:15-17). Исаны динләјән халгын арасында ушаглар да варды. Оғлан ушаглары Мәсиһә уҹадан һәмд едәндә, о бунун Мүгәддәс Јазыларда габагҹадан дејилдијини сөјләди (Матта 14:21; 15:38; 21:15, 16). Бу ҝүн бир чох ушаглар Исанын шаҝирдләри олурлар. Онлара неҹә көмәк едә биләрик?
18, 19. Ушағыныза руһани ҹәһәтдән неҹә көмәк едә биләрсиниз?
18 Өвладыныза руһани ҹәһәтдән көмәк етмәк үчүн ону динләмәк лазымдыр. Онун һансы фикирләринин Јеһованын дүшүнҹә тәрзинә зидд ҝетдијини баша дүшмәјә чалышын. Ушағыныз һәр нә десә дә, онун сөзләринә мүлајим јанашын. Сонра мүвафиг ҝәлән Мүгәддәс Китаб ајәләринин әсасында ушаға Јеһованын нөгтеји-нәзәрини баша дүшмәјә көмәк един.
19 Суаллар вермәк ваҹибдир. Амма бөјүкләр кими, ушаглар да сорғу-суалы хошламырлар. Ушағы чәтин суаллара ҹаваб вермәјә мәҹбур етмәкдәнсә, нәјә ҝөрә бир аз өзүнүз барәдә данышмајасыныз? Мүзакирә етдијиниз мөвзудан асылы олараг, дејә биләрсиниз ки, вахтилә сиз дә белә дүшүнмүсүнүз вә бунун сәбәбини изаһ етмәк олар. Сонра сорушун: «Инди мәни баша дүшүрсән?» Ушағынызын ҹавабыны динләјиб Мүгәддәс Китабдан руһландырыҹы фикирләри мүзакирә едә биләрсиниз.
Бөјүк Мүәллимин нүмунәсини һәмишә изләјин
20, 21. Шаҝирд һазырлајаркән нәјә ҝөрә диггәтлә динләмәлијик?
20 Мүәјјән бир мөвзуну өз өвладынла вә ја башгасы илә мүзакирә едәркән диггәтлә гулаг асмаг чох ваҹибдир. Бу, мәһәббәтин тәзаһүрүдүр. Һәмсөһбәтимизи динләмәклә онунла тәвазөкар даврандығымызы, она һөрмәт етдијимизи вә сәмимијјәтлә гајғысына галдығымызы ҝөстәририк. Сөзсүз ки, динләмәк инсанын фикирләринә диггәт јетирмәји тәләб едир.
21 Ҝәлин тәблиғ заманы инсанлара диггәтлә гулаг асаг. Белә етсәк, Мүгәддәс Китаб һәгигәтинин һансы ҹәһәтинин һәмсөһбәтимиздә даһа бөјүк мараг ојатдығыны ҝөрә биләрик. Сонра Исанын мүхтәлиф тә’лим методларындан истифадә едәрәк онлара көмәк етмәјә чалышаг. Бөјүк Мүәллимин нүмунәсини изләмәјимиз бизә севинҹ вә мәмнунлуг ҝәтирәҹәк.
Неҹә ҹаваб верәрдиниз?
• Иса башгаларыны өз фикирләрини сөјләмәјә неҹә тәшвиг едирди?
• Иса өјрәтдији инсанлары нә үчүн динләјирди?
• Хидмәтдә суаллардан неҹә истифадә едә биләрик?
• Ушағыныза руһани ҹәһәтдән неҹә көмәк едә биләрсиниз?
[28-ҹи сәһифәдәки шәкил]
Тәблиғ едәркән диггәтлә гулаг асын.
[30-ҹу сәһифәдәки шәкил]
Ушаглара руһани ҹәһәтдән көмәк едәндә Исанын нүмунәсини изләјирик.