Бу ҝүн дә иш башында олан Рәһбәримиз
«О, бир галиб кими јекун гәләбәсинә доғру ирәлиләди» (ВӘҺЈ 6:2).
1, 2. а) Мәсиһин 1914-ҹү илдән бәри Падшаһ кими фәалијјәт ҝөстәрмәси Мүгәддәс Китабда неҹә тәсвир олунур? б) Мәсиһ Падшаһ кими тахта чыханда һансы ишләри ҝөрдү?
МӘСИҺ 1914-ҹү илдә Јеһованын Падшаһлығынын Падшаһы олду. Биз ону неҹә тәсәввүр едирик? Сәмави тахтында сакитҹә әјләшиб дәрин фикирләрә далан, һәрдәнбир дә јер үзүндәки јығынҹаглара нәзәр салан бир падшаһ кимими? Әҝәр беләдирсә, онда фикримизи дәјишмәлијик. Нәјә ҝөрә? Чүнки «Зәбур» вә «Вәһј» китабында о, атын белиндә отуран вә ‘галиб кими јекун гәләбәсинә доғру ирәлиләјәрәк’ ‘уғур газанан’ фәал бир падшаһ кими тәсвир олунур (Вәһј 6:2; Мәз. 2:6—9; 45:1—4).
2 Мәсиһин Падшаһ кими ҝөрдүјү илк иш ‘әждаһа вә онун мәләкләри’ үзәриндә гәләбә чалмаг олду. Мәләкләрә башчылыг едән Мәсиһ, баш мәләк Микајыл кими, Шејтаны вә онун ҹинләрини мүгәддәс ҝөјләрдән говду вә инди онлар јалныз Јер күрәсинин һүдудлары чәрчивәсиндә фәалијјәт ҝөстәрә билирләр (Вәһј 12:7—9). Бундан сонра Иса Јеһованын «Әһд Мәләји» ролунда чыхыш едәрәк Онунла бирҝә руһани мәбәдин вәзијјәтини јохламаға ҝәлди (Мал. 3:1). Иса Бөјүк Бабилин һөкмә даһа чох лајиг олан һиссәсини — Христиан дүнјасыны ган төкдүјү вә бу дүнјанын сијаси ишләринә гарышараг өзүнү ләкәләдији үчүн мүһакимә етди (Вәһј 18:2, 3, 24).
Мәсиһ јер үзүндәки нөкәрини тәмизләјир
3, 4. а) Мәсиһ, Јеһованын «Әһд Мәләји» кими, һансы иши ҝөрдү? б) Мәбәдә бахыш заманы нә мәлум олду вә Иса, јығынҹағын Башы кими, јер үзүндәки әмлакынын идарәсини кимә һәвалә етди?
3 Јеһованын вә Онун ‘Мәләјинин’ кечирдији бахыш нәтиҹәсиндә һәмчинин мәлум олду ки, руһани мәбәдин јер үзүндәки һәјәтиндә христиан килсәләринә аидијјәти олмајан бир груп һәгиги мәсиһчи вар. Буна бахмајараг, һәтта бу мәсһ олунмуш мәсиһчиләри вә ја «Левилиләри» сафлашдырмаг лазым иди. Һәр шеј Малаки пејғәмбәрин дедији кими олду: «О, [Јеһова] ҝүмүш әридиб тәмизләјән адам кими рәфтар едәҹәк: Левилиләри сафлашдырыб гызыл вә ҝүмүшү тәмизләјән кими тәмизләјәҹәк. Беләҹә салеһликлә Рәббә гурбанлар ҝәтирәҹәкләр» (Мал. 3:3). Јеһова «Әһд Мәләји»нин, јәни Мәсиһ Исанын васитәсилә бу руһани исраиллиләри тәмизләди.
4 Лакин Мәсиһ ҝөрдү ки, бу садиг мәсһ олунмуш мәсиһчиләр иман гардашларыны вахтлы-вахтында руһани гида илә тәмин етмәк үчүн әлләриндән ҝәләни едирләр. Бәзән чәтинликләрлә үзләшмәләринә рәғмән, онлар 1879-ҹу илдән башлајараг Аллаһын Падшаһлығы һаггында Мүгәддәс Китаб һәгигәтләрини бу журналын сәһифәләриндә дәрҹ едирдиләр. Иса пејғәмбәрлик етмишди ки, ‘дөврүн јекунунда’ евиндәки гуллугчуларыны јохламаға «ҝәләндә» онлара ‘вахтлы-вахтында јемәк пајларыны верән’ бир нөкәр олаҹаг. О, бу нөкәри хошбәхт адландыраҹаг вә јер үзүндәки «бүтүн әмлакынын идарәсини она тапшыраҹаг» (Мат. 24:3, 45—47). Мәсиһчи јығынҹағынын Башы кими, Мәсиһ «садиг вә ағыллы нөкәр»индән истифадә едәрәк Падшаһлығын јер үзүндәки ишләрини идарә едир. О, Рәһбәрлик Шурасы васитәсилә мәсһ олунмуш «евиндәки гуллугчулара» вә онларын әмәкдашлары олан ‘башга гојунлара’ рәһбәрлик верир (Јәһ. 10:16).
‘Јерин мәһсулунун’ јығымы
5. Јәһја рөјада Падшаһын һансы иши һәјата кечирдијини ҝөрдү?
5 Һәвари Јәһја рөјада Падшаһ олан Мәсиһин ‘Ағанын ҝүнүндә’, јәни 1914-ҹү илдә тахта чыхандан сонра даһа нәләр едәҹәјини ҝөрмүшдү. О јазыр: «Сонра мән бир ағ булуд ҝөрдүм. Булудун үстүндә санки инсан оғлу отурмушду. Онун башында гызыл таҹ вә әлиндә ити ораг вар иди» (Вәһј 1:10; 14:14). Јәһја Јеһованын бир мәләјинин һәмин Бичинчијә орағыны ишә салмағы дедијини ешитди, чүнки ‘јерин мәһсулу там јетишмишди’ (Вәһј 14:15, 16).
6. Иса һадисәләрин ҝедишатыны неҹә тәсвир етди?
6 Јәгин, ‘јерин мәһсулунун’ јығымы ифадәсини ешидәндә јадымыза Исанын буғда вә алаг оту мәсәли дүшүр. Һәмин мәсәлдә Иса јахшы вә бол мәһсул јығмаг мәгсәдилә буғда тохуму сәпән адамын өзү олдуғуну деди. Онун сөзләринә әсасән, јахшы мәһсул онунла бирликдә Падшаһлыгда идарә етмәк үчүн мәсһ олунан һәгиги мәсиһчиләри тәмсил едән «падшаһлығын оғуллары»дыр. Лакин ҝеҹәнин зүлмәт гаранлығында дүшмән, јәни ‘Иблис’ тарлаја ‘Шәририн оғулларыны’ тәмсил едән алаг тохуму сәпди. Әкинчи ишчиләринә тапшырды ки, «бичинә», башга сөзлә, ‘дөврүн јекунуна’ гәдәр нә алаг отуна, нә дә ки буғдаја әл дәјсинләр. Онлар һәмин вахта гәдәр бир јердә бөјүмәли идиләр вә о вахт чатанда Иса мәләкләрини ҝөндәрәҹәкди ки, буғданы алаг отундан ајырсынлар (Мат. 13:24—30, 36—41).
7. Мәсиһ ‘јерин мәһсулунун’ јығымыны неҹә һәјата кечирир?
7 Јәһјанын алдығы ҝөрүнтү Исанын үмумдүнја бичин ишинә нәзарәт етмәсилә һәјата кечир. ‘Јерин мәһсулунун’ јығымы 144 000 нәфәрдән ибарәт ‘падшаһлыг оғлунун’ јердә галан һиссәсинин, јәни Исанын мәсәлиндәки ‘буғданын’ бичини илә башлады. Биринҹи Дүнја мүһарибәсиндән сонра һәгиги мәсиһчиләрлә христианлар арасындакы фәрг даһа ајдын ҝөрүндү. Бунун сајәсиндә ‘јерин мәһсулунун’ јығымынын икинҹи мәрһәләси олан башга гојунларын јығымы просеси даһа да сүрәтләнди. Бу инсанлар «падшаһлығын оғуллары» сырасына дахил олмасалар да, һәмин Падшаһлыға көнүллү сурәтдә табе олан ‘бөјүк издиһамы’ тәшкил едирләр. Онлар «бүтүн халглара, милләтләрә вә дилләрә мәнсуб» олан адамларын арасындан сечилирләр. Бу група дахил олан инсанлар Мәсиһ Исадан вә онунла бирҝә сәмави һөкумәтдә идарә едәҹәк 144 000 ‘мүгәддәсдән’ ибарәт олан Падшаһлыға табе олурлар (Вәһј 7:9, 10; Дан. 7:13, 14, 18).
Јығынҹаглар үзәриндә рәһбәрлик
8, 9. а) Мәсиһин јығынҹагларын тәкҹә үмуми вәзијјәтинә јох, һәмчинин онун үзвләринин һәр биринин һәјат тәрзинә диггәт јетирдијини һарадан билирик? б) 26-ҹы сәһифәдән ҝөрдүјүмүз кими, биз Шејтанын һансы дәрјаларындан гачынмалыјыг?
8 Өтән мәгаләдән биз ерамызын биринҹи әсриндә мөвҹуд олан һәр бир јығынҹағын руһани вәзијјәти илә Мәсиһин нә дәрәҹәдә јахындан таныш олдуғуну өјрәндик. Бизим ҝүнләрдә исә Рәһбәримиз олан Мәсиһ, ‘ҝөјдәки вә јердәки бүтүн һакимијјәти’ алан вә һөкмранлыг едән бир Падшаһ кими, јығынҹаглара вә онларын нәзарәтчиләринә фәал сурәтдә рәһбәрлик едир (Мат. 28:18; Колос. 1:18). Јеһова ону мәсһ олунмушлар ‘јығынҹағынын хејринә һәр шејин башы тәјин едиб’ (Ефес. 1:22). Буна ҝөрә дә Јеһованын Шаһидләринин 100 000-дән чох јығынҹағында баш верән һеч бир шеј онун ҝөзүндән јајынмыр.
9 Гәдим Тиатира јығынҹағына Иса бу сөзләрлә мүраҹиәт етди: «Ҝөзләри аловтәк јанан... Аллаһын Оғлу белә дејир: “Мән сәнин ишләриндән... хәбәрдарам”» (Вәһј 2:18, 19). О, һәмин јығынҹағын үзвләрини әхлагсыз һәјат тәрзи сүрдүкләринә вә сәфаһәт ичиндә јашадыгларына ҝөрә тәнбеһ едәрәк деди: «Мән инсанын бөјрәкләрини вә үрәјини тәдгиг едирәм. Мән һәр биринизә әмәлләринизә ҝөрә верәҹәјәм» (Вәһј 2:23). Бу сөзләр ҝөстәрир ки, Мәсиһ тәкҹә һәр јығынҹағын үмуми вәзијјәтинә јох, һәм дә онун һәр бир үзвүнүн сүрдүјү һәјат тәрзинә диггәт јетирир. О, «Шејтанын дәрјасына» баш вурмајан Тиатирадакы мәсиһчиләри тәрифләди (Вәһј 2:24). Иса — истәр ҹаван олсун, истәрсә дә јашлы — «Шејтанын дәрјасына» гәрг олмајан, јәни Интернетдән дүзҝүн истифадә едән, зоракы видеоојунлар ојнамајан, о ҹүмләдән өз һәрәкәт вә арзуларына һәдд гојан инсанлардан разыдыр. Бир чох мәсиһчиләрин һәјатларынын бүтүн саһәләриндә онун рәһбәрлијинә риајәт етмәк үчүн әлләриндән ҝәләни етдикләрини вә фәдакарлыг ҝөстәрдикләрини ҝөрәндә о неҹә дә севинир!
10. Мәсиһин јығынҹаг ағсаггалларына нәзарәт етмәси Мүгәддәс Китабда неҹә тәсвир олунур вә онлар нәји гәбул етмәлидирләр?
10 Мәсиһ тәјин олунмуш ағсаггаллар васитәсилә јер үзүндәки јығынҹаглара мәһәббәтлә нәзарәт едир (Ефес. 4:8, 11, 12). Биринҹи әсрдә нәзарәтчиләрин һамысы руһдан доғулмуш мәсиһчиләр иди. «Вәһј» китабында онлар Исанын сағ әлиндә тутдуғу улдузлар кими тәсвир олунур (Вәһј 1:16, 20). Бу ҝүн исә јығынҹаг ағсаггалларынын әксәријјәти башга гојунлара аиддир. Демәк олар ки, онлар да Мәсиһин нәзарәти алтындадырлар, чүнки онлар мүгәддәс руһун рәһбәрлији алтында вә дуа едиләрәк тәјин олунурлар (Һәв. иш. 20:28). Бунунла белә, онлар гәбул едирләр ки, Мәсиһ јер үзүндәки шаҝирдләринә рәһбәрлик етмәк үчүн мәсһ олунмушлардан ибарәт кичик групдан, Рәһбәрлик Шурасындан истифадә едир. (Һәвариләрин ишләри 15:6, 28—30 ајәләрини оху.)
«Ҝәл, Ағамыз Иса»
11. Нәјә ҝөрә биз Рәһбәримизин тез бир заманда ҝәлмәсини интизарла ҝөзләјирик?
11 Һәвари Јәһјанын ҝөрдүјү рөјада Иса тезликлә ҝәләҹәјини бир јох, бир нечә дәфә дејир (Вәһј 2:16; 3:11; 22:7, 20). Шүбһәсиз, Иса Бөјүк Бабилин вә Шејтанын бу пис дүнјасынын үзәриндә һөкмүнү иҹра етмәк үчүн ҝәләҹәјиндән данышырды (2 Салон. 1:7, 8). Габагҹадан дејилмиш бүтүн бу мөһтәшәм һадисәләрин јеринә јетмәсини сәбирсизликлә ҝөзләјән јаша долмуш һәвари Јәһја нида етди: «Амин! Ҝәл, Ағамыз Иса». Бу пис системин сонунда јашајан бизләр дә Атасынын адыны тәгдис етмәк вә Онун али һөкмранлығына бәраәт газандырмаг үчүн Падшаһлыг иззәтиндә ҝәләҹәк Падшаһымызын вә Рәһбәримизин јолуну интизарла ҝөзләјирик.
12. Дағыдыҹы күләкләр бурахылмаздан өнҹә Мәсиһ һансы иши баша чатдыраҹаг?
12 Исанын Шејтанын һакимијјәти алтында олан бу пис дүнјаны мәһв етмәк үчүн ҝәлмәсиндән өнҹә руһани Исраили тәшкил едән 144 000 нәфәрин јер үзүндә галан үзвләри сонунҹу дәфә мөһүрләнмәлидир. Мүгәддәс Китабда ачыг-ајдын дејилир ки, 144 000 нәфәрин мөһүрләнмәси баша чатмајынҹа Шејтанын системини јерлә јексан едәҹәк дағыдыҹы күләкләр бурахылмајаҹаг (Вәһј 7:1—4).
13. Мәсиһ «бөјүк мүсибәт»ин илкин мәрһәләсиндә өз иштиракыны неҹә нүмајиш етдирәҹәк?
13 Мәсиһин 1914-ҹү илдән бәри «иштиракы» јер үзүнүн әксәр сакинләринин диггәтиндән кәнарда галыб (2 Пет. 3:3, 4). Лакин тезликлә о, Шејтан системинин мүхтәлиф тәркиб һиссәләри үзәриндә Јеһованын һөкмләрини иҹра етмәклә өз иштиракыны ајдын ҝөстәрәҹәк. ‘Ганунсузлуг адамынын’, башга сөзлә, Христиан дүнјасынын руһаниләринин мәһви, шүбһәсиз ки, онун ‘иштиракыны нүмајиш етдирәҹәк’. (2 Салониклиләрә 2:3, 8 ајәләрини оху.) Бундан сонра Мәсиһин Јеһованын тәјин етдији Һаким кими һәрәкәтә кечдијинә һеч кимдә шүбһә галмајаҹаг. (2 Тимотејә 4:1 ајәсини оху.) Јалан динин дүнја империјасы олан Бөјүк Бабилин мәһви онун һөкмә ән чох лајиг олан һиссәсинин мәһви илә башлајаҹаг. Руһани фаһишәни мәһв етмәк фикрини сијаси рәһбәрләрин үрәјинә Јеһова гојаҹаг (Вәһј 17:15—18). Бу, «бөјүк мүсибәт»ин илкин мәрһәләси олаҹаг (Мат. 24:21).
14. а) Нәјә ҝөрә бөјүк мүсибәтин илкин мәрһәләси гысалдылаҹаг? б) ‘Инсан Оғлунун рәмзинин’ пејда олмасы Јеһованын халгы үчүн һансы мәнаны кәсб едәҹәк?
14 Иса гејд етди ки, «сечилмишләрә», јәни јер үзүндә галан мәсһ олунмушлара ҝөрә бу мүсибәтли ҝүнләр гысалдылаҹаг (Мат. 24:22). Јалан дин мәһв едилән заман Јеһова мәсһ олунмуш мәсиһчиләрин вә онларын һәмкарлары олан башга гојунларын јер үзүндән силинмәсинә јол вермәјәҹәк. Иса әлавә едәрәк деди ки, «о ҝүнләрдәки мүсибәтдән дәрһал сонра» ҝүнәшдә, ајда вә улдузларда әламәтләр ҝөрүнәҹәк вә «сонра ҝөјдә инсан Оғлунун рәмзи пејда олаҹаг». Бүтүн милләтләр буну ҝөрүб «башларына дөјәҹәк». Сәмави үмидләри олан мәсһ олунмуш мәсиһчиләр вә онларын јер үзүндә јашамаг үмидләри олан әмәкдашлары исә гуртулушлары јахын олдуғу үчүн ‘гамәтләрини дүзәлдиб башларыны дикәлдәҹәкләр’ (Мат. 24:29, 30; Лука 21:25—28).
15. Мәсиһ ҝәләндә һансы ишләри иҹра едәҹәк?
15 Лакин јекун гәләбәсини чалмаздан әввәл инсан Оғлунун даһа бир ҝәлиши ҝөзләнилир. О пејғәмбәрлик етмишди: «Инсан Оғлу бүтүн мәләкләрлә бирҝә өз ҹалалында ҝәлиб шанлы тахтына әјләшәҹәк. Бүтүн милләтләр онун өнүндә јығышаҹаг вә о, чобан гојунлары кечиләрдән ајырдығы кими, инсанлары саф-чүрүк едәҹәк. О, гојунлары сағ тәрәфинә, кечиләри исә сол тәрәфинә гојаҹаг» (Мат. 25:31—33). Бурада сөһбәт Мәсиһин «бүтүн милләтләр»дән олан инсанлары ики група ајырмаг үчүн Һаким кими ҝәлмәсиндән ҝедир. Биринҹи група онун руһани гардашларыны (јер үзәриндәки мәсһ олунмуш мәсиһчиләри) дәстәкләјән ‘гојунлар’, икинҹи група исә ‘Ағамыз Иса һаггындакы хош хәбәрә итаәт етмәјән’ ‘кечиләр’ дахилдир (2 Салон. 1:7, 8). ‘Салеһ’ адландырылан бу гојунлар јер үзүндә «әбәди һәјата говушаҹаглар», кечиләр исә «әбәдилик мәһв едиләҹәкләр» (Мат. 25:34, 40, 41, 45, 46).
Иса јекун гәләбәсини чалыр
16. Рәһбәримиз олан Мәсиһ јекун гәләбәсини неҹә чалаҹаг?
16 Мәсиһин падшаһ вә каһин гардашларынын һамысы мөһүрләнәндән вә гојунлар мүәјјән едиләрәк хилас үчүн онун сағ тәрәфинә гојуландан сонра о, ‘јекун гәләбәсинә доғру ирәлиләјәҹәк’ (Вәһј 5:9, 10; 6:2). Гүдрәтли мәләкләрдән вә шүбһәсиз, дирилмиш гардашларындан ибарәт ордуја башчылыг едән Иса Шејтан дүнјасынын сијаси, һәрби вә игтисади системини девирәҹәк (Вәһј 2:26, 27; 19:11—21). Шејтанын пис дүнјасы там мәһв едилән заман Мәсиһ јекун гәләбәсини чалаҹаг. Бундан сонра о, Шејтаны вә онун ҹин мәләкләрини буховлајыб мин иллијә үммана атаҹаг (Вәһј 20:1—3).
17. Мәсиһ Миниллик Һөкмранлығы заманы диҝәр гојунлары һара апараҹаг вә биз нә етмәк әзминдә олмалыјыг?
17 Һәвари Јәһја бөјүк мүсибәтдән сағ чыхаҹаг башга гојунлардан ибарәт ‘бөјүк издиһам’ һагда данышараг пејғәмбәрлик етмишди ки, «тахтын јанында дуран Гузу онлары отараҹаг вә һәјат сују булагларына апараҹаг» (Вәһј 7:9, 17). Бәли, Мәсиһ Миниллик Һөкмранлығы боју сәдагәтлә она итаәт едән башга гојунлара рәһбәрлик едәҹәк вә онлары әбәди һәјата доғру апараҹаг. (Јәһја 10:16, 26—28 ајәләрини оху.) Буна ҝөрә дә ҝәлин Рәһбәримизи һәм инди, һәм дә Јеһованын вәд етдији јени дүнјада сәдагәтлә изләмәјә гәти гәрарлы олаг!
Тәкрар үчүн суаллар
• Мәсиһ тахтда отурандан сонра һансы иши ҝөрдү?
• Јығынҹаглара рәһбәрлик етмәк үчүн Мәсиһ јер үзүндә кимләрдән истифадә едир?
• Рәһбәримиз олан Мәсиһин һансы ики мәнада тезликлә ҝәләҹәји ҝөзләнилир?
• Мәсиһ бундан сонра да јени дүнјада бизә неҹә рәһбәрлик едәҹәк?
[29-ҹу сәһифәдәки шәкил]
Шејтанын пис дүнјасынын мәһви Исанын иштиракыны ајдын ҝөстәрәҹәк