Бу чәтин ҝүнләрдә ‘үрәјини тәмиз’ сахла
«ҺЕЧ КӘС дана билмәз ки, бу ҝүн килсәләрдә исмәт дејилән шеј галмајыб,— дејә католик журналисти Витторио Мессори бу јахынларда Италија Килсәсиндә баш верән секс галмагалларыны белә шәрһ едир. — Бу проблеми јалныз кешишләрин субај галмаларыны тәләб едән гануну ләғв етмәклә арадан галдырмаг мүмкүн дејил, чүнки бу кими һалларын 80 фаизи һомосексуаллыгла әлагәлидир, јәни кешишләр кишиләрлә ҹинси әлагәјә ҝирир вә оғлан ушагларыны позурлар» («Ла Стампа»).
Пислијин ҝениш вүсәт алмасы, шүбһәсиз, бу системин өз ‘ахыр ҝүнләрини’ јашадығыны ҝөстәрир (2 Тим. 3:1—5). Хәбәрләрдән ҝөрүндүјү кими, нәтиҹәдә әхлаги тәнәззүл нәинки үмумиликдә инсанлара, һәтта өзүнү Аллаһын хидмәтчиси адландыранлара да тәсир едир. Позғун вә чиркин үрәкләри онлары пис әмәлләрә сүрүкләјир (Ефес. 2:2). Иса әбәс јерә хәбәрдарлыг етмәмишди: «Үрәкдән пис дүшүнҹәләр, гатиллик, зинакарлыг, ҹинси әхлагсызлыг, оғурлуг, јаланчы шаһидлик вә күфр чыхар» (Мат. 15:19). Лакин Јеһова Аллаһ истәјир ки, Онун хидмәтчиләри «үрәк тәмизлијини» севсинләр (Сүл. мәс. 22:11). Бәс мәсиһчиләр бу чәтин ҝүнләрдә үрәкләрини неҹә тәмиз сахлаја биләрләр?
‘Үрәк тәмизлији’ нәдир?
Мүгәддәс Китабда «үрәк» сөзү чох вахт мәҹази мәнада ишләнир. Бир арајыш китабчасында јазыланлара әсасән, Мүгәддәс Китабда үрәк үчүн истифадә едилән сөз «инсанын гәлбинин дәринликләринә» вә «инсанын Аллаһла мүнасибәтинин јарандығы, әхлаги давранышы мүәјјән едән дини һәјатын көкләндији» бир јерә ишарә едир. Үрәк бизим дахили варлығымызы әкс етдирир. Һәмин китабда гејд едилдији кими, үрәк Јеһова Аллаһын Өз хидмәтчиләриндә јохлајыб арашдырдығы вә гијмәтләндирдији бир шејдир (1 Пет. 3:4).
Мүгәддәс Китабда «тәмиз» вә «пак» сөзләри физики ҹәһәтдән тәмиз олан шејләрә аид едилә биләр. Анҹаг бу сөзләр һәм дә әхлаги вә дини ҹәһәтдән саф — корланмамыш, тәмиз вә ја позулмамыш шејләрә дә аид едилир. Дағүстү тәблиғиндә Иса демишди: «Үрәји тәмиз оланлар нә бәхтијардырлар!» Бунунла Иса дахилдән тәмиз олан инсанлары нәзәрдә тутурду (Мат. 5:8). Онларын нијјәтләри, арзу вә истәкләри пакдыр. Онлар Јеһованы сидги-үрәкдән, ријасыз вә тәмәннасыз мәһәббәтлә севир, онларын етдикләри һәр бир ишин архасында мәһәббәт вә миннәтдарлыг дурур (Лука 10:27). Чох ҝүман ки, сән дә гәлбән тәмиз олмаг истәјирсән, елә дејилми?
«Үрәк тәмизлијини» горумаг асан дејил
Јеһованын хидмәтчисинин јалныз «әлләри» јох, ‘гәлби’ дә тәмиз вә пак олмалыдыр (Мәз. 24:3, 4). Амма бу ҝүн Аллаһын хидмәтчиләри үчүн ‘үрәкләрини тәмиз’ сахламаг ҝүнү-ҝүндән чәтинләшир. Шејтан вә онун табечилији алтында олан бу дүнја, о ҹүмләдән гејри-камил бәдәнимиз Јеһовадан узаглашдырмаг үчүн бизә ҝүҹлү тәзјигләр ҝөстәрир. Бунлара гаршы дурмаг үчүн ‘үрәк тәмизлијини севмәк’ вә ондан бәрк-бәрк јапышмаг олдугҹа ваҹибдир. Бу, бизи вә Аллаһла достлуғумузу горујаҹаг. Белә исә, үрәјимизи неҹә тәмиз сахлаја биләрик?
Ибраниләрә 3:12 ајәсиндә белә бир хәбәрдарлыг охујуруг: «Еј гардашлар, диггәтли олун ки, сизләрдән һеч бириндә јашајан Аллаһдан узаглашан јаман вә имансыз бир үрәк олмасын». Әҝәр үрәјимиздә ‘имансылығын’ көк салмасына јол версәк, «үрәк тәмизлијини» горујуб сахлаја билмәјәҹәјик. Инсанларын Аллаһа иманыны сарсытмаг үчүн Шејтан Иблис һансы фикирләри јајыр? Бунлардан бәзиләри тәкамүл нәзәријјәси, әхлаги вә дини нисбилик вә Мүгәддәс Јазыларын Аллаһдан илһам алмасына даир шүбһәләрдир. Биз зеһнимизин бу кими зәрәрли фикирләрә јолухмасына јол вермәмәлијик (Колос. 2:8). Шејтанын һәмләләриндән горунмағын ән әсас үсулу Мүгәддәс Китабы һәр ҝүн охумаг вә онун үзәриндән дәриндән дүшүнмәкдир. Аллаһын Кәламындан алдығымыз дәгиг биликләр Јеһоваја бәсләдијимиз мәһәббәти аловландыраҹаг вә Онун инсанларла неҹә рәфтар етдијини даһа јахшы баша дүшмәјимизә көмәк едәҹәк. Әҝәр биз јанлыш мүлаһизәләри рәдд етмәк вә үрәјимизи тәмиз сахлаја билмәк үчүн Јеһоваја иманымызы мөһкәм горујуб сахламаг истәјириксә, белә мәһәббәт вә анлајыш олдугҹа зәруридир (1 Тим. 1:3—5).
Ҹисмани арзулар баш галдыранда
Ҹисмани арзулар, еләҹә дә мадди шејләрә һәвәс үрәјимизи тәмиз сахламагда бизә манечилик төрәдә биләр (1 Јәһ. 2:15, 16). Пула мәһәббәт вә ја вар-дөвләт һәрислији Аллаһын ирадәсинә зидд ҝедән һәрәкәтләрә тәһрик едәрәк мәсиһчинин үрәјини поза биләр. Бәзиләри иш јерләриндә надүрүст һәрәкәтләрә вә башгаларыны алдатмаға јол вермиш, һәтта пул вә башга әшјалар оғурламышлар (1 Тим. 6:9, 10).
Анҹаг Јеһованын гаршысында сағлам горху инкишаф етдирмәклә, әдаләти севмәклә вә тәмиз виҹданымызы горумагда гәти гәрарлы олмагла «үрәк тәмизлијини» севдијимизи ҝөстәририк. Бу ҹүр мәһәббәт бизи даим ‘һәр саһәдә дүрүст олмаға’ тәшвиг едир (Ибр. 13:18, ЈД). Дүзҝүн вә дүрүст давранышымыз сајәсиндә јахшы шаһидлик верә биләрик. Иҹтимаи нәглијјат ширкәтиндә сүрүҹү ишләјән италијалы Јеһованын Шаһиди Емилио ичиндә 470 авро (680 АБШ доллары) олан пул кисәси тапды. О, кисәни рәисинә тәһвил верди, рәис дә ону јијәсинә гајтарды. Емилионун һәрәкәти әмәкдашларыны јаман тәәҹҹүбләндирди. Бәзиләринә исә бу о гәдәр бөјүк тәсир бағышлады ки, онларда Аллаһын Кәламына мараг ојанды вә онлар Мүгәддәс Китабы өјрәнмәјә башладылар. Нәтиҹәдә, ики аиләнин једди үзвү һәгигәти гәбул етди. Бәли, ҝөрдүјүмүз кими, тәмиз үрәклә дүрүст давранмаг башгаларыны Аллаһа һәмд етмәјә тәшвиг едә биләр (Тит. 2:10).
Мәсиһчинин үрәјинә мәнфи тәсир ҝөстәрә билән диҝәр шеј исә ҹинси әлагәјә дүзҝүн олмајан, натәмиз бахышдыр. Никаһдан әввәл, никаһданкәнар вә һомосексуал ҹинси әлагәнин чохлары тәрәфиндән нормал гәбул едилмәси мәсиһчинин үрәјини поза биләр. Әхлагсызлыға јол верән инсан ҝүнаһыны ҝизләдәрәк икили һәјат сүрмәјә башлаја биләр. Әлбәттә, бу ‘үрәјин тәмиз’ олдуғундан хәбәр вермир.
15 јашында вәфтиз олунан Габриел дәрһал пионер хидмәтинә башлады. Амма бир гәдәр сонра о, ҝеҹә клубларында пис достлара гошулду (Мәз. 26:4). О, позғун вә икили һәјат тәрзи сүрмәјә башлады вә ону мәсиһчи јығынҹағындан кәнар етмәк лазым ҝәлди. Јеһованын бу ҹәзасы ону ҹидди дүшүнмәјә вадар етди. Габриел дејир: «Әввәлләр бармагарасы бахдығым шејләрә ҹидди јанашмаға башладым. Јеһованын демәк истәдикләрини ешитмәк үчүн һәр ҝүн Мүгәддәс Китабы охујур вә теократик нәшрләри диггәтлә арашдырырдым. Мән шәхси өјрәнмәнин нә гәдәр фајдалы вә севиндириҹи олдуғуну, Мүгәддәс Китабы охумағын вә сәмими-гәлбдән дуа етмәјин инсаны неҹә мөһкәмләндирдијини анладым». Бу, Габриелә пис јолдан дөнмәјә вә Јеһова илә мүнасибәтини бәрпа етмәјә көмәк етди.
Габриел јенидән пионер хидмәтинә башлады, бу дәфә һәјат јолдашы илә бирликдә. Онун башына ҝәләнләр сүбут едир ки, «садиг вә ағыллы гул»ун нәшрләрини охујуб арашдырмаг инсана тәмиз үрәјә јијәләнмәјә вә әхлагсызлыгдан чәкинмәјә көмәк едә биләр (Мат. 24:45; Мәз. 143:10).
Сынагларла үзләшәндә ‘үрәк тәмизлијини’ неҹә горумаг олар?
Аллаһын халгына гаршы чыханларын ҝөстәрдикләри тәзјигләр, игтисади чәтинликләр вә ҹидди хәстәликләр Аллаһын бәзи хидмәтчиләрини руһдан салыр. Бәзән бу, онлара пис тәсир едир. Белә бир шеј һәтта Давуд падшаһын да башына ҝәлмишди. О дејирди: «Руһдан дүшмүшәм, бу дәһшәт гәлбими сарсытды» (Мәз. 143:4). Бәс белә анларда она нә көмәк етмишди? Давуд Аллаһын Өз хидмәтчиләри илә неҹә рәфтар етдији вә шәхсән ону неҹә гуртардығы, еләҹә дә Онун Өз бөјүк ады наминә етдикләри барәдә фикирләширди. О, Аллаһын ишләрини дәриндән дүшүнүрдү (Мәз. 143:5). Ејнилә, Јараданымыз вә Онун кечмишдә вә һал-һазырда етдији шејләр барәдә дүшүнмәк бизә көмәк едәҹәк — һәтта ағыр сынаглар алтында оланда белә.
Биз киминсә хәтринә дәјәндә, јахуд башгалары бизим хәтримизә дәјәндә өзүмүзү пис һисс едә биләрик. Әҝәр һәмин һадисә барәдә дүшүнмәјә давам етсәк, бу, гардашларымыза гаршы мәнфи һиссләрин јаранмасына ҝәтириб чыхара биләр. Башгаларындан узаг ҝәзмәклә вә инсанлара гаршы сојуг давранмагла биз ҝет-ҝедә өзүмүзә гапана биләрик. Мәҝәр белә давраныш тәрзи ‘үрәјимизин тәмиз’ олмасыны истәдијимизи ҝөстәрирми? Ајдындыр ки, белә үрәјә саһиб олмаг истәјәнләр баҹы-гардашларла мүнасибәтләринә вә фикир ајрылыгларына неҹә мүнасибәт ҝөстәрдикләринә диггәт јетирмәлидирләр.
Биз һәгиги мәсиһчиләр ҝүнү-ҝүндән позғунлашан вә әхлаги тәнәззүлә уғрајан бу дүнјадан сечилирик, чүнки биз «үрәк тәмизлијини» севирик. Аллаһын ирадәсини јеринә јетирмәјин ҝәтирдији севинҹ бизә гәлб раһатлығы верир вә һәјатымыза мүсбәт тәсир едир. Ән ваҹиби исә, биз «үрәјитәмиз оланлар»ы севән Јараданымыз Јеһова Аллаһла сых достлуг мүнасибәтиндән зөвг алырыг (Мәз. 73:1). Бәли, биз хошбәхтлијә говушаҹаг инсанларын сырасында ола биләрик, чүнки, Исанын вәд етдији кими, Аллаһ «үрәк тәмизлијини» севәнләрин хатиринә һәрәкәтә кечәндә онлар Ону «ҝөрәҹәкләр» (Мат. 5:8).