Биз Аллаһымыз Јеһованын ады илә јеријәҹәјик
«Биз дә даима вә әбәдијјән Аллаһымыз Рәббин исмилә јеријәҹәјик» (МИКЕЈА 4:5, КМ).
1. Нуһун ҝүнләриндә әхлагла әлагәдар вәзијјәт неҹә иди вә Нуһ мүасирләриндән нә илә фәргләнирди?
МҮГӘДДӘС КИТАБДА Аллаһла јеријәнләр сырасында ады биринҹи чәкилән Ханокдур. Аллаһла јеријән икинҹи инсан исә Нуһ иди. Мүгәддәс Китабда дејилир: «Нуһ садиг адам иди вә өз дөврүндә нөгсансыз иди; Нуһ Аллаһ илә јеријирди» (Јарадылыш 6:9, КМ). Амма артыг Нуһун дөврүндә инсанлар тәмиз ибадәтдән чох узаг идиләр. Һәлә үстәлик, сәдагәтсиз мәләкләр гадынларла гејри-тәбии ҹинси әлагәјә ҝирмиш вә онлардан нәһәнҝ ушаглар төрәмишди. Бу нәһәнҝләр «гәдим дөврүн гәһрәман [«зорба», КМ] вә адлы-санлы адамлары иди». Тәәҹҹүблү дејил ки, о вахтлар јер үзүндә зоракылыг ҝениш јајылмышды (Јарадылыш 6:2, 4, 11). Буна бахмајараг, Нуһ нөгсансыз бир инсан олараг «салеһлик тәблиғчиси» иди (2 Петер 2:5). Һәјатыны горумаг үчүн Аллаһ она ҝәми тикмәји әмр едәндә, Нуһ Аллаһа гулаг асыб «һәр шеји етди: Аллаһ она неҹә әмр етмишдисә, о да һәр шеји еләҹә јеринә јетирди» (Јарадылыш 6:22). Һәгигәтән дә, Нуһ Аллаһла јеријирди.
2, 3. Нуһ бизим үчүн һансы ҝөзәл нүмунәни гојуб?
2 Павел Нуһу да садиг шаһидләр сијаһысына дахил едәрәк онун һаггында јазырды: «Нуһ иман васитәсилә, һәлә заһир олмајан шејләр һаггында Аллаһ тәрәфиндән хәбәрдар едилиб, өз аиләсини хилас етмәк үчүн ихласкарлыгла ҝәми һазырлады; о, бунунла дүнјаны мәһкум етди вә имандан ирәли ҝәлән салеһлијин вариси олду» (Ибраниләрә 11:7). Нуһ неҹә дә ҝөзәл өрнәкдир! О, Јеһованын сөзләринин һәјата кечәҹәјинә әмин олдуғундан вахтыны, ҝүҹүнү вә бүтүн имканларыны Аллаһын әмрләрини јеринә јетирмәк үчүн сәрф едирди. Бу ҝүн дә бир чохлары дүнјанын тәклиф етдији шејләрдән имтина едиб, вахтыны, ҝүҹүнү вә бүтүн имканларыны Јеһованын әмрләринә табе олмаг үчүн истифадә едирләр. Бу ҹүр иман тәгдирәлајигдир вә һәм онлары, һәм дә башгаларыны хилас етмәјә гадирдир (Лука 16:9; 1 Тимотејә 4:16).
3 Иман етмәк, әввәлки мәгаләдә мүзакирә етдијимиз Ханок үчүн чәтин олдуғу гәдәр онун нәтиҹәси олан Нуһ вә аиләси үчүн дә чәтин иди. Ханокун да, Нуһун да ҝүнләриндә салеһ инсанлар азлыг тәшкил едирди. Дашгындан јалныз Аллаһа садиг галан сәккиз инсан хилас олду. Нуһ зоракылыг вә әхлагсызлыгла долу олан дүнјада салеһлији тәблиғ едирди. Үстәлик, аиләси илә бирликдә үмумдүнја дашгынындан горунмаг үчүн ағаҹдан бөјүк бир ҝәми дә дүзәлдирди. Бундан әввәл инсанлар һеч вахт дашгын ҝөрмәмишдиләр. Она ҝөрә дә, Нуһ вә аиләсинин мәшғул олдуғу иш онлара гәрибә ҝәлирди.
4. Иса Нуһун мүасирләринин һансы гүсуру һаггында данышырды?
4 Мараглыдыр ки, Иса Нуһун ҝүнләри һаггында сөз саларкән, о вахтлар баш алыб ҝедән зоракылыг, јалан дин вә ја әхлагсызлыг һаггында бир сөз демәди. О, инсанларын ешитдикләри хәбәрдарлыға диггәт јетирмәк истәмәдикләрини вурғулады. Иса дејирди ки, «Нуһун ҝәмијә ҝирдији ҝүнә гәдәр... инсанлар јејиб, ичиб, евләниб, әрә ҝедирдиләр». Јејиб ичмәк, евләниб әрә ҝетмәк — бурада пис нә вар ки? О адамлар «нормал һәјат» сүрүрдүләр! Амма дашгын јахынлашмагда, Нуһ да салеһлији тәблиғ етмәкдә иди. Нуһун сөзләри илә давранышы онлары хәбәрдар етмәли иди. Буна бахмајараг, онлар «дашгын ҝәлиб һамысыны апарынҹаја гәдәр фикир вермирдиләр» (Матта 24:38, 39, ЈД).
5. Нуһа вә онун аиләсинә һансы кејфијјәтләр лазым иди?
5 О ҝүнләрә нәзәр саланда, Нуһун бу ҹүр һәјат јолу сечмәклә нә гәдәр мүдрик даврандығыны ҝөрүрүк. Амма Дашгын ҝәлмәздән әввәл башгаларындан фәргләнмәк үчүн бөјүк ҹәсарәт тәләб олунурду. Нуһун вә онун аиләсинин мөһкәм иманы олмасајды, онлар нә бөјүк бир ҝәми дүзәлдәр, нә дә ону һејван нөвләри илә долдура биләрдиләр. Ҝөрәсән, бу садиг хидмәтчиләрдән киминсә үрәјиндән инсанларын диггәт мәркәзиндә олмамаг вә «нормал» бир һәјат сүрмәк кечирдими? Үрәкләринә һәрдән белә фикирләр ҝәлмиш олса да, онлар нөгсансызлыгда бүдрәмәдиләр. Иманы сајәсиндә Нуһ, узун илләрдән сонра ҝәлән Дашгындан хилас олду. Онун ҝөзләдији мүддәт, һәр биримизин бу системдә һәлә дөзмәли олаҹағымыз вахтдан даһа узундур. Јеһова исә «нормал» һәјат сүрәнләрин вә һансы зәманәдә јашадыгларына фикир вермәјәнләрин һамысынын үзәриндә өз һөкмүнү јеринә јетирди.
Зоракылыг јенидән јер үзүнү бүрүјүр
6. Дашгындан сонра јер үзүндә јенә дә һансы вәзијјәт мөвҹуд иди?
6 Дашгынын сулары чәкилдикдән сонра инсанлар јенидән јер үзүнә јајылмаға башладылар. Амма онлар һәлә дә гејри-камил идиләр вә ‘үрәкләринин фикирләри ҹаванлыгдан бәри пис’ олмагда иди (Јарадылыш 8:21). Бундан башга, ҹинләр артыг инсан ҹилдинә ҝирә билмәсәләр дә, чох фәал идиләр. Аллаһсыз бәшәријјәт «шәририн һакимијјәти алтында» олдуғуну тезликлә бүрузә верди. Бу ҝүн олдуғу кими, о вахтлар да һәгиги Аллаһын хидмәтчиләри «Иблисин һијләләринә гаршы» мүбаризә апармалы олурдулар (1 Јәһја 5:19; Ефеслиләрә 6:11, 12).
7. Дашгындан сонра дүнјада зоракылыг неҹә вүс’әт алды?
7 Дашгындан сонра доғулан Нәмрудун ҝүнләриндән е’тибарән јер үзүндә јенидән зоракылыг јајылмаға башлады. Әһалинин чохалмасы вә техниканын инкишафы илә зоракылыг даһа да ҝениш вүс’әт алды. Әввәлләр инсанлар гылынҹ, низә, ох вә камандан, һәмчинин дөјүш арабаларындан, сонралар исә мушкет, топ, түфәнҝ вә 20-ҹи әсрин тәкмилләшдирилмиш артиллеријасындан истифадә едирдиләр. Биринҹи Дүнја Мүһарибәси заманы тәјјарәләр, танклар, су алты ҝәмиләри вә зәһәрләјиҹи газ кими даһа да горхулу силаһлар мејдана ҝәлди. Бу мүһарибәдә милјонларла инсан өз һәјатыны итирди. Буну ҝөзләнилмәз һадисә адландырмаг олармы? Әсла јох!
8. Вәһј 6:1-4 ајәләри неҹә јеринә јетир?
8 Иса Мәсиһ 1914-ҹү илдә Аллаһын сәмави Падшаһлығынын Падшаһы олду вә о вахтдан е’тибарән «Рәббин ҝүнү» башлады (Вәһј 1:10). «Вәһј» китабындакы ҝөрүнтүдә Иса ағ атын белиндә отурмуш јенилмәз бир Падшаһ кими тәсвир едилир. Онун ардынҹа һәр бири бәшәријјәтин үзәринә ҝәләҹәк бәлалары тәмсил едән башга атлылар ҝәлир. Бу атлылардан бири күрән рәнҝли ата миниб. Она «дүнјадан сүлһү ҝөтүрмәк рүсхәти верилди ки, инсанлар бир-бирини өлдүрсүн; вә атлыја бөјүк бир гылынҹ верилмишди» (Вәһј 6:1-4). Бу ат вә онун белиндә отуран атлы — мүһарибәни, бөјүк бир гылынҹ исә ҝүҹлү силаһларын истифадә едилдији мүасир мүһарибәләрин ҝөрүнмәз дәрәҹәдә дағыдыҹы ҝүҹүнү тәмсил едир. Бу ҝүн бу силаһлара һәр бири он минләрлә инсаны мәһв етмәк габилијјәтиндә олан нүвә гурғулары, һәмчинин бу гурғулары минләрлә километр мәсафәдә јерләшән һәдәфә чатдыран ракетләр вә күтләви гырғын силаһлары олан тәкмилләшдирилмиш кимјәви вә биоложи силаһлар да аиддир.
Биз Јеһованын хәбәрдарлыгларына фикир веририк
9. Мүасир зәманә илә Дашгындан әввәлки дүнја арасында һансы охшарлыг вар?
9 Нуһун ҝүнләриндә нәһәнҝләрин тәһрики илә инсанларын төрәтдији зоракылыг уҹбатындан Јеһова дүнјаны мәһв етди. Бәс бу ҝүн вәзијјәт нә јердәдир? Зоракылыг бу ҝүн кечмишдә олдуғундан даһа азмы јајылыб? Хејр! Инсанлар бу ҝүн дә, Нуһун ҝүнләриндә олдуғу кими, өз ишләри илә мәшғул олур, «нормал һәјат» сүрүр вә ешитдикләри хәбәрдарлыға диггәт јетирмәк истәмирләр (Лука 17:26, 27). Бунлары нәзәрә алараг, Јеһованын итаәтсиз бәшәријјәти јенидән мәһв едәҹәјинә шүбһә едә биләрикми? Хејр, едә билмәрик!
10. а) Мүгәддәс Китаб пејғәмбәрликләриндә һансы хәбәрдарлыг дөнә-дөнә тәкрарланыр? б) Бу ҝүн һансы һәјат тәрзи јеҝанә мүдрик јолдур?
10 Дашгындан јүз илләр әввәл Ханок бизим системин мәһв олаҹағы һагда пејғәмбәрлик етмишдир (Јәһуда 14, 15). Иса Мәсиһ дә гаршыда ҝөзләнилән «бөјүк мәшәггәт» һаггында данышырды (Матта 24:21). О ҹүмләдән, бир чох башга пејғәмбәрләр дә бу вахт һаггында инсанлары хәбәрдар едирдиләр (Језекел 38:18-23; Даниел 12:1; Јоел 2:31, 32). «Вәһј» китабы исә бу сонунҹу мәһви ҹанлы сурәтдә тәсвир едир (Вәһј 19:11-21). Нуһ кими, һәр биримиз салеһлијин фәал тәблиғчисијик. Биз Јеһованын хәбәрдарлыгларына фикир верир вә јахынларымызын да бу хәбәрдарлыглара фикир вермәси үчүн мәһәббәтлә гајғы ҝөстәририк. Белә етмәклә, Нуһ кими, биз дә Аллаһла јеријирик. Јашамаг истәјән һәр бир кәсин Аллаһла јеримәјә давам етмәси доғрудан да чох ваҹибдир. Бәс ҝүнбәҝүн гаршылашдығымыз тәзјигләрә бахмајараг, буну неҹә едә биләрик? Аллаһын нијјәтләринин јеринә јетәҹәјинә иманымызы мөһкәмләндирмәлијик (Ибраниләрә 11:6).
Сыхынтылы вахтларда Аллаһла јеримәјә давам един
11. Биринҹи әсрдә јашајан мәсиһчиләрдән биз һансы нүмунәни ҝөтүрә биләрик?
11 Биринҹи әсрдә јашајан мәсһ едилмиш мәсиһчиләр һаггында ‘бу Јола садиг оланлар’ кими данышылырды (Һәвариләрин ишләри 9:2). Онларын һәјатында Јеһоваја вә Иса Мәсиһә олан иман ән башлыҹа јери тутурду. Онлар Ағаларынын ҝетдији јолла јеријирдиләр. Бу ҝүн садиг мәсиһчиләр дә ејнилә давранырлар.
12. Иса инсанлары мө’ҹүзәли шәкилдә дојдурдугдан сонра нә баш верди?
12 Иманын ваҹиблијини Иса Мәсиһин хидмәти заманы баш верән бир һадисә јахшы ҝөстәрир. Бир дәфә Иса 5000 нәфәрә јахын адамы мө’ҹүзәли шәкилдә дојдурду. Инсанлар һејрәт ичиндә идиләр вә чох севинирдиләр. Лакин сонра нәјин баш вердијинә фикир верин. Биз охујуруг: «Онда Исанын ҝөстәрдији мө’ҹүзәни ҝөрән халг: “Доғрудан да дүнјаја ҝәлмәли олан Пејғәмбәр Будур!” — деди. Иса да, онларын Ону Һөкмдар етмәк үчүн ҝәлиб зорла апармаг истәдикләрини билиб, јенә тәк-тәнһа даға чәкилди» (Јәһја 6:10-15). Һәмин ҝеҹә Иса башга бир јерә ҝетди. Исанын падшаһ олмагдан имтина етмәси, ҝөрүнүр, бир чохларыны мә’јус етмишдир. Чүнки о, падшаһ олмаг үчүн кифајәт гәдәр мүдриклијә вә инсанларын физики тәләбатларыны тә’мин етмәк үчүн ҝүҹә малик олдуғуну артыг ҝөстәрмишди. Лакин онун Падшаһ олмасы үчүн Јеһованын тә’јин етдији вахт һәлә ҝәлмәмишди. Бундан башга, Исанын Падшаһлығы јердә јох, ҝөјдә олмалы иди.
13, 14. Исанын динләјиҹиләриндән бир чохлары һансы дүшүнҹә тәрзинә малик иди вә онларын иманлары неҹә сынанды?
13 Бунунла белә, халг Исаны ахтармаға башлады вә Јәһјанын јаздығы кими, ону «ҝөлүн о бири тајында» тапды. Исанын падшаһ олмагдан имтина етмәсинә бахмајараг, бу инсанлар нә үчүн ону ахтарырды? Буна сәбәб, бир чохларынын ҹисмани дүшүнҹә тәрзинә малик олмасы иди. Онлары даһа чох Мусанын ҝүнләриндә Јеһованын сәһрада долашан исраиллиләрә вердији физики гида дүшүндүрүрдү. Үрәкләриндән Исанын онлары мадди гида илә тә’мин етмәси кечирди. Иса онларын мотивләрини баша дүшүрдү вә дүшүнҹә тәрзләрини дәјишсинләр дејә, онлара руһани һәгигәтләри өјрәтмәјә башлады (Јәһја 6:17, 24, 25, 30, 31, 35-40). Амма бу, бә’зиләринин үрәјинҹә дејилди. Хүсусән дә, Иса «Сизә доғрусуну, доғрусуну дејирәм: Инсан Оғлунун әтини јејиб, ганыны ичмәдикҹә, дахилиниздә һәјат олмаз. Мәним әтими јејиб, ганымы ичәнин әбәди һәјаты вардыр; Мән дә ону сон ҝүндә дирилдәҹәјәм» сөзләрини дејәндә халг үрәјиндә оланлары дилинә ҝәтирәрәк дејинмәјә башлады (Јәһја 6:53, 54).
14 Исанын ҝәтирдији әјани мисаллар чох заман инсанларын үрәкләриндә Аллаһла јеримәк истәјинин олуб-олмадығыны ашкара чыхарырды. Онун бу сәфәр ҝәтирдији мисал да истисна дејилди вә чох кәскин реаксијаја сәбәб олду. Јәһја давам едир: «Шаҝирдләриндән бир чоху буну ешитдикдә: “Бу чәтин сөздүр. Ону ким динләјә биләр?” — дедиләр». Иса баша салды ки, онлар бу сөзләрин руһани мә’насыны дәрк етмәјә чалышмалыдырлар. О деди: «Һәјат верән руһдур; ҹисмани тәбиәт һеч бир шејә јарамаз; сизә сөјләмиш олдуғум сөзләр руһдур вә һәјатдыр». Јенә дә, динләјиҹиләринин әксәријјәти она гулаг асмаг истәмирди. Биз охујуруг: «Бу замандан е’тибарән шаҝирдләрдән бир чоху Ондан ајрылыб, артыг Онунла ҝәзмирди» (Јәһја 6:60, 63, 66).
15. Исанын шаҝирдләриндән бә’зиләри һансы дүзҝүн дүшүнҹә тәрзинә малик идиләр?
15 Лакин Исанын шаҝирдләринин һамысы онун сөзләринә бу ҹүр реаксија ҝөстәрмәди. Дүздүр, садиг шаҝирдләр онун сөзләрини сона гәдәр анламасалар да, онларын Исаја олан иманлары сарсылмады. Бу садиг шаҝирдләрдән бири олан Петер, Исаны тәрк етмәјән шаҝирдләрин һиссләрини белә ифадә етди: «Ја Рәбб, биз кимин јанына ҝедә биләрик? Әбәди һәјатын сөзләри Сәндәдир» (Јәһја 6:68). Петер неҹә дә ҝөзәл дүшүнҹә тәрзинә малик иди, онун нүмунәси неҹә дә дәјәрлидир!
16. Бизим иманымыз неҹә сынана биләр вә һансы дүзҝүн дүшүнҹә тәрзини инкишаф етдирмәлијик?
16 Исанын еркән шаҝирдләри кими, бизим дә иманымыз сынаға чәкилә биләр. Мәсәлән, Јеһованын вә’дләринин бизим истәдијимиз вахтда һәјата кечмәдији үчүн руһдан дүшә биләрик. Вә јахуд, бизә елә ҝәлә биләр ки, Мүгәддәс Китаба әсасланан нәшрләримиздәки бә’зи ајәләрин изаһатыны баша дүшмәк чәтиндир. Мәсиһчи баҹы-гардашларымыздан биринин давранышы бизи мә’јус едә биләр. Мәҝәр, бу вә ја буна бәнзәр сәбәбләрә ҝөрә Аллаһла јеримәјә сон гојмаг дүзҝүн олардымы? Сөзсүз ки, јох! Исаны тәрк едән шаҝирдләр ҹисмани дүшүнҹә тәрзинә малик идиләр. Биз диггәтли олмалыјыг ки, буна јол вермәјәк.
«Биз исә... ҝери чәкиләнләрдән дејилик»
17. Аллаһла јеримәјә давам етмәк үчүн бизә нә көмәк едә биләр?
17 Һәвари Павел јазырды: «Һәр Мүгәддәс Јазы Аллаһдан илһам алмыш[дыр]» (2 Тимотејә 3:16). Мүгәддәс Китаб сәһифәләриндән Јеһова бизә ајдын шәкилдә дејир: «Јол будур, ҝедин бу јола» (Јешаја 30:21). Аллаһын Кәламына итаәт етмәјимиз бизә ‘нә ҹүр һәрәкәт етдијимизә диггәт вермәјә’ көмәк едир (Ефеслиләрә 5:15). Мүгәддәс Китабы өјрәниб, онун үзәриндә дәриндән дүшүнмәклә биз ‘һәгигәтә ҝөрә һәрәкәт едирик’ (3 Јәһја 3). Доғрудан да, Исанын дедији кими, «һәјат верән руһдур; ҹисмани тәбиәт һеч бир шејә јарамаз». Дүзҝүн јолда јеримәјимизә көмәк едән јеҝанә е’тибарлы рәһбәрлик Јеһованын Кәламы, руһу вә тәшкилаты васитәсилә верилән руһани рәһбәрликдир.
18. а) Инсанларын бә’зиләри һансы мүдрик олмајан һәрәкәти едирләр? б) Биз неҹә иман инкишаф етдирмәлијик?
18 Ҹисмани дүшүнҹә тәрзинә малик оланлар вә ја үмидләринин һәјата кечмәдијини ҝөрәнләр чох заман дүнјанын тәклиф етдији шејләрдән там сурәтдә истифадә етмәјә ҹан атырлар. Беләләри Падшаһлығын марагларыны һәјатларында өн плана гојмагданса, шәхси мәгсәдләрини ҝүдүр вә һансы вахтда јашадыгларыны унудараг артыг ‘ојаг дурмаға’ еһтијаҹ дујмурлар (Матта 24:42). Бу ҹүр һәјат тәрзи сон дәрәҹә дүшүнҹәсизликдән хәбәр верир. Һәвари Павелин сөзләринә фикир верин: «Биз исә һәлак олмаг үчүн ҝери чәкиләнләрдән дејилик. Биз, ҹанын гуртулушу үчүн иман едәнләрдәник» (Ибраниләрә 10:39, И–93). Биз дә, Ханок вә Нуһ кими, сыхынтылы вахтларда јашасаг да, онлар кими, Аллаһла јеримәк шәрәфинә маликик. Демәли, Јеһованын вә’дләринин јеринә јетмәсини, пислијин мәһвини вә салеһлијин һөкм сүрдүјү јени дүнјаны өз ҝөзләримизлә ҝөрәҹәјимизә әмин ола биләрик. Бу неҹә дә ҝөзәл үмиддир!
19. Микејанын сөзләринә ҝөрә, Аллаһын һәгиги хидмәтчиләри һансы јолла јеримәлидирләр?
19 Микеја пејғәмбәр Аллаһ тәрәфиндән илһамланмыш китабында милләтләрин һамысынын ‘өз аллаһларынын јолу илә ҝедәҹәји’ барәсиндә јазырды. Сонра исә өзү вә Аллаһын башга садиг хидмәтчиләри һаггында дејир: «Биз исә даима вә әбәдијјән Аллаһымыз Рәббин исмилә јеријәҹәјик» (Микеја 4:5). Әҝәр сиз дә Микеја кими, Аллаһла јеримәк гәрарында гәтијјәтлисинизсә, јашадығыныз вахтлар нә гәдәр сыхынтылы олурса-олсун, Јеһова илә мүнасибәтләринизи инкишаф етдирин (Јагуб 4:8). Вә гој һәр биримизин үрәјиндә даима вә әбәдијјән Аллаһымыз Јеһова илә јеримәк арзусу јашасын!
Неҹә ҹаваб верәрдиниз?
• Нуһун ҝүнләри илә бизим ҝүнләр арасында һансы охшарлыг вар?
• Нуһ вә онун аиләси һансы јолла јеријирдиләр вә биз онларын иманындан неҹә нүмунә ҝөтүрә биләрик?
• Исанын давамчыларындан бә’зиләри һансы сәһв дүшүнҹә тәрзинә малик иди?
• Мәсиһчиләр нә етмәкдә гәти гәрарлыдырлар?
[31-ҹи сәһифәдәки шәкил]
Падшаһлығын тәблиғчиләри олан бизләр «ҝери чәкиләнләрдән дејилик».
[32-ҹи сәһифәдәки шәкилләр]
Нуһун ҝүнләриндә олдуғу кими, бу ҝүн дә инсанларын башы ҝүндәлик ишләринә гарышыб.