Һәјат суларынын гајнагларына апарылмаға лајиг ҝөрүлмүшләр
«Гузу онлара чобан олаҹаг вә һәјат суларынын гајнагларына апараҹаг». ВӘҺЈ 7:17
1. Аллаһын Кәламы мәсһ олунмуш мәсиһчиләри неҹә адландырыр вә Иса онларын үзәринә һансы мәсулијјәти гојду?
АЛЛАҺЫН КӘЛАМЫ мәсһ олунмуш мәсиһчиләри Мәсиһин јер үзүндәки маликанәсинин гејдинә галан «садиг вә ағыллы гул» адландырыр. 1918-ҹи илдә Мәсиһ ‘гулу’ јохлајанда мәсһ олунмушлары ‘вахтлы-вахтында онлара јемәк верән’ тапды. Буна ҝөрә Аға олан Иса ‘бүтүн маликанәсини’ онлара тапшырды. (Матта 24:45-47 ајәләрини оху.) Беләликлә, нә гәдәр ки, мәсһ олунмушлар сәмави мирасларыны алмајыблар, онлар јер үзүндә диҝәр һәмиманлыларына хидмәт едирләр.
2. Исанын маликанәсини тәсвир ет.
2 Ағанын өз маликанәси үзәриндә сәлаһијјәти вар вә ондан истәдији кими истифадә едә биләр. Јеһованын тахта чыхардығы Падшаһ Иса Мәсиһин маликанәсинә јер үзүндә Падшаһлыға аид олан һәр шеј дахилдир. Һәвари Јәһјанын вәһјдә ҝөрдүјү ‘бөјүк издиһам’ да бура дахилдир. Јәһја бөјүк издиһамы белә тәсвир едир: «Һәр милләтдән, бүтүн гәбиләләрдән, халглардан вә дилләрдән олан, кимсәнин сајмаға гадир олмадығы бөјүк бир издиһам ағ либас ҝејиб, әлләриндә палма будағы, тахтын вә Гузунун гаршысында дурублар» (Вәһј 7:9).
3, 4. Бөјүк издиһамын үзвләри һансы шәрәфә лајиг ҝөрүлүбләр?
3 Бөјүк издиһамын үзвләри Исанын ‘башга гојунлар’ адландырдығы група дахилдир (Јәһ. 10:16). Онларын јерүзү Ҹәннәтдә әбәди јашамаға үмидләри вар. Бөјүк издиһамын үзвләри әминдирләр ки, Иса онлары «һәјат суларынын гајнагларына апараҹаг вә Аллаһ онларын ҝөзләриндән һәр јашы силәҹәкдир». Буна ҝөрә дә «либасларыны јујуб, онлары Гузунун ганы илә ағартдылар» (Вәһј 7:14, 17). Исанын фидијә гурбанлығына иман ҝәтирдикләри үчүн, онларын либаслары Аллаһын ҝөзүндә ‘ағардылыб’. Онлар Ибраһим кими Аллаһын достлары симасында салеһ елан олунублар.
4 Башга гојунларын ҝетдикҹә артан издиһамы Аллаһын ҝөзүндә салеһ сајылдығы үчүн, бу дүнја ‘бөјүк мәшәггәтдә’ мәһв олунан заман хилас олмаға үмид едә биләр (Јаг. 2:23-26). Онлар Јеһоваја јахынлаша билир вә бир груп кими Һар-Меҝидондан сағ чыхмаға үмид едирләр (Јаг. 4:8; Вәһј 7:15). Онлар мүстәгил груп кими фәалијјәт ҝөстәрмирләр, көнүллү олараг сәмави Падшаһын вә онун јердәки мәсһ олунмуш гардашларынын рәһбәрлији алтында хидмәт едирләр.
5. Бөјүк издиһамын үзвләри Мәсиһин мәсһ олунмуш гардашларына неҹә көмәк едирләр?
5 Мәсһ едилмиш мәсиһчиләр индијәдәк Шејтан дүнјасынын шиддәтли тәгибләринә мәруз галмышлар; тәгибләр бундан сонра да давам едәҹәк. Буна бахмајараг, онлар бөјүк издиһамдан олан һәмкарларынын көмәјинә архајын ола биләрләр. Инди мәсһ олунмушларын сајы аз олса да, бөјүк издиһамын сајы һәр ил јүз минләрлә артыр. Мәсһ олунмушлар бүтүн дүнјада олан тәхминән 100 000 мәсиһчи јығынҹағынын һәр биринә шәхсән нәзарәт едә билмәзләр. Беләликлә, башга гојунларын мәсһ олунмушлара көмәк етдији саһәләрдән бири, бөјүк издиһамдан тәләбләрә мүвафиг олан кишиләрин јығынҹаг ағсаггаллары кими хидмәт етмәсидир. Онлар милјонларла мәсиһчинин гајғысына галмагда ‘садиг вә ағыллы гула’ көмәк едирләр.
6. Башга гојунлардан олан һәмкарларынын мәсһ олунмушлара ҝөстәрдији көмәк неҹә пејғәмбәрлик едилмишди?
6 Башга гојунларын мәсһ олунмушлара көнүллү олараг јардым етмәси пејғәмбәр Јешаја тәрәфиндән габагҹадан дејилмишди. О јазырды: «Рәбб белә дејир: “Мисирлиләрин вар-дөвләти, Кушун тиҹарәт ҝәлири, уҹабојлу Севалылар јаныныза ҝәлиб гулунуз олаҹаг. Онлар буховланаҹаг вә ардынызҹа ҝедәҹәк”» (Јешаја 45:14). Бу ҝүн јер үзүндә јашамаға үмид едән мәсиһчиләр мәсһ олунмуш гул синфинин вә онун Рәһбәрлик Шурасынын рәһбәрлијини гәбул едәрәк, мәҹази мәнада онларын ардынҹа ҝедир. Башга гојунлар ‘гул’ кими өз ҝүҹләрини вә мадди вәсаитләрини һәвәслә вә сәмими гәлбдән Мәсиһин јер үзүндәки мәсһ олунмуш давамчыларына тапшырдығы үмумдүнја тәблиғ ишини дәстәкләмәјә сәрф едирләр (Һәв. иш. 1:8; Вәһј 12:17).
7. Бөјүк издиһам һансы тәлими алыр?
7 Бөјүк издиһамын үзвләри мәсһ олунмуш гардашларына көмәк етмәклә Һар-Меҝидондан сонра јашајаҹаг јени инсан ҹәмијјәтинин тәмәли олмаг үчүн тәлим алырлар. Бу тәмәл сабит вә мөһкәм олмалы, онун үзвләри исә Ағанын ҝөстәришләрини јеринә јетирмәји баҹармалы вә буну һәвәслә етмәлидирләр. Һәр мәсиһчијә Падшаһ Иса Мәсиһ үчүн фајдалы ола биләҹәјини ҝөстәрмәјә имкан верилир. Мәсиһчи инди иман ҝәтирмәклә вә садиг галмагла, ҝөстәрир ки, јени дүнјада Падшаһын вердији ҝөстәришләрә һәвәслә табе олаҹаг.
Бөјүк издиһам иманыны сүбут едир
8, 9. Бөјүк издиһамын үзвләри иманларыны неҹә сүбут едирләр?
8 Мәсһ олунмушларын һәмкарлары олан башга гојунлар иманларыны мүхтәлиф јолларла сүбут едирләр. Биринҹиси, онлар Аллаһын Падшаһлығы һаггында хош хәбәрин тәблиғ олунмасында мәсһ олунмушлара көмәк едирләр (Мат. 24:14; 28:19, 20). Икинҹиси, Рәһбәрлик Шурасындан алдыглары рәһбәрлијә һәвәслә табе олурлар (Ибр. 13:17; оху: Зәкәријјә 8:23).
9 Үчүнҹүсү, бөјүк издиһамын үзвләри Јеһованын салеһ нормаларына ујғун јашајараг мәсһ олунмуш гардашларыны дәстәкләјирләр. Онлар өзләриндә «мәһәббәт, севинҹ, сүлһ, сәбир, лүтфкарлыг, јахшылыг, сәдагәт, һәлимлик, өзүнә һаким олмаг» кими кејфијјәтләри инкишаф етдирмәјә чалышырлар (Галат. 5:22, 23). Бу ҝүн инсанлар белә кејфијјәтләрдән чох, ‘ҹисмани тәбиәтин әмәлләрини’ тәзаһүр етдирмәјә мејллидирләр. Буна бахмајараг, бөјүк издиһамын үзвләри ‘зина, ҹинси әхлагсызлыг, мурдарлыг, сәфаһәт, бүтпәрәстлик, сеһрбазлыг, дүшмәнчилик, мүнагишә, һәсәд, гәзәб, еһтираслылыг, нифаг, тәфригәләр, пахыллыг, гатиллик, сәрхошлуг, ејш-ишрәтләр вә буна бәнзәр шејләрдән’ узаг дурмаға гәти гәрарлыдырлар (Галат. 5:19-21).
10. Бөјүк издиһамын үзвләри нәји етмәјә гәрарлыдырлар?
10 Гејри-камил олдуғумуздан мәсиһчи кејфијјәтләри тәзаһүр етдирмәк, ҹисмани тәбиәтин әмәлләриндән гачмаг вә Шејтан дүнјасынын тәзјигләринә мүгавимәт ҝөстәрмәк асан олмаја биләр. Буна бахмајараг, шәхси зәифликләримизин, мүвәггәти уғурсузлугларын вә ја зәиф сәһһәтимизин бизи руһдан салараг иманымызы зәифләтмәсинә вә ја Јеһоваја мәһәббәтимизин азалмасына јол вермәмәк әзминдәјик. Биз билирик ки, Јеһова Өз вәдини јеринә јетирәҹәк: бөјүк издиһамы бөјүк мәшәггәтдә хилас едәҹәк.
11. Мәсиһчиләрин иманыны зәифләтмәк үчүн Шејтан һансы васитәләрә әл атыр?
11 Анҹаг биз сајыглығымызы итирмирик, чүнки билирик ки, әсл дүшмәнимиз Шејтандыр вә о, асанлыгла тәслим олмајаҹаг. (1 Петер 5:8 ајәсини оху.) О, дөнүкләрин вә башгаларынын васитәсилә бизи инандырмаға чалышыр ки, риајәт етдијимиз тәлимләр јаландыр. Анҹаг онун бу фәнди адәтән уғурсуз олур. Елә тәгибләр дә һәрдән тәблиғ ишини ләнҝитсә дә, чох вахт тәгиб олунанларын иманыны мөһкәмләндирир. Бунунла белә, Шејтан иманымызы зәифләдә биләҹәјини дүшүндүјү васитәләрә ҝетдикҹә даһа чох әл атыр. О өз мәгсәдинә чатмаг үчүн мәјуслуг һиссиндән истифадә едир. Биринҹи әсрин мәсиһчиләринә бу тәһлүкә барәдә хәбәрдарлыг едилмишди: «Ҝүнаһкарлар тәрәфиндән Она гаршы олан бу гәдәр мүхалифәтә таб ҝәтирән Шәхси [Мәсиһи] фикирләшин». Нә үчүн? «Ҹаныныз јорулуб, тагәтдән дүшмәјәсиниз» (Ибр. 12:3).
12. Мүгәддәс Китабын мәсләһәти руһ дүшкүнлүјүнә гапыланлары неҹә мөһкәмләндирир?
12 Елә вахт олубму ки, артыг ҝүҹүнүн галмадығыны дүшүнәсән? Һәрдән өзүнү уғурсуз адам кими һисс едирсәнми? Әҝәр беләдирсә, Шејтана јол вермә ки, бу һиссләрдән истифадә едәрәк Јеһоваја хидмәтинә мане олсун. Мүгәддәс Китабы дәриндән арашдырмаг, үрәкдән дуа етмәк, ҝөрүшләрә мүнтәзәм ҝәлмәк вә һәмиманлыларла үнсијјәтдә олмаг сәни мөһкәмләндирәҹәк вә ‘тагәтдән дүшмәјә’ гојмајаҹаг. Јеһова Она хидмәт едәнләрә јени гүввәт вермәји вәд едиб вә О бу вәдинә мүтләг әмәл едәҹәк. (Јешаја 40:30, 31 ајәләрини оху.) Диггәтини хидмәтә ҹәмләшдир. Вахт апаран ишләрдән узаг дур вә башгаларына көмәк етмәјә чалыш. О заман руһ дүшкүнлүјүнә бахмајараг, таб ҝәтирмәк үчүн ҝүҹ тапаҹагсан (Галат. 6:1, 2).
Бөјүк мәшәггәтдән чыхыб јени дүнјаја гәдәм гојанлар
13. Һар-Меҝидондан сағ чыханлара һансы тапшырыг вериләҹәк?
13 Һар-Меҝидондан сонра чохлу сајда гејри-салеһ инсанлара Јеһованын јолларыны өјрәтмәк лазым ҝәләҹәк (Һәв. иш. 24:15). Онлар Исанын фидијә гурбанлығы һаггында өјрәнмәлидирләр; бундан башга фидијәдән фајдаланмаг үчүн она неҹә иман ҝәтирмәли олдугларыны билмәлидирләр. Әввәлки јалан дини етигадларындан имтина едиб, кечмиш һәјат тәрзләриндән әл чәкмәлидирләр. Онлар һәгиги мәсиһчиләри характеризә едән јени мәнлији ҝејинмәји өјрәнмәлидирләр (Ефес. 4:22-24; Колос. 3:9, 10). Һар-Меҝидондан сағ чыханларын иши чох олаҹаг. Индики пис дүнјанын тәзјигләри вә манеәләри олмадан Јеһоваја бу ҹүр хидмәт етмәк неҹә дә бөјүк севинҹ ҝәтирәҹәк!
14, 15. Бөјүк мәшәггәтдән сағ чыханларла дирилән салеһ инсанлар бир-бириләри илә нәји бөлүшәҹәкләр?
14 Иса јер үзүндә хидмәт етмәздән габаг өлән Јеһованын садиг хидмәтчиләри дә чох шеји өјрәнмәли олаҹаглар. Онлар јолуну ҝөзләдикләри, амма ҝөрмәдикләри вәд олунмуш Мәсиһ һаггында өјрәнәҹәкләр. Бу хидмәтчиләр артыг әввәлки һәјатларында Јеһованын тәлимләрини һәвәслә гәбул етдикләрини ҝөстәрмишләр. Тәсәввүр един: онлара көмәк етмәк, мәсәлән, Даниелә өзүнүн јаздығы, амма баша дүшмәдији пејғәмбәрликләрин јеринә јетмәсини изаһ етмәк неҹә севиндириҹи вә шәрәфли иш олаҹаг! (Дан. 12:8, 9).
15 Дүздүр, дириләнләр биздән чох шеј өјрәнәҹәкләр, амма бизим дә онлара чохлу суалларымыз олаҹаг. Онлар бизә Мүгәддәс Китабда хатырланан, лакин бүтүн тәфәррүаты илә тәсвир олунмајан һадисәләри хырдалығына кими даныша биләрләр. Исанын һәјаты һаггында гоһуму Вәфтизчи Јәһјадан өјрәнмәк неҹә дә мараглы олаҹаг! Белә садиг шаһидләрдән өјрәндикләримиз сајәсиндә Аллаһын Кәламыны индикиндән даһа јахшы баша дүшәҹәјик. Јеһованын өлүм јухусуна ҝетмиш садиг хидмәтчиләри, о ҹүмләдән, сон ҝүнләр әрзиндә өлән бөјүк издиһамын үзвләри «даһа јахшы дирилмәјә» наил олаҹаглар. Онлар Јеһоваја хидмәт етмәјә Шејтанын идарә етдији дүнјада башламышлар. Јени дүнјада, даһа јахшы шәраитдә хидмәтләрини давам етдирмәк онлар үчүн неҹә дә севиндириҹи олаҹаг! (Ибр. 11:35, И–93; 1 Јәһ. 5:19).
16. Пејғәмбәрлијә әсасән, Һөкм ҝүнүндә нәләр олаҹаг?
16 Һөкм ҝүнүнүн мүәјјән бир вахтында тумарлар ачылаҹаг. Мүгәддәс Китабын вә тумарларын әсасында инсанларын әбәди һәјаты алмаға лајиг олуб-олмадыгларына һөкм вериләҹәк. (Вәһј 20:12, 13 ајәләрини оху.) Һөкм ҝүнүнүн сонларына јахын һәр кәсә Аллаһын һөкмранлыг һүгугу мәсәләсиндә өз мөвгејини ҝөстәрмәк имканы вериләҹәк. Инсан Аллаһын Падшаһлығына табе олараг, Гузунун ону «һәјат суларынын гајнагларына» апармасына јол верәҹәкми? Јохса мүгавимәт ҝөстәрәрәк Аллаһын Падшаһлығына табе олмагдан имтина едәҹәк? (Вәһј 7:17; Јешаја 65:20). Бундан сонра јер үзүндә јашајан инсанларын һамысынын мирас алдыглары ҝүнаһын вә пис мүһитин тәсири олмадан шәхси гәрар гәбул етмәк имканы олаҹаг. Артыг һеч кәс Јеһованын сон һөкмүнүн әдаләтли олдуғуну шүбһә алтына ала билмәјәҹәк. Јалныз писләр әбәдилик мәһв олунаҹаглар (Вәһј 20:14, 15).
17, 18. Мәсһ олунмуш мәсиһчиләр вә башга гојунлар Һөкм ҝүнүнү неҹә ҝөзләјирләр?
17 Падшаһлығы алмаға лајиг ҝөрүлмүш мәсһ олунмуш мәсиһчиләр Һөкм ҝүнүндә идарә етмәји сәбирсизликлә ҝөзләјирләр. Бу онлар үчүн неҹә дә бөјүк шәрәфдир! Бу үмид онлары һәвари Петерин биринҹи әсрдә јашајан гардашларына вердији мәсләһәтә әмәл етмәјә тәшвиг едир: «Сизә верилән дәвәти вә интихаб олунманызы мөһкәмләтмәјә даһа чох чалышын. Чүнки әҝәр буну етсәниз, һеч вахт бүдрәмәзсиниз. Чүнки бу јолла, Рәббимиз вә Хиласкарымыз Иса Мәсиһин әбәди Сәлтәнәтинә ҝирмәк һаггы сизә бол-бол еһсан едиләҹәкдир» (2 Пет. 1:10, 11).
18 Башга гојунлар мәсһ олунмуш гардашларынын севинҹинә шәрикдирләр вә онлары дәстәкләмәјә там гәрарлыдырлар. Аллаһын достлары кими, онлар бу ҝүн хидмәтдә әлләриндән ҝәләни етмәјә һазырдырлар. Һөкм ҝүнүндә Иса онлары һәјат суларынын гајнагларына апаран заман онлар Аллаһын гурулушуну үрәкдән дәстәкләмәјә шад олаҹаглар. Сонра онлар нәһајәт ки, Јеһоваја әбәдијјән хидмәт етмәјә лајиг ҝөрүләҹәкләр! (Ром. 8:20, 21; Вәһј 21:1-7).
Хатырлајырсынызмы?
• Исанын маликанәсинә нә дахилдир?
• Бөјүк издиһамын үзвләри мәсһ олунмуш гардашларына неҹә көмәк едирләр?
• Бөјүк издиһамынын үзвләри һансы шәрәфә лајиг ҝөрүлүбләр вә онлар нәјә үмид едирләр?
• Сизин үчүн Һөкм ҝүнү нә демәкдир?
[25-ҹи сәһифәдәки шәкил]
Бөјүк издиһамын үзвләри либасларыны јујуб, онлары Гузунун ганы илә ағардыблар
[27-ҹи сәһифәдәки шәкил]
Дирилмиш салеһ инсанлардан нәји өјрәнмәк истәјәрдин?