Јеһованын Кәламы ҹанлыдыр
«Марк» китабындан диггәтәлајиг фикирләр
«МАРКЫН МҮЖДӘСИ» дөрд мүждәдән ән кичијидир. Иса Мәсиһин өлүб дирилмәсиндән тәхминән 30 ил сонра Јәһја Марк тәрәфиндән јазылан бу китаб, Исанын үч ил јарым вахт әрзиндә јердәки хидмәтиндә баш верән бир чох мараглы һадисәләри јығҹам шәкилдә тәсвир едир.
Чох еһтимал ки, бу китаб гејри-јәһудиләр, хүсусилә дә ромалылар үчүн нәзәрдә тутулмушду. Иса бурада мөҹүзәләр ҝөстәрән вә ҝениш тәблиғ кампанијасы кечирән Аллаһын Оғлу кими тәсвир едилир. Китабда Исанын тәлимләриндән даһа чох ишләриндән бәһс едилир. «Маркын Мүждәси»нә диггәт јетирмәк Мәсиһә иманымызы мөһкәмләндирәҹәк вә Аллаһын хәбәрини сәјлә бәјан етмәјә тәшвиг едәҹәк (Ибр. 4:12).
ГАЛИЛЕЈАДА ҜЕНИШ ХИДМӘТ
Ҹәми 14 ајәдә Вәфтизчи Јәһјанын фәалијјәти вә Исанын 40 ҝүн сәһрада олмасы һагда бәһс етдикдән сонра, Марк Исанын Галилејадакы хидмәтиндән данышмаға башлајыр. «Судан чыхар-чыхмаз» вә «елә о анда» ифадәләринин ишләнмәси, Исанын алдығы тапшырығын олдугҹа тәҹили олдуғуну ҝөстәрир (Марк 1:10, 12).
Иса үч илдән аз вахта Галилејада үч тәблиғ кампанијасыны баша вурур. Марк һадисәләри әсас етибарилә хроноложи ардыҹыллыгла данышыр. Исанын бир чох узун нитгләри кими, Дағүстү тәблиғи дә бу китаба дахил едилмәјиб.
Мүгәддәс Китаб суалларына ҹаваблар:
1:15 — Нәјин ‘вахты’ тамам олду? Бунунла Иса демәк истәјирди ки, хидмәтә башламағын вахты ҝәлиб чатды. О, тәјин олунмуш Падшаһ кими араларында олдуғу үчүн Аллаһын Падшаһлығы јахынлашмышды. Инди дүзүрәкли инсанлар онун тәблиғинә һај верә вә Аллаһын лүтфүнә сәбәб олаҹаг аддымлар ата биләрдиләр.
1:44; 3:12; 7:36 — Нәјә ҝөрә Иса ҝөстәрдији мөҹүзәләрин инсанлара мәлум олмасыны истәмирди? Иса истәјирди ки, инсанлар сенсасијалы, јахуд, ола билсин, тәһриф едилмиш мәлуматлара јох, өз ҝөзләрилә ҝөрдүкләринә әсасән онун Мәсиһ олдуғу гәнаәтинә ҝәлсинләр вә бундан бир нәтиҹә чыхарсынлар (Јешаја 42:1-4; Мат. 8:4; 9:30; 12:15-21; 16:20; Лука 5:14). Гадара ҹиварындан олан вә әввәлләр ҹинә тутулмуш адамын һадисәси истисна иди. Иса она евинә ҝедиб, баш верәнләри гоһумларына данышмағы сөјләди. Бу мәмләкәтин сакинләри Исадан орадан ҝетмәсини хаһиш етдикләри үчүн Иса бу әразидә ја аз тәблиғ етмишди, ја да һеч етмәмишди. Ҹинләрдән азад едилмиш бу инсан вә онун верәҹәји шаһидлик донузлар әһвалаты әтрафында јаранан сөз-сөһбәти арадан галдырмаға көмәк едә биләрди (Марк 5:1-20; Лука 8:26-39).
2:28 — Нәјә ҝөрә Иса ‘шәнбә ҝүнүнә дә һаким’ адланыр? Һәвари Павел јазмышды ки, ‘Ганун ҝәләҹәк немәтләрин көлҝәсинә маликдир’ (Ибр. 10:1). Гануна әсасән, алты иш ҝүндән сонра шәнбә ҝәлирди, Иса да бир чох мөҹүзәләрини мәһз шәнбә ҝүнләри етмишди. Бу, Шејтанын гәддар һөкмранлыг дөврү сона чатдыгдан сонра Мәсиһин Миниллик Падшаһлығы алтында бәшәријјәтин әмин-аманлыгда истираһәт едәҹәјинин вә Аллаһдан диҝәр хејир-дуалар алаҹағынын көлҝәси иди. Буна ҝөрә дә, Падшаһлығын Падшаһы «шәнбә ҝүнүнә дә һакимдир» (Мат. 12:8; Лука 6:5).
3:5; 7:34; 8:12 — Исанын мүхтәлиф вәзијјәтләрдә неҹә һиссләр кечирдијини Марк һарадан билирди? Марк нә Исанын 12 һәварисиндән бири, нә дә јахын достларындан иди. Әлдә олан мәлумата ҝөрә, Маркын јаздыгларындан бир чохуну онун јахын досту һәвари Петер данышмышды (1 Пет. 5:13).
6:51, 52 — Шаҝирдләрин баша дүшмәдикләри ‘чөрәкләрин’ мәнасы нә иди? Бир нечә саат бундан әввәл Иса беш чөрәк вә ики балыгла, гадынларла ушаглардан башга, 5 000 кишини једиздирди. ‘Чөрәкләрин’ мәнасы о иди ки, шаҝирдләр бу һадисәдән Јеһова Аллаһын Исаја мөҹүзәләр ҝөстәрмәк гүввәсини вердијини баша дүшмәли идиләр (Марк 6:41-44). Әҝәр онлар Исаја верилән гүввәнин бөјүклүјүнү анласајдылар, онун мөҹүзәли шәкилдә сујун үзәриндә јеридијинә тәәҹҹүб етмәздиләр.
8:22-26 — Иса кор адамы нәјә ҝөрә дәрһал сағалтмады? Ола билсин, Иса онун вәзијјәтини нәзәрә алараг буну белә етди. Узун мүддәт гаранлыға алышмыш кор инсана парлаг ишыға өјрәнмәјә вахт вермәк үчүн Иса онун ҝөзләринә јаваш-јаваш шәфа верди.
Бизим үчүн ибрәт дәрсләри:
2:18; 12:18; 13:3. Марк гејри-јәһуди охуҹуларына бәлкә дә таныш олмајан адәт-әнәнәләри, етигадлары вә мүәјјән шејләрин һарада јерләшдијини изаһ едирди. О, ‘фәрисејләрин оруҹ тутдуғуну’, ‘садукејләрин’ ‘дирилмәјә’ инанмадығыны вә «мәбәдин» ‘Зејтун дағындан’ ҝөрүндүјүнү ајдын ҝөстәрди. Мәсиһин нәсил шәҹәрәси әсас етибарилә јәһудиләр үчүн мараглы олдуғундан Марк өз Мүждәсинә ону дахил етмәјиб. Бунунла Марк бизә нүмунә гојду. Биз тәблиғ едәндә, јахуд јығынҹаг ҝөрүшләриндә нитглә чыхыш едәндә динләјиҹиләримизин ким олдуғуну нәзәрә алмалыјыг.
3:21. Исанын гоһумлары онун иманына шәрик дејилдиләр. Буна ҝөрә Иса, иманларына ҝөрә гоһумлары тәрәфиндән тәгиб вә ја ришхәнд едиләнләрин һиссләрини баша дүшүр.
3:31-35. Иса вәфтиз олунандан сонра Аллаһын руһани Оғлу, «Сәмави Јерусәлим исә» онун анасы олду (Галат. 4:26). Бу андан етибарән Исанын шаҝирдләри гоһумларындан даһа јахын вә даһа әзиз олду. Бу бизә руһани мараглары һәјатымызда биринҹи јерә гојмағы өјрәдир (Мат. 12:46-50; Лука 8:19-21).
8:32-34. Башгалары тәрәфиндән ҝөстәрилән јанлыш хејирхаһлығы тез сезмәли вә ону рәдд етмәлијик. Мәсиһин давамчысы ‘өзүнү инкар етмәји’ вә худбин арзу вә мәгсәдләрдән имтина етмәји баҹармалыдыр. О, ‘ишҝәнҹә дирәјини ҝөтүрмәјә’ (ЈД) — лазым ҝәләрсә, мәсиһчи олдуғу үчүн изтираб чәкмәјә, тәһгирләрә, тәгибләрә дөзмәјә вә һәтта өлмәјә белә һазыр олмалыдыр. О, һәмчинин Исанын һәјат тәрзини мәнимсәјәрәк даима онун ‘ардынҹа ҝетмәлидир’. Иса Мәсиһин бизә нүмунә олараг гојдуғу јолу тутмаг биздән тәләб едир ки, онун фәдакарлыг руһуна бәнзәр руһу инкишаф етдирәк вә горујуб сахлајаг (Мат. 16:21-25; Лука 9:22, 23).
9:24. Биз иманымызы инсанларла бөлүшмәкдән, јахуд Аллаһдан даһа чох иман диләмәкдән утанмамалыјыг (Лука 17:5).
АХЫРЫНҸЫ АЈ
Ерамызын 32-ҹи илинин сонуна јахын Иса ‘Јәһудеја тәрәфә, Иордан чајынын о бири саһилиндән ҝәлир’ вә јенә дә онун әтрафына чохлу адам јығылыр (Марк 10:1). Иса бурада тәблиғ етдикдән сонра Јерусәлимә јола дүшүр.
Нисанын сәккизидир, Иса Бејтанјададыр. Фәрисејин евиндә гонаг оланда бир гадын ҝәлиб, онун башына әтирли јағ төкүр. Исанын Јерусәлимә тәнтәнәли ҝиришиндән дирилмәсинәдәк баш верән һадисәләр хроноложи ардыҹыллыгла тәсвир едилир.
Мүгәддәс Китаб суалларына ҹаваблар:
10:17, 18 — Иса ону «јахшы Мүәллим» адландыран адамын сөзләринә нәјә ҝөрә дүзәлиш верди? О бу титулу гәбул етмәкдән имтина етмәклә иззәти Јеһоваја верди вә һәгиги Аллаһын бүтүн јахшылыгларын мәнбәји олдуғуну ҝөстәрди. Үстәлик, Иса ону да гејд етди ки, хејирлә шәрин нә олдуғуну мүәјјән етмәк һүгугу јалныз һәр шеји Јарадана, Јеһова Аллаһа мәхсусдур (Мат. 19:16, 17; Лука 18:18, 19).
14:25 — Исанын садиг һәвариләринә дедији «Аллаһын Сәлтәнәтиндә тәзә шәраб ичәҹәјим ҝүнә гәдәр мејнәнин мәһсулундан бир даһа ичмәјәҹәјәм» сөзләрин мәнасы нәдир? Иса ҝөјләрдә шәраб олдуғуну демәк истәмирди. Мүгәддәс Китабда бәзән шәраб севинҹ рәмзи олдуғу үчүн Иса бу сөзләрлә, дирилмиш мәсһ олунмуш давамчылары илә Падшаһлыгда бәрабәр олмагдан ҝәлән севинҹи нәзәрдә тутурду (Мәз. 104:15; Мат. 26:29).
14:51, 52 — ‘Чылпаг гачан’ ҝәнҹ ким иди? Бу һадисәдән јалныз Марк бәһс етдији үчүн белә гәнаәтә ҝәлмәк олар ки, һәмин ҝәнҹ елә Маркын өзү иди.
15:34 — Исанын «Аллаһым, Аллаһым! Нә үчүн Мәни тәрк етдин?» сөзләри онун иманынын зәифләдијиними ҝөстәрир? Хејр. Исанын нә үчүн белә дедијинин сәбәбини дәгиг билмәсәк дә, ола билсин, бу сөзләр ҝөстәрирди ки, Иса нөгсансызлығынын ахырадәк сынанмасы үчүн Јеһованын ондан Өз мүдафиәсини ҝөтүрдүјүнү билирди. Һәмчинин ола биләр ки, бунунла Иса Мәзмур 22:1 ајәсиндә онун һаггында јазылан пејғәмбәрлик сөзләрини јеринә јетирмәк истәјирди (Мат. 27:46).
Бизим үчүн ибрәт дәрсләри:
10:6-9. Аллаһын нијјәти әрлә арвадын бирликдә олмасыдыр. Буна ҝөрә дә, дәрһал бошанмаг әвәзинә, онлар никаһда јаранан һәр проблемин өһдәсиндән ҝәлмәк үчүн Мүгәддәс Китаб принсипләрини тәтбиг етмәјә чалышмалыдырлар (Мат. 19:4-6).
12:41-44. Касыб дул гадынын нүмунәси бизи өјрәдир ки, һәгиги ибадәти дәстәкләмәк үчүн ианә едәндә буну тәмиз нијјәтлә етмәлијик.
[29-ҹу сәһифәдәки шәкил]
Нәјә ҝөрә Иса бу адама онунла баш верәнләри гоһумларына данышмағы тапшырды?