Оғул атаны танытмаг истәјир
«Атаны... Оғулдан савајы вә Оғулун танытмаг истәдији адамдан савајы һеч кәс танымыр» (ЛУКА 10:22).
НЕҸӘ ҸАВАБ ВЕРӘРДИН?
Нәјә ҝөрә јалныз Иса Атаны башгаларына јахшы таныда биләрди?
Иса Атасыны башгаларына неҹә танытды?
Сән Атаны башгаларына танытмагда Исаны неҹә тәглид едә биләрсән?
1, 2. Чохларыны һансы суал чаш-баш гојур вә бунун сәбәби нәдир?
«АЛЛАҺ кимдир?» Бу суал бир чохларында чашгынлыг јарадыр. Мәсәлән, бир чох инсанлар дүшүнүрләр ки, Аллаһ төвбә етмәјән ҝүнаһкарлары гыр газанында јандырыр, лакин ејни заманда онлар дејирләр ки, Аллаһ чох мәрһәмәтли вә бағышлајандыр. Тәкамүл нәзәријјәсинин тәрәфдары олан инсанларын әксәријјәти исә Аллаһын мөвҹудлуғуна үмумијјәтлә инанмыр. Онлар тәбиәтдәки мөҹүзәләрин кор тәсадүф нәтиҹәсиндә әрсәјә ҝәлдијини иддиа едирләр. Аллаһын мөвҹудлуғуну данмајан Чарлз Дарвин демишди: «Мәним үчүн ән ағлабатан нәтиҹә ондан ибарәтдир ки, “Аллаһ” анлајышыны инсан зеһни гаврамаг габилијјәтиндә дејил».
2 Етигадларындан асылы олмајараг, әксәр инсанлары Аллаһын мөвҹудлуғу барәдә суаллар дүшүндүрүр. Лакин суалларына ганеедиҹи ҹаваб тапа билмәдикдә онларын чоху Аллаһы ахтармаға сон гојурлар. Һәгигәтән дә, Шејтан «имансызларын зеһнини кор едиб» (2 Кор. 4:4). Тәәҹҹүблү дејил ки, Јер күрәсинин әксәр сакинләри Каинатын Јараданы олан Аллаһ һаггында һәгигәти билмирләр вә ја чашгынлыг ичиндәдирләр! (Јешаја 45:18).
3. а) Јараданы бизә ким таныдыб? б) Биз һансы суаллары нәзәрдән кечирәҹәјик?
3 Бунунла белә, инсанларын Аллаһ һаггында билмәләри чох ваҹибдир. Нәјә ҝөрә? Чүнки јалныз «Јеһованын адыны» чағыранлар хилас олаҹаглар (Ром. 10:13). Аллаһын адыны чағырмаға Ону бир Шәхсијјәт кими танымаг дахилдир. Һәјати ваҹиб олан бу билији Иса Мәсиһ өз шаҝирдләринә ачыгламышды. О, Атасыны онлара танытмышды. (Лука 10:22 ајәсини оху.) Нәјә ҝөрә јалныз Иса Атасыны ән јахшы шәкилдә таныда билмишди? О, буну неҹә етди? Бәс биз Атаны башгаларына танытмагда Исаны неҹә тәглид едә биләрик? Ҝәлин бу суаллары нәзәрдән кечирәк.
АТАНЫ ИСА МӘСИҺДӘН ЈАХШЫ ҺЕЧ КИМ ТАНЫДА БИЛМӘЗДИ
4, 5. Нәјә ҝөрә Атаны Исадан башга һеч кәс јахшы таныда билмәзди?
4 Аллаһы инсанлара Исадан јахшы һеч кәс таныда билмәзди. Нәјә ҝөрә? Чүнки Јеһова диҝәр варлыглары јаратмаздан әввәл, јер үзүндә Иса кими танынан руһани варлыг артыг ҝөјләрдә Аллаһын јеҝанә Оғлу кими мөвҹуд иди (Јәһ. 1:14; 3:18). Бу, һәгигәтән дә, тајы-бәрабәри олмајан бир вәзифәдир! Диҝәр варлыглар јарадылмаздан өнҹә, Оғул Атасынын она ҝөстәрдији зәриф гајығы вә диггәтиндән, еләҹә дә Аллаһ вә Онун хүсусијјәтләри барәдә өјрәнмәкдән һәзз алырды. Минилликләр әрзиндә Онларын бир-бири илә сых үнсијјәт етмәләри сајәсиндә араларында дәрин мәһәббәт јаранмышды (Јәһ. 5:20; 14:31). Тәсәввүр едирсән, Иса Атасынын шәхсијјәти барәдә нә гәдәр шеј өјрәнмишди?! (Колослулара 1:15—17 ајәләрини оху.)
5 Ата Оғулу Өз нүмајәндәси, јәни «сөзү» тәјин етмишди (Вәһј 19:13). Буна ҝөрә дә Атаны башгаларына танытмаг кими надир вәзифә јалныз Оғула тапшырылмышды. Бу сәбәбдән Мүждәни јазан Јәһја Исаны «Атанын гојнунда» олан «Сөз» кими тәсвир етмишди (Јәһ. 1:1, 18). Бу ифадә илә Јәһја онун дөврүндә ҝениш јајылан бир адәтә истинад етди: бир гонағы башга бир гонағын јанында отуздурурдулар ки, онлар бир-бири илә раһат сөһбәт едә билсинләр. Беләликлә, «Атанын гојнунда» олан Оғул Онунла сых үнсијјәт едирди.
6, 7. Ата вә Оғул арасындакы мүнасибәт ҝет-ҝедә неҹә инкишаф едирди?
6 Ата вә Оғул арасында мүнасибәт ҝетдикҹә инкишаф едирди. Мүгәддәс Китабда дејилир: «Рәббин... һүзурунда һәмишә севинирдим». (Сүлејманын мәсәлләри 8:22, 23, 30, 31 ајәләрини оху.) Тәбии ки, бирликдә ишләмәләри, еләҹә дә Оғулун Атасынын хүсусијјәтләрини тәглид етмәји өјрәнмәси сајәсиндә мүнасибәтләри даһа да мөһкәмләнди. Диҝәр шүурлу варлыглар јарадылдыгдан сонра Јеһованын онларын һәр бири илә неҹә рәфтар етдијини мүшаһидә едән Оғулун Аллаһа олан мәһәббәт вә һөрмәти бирә-беш артды.
7 Һәтта Шејтан Јеһованын али һөкмранлығына мејдан охујанда Оғул үчүн Јеһованын белә бир мүрәккәб вәзијјәтдә мәһәббәт, әдаләт, мүдриклик вә гүввә кими хүсусијјәтләри неҹә тәзаһүр етдирдијини ҝөрмәк имканы јаранмышды. Шүбһә јохдур ки, бунун сајәсиндә Оғул јер үзүндәки хидмәти заманы үзләшдији чәтинликләрин өһдәсиндән неҹә ҝәлмәји өјрәнмишди (Јәһ. 5:19).
8. Мүждәләрдә јазылан һадисәләр бизә Атанын хүсусијјәтләри барәдә даһа чох өјрәнмәјә неҹә көмәк едир?
8 Атасы илә сых мүнасибәти олдуғу үчүн Иса Ону башгаларындан даһа јахшы танытды. Мәҝәр јеҝанә Оғулун тәлимләрини вә етдикләрини арашдырмаг Ата барәдә өјрәнмәјин ән јахшы үсулу дејил? Мәсәлән, «мәһәббәт» сөзүнүн мәнасыны лүғәтдән охујуб там шәкилдә баша дүшмәк бизим үчүн чәтин олмаздымы? Иса Мәсиһин хидмәти вә башгаларынын гајғысына галмасы илә бағлы Мүждәләрдә ҹанлы шәкилдә тәсвир олунан һадисәләрин үзәриндә дүшүнмәк бизә «Аллаһ мәһәббәтдир» ифадәсинин мәғзини даһа јахшы баша дүшмәјә көмәк едир (1 Јәһ. 4:8, 16). Буну јер үзүндә оларкән Исанын шаҝирдләринә танытдығы Јеһованын диҝәр хүсусијјәтләринә дә шамил етмәк олар.
ИСА АТАСЫНЫ НЕҸӘ ТАНЫТДЫ?
9. а) Иса, әсас етибарилә, һансы ики јолла Атасыны танытды? б) Иса тәлимләри илә Атасыны неҹә танытдырды? Нүмунә чәк.
9 Иса шаҝирдләринә вә ҝениш мәнада десәк, ҝәләҹәкдәки давамчыларына Атасыны неҹә танытды? О, буну, әсасән, ики јолла — тәлимләри вә давранышы илә етди. Илк нөвбәдә, ҝәлин Исанын тәлимләринә нәзәр салаг. Онун тәлимләриндән Атасынын дәрин фикирләринә, һиссләринә вә јолларына чох ҝөзәл бәләд олдуғуну ајдын ҝөрмәк олар. Мәсәлән, Иса Атасыны бир итмиш гојунуну ахтармаға ҝедән гајғыкеш сүрү саһибинә бәнзәтмишди. Иса деди ки, саһиб итмиш гојунуну тапанда «дохсан доггуз азмамыш гојундан даһа чох о гојуна ҝөрә» шадланды. Иса бу нүмунәни нә үчүн чәкди? О изаһ едир: «Ејнилә дә, мәним сәмави Атам бу кичикләрдән бирҹәсинин белә мәһв олмасыны истәмир» (Мат. 18:12—14). Бу нүмунәдән Јеһова һаггында нә өјрәнә биләрсән? Һәтта әҝәр сән бәзән өзүнү дәјәрсиз вә ја унудулмуш һисс едирсәнсә, һеч вахт јадындан чыхартма ки, сәмави Атан сәнинлә марагланыр вә гејдинә галыр. Онун ҝөзүндә сән «бу кичикләрдән» бирисән.
10. Иса өз давранышы илә Атасыны неҹә танытды?
10 Атасыны шаҝирдләринә танытмағын икинҹи јолу онун давранышы иди. Буна ҝөрә дә һәвари Филип Исадан Атаны онлара ҝөстәрмәји хаһиш едәндә о, һаглы олараг деди: «Мәни ҝөрән Атаны да ҝөрүб» (Јәһ. 14:8, 9). Ҝәлин бир нечә нүмунәјә бахаг вә ҝөрәк Иса Атасынын бәзи хүсусијјәтләрини неҹә тәзаһүр етдирирди. «Башдан-ајағадәк ҹүзам ичиндә олан» бир киши Исадан ону сағалтмағы хаһиш едәндә Иса она тохунуб деди: «Истәјирәм. Тәмизлән». Хәстәлијиндән шәфа тапан һәмин киши шүбһә етмирди ки, Исада олан бу ҝүҹ Јеһовадандыр (Лука 5:12, 13). Лазар өләндә исә Исанын бәрк гәһәрләндијини вә дәриндән аһ чәкиб ағладығыны ҝөрән шаҝирдләр Атанын нә гәдәр шәфгәтли олдуғуну дујдулар. Иса бир аздан Лазары дирилдәҹәјини билсә дә, онун аиләсинин вә достларынын кечирдији ағрыны гәлбиндә һисс етди (Јәһ. 11:32—35, 40—43). Шүбһә јохдур ки, сәнин дә Атанын нә гәдәр мәрһәмәтли олдуғуну ҝөрмәјә көмәк едән Иса илә бағлы олан Мүгәддәс Китаб һекајәләрин вар.
11. а) Исанын мәбәди тәмизләмәсиндән Ата барәдә нә өјрәнирик? б) Нәјә ҝөрә Исанын мәбәди тәмизләмәси барәдә олан һадисә бизә тәсәлли верир?
11 Бәс Исанын мәбәди тәмизләмәсиндән нә өјрәнирик? Белә бир сәһнәни тәсәввүр ет: Иса кәндирдән бир гамчы дүзәлдиб гојун вә мал-гара алверчиләрини мәбәддән говур. Сәррафларын масаларыны чевириб пулларыны јерә дағыдыр (Јәһ. 2:13—17). Исанын бу гәти аддымыны ҝөрән шаҝирдләр Давуд падшаһын пејғәмбәрлик сөзләрини јадына салырлар: «Евинин гејрәти мәни јандырыб-јахды» (Мәз. 69:9). Гәти тәдбирләр ҝөрмәклә Иса һәгиги ибадәти мүдафиә етмәк арзусу илә алышыб-јандығыны ҝөстәрди. Сән бу һадисәдән Ата һаггында нә өјрәндин? Һәмин һадисә бизә хатырладыр ки, Аллаһ нәинки пислији јер үзүндән силиб атмаға гадирдир, һәтта буну етмәји үрәкдән арзулајыр. Исанын пислијә олан бу ҹүр мүнасибәти ҝөстәрир ки, Јеһова јер үзүндә баш верән писликләрә баханда һансы һиссләри кечирир. Биз һагсызлыгларла үзләшәндә бу фикир бизә тәсәлли верә биләр.
12, 13. Исанын шаҝирдләри илә рәфтарындан Јеһова барәдә нә өјрәнирик?
12 Ҝәлин башга бир нүмунәјә нәзәр салаг вә ҝөрәк Иса шаҝирдләри илә неҹә рәфтар едирди. Онларын арасында кимин даһа бөјүк олдуғу һагда даима мүбаһисә дүшүрдү (Марк 9:33—35; 10:43; Лука 9:46). Атасынын јанында чохлу вахт кечирән Иса тәкәббүрлүлүјә хас олан бу кими мејилләрә Онун мүнасибәтини билирди (2 Шам. 22:28; Мәз. 138:6). Бундан әлавә, Иса Шејтан Иблисин белә хүсусијјәтләри неҹә тәзаһүр етдирдијини ҝөрмүшдү. Бу худбин шәхсијјәти шөһрәт вә јүксәк мөвгедән башга һеч нә марагландырмырды. Буна ҝөрә дә Иса тәлим вердији шаҝирдләри арасында бу ҹүр шөһрәтпәрәстлик руһунун олдуғуну ҝөрәндә чох кәдәрләнирди! Үстәлик, бу хүсусијјәт Онун сечдији һәвариләр арасында да вар иди. Онлар шөһрәтпәрәстлик руһуну Исанын јер үзүндәки сон ҝүнүнәдәк ҝөстәрмишдиләр (Лука 22:24—27). Бунунла белә, Иса хејирхаһҹасына онлара дүзәлиш вермәјә давам едирди вә онларын да нә вахтса ону тәглид едәрәк тәвазөкар инсан олаҹагларына үмидини итирмирди (Филип. 2:5—8).
13 Исанын шаҝирдләринин дүзҝүн олмајан мејилләринә сәбирлә дүзәлиш вермәсиндән Атасыны неҹә тәглид етдијини ҝөрүрсәнми? Исанын сөз вә һәрәкәтләриндә, дәфәләрлә сәһв етмәләринә бахмајараг, Өз хидмәтчиләрини тәрк етмәјән Атаны ҝөрүрүкмү? Мәҝәр Аллаһын бу хүсусијјәтләри барәдә билмәк сәһвләрә јол верәндә пешман олдуғумузу дуада Она билдирмәјә тәшвиг етмир?
АТАНЫ ТАНЫТМАГ ОҒУЛУН ИСТӘЈИДИР
14. Исанын Атаны инсанлара танытмаг истәји нәдән ҝөрүнүр?
14 Бир чох диктаторлар мүәјјән мәлуматлары өз вәтәндашларындан ҝизләдәрәк онлары нәзарәт алтында сахламаға чалышырлар. Бунун әксинә олараг, Иса Аллаһ һаггындакы мәлуматлары мәмнунијјәтлә инсанларла бөлүшәрәк Атасыны һәртәрәфли онлара танытдырырды. (Матта 11:27 ајәсини оху.) Бундан әлавә, Иса һәгиги Аллаһ олан Јеһова һаггында өјрәнә билмәләри үчүн шаҝирдләринә дәрракә вермишди (1 Јәһ. 5:20). Бу, о демәкдир ки, Иса шаҝирдләринә Ата һаггында өјрәтдикләрини баша дүшмәләринә көмәк етмишди. Иса одлу ҹәһәннәм кими тәлимләрлә инсанларда чашгынлыг јаратмаға чалышмырды.
15. Нәјә ҝөрә Иса Ата барәдә бәзи мәлуматлары шаҝирдләринә ачыгламырды?
15 Бәс Иса шаҝирдләринә Атасы һаггында билдији һәр шеји ачыглајырды? Хејр. Онун һәр шеји ачыгламамасы мүдриклијин тәзаһүрү иди. (Јәһја 16:12 ајәсини оху.) Нәјә ҝөрә? Чүнки һәмин вахт онлар Исанын дедији шејләрин һамысыны гавраја билмәјәҹәкдиләр. Анҹаг Иса онлара изаһ етмишди ки, «һәгигәти там дәрк [етмәләринә] көмәк едәҹәк» «көмәкчи», јәни мүгәддәс руһ ҝәләндә онларын билији даһа да артаҹаг (Јәһ. 16:7, 13). Мүдрик валидејнләр ушагларына мүәјјән мәлуматлары демирләр. Онлар ушагларынын баша дүшмәк үчүн кифајәт гәдәр јеткин олаҹағы вахты ҝөзләјирләр. Иса, белә бир валидејн кими, шаҝирдләринин Ата һаггында мүәјјән биликләри баша дүшмәк үчүн һазыр олаҹаглары вахты ҝөзләјирди. О, хејирхаһҹасына онларын имканларынын мәһдуд олдуғуну нәзәрә алырды.
АТАНЫ БАШГАЛАРЫНА ТАНЫТМАГДА ИСАНЫ ТӘГЛИД ЕТ
16, 17. Нәјин сајәсиндә биз Ата һаггында башгалары илә бөлүшә билирик?
16 Сән кимисә јахындан таныјанда вә онун ҝөзәл хүсусијјәтләрини гијмәтләндирмәјә башлајанда мәҝәр бу, сәни онун һаггында башгаларына данышмаға тәшвиг етмир? Иса јер үзүндә оланда өз Атасы һаггында данышырды (Јәһ. 17:25, 26). Иса кими, Јеһованы башгаларына танытмаг бизим үчүн мүмкүндүрмү?
17 Ҝөрдүјүмүз кими, Атаны Исадан даһа јахшы таныјан башга бир шәхс јохдур. Јухарыда дедијимиз кими, о, мүәјјән мәлуматлары давамчыларына ачыгламаға һазыр иди вә һәтта онлара дәрракә верирди ки, Аллаһын шәхсијјәтинин дәрин јөнләрини баша дүшә билсинләр. Мәҝәр Исанын көмәји сајәсиндә биз әксәр инсанларын Ата һаггында билмәдикләрини өјрәнмәмишик? Тәлимләри вә давранышы илә бизә бөјүк мәмнунијјәтлә Атаны танытдығына ҝөрә Исаја неҹә дә миннәтдарыг! Биз Атаны таныдығымыза ҝөрә гүрур дујуруг (Јер. 9:24; 1 Кор. 1:31). Биз Она јахынлашмаг үчүн чохлу сәј ҝөстәрмишик вә инди О да бизә јахындыр (Јаг. 4:8). Буна ҝөрә дә инди билдикләримизи башгалары илә бөлүшә биләрик. Буну неҹә етмәк олар?
18, 19. Сән Атаны башгаларына неҹә таныда биләрсән? Изаһ ет.
18 Биз сөз вә һәрәкәтләримизлә Атаны башгаларына таныдараг Исанын нүмунәсини изләмәлијик. Јадда сахла ки, хидмәтдә гаршылашдығымыз инсанларын чоху Аллаһын ким олдуғуну билмир. Ола билсин, буна сәбәб јалан дини тәлимләрдир. Биз инсанларла Аллаһын ады, бәшәријјәт үчүн нијјәти вә Мүгәддәс Китабдан Онун шәхсијјәти барәдә билдикләримизи бөлүшә биләрик. Үстәлик, ола билсин, Мүгәддәс Китаб һадисәләрини јенидән охујанда Аллаһын шәхсијјәтинин јени јөнләрини ҝөрүрүк вә бу мәлуматлары һәмиманлыларымызла мүзакирә едә биләрик. Бу, онлар үчүн дә фајдалы вә руһландырыҹы ола биләр.
19 Бундан әлавә, биз Исаны тәглид едәрәк өз әмәлләримизлә дә Аллаһы башгаларына танытмалыјыг. Инсанлар әмәлләримиздә Мәсиһә олан мәһәббәти ҝөрәндә бу, онлары һәм Атаја, һәм дә она јахынлашмаға тәшвиг едә биләр (Ефес. 5:1, 2). Һәвари Павел бизи чағырыр: «Мәсиһдән нүмунә ҝөтүрдүјүм кими, сиз дә мәндән нүмунә ҝөтүрүн» (1 Кор. 11:1). Әмәлләримизлә Јеһованы башгаларына танытмаг неҹә дә бөјүк шәрәфдир! Ҝәлин һамымыз Исаны тәглид едәрәк бундан сонра да Атаны башгаларына таныдаг.